Kun an mga Kristiano Sinasaligsig Siring sa Trigo

KAN madali na siang magadan, pinatanidan ni Jesus an saiyang mga disipulo: “Uya! hinagad ni Satanas na saligsigon kamo siring sa trigo.” (Luc. 22:31) Ano an boot niang sabihon sa mga tataramon na iyan?

Kan panahon ni Jesus, an pag-ani nin trigo nangangaipo nin dakol na panahon asin paghihingoa. Enot, tinitipon nin mga paraani an mga poon nin trigo hale sa oma. Dangan, irinarapas ninda an mga iyan sa ibabaw nin sarong matagas na bagay o naggagamit nin mga hayop na pang-oma tanganing guyodon an pangginik na paragos sa ibabaw kan mga poon nin trigo tanganing magkasuruwaysuway iyan. Hinahale kan prosesong ini an tipasi sa mga poon asin apa. Sunod, an saralak na tipasi, poon, asin apa ipinapahimalid kan mga paraoma sa doros. An mga laman, o an tipasi, nahuhulog pabalik sa pinaggiginikan, mantang pinapalid kan doros an ohot asin apa. Sa katapustapusi, an mga laman kan tipasi maingat na sinasaligsig tanganing haleon sa mga iyan an ano man na dai kaipuhan.

Kaoyon kan mga tataramon ni Jesus, daing ontok na inaatake ni Satanas an mga disipulo ni Jesus kaidto, asin inaatake man nia kita ngonyan. (Efe. 6:11) Totoo, bakong gabos na kadepisilan sa buhay na napapaatubang sa sato direktang hale ki Satanas. (Ecl. 9:11) Pero, gustong-gusto ni Satanas na gamiton an ano man na paagi na magagamit nia tanganing raoton an satong integridad. Halimbawa, tibaad sugotan nia kita na magkaigwa nin materyalistikong estilo nin pamumuhay, magpili nin nakakaraot na aling-alingan, o gumawe nin imoral sa sekso. Tibaad gamiton man nia an mga kaibaiba sa eskuelahan o sa trabaho asin an daing pagtubod na mga paryente tanganing impluwensiahan kita na lubos na pagmaigotan na kamtan an gabos na ikakatao kan kinaban na ini sa pag-eskuela patin pagtrabaho. Apuera kaini, puedeng gamiton ni Satanas an direktang persekusyon sa paghihingoang raoton an satong integridad sa Dios. Siempre, dakol pang ibang paagi an ginagamit ni Satanas tanganing garo baga saligsigon kita.

Paano kita makakapanindogan tumang sa makapangyarihan na kaiwal na ini? Dai niato iyan magigibo sa sadiri niatong kosog. Mas makosog si Satanas kisa sa sato; minsan siring, aram niato na si Jehova mas makosog nanggad kisa ki Satanas. Kun kita igwa nin lubos na kompiansa ki Jehova, namimibi nin odok para sa kadonongan asin kosog nin boot na makatagal, saka nananarig nin lubos sa saiyang paggiya, papakosogon nia kita na labanan an mga pag-atake ni Satanas.—Sal. 25:4, 5.

Kun nababalo, kaipuhan niato an kakayahan na “mamidbid an tama sagkod an sala” asin sa siring malikayan na madaya kan mga pakana ni Satanas. (Heb. 5:13, 14) Matatabangan kita ni Jehova na pataluboon an kakayahan na iyan. Dangan kaipuhan niatong magdanay sa tamang dalan, ano man an mangyari. Kun masunod kita sa paggiya ni Jehova, seguradong susuportaran nia an satong pusoan na determinasyon na gibohon an tama.—Efe. 6:10.

Tibaad pagmaigotan ni Satanas na saligsigon kita siring sa trigo. Alagad paagi sa kosog ni Jehova, makakapanindogan kita tumang sa saiya, na marigon sa pagtubod. (1 Ped. 5:9) Iyo, inaasegurar kita kan Tataramon ni Jehova: “Tumangon nindo an Diablo, asin sia madulag sa saindo.”—Sant. 4:7.