Nagigirumdoman daw Nindo?

Inapresyar daw nindo an pagbasa kan dai pa sana nahahaloy na mga isyu kan An Torrengbantayan? Bueno, helingon kun masisimbag nindo an minasunod na mga hapot:

• Taano ta may nagdadanay na halaga an “Daan na Tipan”?

An Autor kaiyan bakong sarong maringis na dios, kundi an mamomoton na Dios, si Jehova. Padagos na sinambit ni Jesus asin kan saiyang enot na mga parasunod an Hebreong Kasuratan. Iyan may praktikal na sadol para sa pangaroaldaw na buhay asin nagtatao nin marahayon na paglaom para sa ngapit.—9/1, pahina 4-7.

• Ano an nagibo kan pagtogot na lumihis an panahon poon kan magkasala si Adan asin si Eva?

Sa nakaaging rinibong taon na ini, si Satanas napatunayan na putikon—si Adan asin si Eva saka an minilyon na mga gikan ninda nagkagaradan. Ipinapaheling kan panahon na an mga tawo dai mapaparahay kun independiente sa Dios asin na mayo sinda nin deretso ni abilidad na giyahan an saindang mga lakad.—9/15, pahina 6-7.

• Taano ta dai krinitika si Jacob sa pagrepresentar kan saiyang sadiri bilang si Esau?

Si Jacob may deretso na mag-ako kan bendisyon kan saiyang ama, huling binakal nia an pagkamatua hale ki Esau. Kan marealisar ni Isaac na binendisyonan nia si Jacob, dai sia naghingoang bagohon iyan. Asin minsan ngani puede kutanang olangon iyan nin Dios, malinaw na ginusto niang mapasiring ki Jacob an bendisyon.—10/1, pahina 31.

• Paano kinokontra kan pagkaigwa niato nin konsensia an ebolusyon?

Sa gabos na rasa asin kultura, an mga tawo andam na tumabang sa iba, dawa kun an paggibo kaiyan may kalabot na peligro sa sainda mismo. An siring na daing kapasloan na pagmakolog sa iba bako an aasahan kun an mga tawo mga hayop sana na naghihingoang padagos na mabuhay sa ano man na paagi.—10/15, pahina 20.

• Taano ta masasabi niato na mapakumbaba an Dios, asin sa anong paagi nia ipinapaheling an kualidad na ini?

Bilang Soberano asin Kaglalang, an Dios mayong mga limitasyon, na bakong arog niato na may mga limitasyon. Pero, kaoyon kan 2 Samuel 22:36, masasabi na an Dios mapakumbaba huli ta sia nagmamakolog sa hamak na mga tawo na nagmamaigot na paogmahon sia, asin sia naheherak sa sainda. Garo baga ibinababa nia an saiyang sadiri tanganing trataron nin may kabootan an mga matatakton sa Dios.—11/1, pahina 4-5.

• Paano pinapatunayan kan suanoy na mga kapidaso nin koron an rekord sa Biblia?

Nakua nin mga arkeologo an mga kapidaso nin koron sa Samaria na may pitong ngaran nin pamilya na nakasurat sa Josue 17:1-6. An mga kapidaso na hale sa Arad nagpapatunay sa impormasyon manongod sa mga pamilya nin mga saserdote asin igwa kan ngaran nin Dios. An mga kapidaso nin koron na hale sa Laquis nagpapalinaw kan kamugtakan sa politika asin kan grabeng kariribokan sa Juda bago an pagsalakay kan mga Babilonyo.—11/15, pahina 12-14.

• Ano an minagiya pasiring sa kongklusyon na si Lucas an nagsurat kan libro nin Gibo?

An Ebanghelyo ni Lucas asin an Mga Gibo kan mga Apostol isinurat para ki Teofilo, na nagpaparisa na si Lucas an nagsurat kan duwang iyan. An paggamit kan mga pronombreng (pronoun) “kami,” “samo,” asin “sato” nagpapaheling na kaiba si Lucas sa nagkapira sa mga pangyayari. (Gibo 16:8-15)—11/15, pahina 18.

• Paano maninigong mansayon nin sarong Kristiano an pangangayam asin paninira?

Poon kan panahon ni Noe, tinogotan nin Dios an mga tawo na magbuno asin magkakan nin mga hayop. Pero, an kahagadan na paboloson an dugo kan mga iyan nagdodoon na maninigong igalang an buhay nin hayop huling naggikan iyan sa Dios. Dai maninigong gadanon nin mga Kristiano an mga hayop para sa isport ni tanganing maogmang marhay huli sa paglapag o paggadan. Mahalagang kuyogon an mga ley ni Cesar asin konsideraron an konsensia nin iba. (Roma 14:13)—12/1, pahina 31.