Posible daw an Pagkasararo sa Kinaban?

AN KINABAN daw niato palaog na sa matoninong na kamugtakan o naggagatigati na sa grabeng kapahamakan? Garo baga puedeng magkaigwa nin nakakakombensir na mga argumento para sa arin man sa mga pagmansay na iyan.

Sa sarong lado, an nagkapirang namomoon sa kinaban may kompiansang nagtataram na an katoninongan sa bilog na kinaban sarong pasohan na puedeng maabot—ta tibaad kun dai iyan maabot, makatatakot nanggad na isip-isipon an puedeng magin kamugtakan kan kinaban. Sa ibong na lado, dakol an natatakot nin grabe sa mga hapot na siring kaini: Arin na mga nasyon an may mga armas para sa lagdoan na paggadan? Mangangahas daw sindang gamiton iyan? Ano an mangyayari kun gamiton ninda iyan?

Ipinapaheling kan kasaysayan na an pagriribal asin daing binabasaran na pagkaanggot haloy nang nakaolang sa ano man na paglaom para sa pagkasararo, saka an relihion parateng may dakula nanggad na kabtang sa pagpagrabe kan mga saboot na iyan imbes na haleon iyan. “An ano man na dahelan nin pagkabaranga nin mga tawo puedeng makapukaw nin pagkaongis, asin relihion an saro sa pinakamakosog na dahelan nin pagkabaranga,” an isinurat kan peryodistang si James A. Haught. “Sa ibong kan lakop na paniniwala na pinapangyayari nin relihion na magin ‘marahay’ an mga tawo, risang-risa na pinapangyayari kaiyan na makakomiter nin makababaldeng mga gibo an nagkapirang tawo.” Arog man kaiyan an pagmansay kan autor na si Steven Weinberg. “Tanganing gumibo nin karatan an marahay na mga tawo,” an isinurat nia, “kaipuhan an relihion.”

Igwa daw nin ano man na paglaom na magkakasararo pa an satong kinaban? Igwa! Alagad an gikanan nin pagkasararo sa kinaban bakong tawo o mga relihion na gibo nin tawo, siring kan maheheling niato.

[Blurb sa pahina 3]

An kinaban daw garo sarong granada na maputok na?