Ano an Nagtatao nin Kahulogan sa Saindong Buhay?

SI Kenny may trabaho sa sarong sikat na kompanya nin mga nangongomisyon (brokerage firm), may minamanehong mamahalon na kotse, asin may sadiring maluhong apartment (penthouse) sa lugar nin mga mayaman sa sarong dakulang siudad. Bilang ekspertong skydiver, ikinakaogma niang marhay an pagbulusok nin rinibong piye hale sa eroplano. An gabos daw na ini nagtao sa saiya nin nakakakontentong buhay? Segun sa The Wall Street Journal, sia nagsabi: “Uya, 45 anyos na ako, asin an sakong buhay mayong papadumanan . . . An sakong buhay mayo nin kahulogan.”

Nagmaigot na marhay si Elyn na magin matibay na ice skater. Sa katapustapusi sia nagin sikat sa langtad na iyan. Nakua ni Elyn an kabantogan na gusto nia. “Alagad haen an gabos na kaogmahan na dapat kutanang mamatean ko?” an panambitan nia. “Grabeng kamondoan sana an namatean ko. Pag-abot nin panahon magurang ako asin, minsan ngani dakol akong kuarta, biyong magigin daing kahulogan an buhay kun ini sana an katuyohan ko sa buhay.”

 Midbid huli sa saiyang ekspertong paggamit nin mga kolor, nabuhay si Hideo para sa saiyang mga nagibo bilang pintor. Dai nia ipinabakal iyan; naghona sia na kun gigibohon nia iyan ikokompromiso nia an saiyang integridad bilang pintor. Kan madali na siang magadan sa edad na 98 anyos, idinonar nia an kadaklan kaiyan sa sarong museo. Idinusay nia an saiyang buhay sa pagpinta. Pero, dai sia nakontento, na nag-iisip na dai nia noarin man magigibong perpekto an saiyang mga ipininta.

May mga tawo na nagigin imbueltong marhay sa pagtabang sa iba. Kuanon niatong halimbawa an sarong ehekutibo sa industriya nin pelikula sa Hollywood. Bilang bise presidente nin saro sa pinakadakulang mga kompanya sa pelikula sa Estados Unidos, sia nakiibaiba sa bantog na mga tawo asin nag-istar sa mamahalon saka maluhong residensial na lugar. Kan magbakasyon sia sa Cambodia, nagrani sa saiya an sarong aking babae na nakikilimos nin kuarta mantang sia nagkakakan sa sarong kapehan sa Phnom Penh. Tinawan nia ini nin sarong dolyar asin soft drink. Naogma an aki. Minsan siring, kan sunod na banggi yaon na naman ini duman, na nakikilimos pa man giraray. Naheling nia na dakulang tabang an kaipuhan.

Pakalihis nin sarong taon, nagdesisyon an ehekutibong ini na magbago nin karera—hale sa pagtrabaho sa industriya nin pelikula pasiring sa pagtabang sa mga dukha sa Cambodia. Inestablisar nia an sarong eskuelahan na nagtatao nin istaran, kakanon, asin edukasyon. Minsan siring, nabubuhay sia na may dai nahahaleng nagkokorontrahan na emosyon—an dakulang kaogmahan asin pagkakontento sa nagigibo nia kaiba an pagkadesganar saka pagkadiskontento huli sa nagdadakol na problema na kaipuhan niang atubangon.

Inisip kan gabos na apat na indibiduwal na nasambitan pa sana na aram ninda kun ano an gusto nindang magibo sa buhay. Pero, sa pagmate ninda daing kahulogan pa man giraray an saindang buhay dawa kun sa katapustapusi naabot na ninda an pasohan na pinagmaigotan nindang marhay na magibo. Ano an gusto nindong magibo sa buhay? Ano an ineenot nindo sa saindong buhay? Segurado daw kamo na dai nindo pagbabasolan sa huri an saindong paagi nin pamumuhay?