An Bagong Pag-aadalan na Edisyon kan An Torrengbantayan

AN MAGASIN na binabasa nindo iyo an enot na isyu kan pag-aadalan na edisyon kan An Torrengbantayan. Gusto niamong ipaliwanag an nagkapira sa mga kabtang kan bagong format kan magasin na ini.

Ipinupublikar an pag-aadalan na edisyon para sa Mga Saksi ni Jehova asin nag-ooswag na mga inaadalan sa Biblia. Ipupublikar iyan sarong beses kada bulan asin magkakaigwa iyan nin magsalang apat o limang artikulong pag-aadalan. An iskedyul sa pag-orolay sa mga artikulong pag-aadalan nakaimprenta sa tutob kan magasin. Bakong arog kan pampublikong edisyon kan An Torrengbantayan, an pag-aadalan na edisyon dai magkakaigwa nin laen-laen na ilustrasyon sa tutob kan kada isyu, huling dai iyan iaalok sa ministeryo sa langtad.

Sa pahina 2 kan magasin, maheheling nindo an sarong nakakatabang na marhay asin halipot na sumaryo kan katuyohan kan kada artikulong pag-aadalan o serye, saka mga titulo kan sekondaryong mga artikulo. Manonompongan kan mga namamayo sa Pag-adal sa Torrengbantayan na an kabtang na iyan makakatabang na marhay mantang nag-aandam sinda para sa makahulogan na pag-orolay sa mga artikulo sa pagtiripon kan kongregasyon.

Maririsa nindo na an mga artikulong pag-aadalan mas halipot nin kadikit kisa sa dati. Bilang resulta, mas dakol na panahon an itinatao para sa pag-orolay sa importanteng marhay na mga teksto durante kan Pag-adal sa Torrengbantayan. Maogma niamo kamong dinadagka na basahon an gabos na sitadong teksto kada semana. An nagkapirang sitadong teksto may nakalaag na “basahon” asin maninigong basahon saka pag-olayan iyan durante kan Pag-adal sa Torrengbantayan. An ibang teksto puede man na basahon sagkod na itinotogot kan oras. Sa nagkapirang artikulo, makakaheling kamo nin mga tekstong may nakalaag na “ikomparar.” Huling an siring na mga teksto dai direktang nagpapatunay sa pangenot na mga punto sa parapo, sa parate dai iyan babasahon sa pagtiripon kan kongregasyon. Pero, an mga teksto na may nakalaag na “ikomparar” igwa nin interesanteng suplementaryong impormasyon, o iyan puedeng dai direktang nagsusuportar sa mga puntong pinag-oolayan. Dinadagka niamo kamo na basahon iyan mantang nag-aandam para sa Pag-adal sa Torrengbantayan. Tibaad puede nindong sambiton iyan sa saindong mga komento.

An taonan na report dai na maheheling sa An Torrengbantayan. Poon sa 2008, maheheling iyan bilang suplemento sa An Satong Ministeryo sa Kahadean saka sa Yearbook. Minsan siring, arog kan ipinaparisa sa enotan, an pag-aadalan na edisyon igwa nanggad nin sekondaryong mga artikulo. Minsan ngani dakol sa mga ini an dai totokaron sa pagtiripon kan kongregasyon, dinadagka kamo na maingat na basahon iyan. Igwa man iyan nin espirituwal na kakanon hale sa “maimbod asin mapagmansay na oripon.”—Mat. 24:45-47.

Sa katapustapusi, an pag-aadalan na edisyon asin an pampublikong edisyon kan An Torrengbantayan bakong duwang magkalaen na magasin. Iyan parehong An Torrengbantayan Nagpapahayag kan Kahadean ni Jehova. Igwa iyan nin magkaparehong mga parapo sa pahina 2 na nagpapaliwanag kan katuyohan kan An Torrengbantayan. Pareho iyan kaiba sa taonan na bound volume. Asin manonompongan an impormasyon na hale sa duwang iyan sa kabtang na “Nagigirumdoman daw Nindo?” na ipupublikar sa pag-aadalan na edisyon.

Poon kan 1879, sa mga panahon nin guerra, kasakitan sa pagbuhay, asin persekusyon, maimbod na ibinabalangibog kan An Torrengbantayan an mga katotoohan manongod sa Kahadean nin Dios. Ipinapamibi niamo na paagi sa bendisyon ni Jehova, logod na ipadagos kaiyan an siring na gibohon sa bagong format kaiyan. Asin ipinapamibi niamo na logod an bendisyon ni Jehova mapasaindo, an parabasa, mantang ginagamit nindo nin epektibo an bagong pag-aadalan na edisyon kan An Torrengbantayan.