“Tumindog Kamo nin Marigon Asin Helingon an Pagliligtas ni Jehova”

“Si Jehova nasa kampi ko; dai ako matatakot. Ano an magigibo sa sako nin daganon na tawo?”—SALMO 118:6.

1. Anong grabeng mga pangyayari sa ngapit an napapaatubang sa katawohan?

NGONYAN, an katawohan napapaatubang sa grabeng mga pangyayari na nungka pang naeksperyensiahan kan nakaagi. Sa paghula kaini manongod sa satong panahon, si Jesus nagpatanid sa saiyang mga parasunod: “Magkakaigwa nin dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray. Sa katunayan, kun dai pahalipoton an mga aldaw na iyan, mayong laman na makakaligtas; alagad huli sa mga pinili an mga aldaw na iyan papahalipoton.”—Mateo 24:21, 22.

2. Ano an dahelan kan pagpugol sa dakulang kahorasaan?

² Minsan ngani dai sinda naheheling nin mga tawo, pinupugolan ngonyan kan langitnon na mga hukbo an dakulang kahorasaan na iyan. Paagi sa kapahayagan na itinao sa saiya ni Jesus, si apostol Juan nagkapribilehio na maheling an dahelan kan pagpugol na ini. Siring kaini an pagkaladawan dian kan gurang nang apostol: “Nakaheling ako nin apat na anghel na nagtitindog sa apat na kanto kan daga, na pinupugolan an apat na doros kan daga . . . Asin nakaheling ako nin saro pang anghel na nag-iitaas hale sa sirangan, na may pantatak kan Dios na buhay; asin sia nagkurahaw sa makosog na tingog sa apat na anghel . . . ‘Dai nindo pagdanyaran an daga o an dagat o an mga kahoy, sagkod na matatakan niamo sa saindang angog an mga oripon kan satong Dios.’”—Kapahayagan 7:1-3.

3. Ano an magigin enot na kabtang kan dakulang kahorasaan?

³ Madali nang matapos an pangultimong pagtatak sa linahidan na “mga oripon kan satong Dios.” Andam na an apat na anghel na butasan an mapanlaglag na mga doros na iyan. Kun butasan na ninda iyan, ano an enot na mangyayari? Sinisimbag kan sarong anghel an hapot na iyan: “Iaapon [paagi] sa marikas na pagbaribad an Babilonya na dakulang siudad, asin dai na sia noarin man makukua giraray.” (Kapahayagan 18:21) Magkakaigwa nanggad nin paggayagaya sa langit kun mangyari na ini, kun laglagon na an pambilog na kinaban na imperyo nin falsong relihion!—Kapahayagan 19:1, 2.

4. Ano an mga mangyayari pa sa ngapit?

⁴ An gabos na nasyon kan daga magkakasararo tumang sa banwaan ni Jehova. Magigin mapanggana daw an mga nasyon sa pagpara sa maimbod na mga Kristianong iyan? Garo baga magigin mapanggana sinda. Alagad uya! Seseguradohon kan langitnon na mga hukbo na nagsusurunod ki Cristo Jesus na malaglag an mga puersang ini nin tawo. (Kapahayagan 19:19-21) Sa katapustapusi, an Diablo asin an saiyang mga anghel iaapon sa bungaw nin pagkadaing maginibo. Dai na sinda makakapanlagalag sa mga tawo huling gagaposon sinda sa laog nin sangribong taon. Ay, nakakaginhawa nanggad iyan para sa dakulang kaburunyogan nin mga natadang buhay!—Kapahayagan 7:9, 10, 14; 20:1-3.

5. Anong kagayagayahan an naghahalat sa mga nagdadanay na maimbod ki Jehova?

⁵ Madali na niatong maeksperyensiahan an makangangalas asin pambihirang mga pangyayaring ini. An gabos na iyan igwa nin koneksion sa pagbindikar kan deretso ni Jehova na mamahala, an saiyang unibersal na soberaniya. Asin isip-isipon nindo ini: Kun kita magdadanay na maimbod ki Jehova asin maninindogan nin marigon para sa saiyang soberaniya, magkakaigwa kita nin oportunidad na makikabtang sa pagpakangbanal kan ngaran ni Jehova asin sa kaotoban kan saiyang katuyohan. Magigin pambihirang kagayagayahan nanggad iyan!

6. Huli sa nagdadangadang na mga pangyayari, ano an eestudyaran niato?

 ⁶ Andam daw kita para sa importanteng mga pangyayaring iyan? Nagtutubod daw kita sa kapangyarihan ni Jehova na magligtas? Nagsasarig daw kita na tatabangan nia kita sa tamang panahon asin sa pinakamarahay na paagi? Sa pagsimbag sa personal na mga hapot na iyan, puede niatong girumdomon an sinabi ni apostol Pablo sa mga kapwa nia Kristiano sa Roma: “An gabos na bagay na isinurat kaidto isinurat sa pagtokdo sa sato, tanganing paagi sa satong pakatagal asin sa karangahan hale sa Kasuratan magkaigwa kita nin paglaom.” (Roma 15:4) Kabilang sa mga bagay na isinurat sa pagtokdo sa sato, na nagtatao sa sato nin karangahan asin paglaom, iyo an rekord kan pangyayari kan an mga Israelita patalingkason ni Jehova sa maringis na pang-ooripon kan mapang-aping mga Egipcio. An maingat na pagsiyasat sa nakakaogmang mga pangyayaring iyan, kan maniobrahon ni Jehova an pagkaligtas kan mga aki ni Israel, seguradong makakaparigon na marhay sa boot niato mantang hinahalat niato an marikas an pagdangadang na dakulang kahorasaan.

Iliniligtas ni Jehova an Saiyang Banwaan

7. Kan 1513 B.C.E., anong kritikal na situwasyon an nangyari sa Egipto?

⁷ Taon idto nin 1513 B.C.E. Nagpaabot na si Jehova nin siyam na damat sa mga Egipcio. Pagkatapos na ipaabot an ikasiyam kaiyan, tolos na pinahale ni Faraon si Moises paagi sa mga tataramon na ini: “Humale ka sa atubangan ko! Magmaan ka! Dai mo na pagprobaran na maheling giraray an sakong lalawgon, huli ta sa aldaw na maheling mo an sakong lalawgon ika magagadan.” Si Moises nagsimbag: “Iyan an saimong pagkasabi. Dai ko na poprobaran na maheling pa an saimong lalawgon.”—Exodo 10:28, 29.

8. Anong mga instruksion para sa kaligtasan an itinao sa mga Israelita, asin ano an nagin resulta?

⁸ Ihinayag ngonyan ni Jehova ki Moises na mapaabot sia ki Faraon asin sa gabos na Egipcio nin saro pang damat, an pangultimo. Sa ika-14 kan Abib (Nisan), magagadan an panganay kan gabos na lalaking Egipcio asin kan gabos na hayop. Alagad an mga pamilyang Israelita puedeng makaligtas paagi sa maingat na pagsunod sa mga instruksion nin Dios na itinao ki Moises. Kaipuhan nindang wirikan nin dugo kan kordero an duwang harigi kan pinto asin an itaas kan pinto kan saindang harong saka kaipuhan sindang magdanay sa laog kan harong. Ano an nangyari kan bangging iyan? Togotan niatong si Moises mismo an magsabi sa sato: “Nangyari na kan mga matanga na nin banggi ginadan ni Jehova an gabos na panganay sa daga nin Egipto.” Biglaan an nagin reaksion ni Faraon. Kan ipaapod nia si Moises asin Aaron, sinabi nia sa sainda: “Buhat kamo, lumuwas kamo sa sakong banwaan, . . . asin lakaw kamo, paglingkod kamo ki Jehova, siring sa saindong sinabi.” Asin tolos na naghale an mga Israelita, posibleng labing tolong milyon sinda kaiba an dai mabilang na “dakulang kadaklan na manlaenlaen” na bakong mga Israelita.—Exodo 12:1-7, 29, 31, 37, 38.

9. Saen pinaagi nin Dios an Israel paghale sa Egipto, asin taano?

⁹ An pinakaharaning aagihan kan mga Israelita iyo an Dagat Mediteraneo asin an daga kan mga Filisteo. Alagad teritoryo iyan kan mga kaiwal. Huli kaini, posibleng marhay na tanganing ilikay an saiyang banwaan sa pakikipaglaban, pinaagi sinda ni Jehova sa kaawagan kan  Dagat na Pula. Minsan ngani minilyon an nagbabaklay, bako ining disaregladong kadaklan. An rekord sa Biblia nagsasabi: “An mga aki ni Israel naghale sa daga nin Egipto na organisado siring sa hukbo na makikilaban.”—Exodo 13:17, 18.

“Helingon an Pagliligtas ni Jehova”

10. Taano ta sinabihan nin Dios an Israel na magkampo sa atubangan nin Pihahirot?

¹⁰ Sunod, nagkaigwa nin makangangalas na pagkabaliktad nin mga pangyayari. Sinabi ni Jehova ki Moises: “Taraman mo an mga aki ni Israel, na sinda bumuelta asin magkampo sa atubangan nin Pihahirot sa pag-oltanan nin Migdol asin kan dagat sa atubangan nin Baal-zefon.” Mantang sinusunod ninda an instruksion na ini, an dakulang kaburunyogan na ini nalaom sa pag-oltanan kan kabukidan asin kan golpo kan Dagat na Pula. Garo baga dai na sinda makakadulag. Minsan siring, aram ni Jehova an saiyang ginigibo. Sinabihan nia si Moises: “Papatagason ko nanggad an puso ni Faraon, asin siertong malamag sia sa sainda asin magkakamit ako nin kamurawayan paagi ki Faraon asin sa bilog niang puersa militar; asin an mga Egipcio siertong makakamidbid na ako si Jehova.”—Exodo 14:1-4.

11. (a) Anong paghiro an ginibo ni Faraon, asin ano an reaksion kan mga Israelita? (b) Ano an simbag ni Moises sa reklamo kan Israel?

¹¹ Huling iniisip ni Faraon na napasala sia sa pagtogot sa mga Israelita na humale sa Egipto, naghuhumaring linapag nia sinda asin kaiba nia an 600 na piling karuwahe na pangguerra. Kan maheling kan mga Israelita an hukbo nin mga Egipcio, sinda nagkatarakot nin grabe asin nagreklamo ki Moises: “Huli daw ta mayo man lamang nin mga lugar na lolobngan sa Egipto kaya dinara mo kami digdi tanganing magadan sa kaawagan?” Huling si Moises nagsasarig sa pagliligtas ni Jehova, sia nagsimbag: “Dai kamo matakot. Tumindog kamo nin marigon asin helingon an pagliligtas ni Jehova, na gigibohon nia para sa saindo ngonyan. . . . Si Jehova mismo an makikipaglaban para sa saindo, asin kamo mismo magigin silensio.”—Exodo 14:5-14.

12. Paano ilinigtas ni Jehova an saiyang banwaan?

¹² Kaoyon kan mga tataramon ni Moises na si Jehova mismo an makikipaglaban para sa mga Israelita, nag-interbenir ngonyan an mga puersang nakakalabi sa tawo. An hariging panganoron na naggigiya sa kampamento nin Israel milagrosong ibinalyo kan anghel ni Jehova hale sa enotan pasiring sa likod ninda. Mantang iyan nagtatao nin kadikloman sa mga Egipcio, an hariging panganoron man sanang iyan an nagtao nin liwanag sa mga Israelita. (Exodo 13:21, 22; 14:19, 20) Bilang pagkuyog sa pagboot nin Dios, inunat ngonyan ni Moises an saiyang kamot. An pagkasaysay nagpapadagos: “Pinonan ni Jehova na pasibogon nin magdamlag an dagat paagi sa sarong makosog na doros hale sa sirangan . . . Sa katapustapusi an mga aki ni Israel uminagi sa tahaw kan dagat sa marang daga, mantang an katubigan garo lanob ninda sa saindang too asin sa saindang wala.” Ipinagpadagos kan mga Egipcio an saindang paglapag, alagad si Jehova nasa kampi kan saiyang banwaan. Rinibaraw nia an kampo kan mga Egipcio, dangan sinabi nia ki Moises: “Unata an saimong kamot sa dagat, tanganing bumalik an katubigan asin malantopan an mga Egipcio, an saindang mga karuwahe na pangguerra asin an saindang kabalyeriya.” Lubos an kalaglagan kan mga hukbo ni Faraon kaya  mayo ni sarong soldados an natadang buhay!—Exodo 14:21-28; Salmo 136:15.

Makanood sa Pagligtas sa Israel

13. Ano an nagin reaksion kan mga aki ni Israel sa pagligtas sa sainda?

¹³ Huli sa milagrosong pagliligtas na ini, ano an nagin epekto kaini sa mga nakaligtas? Tara, si Moises asin an mga aki ni Israel gikan sa boot na nag-arawit, na inoomaw si Jehova! Sinda nag-awit: “Mag-aawit ako ki Jehova, ta sia napamuraway na gayo. . . . Si Jehova mamamahala bilang hade sagkod sa panahon na daing talaan, sagkod lamang pa ngani.” (Exodo 15:1, 18) Iyo, an enot na naisip ninda iyo na pamurawayon an Dios. Sa kamugtakan na iyan, nahayag an soberaniya ni Jehova.

14. (a) Ano an manonodan niato manongod ki Jehova sa naeksperyensiahan kan Israel? (b) Ano an teksto kan taon para sa 2008?

¹⁴ Anong pagtotokdo, pagranga, asin paglaom an makukua niato sa nakakapukaw sa boot na mga pangyayaring ini? Siertong maheheling niato na si Jehova andam para sa ano man na pagbalo na kaipuhan na atubangon kan saiyang banwaan. Kaya niang gibohan nin paagi an ano man na kamugtakan na tibaad mapaatubang sa sainda. An Dagat na Pula dai nakaolang sa Israel kan ipaabot ni Jehova an makosog na doros hale sa sirangan. Asin sa katubigan kan iyo man sanang Dagat na Pula pinangyari nia na dian malobong an mga hukbo ni Faraon. Sa paghorophorop kaini, puede man niatong sambiton an mga tataramon kan salmista: “Si Jehova nasa kampi ko; dai ako matatakot. Ano an magigibo sa sako nin daganon na tawo?” (Salmo 118:6) Mararanga man kita kan mga tataramon ni Pablo na nakasurat sa Roma 8:31: “Kun an Dios nasa kampi niato, siisay an matumang sa sato?” Nagtatao nanggad sa sato nin pagsarig an ipinasabong na mga tataramon na ini! Hinahale kaiyan an ano man na takot asin pagduwaduwa niato saka huli kaiyan napapano kita nin paglaom. Kun siring, angay nanggad an satong teksto kan taon para sa 2008: “Tumindog kamo nin marigon asin helingon an pagliligtas ni Jehova”!—Exodo 14:13.

15. Gurano kaimportante an pagkuyog tangani na makalda an Israel hale sa Egipto, asin gurano kaimportante iyan ngonyan?

¹⁵ Ano pa an manonodan niato sa Lagdoan na Pagharale kan Israel sa Egipto? Nanodan niato na dapat niatong kuyogon si Jehova ano man an ipagibo nia sa sato. An mga Israelita makinuyog sa paggibo kan detalyadong mga pag-andam para sa Paskua. Makinuyog sindang nagdanay na nasa laog kan saindang harong kan banggi nin Nisan 14. Kan sa katapustapusi maghale sinda sa Egipto, kaipuhan na maghale sinda na “organisado siring sa hukbo na makikilaban.” (Exodo 13:18) Ngonyan, mahalagang marhay na sunodon niato an paggiya na itinatao sa sato paagi sa “maimbod asin mapagmansay na oripon”! (Mateo 24:45) Kaipuhan niatong hinanyogon na marhay an tataramon nin Dios sa likod niato, na nagsasabi: “‘Iyo ini an dalan. Maglakaw kamo dian,’ enkaso kamo pumatoo o enkaso kamo pumawala.” (Isaias 30:21) Mantang kita parani nang parani sa biglang pag-abot kan dakulang kahorasaan, posibleng marhay na makakaako kita nin nagkapirang  detalyadong instruksion. Tanganing ligtas na malagpasan niato an depisil na mga aldaw na iyan, kaipuhan kitang magdanay na kaoyon kan iba pang maimbod na mga lingkod ni Jehova.

16. Ano an manonodan niato sa paagi kan pagmaniobra nin Dios sa mga bagay-bagay kan kinakalda nia an mga Israelita?

¹⁶ Girumdomon man na pinalikaw ni Jehova an mga Israelita sa lugar na garo baga nalaom sinda sa pag-oltanan kan kabukidan asin kan Dagat na Pula. Garo baga talagang bakong tama idto. Alagad kontrolado ni Jehova an mga bagay-bagay, asin an gabos na iyan nakapagtao nin kaomawan sa saiya asin nagresulta sa pagkaligtas kan saiyang banwaan. Ngonyan, tibaad dai niato malinaw na nasasabotan an paagi kan pag-asikaso sa nagkapirang organisasyonal na bagay, alagad igwa nanggad kita nin dahelan na magtiwala sa paggiya ni Jehova paagi sa saiyang maimbod na pinakapaagihan nin pagkomunikar. Kun beses, an mga kaiwal niato tibaad garo baga iyo an nanggagana. Sa limitadong pagmansay niato, tibaad dai niato nasasabotan an bilog na detalye. Sa ibong kaiyan, may kakayahan si Jehova na imaniobra an mga bagay-bagay sa tamang panahon, siring kan ginibo nia kaidto sa mga aki ni Israel.—Talinhaga 3:5.

Magsarig ki Jehova

17. Taano ta lubos kitang makakasarig sa paggiya nin Dios?

¹⁷ Naiimahinar daw nindo an pagsarig na siertong namatean kan mga Israelita mantang hinohorophorop ninda an hariging panganoron na idto kun aldaw asin an hariging kalayo kun banggi? Katunayan idto na ginigiyahan kan “anghel kan tunay na Dios” an saindang pagbaklay. (Exodo 13:21, 22; 14:19) Ngonyan, makakasarig kita na si Jehova kaibanan kan saiyang banwaan tanganing maggiya, magprotehir, asin magligtas sa sainda. Puede niatong isapuso an panugang ini: “Dai [ni Jehova] papabayaan an mga maimbod sa saiya. Sagkod sa panahon na daing talaan sinda babantayan nanggad.” (Salmo 37:28) Nungka niatong paglingawan an makapangyarihan na mga hukbo nin mga anghel na nagtatabang sa mga lingkod nin Dios ngonyan. Huli sa pagsuportar ninda, ‘makakatindog kita nin marigon asin maheheling niato an pagliligtas ni Jehova.’—Exodo 14:13.

18. Taano ta kaipuhan na “isulog [niato] an bilog na pangalasag hale sa Dios”?

¹⁸ Ano an makakatabang sa sato gabos na ‘makatindog nin marigon’ sa dalan kan katotoohan? Iyan paagi sa pagsulog kan espirituwal na pangalasag na ilinadawan ni Pablo sa saiyang surat sa mga taga Efeso. Mangnohon na sinasadol kita kan apostol na ‘isulog an bilog na pangalasag hale sa Dios.’ Isinusulog daw niato an gabos na kabtang kan espirituwal na pangalasag na ini? Sa maabot na taon, marahay na siyasaton nin lambang saro an saiyang sadiri tanganing seguradohon na sulog nia sa tamang paagi an lambang kabtang kan pangalasag na iyan. Aram kan satong kaiwal, si Satanas na Diablo, an satong mga kaluyahan, asin pinagmamaigotan niang madakop kita na nagpapabaya o na atakehon kita kun saen an kaluyahan niato. “Kita nakikipaggumolan” sa marigsok na mga puersang espiritu. Pero, paagi sa kosog ni Jehova, manggagana kita!—Efeso 6:11-18; Talinhaga 27:11.

19. Kun makatagal kita, ano an puedeng magin pribilehio niatong gibohon?

¹⁹ Sinabi ni Jesus sa saiyang mga parasunod: “Huli sa saindong pakatagal makakamtan nindo an saindong kalag.” (Lucas 21:19) Logod na kabilang kita sa mga maimbod na nagtatagal sa ano man na kasakitan na tibaad napapaatubang sa sainda asin sa siring magkaigwa kita nin pribilehio, huli sa dai na kutana maninigong kabootan nin Dios, na ‘tumindog nin marigon asin helingon an pagliligtas ni Jehova.’

Ano an Isisimbag Nindo?

• Anong nakakapukaw sa boot na mga pangyayari an madali nang mag-abot?

• Paano ipinaheling ni Jehova an saiyang kapangyarihan na magligtas kan 1513 B.C.E.?

• Ano an determinado nindong gibohon sa ngapit?

[Mga Hapot Para sa Pag-adal]

[Blurb sa pahina 20]

An teksto kan taon para sa 2008 iyo an: “Tumindog kamo nin marigon asin helingon an pagliligtas ni Jehova.”—Exodo 14:13.

[Ritrato sa pahina 17]

“An gabos na bagay na isinurat kaidto isinurat sa pagtokdo sa sato”

[Ritrato sa pahina 18]

An pagigin matagas ni Faraon nagbunga nin grabeng kapahamakan sa Egipto

[Ritrato sa pahina 19]

An Israel nakaligtas kan gibohon ninda an gabos na ipinagboot ni Jehova