Igwa daw Kamo nin Espirituwal na Parahatol?

SA HOBEN na edad na 16, si Uzias nagin hade kan kahadean nin Juda sa timog. Sia naghade sa laog nin labing 50 taon, poon sa huring kabtang kan ikasiyam na siglo B.C.E. sagkod sa enot na kabtang kan ikawalong siglo B.C.E. Poon sa hoben na edad, si Uzias ‘padagos na naggibo nin tama sa pagheling ni Jehova.’ Ano an nakaimpluwensia sa saiya na sunodon an tanos na dalan? An rekord na nasa kasaysayan nagsasabi: “[Si Uzias] padagos na nagkaigwa nin tendensia na hanapon an Dios kan panahon ni Zacarias, an paratokdo nin pagkatakot sa tunay na Dios; asin, kan panahon kan saiyang paghanap ki Jehova, pinaasenso sia kan tunay na Dios.”—2 Cronica 26:1, 4, 5.

Mayong gayong aram manongod ki Zacarias, an konsehero kan hade, apuera sa pagkasaysay na ini sa Biblia. Pero, bilang “paratokdo nin pagkatakot sa tunay na Dios,” si Zacarias nagin marahayon na impluwensia sa hoben na namamahala na gibohon an tama. An The Expositor’s Bible nagkomento na si Zacarias risang-risa na “sarong tawong pamilyar sa kaaraman sa Kasuratan, mayaman sa espirituwal na eksperyensia, asin may kakayahan na sabihon sa iba an saiyang kaaraman.” An sarong nag-espesyalisar sa Biblia nagsabi bilang kongklusyon manongod ki Zacarias: “Sia pamilyar na marhay sa hula asin . . . madonong, deboto, marahay na tawo; saka, garo baga igwa nin dakulang impluwensia ki Uzias.”

An maimbod na pamumuhay ni Uzias nagtao sa saiya nin dakol na bendisyon, asin sia ‘nagpaheling nin pambihirang kosog’ huli ta “padagos siang tinabangan kan tunay na Dios.” Iyo, an kapangganahan sa saiyang sekular na mga paghihingoa nakadepende sa saiyang espirituwal na kapangganahan “kan panahon ni Zacarias.” (2 Cronica 26:6-8) Pakatapos na magin mapanggana si Uzias, binayaan nia an mga katokdoan ni Zacarias, an saiyang parahatol. ‘An puso ni Uzias nagin maabhaw sagkod na nagin dahelan pa ngani nin kalaglagan, kaya sia guminawe na bakong maimbod ki Jehova.’ Bilang resulta nin sarong daing galang nanggad na akto, sia nagkaigwa nin makangingiring helang sa kublit, na huli kaiyan may mga bagay na dai na nia magibo, kaya dai na sia makapaglingkod bilang hade sa pinakalubos na paagi.—2 Cronica 26:16-21.

Igwa daw nin sarong tawo na puede nindong apodon na paratokdo asin sarong parahatol, na nakakaimpluwensia sa saindo “na hanapon an Dios”? Tibaad igwa, baga man kamo hoben o lihis na sa saindong pagkahoben, baga man kamo lalaki o babae. Pakamahalon an siring na parahatol, huli ta an saiyang sadol makakatabang sa saindo na padagos na gibohon an tama sa pagheling ni Jehova. Maghinanyog sa maygurang na Kristianong ini, asin seryosong isip-isipon an sadol na itinatao nia. Logod na dai kamo noarin man magtalikod sa madonong na mga tataramon nin siring na “paratokdo nin pagkatakot sa tunay na Dios.”—Talinhaga 1:5; 12:15; 19:20.