Ibinilang na Angay na Giyahan sa mga Burabod kan Tubig nin Buhay
Ibinilang na Angay na Giyahan sa mga Burabod kan Tubig nin Buhay
“An Kordero . . . magpapastor sa sainda, asin magiya sa sainda sa mga burabod kan tubig nin buhay.”—KAP. 7:17.
1. Paano ipinapamidbid kan Tataramon nin Dios an linahidan na mga Kristiano, asin anong paninimbagan an itinao ni Jesus sa sainda?
IPINAPAMIDBID kan Tataramon nin Dios an linahidan na mga Kristiano na nangangataman kan intereses ni Cristo digdi sa daga bilang “an maimbod asin mapagmansay na oripon.” Kan siyasaton ni Cristo an “oripon” kan 1918, nanompongan nia an mga linahidan sa daga na maimbod na nagtatao nin espirituwal na “kakanon sa tamang panahon.” Bilang an Kagurangnan, naogma si Jesus pakatapos kaiyan na nombrahan sinda na “mamahala sa gabos niang rogaring.” (Basahon an Mateo 24:45-47.) Sa paaging ini, bago mag-ako nin langitnon na mana, an mga linahidan naglilingkod sa ibang mga parasamba ki Jehova digdi sa daga.
2. Iladawan an mga rogaring ni Jesus.
2 An sarong kagurangnan igwa nin autoridad na pamahalaan an saiyang mga rogaring asin puede nia sindang gamiton sa paagi na gusto nia. Kaiba sa mga rogaring ni Jesu-Cristo, an Hade na pinatukaw ni Jehova, an gabos na intereses kan Kahadean sa daga. Kaiba dian an “dakulang kadaklan” na naheling ni apostol Juan sa bisyon. Siring kaini an pagkaladawan ni Juan sa dakulang kadaklan: “Uya! naheling ko an sarong dakulang kadaklan, na dai nin siisay man na makakabilang, hale sa gabos na nasyon asin tribo asin banwaan patin lenguahe, na nagtitindog sa atubangan kan trono asin sa atubangan kan Kordero, may sulot na puting haralabang gubing; asin igwa nin mga sanga nin palma sa saindang mga kamot.”—Kap. 7:9.
3, 4. Paanong an mga kabilang sa dakulang kadaklan may dakula nanggad na pribilehio?
3 An mga miembro kan dakulang kadaklan na iyan kabilang sa mga nasambitan ni Jesus bilang “ibang mga karnero” nia. (Juan 10:16) An saindang paglaom iyo na mabuhay sagkod lamang sa paraisong daga. Nananarig sinda na ‘gigiyahan sinda ni Jesus sa mga burabod kan tubig nin buhay’ asin na “papahidon nin Dios an gabos na luha sa saindang mga mata.” Huli sa paglaom na iyan, “linabahan ninda an saindang haralabang gubing asin pinaputi iyan sa dugo kan Kordero.” (Kap. 7:14, 17) Nagtutubod sinda sa atang ni Jesus, asin huli kaini igwa sinda nin ‘puting mga gubing’ sa pagheling nin Dios. Ipinahayag sindang matanos bilang mga katood nin Dios, kapareho ni Abraham.
4 Dugang pa, mantang an nagdadakol na dakulang kadaklan kan ibang mga karnero minamansay nin Dios bilang matanos, makakalaom sinda na makaligtas sa pagkalaglag kan sistemang ini nin mga bagay sa dakulang kahorasaan. (Sant. 2:23-26) Puede sindang dumayupot ki Jehova, asin bilang sarong grupo, igwa sinda nin makangangalas na oportunidad na makaligtas sa Armagedon. (Sant. 4:8; Kap. 7:15) Bako sindang independiente kundi andam na maglingkod sa pagdirehir kan langitnon na Hade asin kan saiyang linahidan na mga tugang sa daga.
5. Paano sinusuportaran kan mga kabilang sa dakulang kadaklan an linahidan na mga tugang ni Cristo?
5 An linahidan na mga Kristiano napaatubang asin padagos na mapapaatubang sa grabeng pagtumang kan kinaban ni Satanas. Minsan siring, makakasarig sinda sa suporta kan saindang kairiba na kabilang sa dakulang kadaklan. Mantang kakadikit na ngonyan an linahidan na mga Kristiano, an dakulang kadaklan nadadagdagan nin ginatos na ribo taon-taon. Dai madidirehiran nin personal kan mga linahidan an kada saro kan mga 100,000 na Kristianong kongregasyon sa bilog na kinaban. Huli kaini, an sarong aspekto kan suporta na inaako kan mga linahidan hale sa ibang karnero iyo an paglilingkod kan kualipikadong mga lalaki kan dakulang kadaklan bilang kamagurangan kan kongregasyon. Nagtatabang sinda sa pag-asikaso sa minilyon na Kristiano na ipinaniwala ngonyan sa “maimbod asin mapagmansay na oripon.”
6. Paano ihinula an pagsuportar sa linahidan na mga Kristiano kan saindang kairibang ibang mga karnero?
6 Ihinula ni propeta Isaias an gikan sa boot na pagsuportar sa linahidan na mga Kristiano kan kairiba nindang ibang mga karnero. Sia nagsurat: “Iyo ini an sinabi ni Jehova: ‘An dai binabayadan na mga trabahador nin Egipto asin an mga negosyante nin Etiopia asin an mga Sabeo, haralangkaw na lalaki, madian ngani mismo saimo, asin sinda mapapasaimo. Sa likod mo malakaw sinda.’” (Isa. 45:14) Sa simbolikong paagi, an mga Kristiano na may daganon na paglaom naglalakaw ngonyan sa likod kan grupong linahidan na oripon asin kan Namamahalang Grupo kaiyan, na sinusunod an saindang pamomoon. Bilang “dai binabayadan na mga trabahador,” an ibang mga karnero gikan sa boot asin bilog na pusong naggagamit kan saindang kosog saka materyal na mga rogaring bilang pagsuportar sa pambilog na kinaban na paghuhulit na inasignar ni Cristo sa saiyang linahidan na mga parasunod sa daga.—Gibo 1:8; Kap. 12:17.
7. Para sa anong mga pribilehio sinasanay an dakulang kadaklan?
7 Mantang sinusuportaran ninda an linahidan na mga tugang ninda, an mga miembro kan dakulang kadaklan sinasanay bilang pundasyon kan bagong sosyedad nin tawo na mabubuhay pagkatapos kan Armagedon. An pundasyon na iyan dapat na masarig asin makosog, saka an mga miembro kaiyan dapat na gikan sa boot patin kayang gibohon an pagdirehir kan Kagurangnan. An lambang Kristiano tinatawan nin oportunidad na ipaheling na magagamit sia kan Hade, si Cristo Jesus. Paagi sa pagtubod asin pagpaheling nin kaimbodan ngonyan, ipinapaheling nia na magigin marahay an saiyang paghimate kun tawan na sia kan Hade nin mga instruksion sa bagong kinaban.
Pinapatunayan kan Dakulang Kadaklan an Saindang Pagtubod
8, 9. Paano pinapatunayan kan mga kabilang sa dakulang kadaklan an saindang pagtubod?
8 An kairibang ibang mga karnero kan kongregasyon nin linahidan na mga Kristiano pinapatunayan an saindang pagtubod sa manlaenlaen na paagi. Enot, sinusuportaran ninda an mga linahidan sa pagbalangibog kan maogmang bareta kan Kahadean nin Dios. (Mat. 24:14; 28:19, 20) Ikaduwa, gikan sa boot sindang nagpapasakop sa pagdirehir na itinatao kan Namamahalang Grupo.—Heb. 13:17; basahon an Zacarias 8:23.
9 Ikatolo, sinusuportaran kan mga miembro kan dakulang kadaklan an linahidan na mga tugang ninda paagi sa pamumuhay na kaoyon kan matanos na mga prinsipyo ni Jehova. Pinagmamaigotan nindang kultibaron an “pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpupugol sa sadiri.” (Gal. 5:22, 23) Ngonyan, an pagpaheling kan siring na mga kualidad, imbes na pagpaheling kan “mga gibo kan laman,” tibaad bakong popular. Pero, an mga miembro kan dakulang kadaklan determinado na likayan an “pakikisaro, pagkamaati, malaswang gawe-gawe, idolatriya, paggibo nin espiritismo, mga pag-iriwal, mapait na paglalaban, pangimon, mga pagputok nin kaanggotan, mga pasuruhay, pagkabaranga, mga sekta, mga pagkauri, mga pagburat, mariribok na pag-ogma, asin an mga bagay na kapareho kaini.”—Gal. 5:19-21.
10. Ano an determinasyon kan mga miembro kan dakulang kadaklan?
10 Mantang bako kitang sangkap, magigin depisil an pagpaheling nin espirituwal na mga bunga, paglikay sa mga gibo kan laman, asin paglaban sa mga panggigipit kan kinaban ni Satanas. Minsan siring, determinado kita na dai pagtogotan na maapektaran an satong makosog na pagtubod o lumuya an satong pagkamoot ki Jehova huli sa pagkadesganar na resulta nin personal na mga kaluyahan, temporaryong mga pagkasudya, o pisikal na mga limitasyon. Aram niato na gigibohon ni Jehova an saiyang ipinanuga—na ingatan na buhay an dakulang kadaklan sa dakulang kahorasaan.
11. Anong mga taktika an ginamit ni Satanas sa saiyang mga paghihingoa na paluyahon an pagtubod kan mga Kristiano?
11 Minsan siring, danay kitang nagbabantay huling aram niato na an satong tunay na kaiwal iyo an Diablo, asin dai sia minasuko tolos. (Basahon an 1 Pedro 5:8.) Hiningoa niang gamiton an mga apostata asin iba pa tanganing papaniwalaon kita na sala an katokdoan na sinusunod niato. Alagad an mga taktikang iyan sa parate nasusudya. Kaagid kaiyan, minsan ngani kun beses napapaluya nin persekusyon an paghuhulit, sa parate pinapakosog sana kaiyan an pagtubod kan mga pinepersegir. Huli kaini, paorog nang paorog na naggagamit si Satanas nin paagi na sa paghona nia magigin mas epektibo sa pagpaluya kan satong pagtubod. Inaaprobetsaran nia an panluluya nin boot. Pinatanidan an enot na siglong mga Kristiano manongod sa peligrong ini kan sabihan sinda: “Horophoropa nindo nin marhay [si Cristo] na nagtagal nin siring na panlilibak nin mga parakasala tumang sa saindang sadiring ikakarahay.” Taano? “Tanganing dai kamo mapagal asin manluya an saindong kalag.”—Heb. 12:3.
12. Paano an hatol sa Biblia nagpapakosog sa mga nanluluya an boot?
12 Namatean na daw nindo na garo baga gusto na nindong pumondo sa paglilingkod ki Jehova? Kun minsan daw namamatean nindo na bako kamong mapanggana? Kun iyo, dai pagtogotan si Satanas na gamiton an siring na mga pagmate na olangon kamo sa paglilingkod ki Jehova. An lubos na pag-adal sa Biblia, odok na pamibi, asin regular na pag-atender sa pagtiripon saka pakikiasosyar sa mga kapagtubod mapakosog sa saindo patin maolang sa saindo na “manluya an saindong kalag.” Si Jehova nanuga na tatabangan nia an mga naglilingkod sa saiya na magkamit nin bagong puersa, asin an saiyang panuga segurado. (Basahon an Isaias 40:30, 31.) Ipagpadagos nindo an saindong paglilingkod sa Kahadean. Likayan an mga disturbo na nakakaubos nin dakol na panahon, asin magkonsentrar sa pagtabang sa iba. Sa siring mapapakosog kamo na magtagal sa ibong nin panluluya nin boot.—Gal. 6:1, 2.
Pagkaligtas sa Kahorasaan Asin Paglaog sa Bagong Kinaban
13. Anong gibohon an naghahalat sa mga makakaligtas sa Armagedon?
13 Pagkatapos kan Armagedon, kadakoldakol na bakong matanos na binuhay liwat an mangangaipo nin pagtotokdo sa mga dalan ni Jehova. (Gibo 24:15) Kaipuhan nindang maaraman an manongod sa atang na pantubos ni Jesus; apuera kaiyan, dapat sindang tokdoan na magtubod sa atang na iyan tanganing akoon ninda an mga pakinabang kaiyan. Kaipuhan nindang isikwal an dating pinaniniwalaan na falsong relihiosong mga ideya asin bayaan an dating pamumuhay ninda. Dapat sindang makanood na magsulog nin bagong personalidad na nagpapamidbid sa tunay na mga Kristiano. (Efe. 4:22-24; Col. 3:9, 10) An mga kabilang sa ibang mga karnero na nakaligtas sa panahon na iyan igwa nin dakol na gigibohon. Kanigoan na kagayagayahan na gibohon an siring na paglilingkod ki Jehova, na mayo kan mga panggigipit asin pangdisturbo kan presenteng marigsok na kinaban!
14, 15. Iladawan an pagrinibayan nin impormasyon kan mga makakaligtas sa dakulang kahorasaan asin kan binuhay liwat na mga matanos.
14 Sa panahon na iyan, dakol man an manonodan kan maimbod na mga lingkod ni Jehova na nagadan bago an ministeryo ni Jesus sa daga. Maaaraman ninda kun siisay an ipinanugang Mesiyas, na linaoman ninda na maheling alagad dai ninda noarin man naheling. Kan sinda buhay pa, ipinarisa na ninda an pagigin andam ninda na matokdoan ni Jehova. Imahinaron an magigin kagayagayahan asin pribilehio na tabangan sinda—halimbawa, an pagpaliwanag ki Daniel kan kaotoban kan mga hula na isinurat nia alagad dai nia nasabotan!—Dan. 12:8, 9.
15 Siempre, minsan ngani dakol an manonodan sa sato kan mga binuhay liwat, dakol kitang ihahapot sa sainda. Puede nindang sabihon sa sato an mga detalye kan mga pangyayari na nasambitan sa Biblia alagad dai ilinadawan nin detalyado. Isip-isipon kun gurano kanakakapukaw sa boot na maaraman an personal na mga detalye manongod ki Jesus hale sa pinsan niang si Juan Bautista! An mga manonodan niato nin direkta sa siring na maimbod na mga saksi daing duwa-duwa na matao sa sato nin orog pa nganing pakasabot manongod sa Tataramon nin Dios kisa sa pakasabot niato ngonyan. An maimbod na mga lingkod ni Jehova na nagadan—kaiba an mga kabilang sa dakulang kadaklan na nagadan durante kan panahon kan katapusan—mag-aako nin “mas marahay na pagkabuhay liwat.” Pinonan ninda an saindang paglilingkod ki Jehova sa sarong kinaban na dominado ni Satanas. Kanigoan na kagayagayahan para sa sainda na padagos na maglingkod sa irarom nin mas marahay na mga kamugtakan kan bagong kinaban!—Heb. 11:35; 1 Juan 5:19.
16. Oyon sa hula, ano pa an mga mangyayari sa Aldaw nin Paghokom?
16 Sa sarong panahon durante kan Aldaw nin Paghokom, bubukasan an mga rolyo. Kaiba an Biblia, an mga ini an magigin basehan para sa paghokom sa gabos na nabubuhay kun dapit sa pagigin maninigo ninda na umako nin buhay na daing katapusan. (Basahon an Kapahayagan 20:12, 13.) Sa katapusan kan Aldaw nin Paghokom, an lambang indibiduwal magkakaigwa na nin igong panahon na ipaheling kun saen sia kampi sa isyu nin unibersal na soberaniya. Susuportaran daw nia an areglo kan Kahadean asin totogotan an Kordero na giyahan sia sa “mga burabod kan tubig nin buhay”? O makontra daw sia, na nagsasayumang magpasakop sa Kahadean nin Dios? (Kap. 7:17; Isa. 65:20) Sa panahon na iyan, an gabos na nasa daga magkakaigwa na nin oportunidad na gumibo nin personal na desisyon, na dai naaapektaran nin minanang kasalan o nin marigsok na mga kamugtakan. Mayo nin makakakuestion sa pagigin makatanosan kan pangultimong paghokom ni Jehova. An mga marigsok sana an malalaglag sagkod pa man.—Kap. 20:14, 15.
17, 18. May anong maogmang pag-antisipar an pagtanaw kan linahidan na mga Kristiano asin kan ibang mga karnero sa Aldaw nin Paghokom?
17 An linahidan na mga Kristiano ngonyan, huling ibinilang na angay na mag-ako kan Kahadean, maogmang inaantisipar an pamamahala ninda durante kan Aldaw nin Paghokom. Dakulang pribilehio nanggad an mapapasainda! An oportunidad mismong iyan nagmomotibar sa sainda na sunodon an hatol na itinao ni Pedro sa enot na siglong mga tugang ninda: “Orog nindong gibohon an saindong bilog na makakaya tanganing masierto an pag-apod asin pagpili sa saindo; huli ta kun padagos nindong ginigibo an mga bagay na ini dai nanggad kamo masusudya. Sa katunayan, sa siring abundang itatao sa saindo an pakalaog sa daing katapusan na kahadean kan satong Kagurangnan asin Paraligtas na si Jesu-Cristo.”—2 Ped. 1:10, 11.
18 Ipinaggagayagaya kan ibang mga karnero an oportunidad na iyan kan linahidan na mga tugang ninda. Determinado sindang suportaran an mga ini. Bilang mga katood nin Dios ngonyan, namomotibar sinda na gibohon an saindang pinakamakakaya sa paglilingkod sa Dios. Durante kan Aldaw nin Paghokom, ikakaogmang marhay ninda an bilog na pusong pagsuportar sa mga areglo nin Dios mantang ginigiyahan sinda ni Jesus sa mga burabod kan tubig nin buhay. Dangan—sa katapustapusi—ibibilang sindang angay na magin mga lingkod ni Jehova sa daga sa bilog na panahon na daing sagkod!—Roma 8:20, 21; Kap. 21:1-7.
Nagigirumdoman daw Nindo?
• Ano an kaiba sa mga rogaring ni Jesus?
• Paano sinusuportaran kan mga kabilang sa dakulang kadaklan an linahidan na mga tugang ninda?
• Anong mga pribilehio asin oportunidad an nakakamtan kan mga kabilang sa dakulang kadaklan?
• Paano nindo minamansay an Aldaw nin Paghokom?
[Mga Hapot Para sa Pag-adal]
[Ritrato sa pahina 25]
Linabahan kan mga kabilang sa dakulang kadaklan an saindang haralabang gubing asin pinaputi iyan sa dugo kan Kordero
[Ritrato sa pahina 27]
Ano an linalaoman nindong manodan sa binuhay liwat na mga maimbod?