Arogon an Dakulang Paragibo nin Disipulo
Arogon an Dakulang Paragibo nin Disipulo
“Tawan nindo nin atension kun paano kamo naghihinanyog.”—LUCAS 8:18.
1, 2. Taano ta maninigo nindong tawan nin atension an paagi nin pagtratar ni Jesus sa mga tawo durante kan saiyang ministeryo?
INOOTOB ni Jesu-Cristo an saiyang katongdan bilang Dakulang Paratokdo asin Paragibo nin Disipulo kan sabihon nia sa saiyang mga parasunod: “Tawan nindo nin atension kun paano kamo naghihinanyog.” (Lucas 8:16-18) An prinsipyong iyan aplikado sa saimong ministeryo bilang Kristiano. Kun ika nagtatao nin atension sa espirituwal na pagtotokdo, mahiro ka oyon dian asin ika magigin epektibong parabalangibog kan Kahadean. Siempre, dai mo madadangog an tingog ni Jesus ngonyan, alagad mababasa mo an manongod sa sinabi asin ginibo nia, siring kan ihinahayag sa Kasuratan. Ano an ihinahayag kaiyan manongod sa paagi nin pagtratar ni Jesus sa mga tawo durante kan saiyang ministeryo?
2 Si Jesus ekselenteng parahulit kan maogmang bareta asin marahayon na paratokdo kan katotoohan sa Kasuratan. (Lucas 8:1; Juan 8:28) Kalabot sa paggibo nin mga disipulo an paghuhulit sagkod pagtotokdo, alagad ta an nagkapirang Kristiano na epektibong mga parahulit nadedepisilan na magtokdo sa mga tawo sa epektibong paagi. Mantang kalabot sa paghuhulit an pagbalangibog nin mensahe, an pagtotokdo sa mga tawo manongod ki Jehova asin sa saiyang mga katuyohan parateng nagkakaipo na an paragibo nin disipulo magpatalubo nin marahay na relasyon sa sainda. (Mateo 28:19, 20) Magigibo ini paagi sa pag-arog ki Jesu-Cristo, an Dakulang Paratokdo asin Paragibo nin Disipulo.—Juan 13:13.
3. Kun aarogon nindo si Jesus, ano an puedeng magin epekto kaiyan sa saindong mga paghihingoa na gumibo nin mga disipulo?
3 Kun inaarog nindo an mga paagi nin pagtotokdo ni Jesus, sinusunod nindo an konseho ni apostol Pablo: “Padagos kamong maglakaw na may kadonongan manongod sa mga nasa luwas, na tinutubos an angay na panahon para sa saindo man sana. An saindo logod na pagtaram danay na igwa nin pagkamaugayon, na tinimplahan nin asin, tanganing maaraman nindo kun paano kamo dapat na sumimbag sa lambang saro.” (Colosas 4:5, 6) An pag-arog ki Jesus sa paggibo nin mga disipulo nangangaipo nin paghihingoa, alagad gigibohon kaiyan na epektibo an saindong pagtotokdo huling tatabangan kamo kaiyan na “sumimbag sa lambang saro” oyon sa kinakaipuhan nia bilang indibiduwal.
Dinagka ni Jesus an Iba na Magtaram
4. Taano ta masasabi na si Jesus marahay na parahinanyog?
4 Poon pa sa pagkaaki, ugale na ni Jesus na maghinanyog sa mga tawo asin magdagka sa sainda na ipahayag an saindang mga punto de vista. Halimbawa, kan sia 12 anyos, nanompongan sia kan saiyang mga magurang sa tahaw kan mga paratokdo sa templo, na “naghihinanyog sa sainda asin naghahapot sa sainda.” (Lucas 2:46) Si Jesus dai nagduman sa templo tanganing mapasupog an mga paratokdo paagi sa saiyang kaaraman. Nagduman sia tanganing maghinanyog, pero naghapot man sia. An saiyang kamawotan na magin marahay na parahinanyog posibleng sarong kualidad kun taano ta inoyonan sia nin Dios asin nin mga tawo.—Lucas 2:52.
5, 6. Paano niato naaaraman na naghinanyog si Jesus sa mga kapahayagan kan mga tinotokdoan nia?
5 Pagkatapos na sia bautismohan asin lahidan bilang Mesiyas, pinapagdanay ni Jesus an saiyang interes sa paghinanyog sa mga tawo. Dai sia nawiling marhay sa saiyang itinotokdo na huli kaiyan nalingawan na nia an mga minadolok tanganing maghinanyog sa saiya. Sa parate, minapondo sia, naghahapot kun ano an nasa isip ninda, asin naghihinanyog sa saindang simbag. (Mateo 16:13-15) Halimbawa, pagkagadan kan tugang ni Marta na si Lazaro, sinabihan ni Jesus si Marta: “An gabos na nabubuhay asin nagtutubod sa sako dai na noarin man magagadan.” Dangan hinapot sia ni Jesus: “Minatubod ka kaini?” Asin siertong naghinanyog si Jesus mantang minasimbag si Marta: “Iyo, Kagurangnan; nagtubod ako na ika an Cristo na Aki nin Dios.” (Juan 11:26, 27) Siertong nakakakontento nanggad na madangog si Marta na ipinapahayag an saiyang pagtubod sa siring na mga tataramon!
6 Kan si Jesus bayaan kan dakol na disipulo, interesado siang madangog an punto de vista kan saiyang mga apostol. Kaya naghapot sia: “Kamo, gusto man nindong maghale?” Si Simon Pedro nagsimbag: “Kagurangnan, siisay pa an samong dudumanan? Yaon sa saimo an mga tataramon nin buhay na daing katapusan; asin kami nagtubod asin nakaaram na ika iyo an Banal nin Dios.” (Juan 6:66-69) Siertong nagpaogma nanggad ki Jesus an mga tataramon na iyan! An kaagid kaiyan na kapahayagan nin pagtubod nin sarong inaadalan sa Biblia siertong magpapaogmang marhay sa saindo.
Si Jesus Naghinanyog na May Paggalang
7. Taano ta dakol na Samaritano an nagturubod ki Jesus?
7 An saro pang dahelan na si Jesus epektibong paragibo nin disipulo iyo na nagmakolog sia sa mga tawo asin naghinanyog sa sainda na may paggalang. Halimbawa, sa sarong okasyon, si Jesus nagpatotoo sa sarong Samaritana harani sa burabod ni Jacob sa Sicar. Durante kan pag-oolay na iyan, bako sanang si Jesus an nagparataram; naghinanyog sia sa sinasabi kan babae. Mantang naghihinanyog sa saiya, narisa ni Jesus an saiyang interes sa pagsamba asin sinabihan ini na hinahanap nin Dios an mga masamba sa Saiya sa espiritu asin katotoohan. Nagpaheling si Jesus nin paggalang asin pagmakolog sa babaeng ini, kaya sinabi kaini sa iba an manongod sa saiya, saka “an dakol na Samaritano sa siudad na idto nagturubod sa saiya huli sa tataramon kan babae.”—Juan 4:5-29, 39-42.
8. Paano an tendensia kan mga tawo na magpahayag kan saindang opinyon makakatabang sa saindo na makapoon nin mga pakikipag-olay sa ministeryo?
8 Sa parate naoogma an mga tawo na magpahayag kan nasa isip ninda. Halimbawa, an mga nag-eerok sa suanoy na Atenas naogmang magpahayag kan saindang opinyon asin maghinanyog sa sarong bagay na bago. Ini an dahelan kaya nagin epektibo an diskurso ni apostol Pablo sa Areopago sa siudad na iyan. (Gibo 17:18-34) Kun kamo nagpopoon nin pakikipag-olay sa sarong kagharong sa saindong ministeryo ngonyan, puede nindong sabihon, “Nagdalaw ako sa saindo huling interesado akong madangog an saindong opinyon mapadapit sa [sarong topiko].” Maghinanyog sa punto de vista kan kaolay nindo, asin magkomento oyon dian, o maghapot manongod dian. Dangan maboot na ipaheling sa saiya an sinasabi kan Biblia manongod sa pinag-oolayan.
Aram ni Jesus Kun Ano an Sasabihon
9. Ano an ginibo ni Jesus bago ‘lubos na buksan an Kasuratan’ ki Cleopas asin sa kaiba kaini?
9 Nungkang naubosan si Jesus nin sasabihon. Apuera sa pagigin marahay na parahinanyog, sa parate aram nia kun ano an iniisip nin mga tawo, asin aram nia nin eksakto kun ano an sasabihon. (Mateo 9:4; 12:22-30; Lucas 9:46, 47) Sa pag-ilustrar: Dai nahaloy pakatapos na buhayon liwat si Jesus, duwa sa saiyang mga disipulo an naglalakaw hale sa Jerusalem pasiring sa Emaus. “Mantang sinda nag-oolay asin nagdidiskusyon,” an sabi kan pagkasaysay sa Ebanghelyo, “nagrani mismo si Jesus asin nagpoon na maglakaw kaiba ninda; alagad dai sia namimidbid kan saindang mga mata. Sinabi nia sa sainda: ‘Ano ining mga bagay na pinagdidiskusyonan nindo mantang kamo naglalakaw?’ Asin uminontok sinda na mamondo an mga lalawgon. Bilang simbag sinabi sa saiya kan saro na an ngaran Cleopas: ‘Ano solo kang nag-eerok bilang nakikihimanwa sa Jerusalem kaya dai mo aram an mga bagay na nangyari digdi kan mga aldaw na ini?’ Asin sia nagsabi sa sainda: ‘Anong mga bagay?’” Naghinanyog an Dakulang Paratokdo mantang ipinapaliwanag ninda na si Jesus na Nazareno nagtokdo sa mga tawo, naggibo nin mga milagro, asin ginadan. Ngonyan may mga nagsasabi na sia binuhay na liwat hale sa mga gadan. Tinogotan ni Jesus si Cleopas asin an kaiba kaini na magpahayag kan nasa boot ninda. Dangan ipinaliwanag nia an kaipuhan nindang maaraman, na ‘lubos na binubuksan sa sainda an Kasuratan.’—Lucas 24:13-27, 32.
10. Paano nindo puedeng aramon an relihiosong punto de vista nin saro na nanompongan nindo sa saindong ministeryo?
10 Tibaad mayo kamong aram manongod sa relihiosong punto de vista nin sarong kagharong. Tanganing maaraman iyan, puede nindong sabihon na naoogma kamong maghinanyog sa saboot kan mga tawo manongod sa pamibi. Dangan puede kamong maghapot, “Sa paghona nindo may saro daw talagang naghihinanyog sa mga pamibi?” An saindang simbag tibaad maghayag nin dakol manongod sa punto de vista asin pinaghalean na relihion kan tawong iyan. Kun sia relihioso, puede nindong aramon nin orog pa an saiyang punto de vista paagi sa paghapot, “Sa paghona daw nindo naghihinanyog an Dios sa gabos na pamibi, o igwa daw nin mga pamibi na dai nia inooyonan?” An siring na mga hapot puedeng magbunga nin relaks na pakikipag-olay. Kun angay na ipaheling sa saiya an sinasabi kan Kasuratan, gibohon iyan sa mataktikang paagi, na dai inaatake an mga paniniwala kan tawong iyan. Kun naoogma siang maghinanyog sa saindo, tibaad maoogma siang pabalikon kamo. Alagad paano kun maghapot sia asin dai nindo iyan kayang simbagon? Puede kamong magsiyasat asin magbalik na preparadong tumao nin ‘rason para sa saindong paglaom, na ginigibo iyan sa mahoyong boot asin hararom na paggalang.’—1 Pedro 3:15.
Tinokdoan ni Jesus an mga Maninigo
11. Ano an makakatabang sa saindo na manompongan an mga maninigong tokdoan?
11 May pakabatid an sangkap na tawong si Jesus na nagpangyari sa saiya na mamidbid kun siisay an mga maninigong tokdoan. Para sa sato, mas depisil nanggad na hanapon an mga “may tamang tendensia sa buhay na daing katapusan.” (Gibo 13:48) Nagin depisil man iyan para sa mga apostol na sa sainda sinabi ni Jesus: “Sa ano man na siudad o baryo kamo lumaog, hanapon nindo kun siisay dian an maninigo.” (Mateo 10:11) Kapareho kan mga apostol ni Jesus, kaipuhan nindong hanapon an mga tawo na andam na maghinanyog asin matokdoan kan katotoohan sa Kasuratan. Puede nindong manompongan an mga maninigo paagi sa maingat na paghinanyog sa gabos na nakakaolay nindo, na inoobserbaran an saboot kan lambang indibiduwal.
12. Paano nindo padagos na matatabangan an sarong interesado?
12 Pagkatapos na makaolay an saro na nagpaheling nin interes sa mensahe kan Kahadean, marahay na padagos na horophoropon an espirituwal na mga pangangaipo kan tawong iyan. Kun isusurat nindo an saindong naaraman pagkatapos na makipag-olay sa saro manongod sa maogmang bareta, makakatabang ini sa saindo na padagos na tabangan sa espirituwal an tawong iyan. Durante nin mga pagdalaw liwat, kaipuhan na maingat kamong maghinanyog tanganing orog nindong maaraman an mga paniniwala, saboot, o mga kamugtakan kan indibiduwal.
13. Ano an puedeng makatabang sa saindo tanganing mabatid an mga saboot nin saro manongod sa Biblia?
13 Paano nindo madadagka an mga tawo na sabihon sa saindo an saindang saboot manongod sa Tataramon nin Dios? Sa nagkapirang lugar, epektibo an paghapot nin “Prinobaran na daw nindong saboton an Biblia?” An simbag sa hapot na iyan parateng naghahayag kan saboot nin saro manongod sa espirituwal na mga bagay. An saro pang paagi iyo na magbasa nin teksto asin maghapot, “Rasonable daw ini para sa saindo?” Arog ni Jesus, tibaad dakol an magibo nindo sa saindong ministeryo paagi sa paggamit nin angay na mga hapot. Minsan siring, angay sanang magmaan.
Si Jesus Epektibong Naggamit nin mga Hapot
14. Paano nindo ikakapaheling na interesado kamo sa punto de vista nin mga tawo minsan ngani dai nagpaparausisa sa sainda?
14 Magpaheling nin interes sa punto de vista nin iba na dai sinda napapasupog. Arogon an paagi ni Jesus. Mataktika sia sa paghapot asin naggamit sia nin nakakapukaw sa isip na mga hapot. Si Jesus maboot man na parahinanyog na nagpapaginhawa sa sinserong mga tawo asin ginigibong pamugtak an saindang boot. (Mateo 11:28) An gabos na klase nin tawo dai nag-alangan na dumolok sa saiya tanganing sabihon an saindang mga ikinakahadit. (Marcos 1:40; 5:35, 36; 10:13, 17, 46, 47) Tanganing magin pamugtak an boot nin mga indibiduwal sa pagsabi sa saindo kan saindang iniisip manongod sa Biblia asin sa mga katokdoan kaiyan, kaipuhan nindong likayan na pagparausisaon sinda.
15, 16. Paano nindo madadagka an mga tawo na makipag-olay manongod sa relihion?
15 Apuera sa epektibong paggamit nin mga hapot, puede kamong makapoon nin pakikipag-olay paagi sa pagsambit nin interesanteng punto dangan paghinanyog sa saindang simbag. Halimbawa, sinabihan ni Jesus si Nicodemo: “Kun an saro dai namundag giraray, dai sia makakaheling kan kahadean nin Dios.” (Juan 3:3) An mga tataramon na iyan nakakapukaw na marhay nin interes kaya dai napugolan ni Nicodemo na magsimbag asin maghinanyog ki Jesus. (Juan 3:4-20) Sa kaagid na paagi, puede man nindong madagka an mga tawo na makipag-olay.
16 Ngonyan, an paglataw nin dakol na bagong relihion an parateng pinag-oolayan sa mga lugar na arog kan Aprika, Sirangan na Europa, asin Latin Amerika. Sa mga lugar na arog kaini, sa parate makakapoon kamo nin pakikipag-olay paagi sa pagsabing: “Ikinakahadit ko na kadakol nin relihion. Alagad linalaoman ko na sa dai na mahahaloy an mga tawo sa gabos na nasyon magkakasararo sa tunay na pagsamba. Gusto daw nindong maheling na mangyari iyan?” Paagi sa pagsambit nin nakakangalas na bagay manongod sa saindong paglaom, tibaad madagka nindo an mga tawo na magpahayag kan saindang saboot. Asin mas pasil na simbagon an mga hapot kun may duwang posibleng simbag. (Mateo 17:25) Pagkatapos na makapagkomento an kagharong manongod sa saindong hapot, simbagon nindo iyan paagi sa saro o duwang teksto. (Isaias 11:9; Sofonias 3:9) Paagi sa maingat na paghinanyog asin pagrisa sa simbag nin saro, puede nindong madeterminaran kun ano an ipapakipag-olay nindo sa sunod nindong pagdalaw.
Si Jesus Naghinanyog sa mga Aki
17. Ano an nagpapaheling na interesado si Jesus sa mga aki?
17 Si Jesus interesado bako sanang sa mga nasa edad na kundi sa mga aki man. Aram nia an mga kinakawat kan mga aki asin an mga bagay na sinasabi ninda. Kun beses, inaagda nia an mga aki na dumolok sa saiya. (Lucas 7:31, 32; 18:15-17) Dakol na aki an kabilang sa mga kadaklan na naghinanyog ki Jesus. Kan an mga aking lalaki magkururahaw sa pag-omaw sa Mesiyas, narisa ini ni Jesus asin sinabi nia na ihinula ini kan Kasuratan. (Mateo 14:21; 15:38; 21:15, 16) Ngonyan, dakol na aki an nagigin mga disipulo ni Jesus. Kaya paano nindo sinda matatabangan?
18, 19. Paano nindo matatabangan sa espirituwal an saindong aki?
18 Tanganing matabangan sa espirituwal an saindong aki, kaipuhan kamong maghinanyog sa saiya. Kaipuhan nindong masabotan an saiyang mga ideya na tibaad bakong kaoyon kan kaisipan ni Jehova. Ano man an sabihon kan saindong aki, madonong na magtao nguna nin positibong komento. Dangan puede kamong gumamit nin angay na mga teksto tanganing tabangan an saindong aki na masabotan an pagmansay ni Jehova sa mga bagay-bagay.
19 Makakatabang an mga hapot tanganing maaraman an saboot nin mga aki. Kapareho kan mga nasa edad na, dai man naoogma an mga aki na pagparausisaon sinda. Imbes na pasakitan an saindong aki na simbagon an dakol na depisil na hapot, taano ta dai nindo sabihon sa halipot an saindo mismong saboot? Depende sa pinag-oolayan, puede nindong sabihon na dati arog kaiyan an namamatean nindo asin ipaliwanag kun taano. Dangan puede kamong maghapot, “Arog man daw kaiyan an namamatean mo?” An simbag kan saindong aki puedeng maggiya nanggad sa sarong nakakatabang asin nakakaparigon sa boot na pag-oolay sa Kasuratan.
Padagos na Arogon an Dakulang Paragibo nin Disipulo
20, 21. Bilang paragibo nin disipulo, taano ta maninigo kamong magin marahay na parahinanyog sa saindong paghuhulit?
20 Baga man ipinapakipag-olay nindo an sarong tema sa saindong aki o sa kiisay pa man, mahalagang marhay an atentong paghinanyog. Sa katunayan, iyan sarong kapahayagan nin pagkamoot. Paagi sa paghinanyog, minagawe kamo sa mapakumbabang paagi, asin ipinapaheling nindo an paggalang saka mamomoton na konsiderasyon sa nagtataram. Siempre, an paghinanyog nangangaipo nin pagtao nin atension sa mga kapahayagan nin saro.
21 Mantang nakikikabtang kamo sa Kristianong ministeryo, padagos na maingat na maghinanyog sa mga kagharong. Kun kamo nagtatao nin maingat na atension sa sinasabi ninda, posibleng marhay na masasabotan nindo kun arin na mga aspekto kan katotoohan sa Biblia an nangorognang makakaakit sa sainda. Dangan maghingoang tabangan sinda paagi sa paggamit kan manlaenlaen na paagi nin pagtotokdo ni Jesus. Mantang ginigibo nindo iyan, babalosan kamo nin kagayagayahan asin pagkakontento huli ta inaarog nindo an Dakulang Paragibo nin Disipulo.
Ano an Isisimbag Nindo?
• Paano dinagka ni Jesus an iba na ipahayag an nasa boot ninda?
• Taano ta naghinanyog si Jesus sa mga tinotokdoan nia?
• Paano kamo puedeng gumamit nin mga hapot sa saindong ministeryo?
• Ano an magigibo nindo tanganing tabangan sa espirituwal an mga aki?
[Mga Hapot Para sa Pag-adal]
[Ritrato sa pahina 28]
Kun naghuhulit, seguradohon na maghinanyog kamo
[Ritrato sa pahina 30]
Inaarog niato si Jesus kun tinatabangan niato sa espirituwal an mga aki