Sinusuportaran daw Nindo an Soberaniya ni Jehova?
Sinusuportaran daw Nindo an Soberaniya ni Jehova?
“Sabihon nindo sa tahaw kan mga nasyon: ‘Si Jehova mismo nagin hade.’”—SALMO 96:10.
1, 2. (a) Ano an mahalagang nangyari kan mga Oktubre 29 C.E.? (b) Ano an kahulogan para ki Jesus kan pangyayaring iyan?
MAY sarong mahalagang nangyari kan mga Oktubre 29 C.E., na dai pa noarin man naheling sa daga. An kagsurat sa Ebanghelyo na si Mateo nagbareta: “Kan mabautismohan na, si Jesus tolos na naghawas sa tubig; asin, uya! an kalangitan nagkaburukasan, asin naheling [ni Juan na Bautisador] an espiritu nin Dios na nag-iibaba siring sa salampati na nagtotogdon [ki Jesus]. Uya! May nadangog man na tingog sa langit na nagsasabi: ‘Ini an sakong Aki, an namomotan, na sakong inoyonan.’” Saro ini sa pira sanang pangyayari na isinurat kan gabos na apat na kagsurat sa Ebanghelyo.—Mateo 3:16, 17; Marcos 1:9-11; Lucas 3:21, 22; Juan 1:32-34.
2 An naheheling na pagbubo ki Jesus kan banal na espiritu nagpamidbid sa saiya bilang an Linahidan, na an termino nangangahulogan na Mesiyas, o Cristo. (Juan 1:33) Sa katapustapusi, naglataw an ipinanugang “banhi”! An nagtitindog sa atubangan ni Juan na Bautisador iyo an saro na an bool lulugadon ni Satanas asin iyo an malugad sa payo kan pangenot na kaiwal na iyan ni Jehova asin kan Saiyang soberaniya. (Genesis 3:15) Poon kaidto, lubos na aram ni Jesus na kaipuhan niang pagmaigotan na otobon an katuyohan ni Jehova mapadapit sa Saiyang soberaniya asin Kahadean.
3. Paano inandam ni Jesus an saiyang sadiri para sa magigin papel nia sa pagsuportar sa soberaniya ni Jehova?
3 Tanganing magin andam para sa bago niang asignasyon, “si Jesus, na pano kan banal na espiritu, naghale sa Jordan, asin dinara sia kan espiritu sa kapatagan.” (Lucas 4:1; Marcos 1:12) Duman, sa laog nin 40 aldaw may panahon si Jesus tanganing maghorophorop nin hararom manongod sa isyu nin soberaniya na ibinangon ni Satanas asin sa magigin paggawe Nia tanganing suportaran an soberaniya ni Jehova. Kalabot sa isyung iyan an gabos na madonong na linalang—sa langit asin sa daga. Kaya maninigo niatong isip-isipon an maimbod na paggawe ni Jesus asin helingon niato kun ano an dapat tang gibohon tanganing ipaheling na boot man niatong suportaran an soberaniya ni Jehova.—Job 1:6-12; 2:2-6.
Hayagan na Inangat an Soberaniya
4. Ano an nagin aksion ni Satanas na hayagan na inangat an soberaniya?
4 Siempre, an gabos na pangyayaring nasambitan pa sana dai nakalampas sa pagmangno ni Satanas. Tolos-tolos siang naglansar kan saiyang pag-atake sa pangenot na “banhi” kan simbolikong “babae” nin Dios. (Genesis 3:15) Tolong beses na sinugotan ni Satanas si Jesus, na isinusuherir na maninigong gibohon ni Jesus an garo baga magigin kapakipakinabang para sa saiya imbes na an ipinapagibo sa saiya kan saiyang Ama. An ikatolong sugot partikularmenteng hayagan na inangat an soberaniya. Sa pagpaheling ki Jesus kan “gabos na kahadean kan kinaban asin [kan] kamurawayan kan mga iyan,” daing supog na sinabi ni Satanas ki Jesus: “An gabos na bagay na ini itatao ko sa saimo kun ika lumuhod asin gumibo nin sarong akto nin pagsamba sa sako.” Huling lubos na naaaraman na an Diablo iyo nanggad an may kontrol sa “gabos na kahadean kan kinaban,” ipinaheling ni Jesus an Saiyang paninindogan sa isyu nin soberaniya paagi sa pagsimbag: “Humale ka, Satanas! Huli ta nasusurat, ‘Si Jehova na saimong Dios an dapat mong sambahon, asin sa saiya ka sana dapat na maggibo nin sagradong paglilingkod.’”—Mateo 4:8-10.
5. Anong depisil na sugo an kaipuhan na otobon ni Jesus?
5 Malinaw na ipinaheling kan pamumuhay ni Jesus na para sa saiya, an pagsuportar sa soberaniya ni Jehova iyo an pangenot niang katuyohan. Aram na marhay ni Jesus na dapat siang magdanay na maimbod sagkod sa kagadanan sa kamot ni Satanas—na makahulang sinabi bilang an paglugad sa bool kan “banhi” kan babae—tanganing patunayan an pagkamakatanosan kan soberaniya nin Dios. (Mateo 16:21; 17:12) Kaipuhan man niang magpatotoo sa bagay na an Kahadean nin Dios iyo an instrumento na tinawan nin kapangyarihan ni Jehova tanganing daogon an rebeldeng si Satanas asin ibalik an katoninongan saka areglo sa gabos na linalang. (Mateo 6:9, 10) Ano an ginibo ni Jesus tanganing otobon an depisil na sugong ini?
“An Kahadean nin Dios Harani Na”
6. Paano ipinaaram ni Jesus na an Kahadean iyo an paagi na gagamiton nin Dios tanganing “laglagon an mga gibo kan Diablo”?
6 Sa primero, “si Jesus nagduman sa Galilea, na naghuhulit kan maogmang bareta nin Dios asin nagsasabi: ‘An itinalaan na panahon naotob na, asin an kahadean nin Dios harani na.’” (Marcos 1:14, 15) Sa katunayan, sia nagsabi: “Kaipuhan na ipahayag ko . . . an maogmang bareta kan kahadean nin Dios, huli ta dahel kaini ako isinugo.” (Lucas 4:18-21, 43) Si Jesus naglilibot sa laen-laen na lugar, “na naghuhulit asin nagpapahayag kan maogmang bareta kan kahadean nin Dios.” (Lucas 8:1) Naggibo man si Jesus nin dakol na makapangyarihan na gibo—nagpakakan sa mga kadaklan, nagpakalma sa kamugtakan nin panahon, nagpaomay sa mga may helang, asin nagbuhay nin mga gadan. Paagi sa mga milagrong ini, pinatunayan ni Jesus na kaya nin Dios na haleon an gabos na danyos asin pagdusa na resulta kan pagrebelde sa Eden saka sa siring “laglagon an mga gibo kan Diablo.”—1 Juan 3:8.
7. Ano an ipinagboot ni Jesus na gibohon kan saiyang mga parasunod, asin ano an nagin resulta?
7 Tanganing ikapahayag an maogmang bareta kan Kahadean sa pinakalubos na paaging posible, tinipon ni Jesus an sarong grupo nin maimbod na mga parasunod asin sinanay sinda sa gibohon na iyan. Enot, ninombrahan nia an saiyang 12 apostol asin “sinugo nia sinda tanganing ihulit an kahadean nin Dios.” (Lucas 9:1, 2) Dangan, sinugo nia an 70 pa tanganing ipahayag an mensaheng ini: “An kahadean nin Dios harani na sa saindo.” (Lucas 10:1, 8, 9) Kan an mga disipulong ini magbaralik asin magbareta ki Jesus kan kapangganahan ninda sa paghuhulit kan Kahadean, sia nagsimbag: “Naheheling ko nang nahulog na si Satanas hale sa langit siring sa kikilat.”—Lucas 10:17, 18.
8. Ano an malinaw na ipinaheling kan pamumuhay ni Jesus?
8 Ginibo ni Jesus an gabos na paghihingoa asin inaprobetsaran nia an gabos na oportunidad tanganing magpatotoo manongod sa Kahadean. Sia daing ontok na nagtrabaho, nagpapagal aldaw asin banggi, na linilingawan pa ngani an normal na mga kaginhawahan sa buhay. “An mga sora igwa nin mga lungib asin an mga gamgam nin langit igwa nin mga hapunan, alagad an Aki nin tawo mayo man lamang nin mahihigdaan,” an sabi nia. (Lucas 9:58; Marcos 6:31; Juan 4:31-34) Kan madali na siang magadan, daing takot na sinabi ni Jesus ki Poncio Pilato: “Dahel kaini ako napadigdi sa kinaban, tangani na ako magpatotoo sa katotoohan.” (Juan 18:37) Ipinaheling kan bilog na pamumuhay ni Jesus na sia napadigdi, bako sanang tanganing magin dakulang paratokdo o paramilagro o maski magin sanang mapagsakripisyong Paraligtas, kundi tanganing suportaran an kabotan kan Soberanong si Jehova asin magpatotoo sa kakayahan nin Dios na otobon an kabotan na iyan paagi sa Kahadean.—Juan 14:6.
“Tapos Na!”
9. Paano sa katapustapusi nagin mapanggana si Satanas sa paglugad sa bool kan “banhi” kan simbolikong babae nin Dios?
9 An gabos na ginibo ni Jesus mapadapit sa Kahadean dai nagpaogma sa Kaiwal, si Satanas na Diablo. Paagi sa daganon na kabtang kan saiyang “banhi”—politikal sagkod relihioso—paorootrong prinobaran ni Satanas na gadanon an “banhi” kan simbolikong babae nin Dios. Poon kan panahon na sia mamundag sagkod sa katapusan kan saiyang buhay digdi sa daga, si Jesus an punteriya ni Satanas asin kan saiyang mga parasuportar. Sa katapustapusi, kan tigsoli nin 33 C.E., nag-abot an panahon tanganing an Aki nin tawo itao sa kamot kan Kaiwal tanganing lugadon kaini sa bool. (Mateo 20:18, 19; Lucas 18:31-33) Malinaw na ipinapaheling kan mga pagkasaysay sa Ebanghelyo kun paano minanipular ni Satanas an mga tawo—poon ki Judas Iscariote sagkod sa mga poon na saserdote, eskriba, Fariseo, asin mga Romano—tanganing kondenaron si Jesus asin ipasairarom sia sa makolog na kagadanan sa hariging pasakitan.—Gibo 2:22, 23.
10. Ano an pangenot na nagibo ni Jesus kan sia magadan sa hariging pasakitan?
10 Ano an minasabong sa isip nindo kun iniisip nindo si Jesus sa hariging pasakitan na nagtitios nin luway-luway asin makologon na kagadanan? Tibaad nagigirumdoman nindo an atang na pantubos na daing kaimotan na itinao ni Jesus para sa makasalan na katawohan. (Mateo 20:28; Juan 15:13) Tibaad magngalas kamo sa dakulaon na pagkamoot na ipinaheling ni Jehova sa pagtao kan atang na iyan. (Juan 3:16) Tibaad an namamatean nindo kapareho kan namatean kan sarong opisyal kan hukbo nin Roma na napahirong magsabi: “Totoong gayo na ini an Aki nin Dios.” (Mateo 27:54) An gabos na ini seguradong angay na mga reaksion. Sa ibong na lado, girumdomon na an huring mga tataramon ni Jesus sa hariging pasakitan iyo ini: “Tapos na!” (Juan 19:30) Ano an tapos na? Mantang dakol na bagay an nagibo ni Jesus paagi sa saiyang buhay asin kagadanan, bako daw na an pangenot na dahelan kan pagdigdi ni Jesus sa daga iyo an pagresolber sa isyu manongod sa soberaniya ni Jehova? Asin bako daw na ihinula na bilang an “banhi,” titioson nia an grabeng pagbalo sa kamot ni Satanas tanganing haleon an gabos na katuyawan sa ngaran ni Jehova? (Isaias 53:3-7) Magabat na mga paninimbagan ini, pero lubos na inotob ini ni Jesus. Ini pambihira nanggad na nagibo!
11. Ano an gigibohon ni Jesus tanganing lubos na maotob an ihinula sa Eden?
11 Huli sa saiyang kaimbodan, binuhay liwat si Jesus, bakong bilang tawo, kundi bilang “espiritung nagtatao nin buhay.” (1 Corinto 15:45; 1 Pedro 3:18) An panuga ni Jehova sa saiyang pinamuraway na Aki iyo ini: “Tumukaw ka sa sakong too sagkod na ibugtak ko an saimong mga kaiwal na tungtongan kan saimong mga bitis.” (Salmo 110:1) Kaiba sa “mga kaiwal” an pangenot na may kasalan, si Satanas, asin an gabos na minakompuesto sa saiyang “banhi.” Bilang Hade kan Mesiyanikong Kahadean ni Jehova, papangenotan ni Jesu-Cristo an paglaglag sa gabos na rebelde, sa rona nin mga espiritu asin sa daga. (Kapahayagan 12:7-9; 19:11-16; 20:1-3, 10) Dangan mangyayari an lubos na kaotoban kan hula sa Genesis 3:15 saka kan pamibi na itinokdo ni Jesus sa saiyang mga parasunod: “Dumatong logod an kahadean mo. Gibohon logod an kabotan mo, kun paano sa langit, siring man sa daga.”—Mateo 6:10; Filipos 2:8-11.
Sarong Modelo na Dapat Sunodon
12, 13. (a) Anong paghimate sa maogmang bareta kan Kahadean an naheheling ngonyan? (b) Ano an dapat niatong isip-isipon sa pagsunod niato sa mga lakad ni Jesus?
12 Ngonyan, an maogmang bareta kan Kahadean ihinuhulit na sa dakol na nasyon, siring kan ihinula ni Jesus. (Mateo 24:14) Bilang resulta, minilyon na tawo an nagdusay kan saindang buhay sa Dios. Ogmahon sinda sa mga bendisyon na itatao kan Kahadean. Inaantisipar ninda na mabuhay sagkod lamang na may katoninongan asin katiwasayan sa sarong paraisong daga, asin magayagaya nindang sinasabi sa iba an manongod sa saindang paglaom. (Salmo 37:11; 2 Pedro 3:13) Saro ka daw sa mga parabalangibog na ini kan kahadean? Kun iyo, maninigo kang tawan nin komendasyon. Minsan siring, may sarong bagay na dapat na isip-isipon kan lambang saro sa sato.
13 Si apostol Pedro nagsurat: “Si Cristo nagsakit para sa saindo, na winalatan kamo nin modelo tanganing sunodon nindo nin estrikto an saiyang mga lakad.” (1 Pedro 2:21) Mangnohon na sa pangyayaring ini, an sinambit ni Pedro bakong an kaigotan ni Jesus sa paghuhulit o an abilidad nia sa pagtotokdo, kundi an saiyang pagsakit. Bilang sarong nakaheling mismo, aram na marhay ni Pedro kun gurano kaandam si Jesus na magtios tanganing magpasakop sa soberaniya ni Jehova asin patunayan na putikon si Satanas. Kun siring, sa anong mga paagi puede niatong sunodon an mga lakad ni Jesus? Dapat niatong hapoton an satong sadiri: ‘Gurano daw ako kaandam na magtios tanganing suportaran asin tawan nin onra an soberaniya ni Jehova? Ipinapaheling daw kan sakong pamumuhay asin pakikikabtang sa ministeryo na an pangenot sa sako iyo an pagsuportar sa soberaniya ni Jehova?’—Colosas 3:17.
14, 15. (a) Ano an nagin reaksion ni Jesus sa napasalang mga suhestion asin alok, asin taano? (b) Anong isyu an dapat na pirme niatong girumdomon? (Iiba an mga komento sa kahon na “Manindogan sa Lado ni Jehova.”)
14 Aroaldaw, napapaatubang kita sa mga pagbalo asin pagdesisyon, dakula asin sadit. Ano an maninigong magdeterminar sa magigin reaksion niato? Halimbawa, kun napapaatubang kita sa sugot na gibohon an sarong bagay na magsasapeligro kan kamugtakan niato bilang Kristiano, ano an magigin reaksion niato? Kan sabihan ni Pedro si Jesus na magin maboot sa saiyang sadiri, ano an nagin reaksion ni Jesus? “Padian ka sa hudian ko, Satanas!” an sabi ni Jesus. “Iniisip mo, bakong an mga kaisipan nin Dios, kundi an sa mga tawo.” (Mateo 16:21-23) O kun may inaalok sa sato na mga oportunidad para sa pag-asenso sa pinansial o karera na makakaapektar sa satong espirituwal na ikakarahay, an sato daw na reaksion kapareho kan reaksion ni Jesus? Kan marisa ni Jesus na an mga nakaheling sa saiyang mga milagro “madorolok asin kukuanon sia nin pirit tanganing gibohon siang hade,” tolos-tolos niang binayaan sinda.—Juan 6:15.
15 Taano ta marigon na marhay an reaksion ni Jesus digdi asin sa iba pang mga pangyayari? Huli ta malinaw niang naheling na labi pa sa personal na kaligtasan o bentaha nia an kalabot digdi. Gusto niang gibohon an kabotan kan saiyang Ama asin suportaran an soberaniya ni Jehova ano man an mangyari. (Mateo 26:50-54) Sa siring, kun bakong malinaw sa satong isip sa gabos na panahon an isyu manongod sa soberaniya ni Jehova, na dai inaarog si Jesus, yaon pirme an peligro na makikompromiso o masudya sa paggibo nin tama. Taano man? Huli ta madali kitang mabibiktima kan mga pakana ni Satanas, na eksperto sa paggibo na magin kawiliwili an bagay na sala, arog kan ginibo nia kan sinusugotan nia si Eva.—2 Corinto 11:14; 1 Timoteo 2:14.
16. Ano an maninigong magin pangenot na pasohan niato sa pagtabang sa iba?
16 Sa satong ministeryo, pinagmamaigotan niatong ipakipag-olay sa mga tawo an mapadapit sa ikinakapurisaw ninda asin hinihingoa niatong ipaheling sa sainda an mga simbag sa Biblia. Sarong epektibong paagi ini na mapukaw an interes ninda na mag-adal sa Biblia. Minsan siring, an pangenot na pasohan niato bako sanang tabangan an mga tawo na maaraman kun ano an sinasabi kan Biblia o kun anong mga bendisyon an itatao kan Kahadean nin Dios. Dapat na tabangan niato sinda na masabotan an isyu manongod sa soberaniya ni Jehova. Andam daw sindang magin tunay na Kristiano asin pasanon an saindang “hariging pasakitan” asin magtios para sa kapakanan kan Kahadean? (Marcos 8:34) Andam daw sindang umayon sa mga nagsusuportar sa soberaniya ni Jehova asin sa siring patunayan na si Satanas putikon asin parabalobagi? (Talinhaga 27:11) Pribilehio niato na tabangan an satong sadiri asin an iba na gibohon iyan.—1 Timoteo 4:16.
Kun an Dios Nagigin “Gabos na Bagay sa Gabos na Tawo”
17, 18. Anong mamuraway na panahon an malalaoman niato kun satong ipinapaheling na sinusuportaran niato an soberaniya ni Jehova?
17 Mantang ginigibo niato an satong pinakamakakaya ngonyan tanganing ipaheling paagi sa satong paggawe asin sa satong ministeryo na sinusuportaran niato an soberaniya ni Jehova, makakalaom kita sa panahon na ‘itatao ni Jesu-Cristo an kahadean sa saiyang Dios asin Ama.’ Noarin mangyayari iyan? Si apostol Pablo nagpaliwanag: “Kun napara na nia an gabos na gobyerno asin gabos na autoridad asin kapangyarihan. Huli ta sia kaipuhan na mamahala bilang hade sagkod na ikinabugtak na nin Dios an gabos na kaiwal sa irarom kan saiyang mga bitis. . . . Dangan an Aki mismo mapasakop man sa Saro na nagpasakop sa saiya kan gabos na bagay, tanganing an Dios magin gabos na bagay sa gabos na tawo.”—1 Corinto 15:24, 25, 28.
18 Kun an Dios magin nang “gabos na bagay sa gabos na tawo”—abaa kamamuraway na panahon iyan! Naotob na kan Kahadean an katuyohan kaiyan. An gabos na nagtutumang sa soberaniya ni Jehova nahale na. Ikinabalik na sa bilog na uniberso an katoninongan asin areglo. Sa mga tataramon kan salmista, an gabos na linalang mag-aawit: “Itao nindo ki Jehova an kamurawayan na nanonongod sa saiyang ngaran . . . Sabihon nindo sa tahaw kan mga nasyon: ‘Si Jehova mismo nagin hade.’”—Salmo 96:8, 10.
Masisimbag daw Nindo?
• Paano hayagan na sinuportaran ni Jesus an soberaniya nin Dios?
• Ano an pangenot na nagibo ni Jesus paagi sa saiyang ministeryo asin kagadanan?
• Sa anong mga paagi na puede niatong sunodon an halimbawa ni Jesus sa pagpaheling na sinusuportaran niato an soberaniya ni Jehova?
[Mga Hapot Para sa Pag-adal]
[Kahon/Mga Ritrato sa pahina 29]
MANINDOGAN SA LADO NI JEHOVA
Arog kan naaaraman kan dakol na tugang sa Korea asin sa iba pang lugar, kun an mga Kristiano napapaatubang sa grabeng mga pagbalo, makakatabang na papagdanayon nin malinaw sa isip an dahelan kun taano ta nangyayari sa sainda an siring na mga pagbalo.
“An nakatabang sa samo na makatagal,” an sabi kan saro sa mga Saksi ni Jehova na nabilanggo durante kan dating rehimen na Sobyet, “iyo an malinaw na pakasabot sa isyu na pinalataw sa hardin nin Eden—an isyu dapit sa deretso nin Dios na mamahala. . . . Aram niamo na igwa kami nin oportunidad na manindogan para sa pamamahala ni Jehova. . . . Pinakosog kami kaini asin pinangyaring mapagdanay mi an samong integridad.”
Ipinaliwanag kan saro pang Saksi kun ano an nakatabang sa saiya asin sa mga kapwa nia Saksi sa kampo nin puersahan na pagtrabaho. “Sinuportaran kami ni Jehova,” an sabi nia. “Sa ibong kan masakit na mga kamugtakan, mata kami sa espirituwal. Pirme kaming nagpaparinigonan nin boot paagi sa pagpagirumdom sa lambang saro na naninindogan kami sa lado ni Jehova sa isyu kan unibersal na soberaniya.”
[Ritrato sa pahina 26]
Paano sinuportaran ni Jesus an soberaniya ni Jehova kan sia sugotan ni Satanas?
[Ritrato sa pahina 28]
Ano an nagibo kan kagadanan ni Jesus?