An “Mahalagang Marhay na Regalo Mo”

IYAN an pagkaladawan nin sarong dating primer ministro kan Belgium sa librong The Greatest Man Who Ever Lived. * An sarong kataed makikatood na nagbisita sa saiya, asin nag-ako an primer ministro nin kopya kan librong iyan. Paghaloyhaloy, naggibo sia nin surat nin pagpasalamat: “An saimong makikatood na pagbisita talagang nakapahiro sa sakong boot, asin mas napahanga pa ngani ako sa mahalagang marhay na regalo mo: an librong nagtotokar manongod sa ‘Pinakadakulang Tawo.’”

Siniyasat kan dating primer ministro an libro asin nagsabi bilang kongklusyon: “Kun an mga tawo magigin mas interesado sa mensahe kan Ebanghelyo asin isasagibo an mga prinsipyo ni Jesu-Cristo, an kinaban ngonyan biyong magigin laen. Kun siring, dai na niato kakaipuhanon an Konseho Para sa Seguridad (Security Council); ni magkakaigwa pa man nin mga pag-atake nin mga terorista, asin magigin bawal na an kadahasan sa kinaban.” Minsan ngani inaadmitir nia na ini garo baga bakong realistikong paniniwala sa sarong bagay na gusto niang mangyari, ipinahayag nia an paggalang sa positibong ginibo kan saiyang kataed.

An surat nagsabi pa: “Kabilang ka sa kaomaw-omaw na grupo nin mga tawo na may marahay na boot na bakong pano-pano nin paglaom (optimist) ni nag-iisip na pirmeng may maraot na mangyayari (pessimist) kundi meliorist, an boot sabihon, mga tawong naniniwala na magigin mas marahay an kamugtakan kan mga tawo sagkod bagay.”

Nagtutubod an Mga Saksi ni Jehova na an paghiro nin Dios, bakong an mga paghihingoa nin tawo, an mapangyari na magkaigwa nin sarong mas marahay na kinaban pag-abot nin panahon. Pinagmamaigotan nindang arogon an pinakadakulang tawo, si Jesu-Cristo. Nagdalaw na daw sa saindo kasuarin pa sana an mga Saksi ni Jehova? Posibleng marhay na ikakaogma nindo an pakikipag-olay sa sainda manongod sa pinakadakulang tawo na nabuhay kasuarin man. Asin maoogma sindang itao sa saindo an libro na nakapahangang marhay sa dating primer ministro.

[Nota sa Ibaba]