“Akoon Tabi Nindo an Sakong Sadit na Regalo”

INI an mga tataramon sa surat na naresibi kan sangang opisina kan Mga Saksi ni Jehova sa Rusya. Kaiba kan surat an sarong dakulang kahon na pano nin medyas na gibo sa lana (wool).

An regalo ipinadara kan 67 anyos na si Alla, na saro sa Mga Saksi ni Jehova na naglilingkod sa sarong kongregasyon sa Harayong Sirangan nin Rusya. Labi nang sampulong taon na naglilingkod si Alla ki Jehova, na maigot na naghuhulit kan maogmang bareta kan Kahadean. Minsan siring, huli sa atake serebral (stroke) bigla siang naparalisar nin parsial. Pero, huling namotibar nin pagkamoot, inarog ni Alla an ginibo kan enot na siglong Kristiana na si Dorcas, na naggibo nin mga gubing para sa mga kapagtubod.—Gibo 9:36, 39.

Sa saiyang surat, sinabi ni Alla: “Dai ko nahihiro an sakong mga bitis, alagad nahihiro ko pa an sakong mga kamot. Kaya naghuhulit ako paagi sa pagsurat.” Sinabi pa nia: “Nagdesisyon ako na mantang kaya ko pang hiroon an sakong mga kamot, magibo ako nin pirang padis nin mahibog na medyas. Boot kong itao an mga medyas na ini sa mga tugang na matogdok nin mga Kingdom Hall sa malipot na mga lugar, siring kan Harayong Sirangan asin Siberia.”

Mapadapit sa saiyang tunay na mga parasunod, si Jesu-Cristo nagsabi: “Paagi kaini an gabos makakaaram na kamo an sakong mga disipulo, kun kamo nagkakaminorootmootan.” (Juan 13:35) An pagkamoot na arog kan ipinaheling ni Alla sarong nagpapamidbid na tanda kan tunay na mga disipulo ni Jesus.