Kamo daw Nakakapaginhawa sa Iba?

SA TIMOG na poro kan Kabukidan nin Anti-Libano yaon an Bukid nin Hermon, na may kahangahangang alitoktok na an langkaw 2,814 metros na mas halangkaw sa kapatagan kan dagat. Sa kadaklan na panahon kan taon, an alitoktok kan Hermon natatakopan nin niebe, kaya an nag-aagi dian na medyo mainit na alisngaw sa banggi nagigin ambon. An ambon minaibaba sa mga poon nin fir asin namumungang mga kahoy sa ibabang mga bakilid saka sa mga ubasan sa ibaba pa. Durante kan halawig na tig-init sa suanoy na Israel, an siring na nakakapaginhawang ambon iyo an pangenot na gikanan nin alumaad para sa mga pananom.

Sa sarong awit na ipinasabong nin Dios, an nakakapaginhawang pagkasararo sa tahaw kan mga parasamba ki Jehova inaagid sa “ambon sa Hermon na minaibaba sa kabukidan nin Sion.” (Salmo 133:1, 3) Kun paanong an Bukid nin Hermon nagtatao nin nakakapaginhawang ambon sa mga pananom, puede man kitang makapaginhawa sa mga nakakamidbid niato. Paano niato magigibo iyan?

An Nakakapaginhawang Halimbawa ni Jesus

Si Jesu-Cristo may hararom na epekto sa iba. Dawa an halipot na pakikiiba sa saiya puedeng magin nakakapaginhawang marhay. Halimbawa, nagsaysay an kagsurat nin Ebanghelyo na si Marcos: “Kinugos [ni Jesus] an mga aki asin pinonan na bendisyonan sinda, na ipinapatong an saiyang mga kamot sa sainda.” (Marcos 10:16) Siertong nakakapaginhawa nanggad iyan para sa mga hoben na idto!

Sa huring banggi nia sa daga bilang tawo, hinanawan ni Jesus an mga bitis kan saiyang mga disipulo. Siertong nakapahiro sa boot ninda an saiyang kapakumbabaan. Dangan sinabihan sinda ni Jesus: “Ako nagtao sa saindo nin arogan, tanganing, kun ano an ginibo ko sa saindo, iyo man an maninigong gibohon nindo.” (Juan 13:1-17) Iyo, kaipuhan man nindang magin mapakumbaba. Si Jesus dai nairita minsan ngani dai tolos nasabotan kan mga apostol an punto asin paghaloyhaloy kan bangging iyan nagpoon pa sindang mag-argumento kun siisay sa sainda an garo baga pinakadakula. Imbes, sia mapasensiang nangatanosan sa sainda. (Lucas 22:24-27) Dawa “kan sia pinagtataraman nin maraot, dai [si Jesus] nagbalos na magtaram nin maraot.” Sa katunayan, “kan sia nagsasakit, dai sia nanhuma, kundi padagos na ipinagkatiwala an saiyang sadiri sa saro na naghohokom nin matanos.” Maninigong arogon an nakakapaginhawang halimbawa ni Jesus.—1 Pedro 2:21, 23.

Si Jesus nagsabi: “Pasana nindo an sakong sakal asin makanood kamo sa sako, huli ta ako mahoyo asin may kababaan an puso, asin makakakua kamo nin kaginhawahan para sa saindong kalag.” (Mateo 11:29) Imahinara na personal kamong tinotokdoan ni Jesus. Pagkatapos na madangog siang nagtotokdo sa saindang sinagoga, nagngalas nin labi-labi an mga tawo sa pinaghalean niang lugar asin nagsabi: “Saen kinua kan tawong ini an kadonongan na ini asin an makapangyarihan na mga gibong ini?” (Mateo 13:54) An pagbasa manongod sa buhay asin ministeryo ni Jesus puedeng magtokdo sa sato nin dakula manongod sa pagigin nakakapaginhawa sa iba. Helingon niato kun paano nagtao si Jesus nin marahayon na halimbawa paagi sa positibong pagtaram asin paagi sa pagigin matinabang.

Pagpapadanay na Positibo an Pagtaram

Mas pasil nanggad an paggaba nin sarong edipisyo kisa sa pagtogdok nin bago. Aplikado sa satong pagtaram an iyo man sanang prinsipyong iyan nin paggaba asin pagtogdok. Bilang bakong sangkap na mga tawo, gabos kita nasasala asin may mga pagkukulang. Si Hadeng Salomon nagsabi: “Mayo nin tawong matanos sa daga na padagos na naggigibo nin marahay asin dai nagkakasala.” (Eclesiastes 7:20) Pasil sanang maheling an mga sala nin ibang  tawo asin paluyahon sinda paagi sa makolog na mga komento. (Salmo 64:2-4) Sa ibong na lado, bakong arog kaiyan kapasil na papagdanayon na positibo an satong pagtaram.

Ginamit ni Jesus an saiyang dila tanganing parigonon an mga tawo. Nagtao sia sa sainda nin espirituwal na kaginhawahan paagi sa pagbalangibog sa sainda kan maogmang bareta kan Kahadean. (Lucas 8:1) Pinaginhawa man ni Jesus an mga nagin disipulo nia paagi sa paghayag sa sainda kan dapit sa saiyang langitnon na Ama. (Mateo 11:25-27) Bakong makangangalas na an mga tawo naakit na dumolok ki Jesus!

Sa kabaliktaran, dai kinonsiderar kan mga eskriba asin Fariseo an mga pangangaipo kan iba. “Boot ninda an pinakaprominenteng lugar sa mga kakanan asin an nasa enotan na mga tukawan sa mga sinagoga,” an sabi ni Jesus. (Mateo 23:6) Sa katunayan, minenos ninda an ordinaryong mga tawo, na sinasabi: “An kadaklan na ini na dai tatao kan Ley mga tawong isinumpa.” (Juan 7:49) Mayo nanggad nin nakakapaginhawa manongod sa ugaleng iyan!

Parateng ipinapaheling kan satong pagtaram kun ano kita sa laog asin kun paano niato minamansay an iba. Si Jesus nagsabi: “An marahay na tawo nagluluwas nin marahay gikan sa marahay na kayamanan kan saiyang puso, alagad an maraot na tawo nagluluwas nin maraot gikan sa saiyang maraot na kayamanan; huli ta gikan sa kapanoan kan puso an saiyang ngoso nagtataram.” (Lucas 6:45) Kun siring, ano an puede niatong gibohon tanganing masierto na nakakapaginhawa sa iba an satong pagtaram?

An saro iyo na puede kitang magpondo nguna asin mag-isip bago kita magtaram. An Talinhaga 15:28 nagsasabi: “An puso kan matanos naghohorophorop tanganing makasimbag.” An siring na paghorophorop dai man kaipuhan na magin halawig. Paagi sa kadikit na pagplano antes pa, sa parate madedeterminaran niato kun paano aakoon nin mga tawo an satong mga komento. Puede niatong ihapot sa satong sadiri: ‘Mamomoton daw an sasabihon ko? Totoo daw iyan, o iyan daw tsismis sana? Iyan daw “tataramon na nasa tamang panahon”? Iyan daw makakapaginhawa asin makakaparigon sa mga sasabihan ko kaiyan?’ (Talinhaga 15:23) Kun magkongklusyon kita na an iniisip niatong sabihon negatibo o dai pa napapanahon, maingat kitang maghingoa na lingawan iyan. Mas marahay pa ngani, taano ta dai iyan salidahan nin mas positibo asin angay? An dai inisip na mga tataramon siring kan “mga bono nin espada,” mantang an positibong mga komento “bolong.”—Talinhaga 12:18.

An saro pang tabang iyo na isentro an satong isip sa mga karakteristiko na nagpapangyari na an satong mga kapagtubod magin mahalagang marhay sa pagheling nin Dios. Si Jesus nagsabi: “Dai nin makakadolok sa sako kun dai sia dagkahon kan Ama na nagsugo sa sako.” (Juan 6:44) Naheheling ni Jehova an positibong mga kualidad sa lambang saro kan saiyang maimbod na mga lingkod—dawa an mga hinohona niato na depisil pakiibanan huli sa personalidad. Paagi sa paghihingoa na helingon an saindang marahay na mga kualidad, magkakaigwa kita nin dahelan na magtaram nin positibo manongod sa sainda.

Tabangan an Iba

Biyong nasabotan ni Jesus an mamondong kamugtakan kan mga inaapi. Sa katunayan, “kan maheling nia an mga kadaklan naherak sia sa sainda, huli ta sinda naanitan asin nagkaralagalag siring sa  mga karnero na mayong pastor.” (Mateo 9:36) Alagad dai sana hineling ni Jesus an saindang kaherakherak na kamugtakan; may ginibo sia tanganing tabangan sinda. Itinao nia an pangagda: “Madia kamo sa sako, kamo gabos na nagpapagal asin nagagabatan, asin papaginhawahon ko kamo.” Itinao man nia an pagpasarig na ini sa boot: “An sakong sakal maboot asin an sakong pasan magian.”—Mateo 11:28, 30.

Ngonyan, nabubuhay kita sa “delikadong mga panahon na masakit pakibagayan.” (2 Timoteo 3:1) Dakol na tawo an nagagabatan huli sa “kahaditan kan sistemang ini nin mga bagay.” (Mateo 13:22) An iba nagagabatan huli sa makamomondong personal na mga kamugtakan. (1 Tesalonica 5:14) Paano kita makakatao nin kaginhawahan sa mga nangangaipo? Arog ni Cristo, makakatabang kita na pagianon an saindang pasan.

May mga tawo na naghihingoang ipahayag an ikinakagabat kan saindang boot paagi sa pakikipag-olay manongod sa saindang mga problema. Kun an mga indibiduwal na pinanluluyahan nin boot dumolok sa sato para sa tabang, nagtatao daw kita nin panahon na maghinanyog nin maingat? An paghinanyog na may pakikidamay nangangaipo nin pagdisiplina sa sadiri. Nangangahulogan iyan na kita danay na nakakonsentrar sa sinasabi kan kaolay niato, imbes na isipon kun ano an isisimbag niato o kun paano reresolberan an problema. Paagi sa paghinanyog nin maingat, pagheling sa mata, asin paghuyom kun angay na gibohon iyan, ipinapaheling niato na nagmamakolog kita.

Sa Kristianong kongregasyon, igwa nin dakol na oportunidad na parigonon an mga kapagtubod. Halimbawa, kun nag-aatender sa mga pagtiripon sa Kingdom Hall, puede niatong hanapon an mga nakikipaglaban sa mga problema sa salud. Kun beses an kaipuhan sana tanganing parigonon sinda iyo an pira sanang minuto bago o pagkatapos kan pagtiripon tanganing kaolayon sinda sa nakakaparigon na paagi. Puede man niatong girumdomon an mga dai nakaatender sa satong Pag-adal sa Libro kan Kongregasyon. Tibaad puede niato sindang apodan sa telepono asin ipahayag an satong interes sa saindang ikakarahay o tumabang.—Filipos 2:4.

An Kristianong kamagurangan may magabat na pasan nin paninimbagan sa kongregasyon. Dakula an magigibo niato tanganing tumabang na pagianon an saindang pasan paagi sa pagkooperar asin paagi sa mapakumbabang pag-otob sa ano man na asignasyon na tibaad maresibi niato. Sinasadol kita kan Tataramon nin Dios: “Magin makinuyog kamo duman sa mga nangengenot dian sa tahaw nindo asin magin mapagpasakop, huli ta sinda nagbabantay sa saindong kalag bilang an mga maninimbag; tanganing ini magibo nindang may kagayagayahan asin bakong may pag-agagha, huli ta ini makakaraot sa saindo.” (Hebreo 13:17) Paagi sa pagigin listong kumuyog, makakapaginhawa kita sa mga “nangengenot sa marahay na paagi.”—1 Timoteo 5:17.

Pirmeng Magtaram nin Positibo Asin Magin Matinabang

An nakakapaginhawang ambon resulta nin dai mabilang na saradit na turo nin tubig na luway-luway na minaibaba, na garo baga dai aram kun saen hale. Siring man, an pagpaginhawa sa iba posibleng marhay na bakong resulta nin saro sanang kaomaw-omaw na gibo kundi resulta nin progresibong mga epekto kan pagpaheling niato nin arog-Cristong mga kualidad sa gabos na panahon.

“Sa pagkamoot na sa magturugang magkaigwa kamo nin mamomoton na kapadangatan sa lambang saro,” an isinurat ni apostol Pablo. “Sa pagtao nin onra sa lambang saro mangenot kamo.” (Roma 12:10) Iaplikar niato an hatol ni Pablo. Paagi sa satong pagtaram asin paggawe, logod na talagang magin nakakapaginhawa kita sa iba.

[Mga Ritrato sa pahina 16]

An ambon sa Bukid nin Hermon—nakakapaginhawang gikanan nin alumaad para sa mga pananom

[Ritrato sa pahina 17]

An naghihinanyog na may pakikidamay nakakapaginhawa sa iba