Mayong Armas na Ginibo Tumang sa Saindo an Magkakaepekto
Mayong Armas na Ginibo Tumang sa Saindo an Magkakaepekto
“Ano man na armas na gigibohon tumang sa saimo dai magkakaepekto.”—ISAIAS 54:17.
1, 2. Paano an mga eksperyensia kan mga Saksi ni Jehova sa Albania nagpapaheling kan pagigin totoo kan Isaias 54:17?
KAIDTONG dakol nang dekada an nakaagi, sa sarong sadit na mabukid na nasyon sa timog-sirangan na Europa, igwa nin sarong grupo nin daing takot na mga Kristiano. Pinagmaigotan na marhay nin ateistikong Komunistang gobyerno na biyong papanluyahon sinda. Pero, dai sinda mapapapondo paagi sa pagpasakit nin grabe, mga kampo nin puersahan na pagtrabaho, asin mga pag-atake nin media. Sairisay sinda? Sinda an mga Saksi ni Jehova sa Albania. Minsan ngani labi-labi kadepisil an pagtorotiripon asin paghuhulit, an saindang pagkadesidido sa laog nin mga dekada nagpamuraway asin nagtaong onra sa Kristianismo saka nagtaong kaomawan sa ngaran ni Jehova. Kan nakaaging taon sa dedikasyon kan saindang bagong mga pasilidad sa sangang opisina, an sarong haloy nang maimbod na Saksi nagsabi: “Gurano man an pagmamaigot ni Satanas, padagos siang nadadaog asin padagos na nanggagana si Jehova!”
2 An gabos na ini buhay na ebidensia kan pagigin totoo kan panuga nin Dios sa saiyang banwaan na nakasurat sa Isaias 54:17: “An ano man na armas na gigibohon tumang sa saimo dai magkakaepekto, asin kokondenaron mo an arin man na dila na matumang sa saimo sa paghokom.” An kasaysayan nagpapatunay na mayo nin ano man na puedeng gibohon kan kinaban ni Satanas an makakapapondo sa pagsamba ki Jehova Dios kan nagdusay na mga lingkod nia.
Mayong Epekto an mga Paghihingoa ni Satanas
3, 4. (a) Ano an kaiba sa mga armas ni Satanas? (b) Sa anong paagi napatunayan na dai nagkaepekto an mga armas kan Diablo?
3 Kaiba sa mga armas na ginagamit tumang sa tunay na mga parasamba an mga pagprohibir, madahas na pagsururog, pagbilanggo, asin ‘pagmukna nin karibokan paagi sa ley.’ (Salmo 94:20) Sa katunayan, sa nagkapirang nasyon, dawa sa oras na ini na pinag-aadalan kan mga Saksi ni Jehova an artikulong ini, an tunay na mga Kristianong ini ‘binabalo’ mapadapit sa saindang integridad sa Dios.—Kapahayagan 2:10.
4 Halimbawa, sarong sangang opisina kan Mga Saksi ni Jehova an nagbareta na sa laog nin saro sanang taon, nagkaigwa nin 32 na pisikal na pangongolog sa mga lingkod nin Dios mantang nakikikabtang sinda sa ministeryo. Dugang pa, may 59 pagdetener nin mga pulis an ginibo sa mga Saksi—hoben asin gurang, lalaki saka babae—na naghuhulit sa publiko. May mga kinuanan nin fingerprint, rinetrato, asin ibinilanggo na garo mga kriminal. An iba pinatakot na kokologan sa pisikal. Sa saro pang nasyon, igwa na ngonyan nin labing 1,100 na dokumentadong kaso nin pag-arestar, pagpamulta, o pagbugbog sa mga Saksi ni Jehova. Labing 200 sa mga kasong ini an nangyari sa aldaw na nagtitiripon sinda tanganing iselebrar an kagadanan ni Jesus! Minsan siring, pinangyari kan espiritu ni Jehova na makatagal an saiyang banwaan sa ibong nin makosogon na mga pagkontra, sa mga nasyon na ini sagkod sa iba pang nasyon. (Zacarias 4:6) An grabeng kaanggotan kan mga kaiwal dai makakapapondo sa mga nag-oomaw ki Jehova. Iyo, may pagsarig kita na mayong armas an makakaolang sa katuyohan nin Dios.
Kinondenar an Putikon na mga Dila
5. Anong putikon na mga dila an nagtumang sa mga lingkod ni Jehova kan enot na siglo?
5 Ihinula ni Isaias na kokondenaron kan banwaan nin Dios an arin man na dila na matumang sa sainda. Kan enot na siglo, an mga Kristiano parateng minimisrepresentar, na sinasabi na mga paragibo daa sinda nin karompotan. An mga tataramon sa Gibo 16:20, 21 kapareho kan siring na mga akusasyon: “An mga tawong ini nanriribok nin grabe sa satong siudad, . . . asin nagtotokdo sinda nin mga kaugalean na bakong sono sa ley na akoon o gibohon niato, mantang kita mga Romano.” Sa saro pang pangyayari, pinagmaigotan kan nagkokontrang mga miembro nin relihion na sutsutan an mga namomoon sa siudad na humiro tumang sa mga parasunod ni Cristo, na nagsasabi: “An mga tawong ini na nagpabagsak sa ineerokan na daga yaon man digdi, [asin sinda] minagaweng tumang sa mga dekreto ni Cesar.” (Gibo 17:6, 7) Si apostol Pablo inapod na “tawong perhuwisyo” asin namomoon sa sarong sekta na nagsusutsut nin mga sedisyon “sa bilog na ineerokan na daga.”—Gibo 24:2-5.
6, 7. Ano an sarong paagi nin pagkondenar kan tunay na mga Kristiano sa berbal na mga pag-atake sa sainda?
6 Huli kaiyan, dai niato ipinagngangalas na an tunay na mga Kristiano ngonyan napapaatubang sa grabeng pagmisrepresentar, pagbalobagi, asin pagpakaraot. Sa paanong paagi niato kinokondenar an siring na berbal na mga pag-atake?—Isaias 54:17.
7 An siring na mga akusasyon asin propaganda parateng napapahimutikan paagi sa marahay na paggawe kan mga Saksi ni Jehova. (1 Pedro 2:12) Kun pinapatunayan kan mga Kristiano na sinda makinuyog sa ley na mga siudadano asin may marahay na moral na nagpapaheling nin tunay na interes sa kapakanan kan saindang kapwa tawo, nahahayag na sala an mga akusasyon sa sainda. An satong marahay na paggawe nagpapatunay sa pagigin tanos niato. Mantang naririsa kan mga nagmamasid an pagmamaigot niato sa marahay na mga gibo, sa parate napapahiro sinda na pamurawayon an satong langitnon na Ama asin midbidon an mas marahay na paagi nin pamumuhay kan saiyang mga lingkod.—Isaias 60:14; Mateo 5:14-16.
8. (a) Kun beses, ano an tibaad kaipuhan tanganing idepensa an satong paninindogan na sono sa Kasuratan? (b) Bilang pag-arog ki Cristo, paano niato kinokondenar an nagtutumang na mga dila?
8 Apuera sa diosnon na paggawe niato, kun beses tibaad kaipuhan na idepensa na may pagkapusoan an satong paninindogan na sono sa Kasuratan. An sarong paagi nin paggibo kaiyan iyo an pag-apelar sa mga gobyerno asin korte para sa proteksion. (Ester 8:3; Gibo 22:25-29; 25:10-12) Kan si Jesus yaon digdi sa daga, kun minsan hayagan siang nakikipagdiskutiran sa mga nagkikritika sa saiya, na pinapahimutikan an falsong mga akusasyon ninda. (Mateo 12:34-37; 15:1-11) Bilang pag-arog ki Jesus, ikinakaogma niato an oportunidad na ipaabot sa iba an malinaw na eksplikasyon kan satong odok sa pusong mga tinutubod. (1 Pedro 3:15) Dai man logod niato noarin man togotan an pag-olog-olog sa eskuelahan, sa trabaho, o kan daing pagtubod na mga paryente na papondohon kita sa pagpahayag kan katotoohan kan Tataramon nin Dios.—2 Pedro 3:3, 4.
An Jerusalem—“Sarong Nakakapagabat na Gapo”
9. Sa arin na Jerusalem nagsisimbolo an “nakakapagabat na gapo” na nasambitan sa Zacarias 12:3, asin sairisay an nagrerepresentar kaiyan digdi sa daga?
9 Ihinahayag kan hula ni Zacarias an dahelan kan pagtumang kan mga nasyon sa tunay na mga Kristiano. Mangnohon an sinasabi sa Zacarias 12:3: “Mangyayari sa aldaw na iyan na an Jerusalem gigibohon kong sarong nakakapagabat na gapo sa gabos na banwaan.” Sa arin na Jerusalem nanonongod an hulang ini? An hula ni Zacarias mapadapit sa Jerusalem minaaplikar sa “langitnon na Jerusalem,” an langitnon na Kahadean na dian inapod an linahidan na mga Kristiano. (Hebreo 12:22) Yaon pa digdi sa daga an sarong sadit na natatada kan mga magmamanang ini kan Mesiyanikong Kahadean. Kaibanan an saindang kairiba, an “ibang karnero,” sinasadol ninda an mga tawo na magpasakop sa Kahadean nin Dios mantang may panahon pa. (Juan 10:16; Kapahayagan 11:15) Ano an nagin reaksion kan mga nasyon sa imbitasyon na ini? Asin anong klaseng pagsuportar an itinatao ni Jehova sa tunay na mga parasamba ngonyan? Aramon niato mantang sinisiyasat pa niato an kahulogan kan Zacarias kapitulo 12. Sa paggibo kaiyan, magkakaigwa kita kan kasegurohan na ‘mayong armas an magkakaepekto’ tumang sa mga linahidan nin Dios asin sa saindang nagdusay na kairiba.
10. (a) Taano ta sinasalakay an banwaan nin Dios? (b) Ano an nangyari sa mga nagmamaigot na haleon an “nakakapagabat na gapo”?
10 Sinasabi kan Zacarias 12:3 na an mga nasyon magkakaigwa nin “grabeng mga bakros.” Paano ini nangyayari? Ipinagboot nin Dios na an maogmang bareta kan Kahadean dapat na ikahulit. Sineseryoso kan Mga Saksi ni Jehova an paninimbagan na maghulit. Minsan siring, an pagbalangibog kan Kahadean bilang solamenteng paglaom kan katawohan nagin “sarong nakakapagabat na gapo” sa mga nasyon. Pinagmamaigotan nindang haleon iyan paagi sa pag-olang sa mga parahulit kan Kahadean. Sa paggibo ninda kaiyan, an nag-oolang na mga nasyon nagkaigwa nin “grabeng mga bakros” o nagkarulugadan. Pati an saindang reputasyon naraot mantang inaatubang ninda an makasusupog na pagkasudya. Dai ninda kayang pasilensiohon an tunay na mga parasamba, na nagpapahalagang marhay sa pribilehio na magbalangibog kan “daing katapusan na maogmang bareta” manongod sa Mesiyanikong Kahadean nin Dios bago matapos an sistemang ini nin mga bagay. (Kapahayagan 14:6) Kan maheling an kadahasan na ginibo sa mga lingkod ni Jehova, sarong guardia sa bilanggoan sa sarong nasyon sa Aprika an sa katunayan nagsabi: ‘Sinasayang nindo an saindong paghihingoa sa pagpersegir sa mga tawong ini. Nungka sindang makikikompromiso. Nagdadakol sana sinda.’
11. Paano inotob nin Dios an saiyang panuga na nakasurat sa Zacarias 12:4?
11 Basahon an Zacarias 12:4. Nanuga si Jehova na sa piguratibong paagi bubutahon asin ‘riribarawon’ nia an mga nagtutumang sa saiyang makosog an boot na mga mensahero kan Kahadean. Inotob nia an saiyang sinabi. Halimbawa, sa sarong nasyon na prohibido an tunay na pagsamba, dai naolang kan mga nagtutumang an banwaan nin Dios sa pag-ako nin espirituwal na kakanon. Sinabi pa ngani nin sarong diaryo na nagpapalupad daa an mga Saksi ni Jehova nin mga lobo tanganing ikalaog sa nasyon an mga literatura sa Biblia! Nagin totoo an panuga nin Dios sa saiyang maimbod na mga lingkod: “Ibubuklat ko an sakong mga mata, asin an lambang kabayo kan mga banwaan papaabotan ko nin pagkabuta.” Huling nabuta nin kabangisan, an mga kaiwal kan Kahadean dai aram kun saen sinda maduman. Pero, kombensido kita na iingatan ni Jehova an saiyang banwaan bilang sarong grupo asin aasikasohon nia an kapakanan ninda.—2 Hade 6:15-19.
12. (a) Sa anong paagi nagpalaad nin kalayo si Jesus kan sia nasa daga? (b) Paano an linahidan na natatada nagpalaad nin kalayo sa espirituwal na paagi, asin may anong mga resulta?
12 Basahon an Zacarias 12:5, 6. “An mga sheik nin Juda” nanonongod sa mga nangangataman sa banwaan nin Dios. Pinapangyayari ni Jehova na mapano sinda nin malaad na kaigotan para sa intereses kan saiyang Kahadean digdi sa daga. Sarong beses, sinabihan ni Jesus an saiyang mga disipulo: “Nagdigdi ako tanganing magpalaad nin kalayo sa daga.” (Lucas 12:49) Totoo nanggad, nagpalaad sia nin piguratibong kalayo. Paagi sa saiyang maigot na paghuhulit sa mga tawo, ginibo ni Jesus na pangenot na tema an Kahadean nin Dios. Nagpalaad ini nin mainit na kontrobersia sa bilog na Judiong nasyon na iyan. (Mateo 4:17, 25; 10:5-7, 17-20) Kaagid kaiyan, “siring sa koron na may kalayo sa tahaw nin kakahoyan asin siring sa nagkakalayong sulo sa raya nin bago pa sanang putolon na ohoy,” an mga parasunod sa lakad ni Cristo sa panahon niato nagpalaad nin kalayo sa espirituwal na paagi. Biyong ibinuyagyag kan librong The Finished Mystery, * na ilinuwas kan 1917, an pagsaginsagin kan Kakristianohan. Nagin dahelan iyan nin kaanggotan kan klero. Sa mas dai pa sana nahahaloy na mga panahon, an Kingdom News No. 37, na may titulong “Harani Na an Katapusan kan Falsong Relihion!” nagpahiro sa dakol na tawo na manindogan magsalang apabor o kontra sa Kahadean nin Dios.
Ilinigtas “an mga Tolda nin Juda”
13. Ano an ipinaparisa kan pananaram na “an mga tolda nin Juda,” asin taano ta ililigtas ni Jehova an mga apektado?
13 Basahon an Zacarias 12:7, 8. Sa suanoy na Israel, parate nang maheheling an mga tolda, na kun beses ginagamit kan mga pastor asin mga nagtatrabaho sa oma. An siring na mga tawo iyo an enot na maaapektaran asin enot na mangangaipo nin proteksion kun sumalakay sa siudad nin Jerusalem an sarong kaiwal na nasyon. An pananaram na “an mga tolda nin Juda” nagpaparisa na an linahidan na natatada sa panahon niato nasa kaomahan, sabi ngani, bakong nasa mga siudad na nakukutaan. Duman daing takot nindang idinedepensa an intereses kan Mesiyanikong Kahadean. An “enot” na ililigtas ni Jehova nin mga hukbo iyo “an mga tolda nin Juda” huling ini an direktang punteriya kan pagsalakay ni Satanas.
14. Paano idinedepensa ni Jehova an mga nasa “mga tolda nin Juda” asin paano nia sinda pinapagdadanay na dai ‘mapukan’?
14 Tunay nanggad, pinapatunayan kan rekord nin kasaysayan na idinedepensa ni Jehova an linahidan na mga embahador na ini kan Kahadean sa saindang “mga tolda” sa kaomahan. * Pinapagdadanay nia sinda na dai ‘mapukan’ paagi sa pagpangyari sa sainda na magin makosog asin marigon an boot kapareho ni David, an parapakilaban na hade.
15. Taano ta ‘minamawot ni Jehova na pohoon an gabos na nasyon,’ asin sa anong panahon nia gigibohon ini?
15 Basahon an Zacarias 12:9. Taano ta ‘minamawot ni Jehova na pohoon an gabos na nasyon’? Huli ta daing ontok nindang tinutumang an Mesiyanikong Kahadean. Huli sa pagsalakay asin pagpersegir ninda sa banwaan nin Dios, sinda kondenado na nin Dios. Dai na mahahaloy gigibohon kan mga representante ni Satanas digdi sa daga an pangultimong pagsalakay sa tunay na mga parasamba sa Dios, na maresulta sa kamugtakan kan kinaban na ilinaladawan sa Biblia na “Har–Magedon.” (Kapahayagan 16:13-16) Bilang reaksion sa pagsalakay na iyan, dedepensahan kan Supremong Hokom an saiyang mga lingkod asin papakangbanalon an saiyang ngaran sa mga nasyon.—Ezequiel 38:14-18, 22, 23.
16, 17. (a) Ano an “minanang rogaring kan mga lingkod ni Jehova”? (b) An satong pakatagal sa mga pagsalakay ni Satanas ebidensia nin ano?
16 Mayong armas si Satanas na puedeng magpaluya sa pagtubod o maghale kan kaigotan kan banwaan nin Dios sa bilog na kinaban. An satong espirituwal na katoninongan, na resulta kan kapangyarihan ni Jehova na magligtas, iyo an “minanang rogaring kan mga lingkod ni Jehova.” (Isaias 54:17) Dawa puersahon kita, mayo nin makakahale kan satong katoninongan asin espirituwal na prosperidad. (Salmo 118:6) Si Satanas padagos na magsusutsut nin pagtumang asin magmamaigot na magpakana nin kasakitan. An satong maimbod na pakatagal sa ibong nin pag-olog-olog ebidensia na yaon sa sato an espiritu nin Dios. (1 Pedro 4:14) Ibinabalangibog na sa bilog na kinaban an maogmang bareta manongod sa naestablisar nang Kahadean ni Jehova. Kapareho nin nakakasindak na mga pang-olang, dakol na pagtumang na siring sa simbolikong “mga gapo kan lagpitaw” an idinaklag sa banwaan nin Dios. Pero, paagi sa kosog ni Jehova napangganahan kan saiyang mga lingkod an siring na mga gapo, na ginigibong daing saysay an epekto kaiyan. (Zacarias 9:15) Dai mapapapondo an linahidan na natatada asin an saindang maimbod na kairiba!
17 Hinahalat niato an lubos na pagkaligtas niato sa mga pagsalakay kan Diablo. Nararanga nanggad kita kan garantiya na ‘ano man na armas na ginibo tumang sa sato dai magkakaepekto, asin kokondenaron niato an arin man na dila na matumang sa sato sa paghokom’!
[Mga Nota sa Ibaba]
^ par. 12 Ipinublikar kan Mga Saksi ni Jehova alagad dai na iniimprenta ngonyan.
^ par. 14 Para sa dugang pang detalye, helingon an librong Jehovah’s Witnesses—Proclaimers of God’s Kingdom, pahina 675-6, na ipinublikar kan Mga Saksi ni Jehova.
Ano an Isisimbag Nindo?
• Ano an nagpapaheling na an mga armas ni Satanas dai nagkaepekto?
• Paano an langitnon na Jerusalem nagin “sarong nakakapagabat na gapo”?
• Paano iliniligtas ni Jehova “an mga tolda nin Juda”?
• Mantang nagdadangadang kita sa Armagedon, sa ano kamo makakasarig?
[Mga Hapot Para sa Pag-adal]
[Mga Ritrato sa pahina 21]
An banwaan ni Jehova sa Albania nagdanay na maimbod sa ibong nin mga pagsalakay ni Satanas
[Ritrato sa pahina 23]
Pinahimutikan ni Jesus an falsong mga akusasyon
[Mga Ritrato sa pahina 24]
Mayong armas na ginibo tumang sa mga nagbabalangibog kan maogmang bareta an magkakaepekto