Naghihimate an mga “May Tamang Inklinasyon”

“An gabos na may tamang inklinasyon sa buhay na daing katapusan nagturubod.”—GIBO 13:48.

1, 2. Ano an ginibo kan enot na mga Kristiano huli sa hula ni Jesus na an maogmang bareta ihuhulit sa bilog na ineerokan na daga?

ININGATAN sa libro kan Biblia na Gibo an nakakaogmang pagkasaysay dapit sa kun ano an ginibo kan enot na mga Kristiano huli sa hula ni Jesus na an maogmang bareta kan Kahadean ihuhulit sa bilog na ineerokan na daga. (Mat. 24:14) Garo man sana inilawan kan maigot na mga parahulit an dalan para sa gabos na masurunod sa sainda. Bilang resulta kan maigot na pagpapatotoo kan mga disipulo ni Jesus sa Jerusalem, rinibong tawo, kaiba na an “sarong dakulang kadaklan nin mga saserdote,” an nag-ayon sa kongregasyon kan enot na siglo.—Gibo 2:41; 4:4; 6:7.

² Tinabangan kan enot na mga misyonero an dakol pang tawo na akoon an Kristianismo. Halimbawa, si Felipe nagduman sa Samaria, na dian dakol na tawo an nagtao nin atension sa saiyang mga tataramon. (Gibo 8:5-8) Si Pablo nagbiahe sa dakol na lugar na may manlaenlaen na kaibaiba, na ihinuhulit an Kristianong mensahe sa Chipre, mga parte nin Asia Minor, Macedonia, Grecia, asin Italya. Sa mga siudad na hinulitan nia, kadakol na Judio sagkod Griego an nagturubod. (Gibo 14:1; 16:5; 17:4) Si Tito may ginibong ministeryo sa Creta. (Tito 1:5) Si Pedro sibot sa Babilonya, asin kan panahon na ginibo nia an saiyang enot na surat, kan mga 62-64 C.E., an gibohon kan mga Kristiano aram nang marhay sa Ponto, Galacia, Capadocia, Asia, asin Bitinia. (1 Ped. 1:1; 5:13) Nakakaogma nanggad na mga panahon idto! Maigoton an Kristianong mga parahulit na idto kan enot na siglo kaya sinabi kan mga kaiwal ninda na ‘pinabagsak ninda an ineerokan na daga.’—Gibo 17:6; 28:22.

3. Ano an mga resulta ngonyan kan paghuhulit kan mga parabalangibog kan Kahadean, asin ano an namamatean nindo huli kaiyan?

³ Sa presenteng mga panahon man, an Kristianong kongregasyon binendisyonan nin pambihirang pag-oswag. Bako daw na napaparigon an saindong boot kan binabasa nindo an taonan na report kan Mga Saksi ni Jehova asin kan naheheling nindo an mga resulta sa bilog na kinaban? Bako daw na naoogma kamong maaraman na an mga parabalangibog kan Kahadean nagkondukta nin labing anom na milyon na pag-adal sa Biblia durante kan 2007 taon nin paglilingkod? Dugang pa, an bilang kan mga nag-atender sa Memorial kan kagadanan ni Jesu-Cristo kan nakaaging taon nagpaparisa na mga dies milyones katawo na bakong Saksi ni Jehova an igwa nin igong interes sa maogmang bareta kaya nag-atender sinda sa mahalagang selebrasyon na ini. Ipinaparisa kaini na kadakol pa kan gigibohon.

4. Sairisay an naghihimate sa mensahe kan Kahadean?

⁴ Ngonyan, siring kan enot na siglo, “an gabos na may tamang inklinasyon sa buhay na daing katapusan” naghihimate sa mensahe nin katotoohan. (Gibo 13:48) Dinadagka ni Jehova sa saiyang organisasyon an siring na mga tawo. (Basahon an  Haggeo 2:7.) Anong kaisipan manongod sa Kristianong ministeryo an kaipuhan niatong papagdanayon tanganing lubos kitang makipagtabangan sa pagtitipon na ini?

Maghulit na Daing Ipinapaorog

5. Anong klaseng mga tawo an igwa kan pabor ni Jehova?

⁵ Nasabotan kan mga Kristiano kan enot na siglo na “an Dios daing ipinapaorog, kundi sa lambang nasyon an tawo na natatakot sa saiya asin naggigibo nin katanosan saiyang inaako.” (Gibo 10:34, 35) An pagkaigwa nin marahay na relasyon nin sarong tawo ki Jehova nakadepende sa pagpaheling nia nin pagtubod sa atang na pantubos ni Jesus. (Juan 3:16, 36) Asin kabotan ni Jehova na “an gabos na klase nin tawo makaligtas asin makaabot sa tamang kaaraman dapit sa katotoohan.”—1 Tim. 2:3, 4.

6. Ano an dai maninigong gibohon kan mga parahulit kan Kahadean, asin taano?

⁶ Magigin sala para sa mga parabalangibog kan maogmang bareta na husgaran tolos an mga tawo basado sa saindang rasa, posisyon sa sosyedad, panluwas na itsura, relihion, o ano man na iba pang karakteristiko. Isip-isipon nguna: Bako daw na nagpapasalamat kamo na dai kamo hinusgaran tolos kan tawo na enot na nakipag-olay sa saindo manongod sa mga katotoohan na sono sa Kasuratan? Kaya taano ta mapugol kamo sa pagpaabot kan mensahe na puedeng makapagligtas sa siisay man na tibaad mahinanyog dian?—Basahon an Mateo 7:12.

7. Taano ta dai niato dapat na husgaran an mga tawo na hinuhulitan niato?

⁷ Ninombrahan ni Jehova si Jesus bilang Hokom; huli kaini mayo kita kan deretso na husgaran an siisay man. Angay iyan huli ta, bakong arog ni Jesus, kita makakahusgar sana oyon sa ‘naheheling kan satong mga mata’ o ‘nadadangog kan satong mga talinga,’ mantang si Jesus nakakabasa kan personal na mga kaisipan asin pangangatanosan kan puso.—Isa. 11:1-5; 2 Tim. 4:1.

8, 9. (a) Anong klaseng tawo si Saulo bago sia nagin Kristiano? (b) Ano an maninigong itokdo sa sato kan eksperyensia ni apostol Pablo?

⁸ Haros gabos na klase nin mga tawo nagin mga lingkod ni Jehova. An sarong marahayon na halimbawa iyo si Saulo nin Tarso, na nagin midbid bilang si apostol Pablo. Si Saulo, na Fariseo, sarong maringis na paratumang sa mga Kristiano. An saiyang sinserong paniniwala na an mga Kristiano falso iyo an nagin dahelan tanganing persegiron nia an Kristianong kongregasyon. (Gal. 1:13) Sa punto de vista nin tawo, siertong sia garo baga saro sa mga dai nanggad lalaoman na magin Kristiano. Pero, si Jesus may naheling na marahay sa puso ni Saulo asin pinili nia ini tanganing otobon an sarong espesyal na sugo. Bilang resulta, si Saulo nagin saro sa pinakaaktibo asin pinakamaigot na mga miembro kan Kristianong kongregasyon kan enot na siglo.

⁹ Ano an itinotokdo sa sato kan eksperyensia ni apostol Pablo? Sa satong teritoryo, tibaad may mga grupo nin tawo na garo baga kontra sa dara niatong mensahe. Minsan ngani tibaad garo baga kadudaduda na magigin tunay na Kristiano an siisay man sa sainda, dai kita maninigong pumondo sa pagmamaigot na mangatanosan sa sainda. Kun beses naghihinanyog sa satong mensahe dawa an mga tawo na dai nanggad nindo lalaoman na magin interesado. An sugo sa sato iyo na padagos na maghulit sa gabos na tawo na “daing ontok.”—Basahon an Gibo 5:42.

Nakatagamang mga Bendisyon Para sa mga Naghuhulit na “Daing Ontok”

10. Taano ta dai kita maninigong magpugol na hulitan an mga tawo na tibaad garo baga nakakatakot? Magsaysay nin lokal na mga eksperyensia.

¹⁰ An panluwas na itsura puedeng makadaya. Halimbawa, si Ignacio * nagpoon na makipag-adal sa Biblia sa mga Saksi ni Jehova mientras na sia nasa bilanggoan sa sarong nasyon sa Amerika del Sur. Sia kinakatakotan huli sa saiyang pagigin madahas. Bilang resulta, an mga preso na naggigibo asin nagpapabakal nin mga bagay-bagay sa mga kapwa preso ginagamit si Ignacio tanganing singilon an mga dai tolos nagbabayad nin utang. Minsan siring, mantang nag-ooswag sa espirituwal si Ignacio asin inaaplikar nia an saiyang nanonodan, an dating madahas na maton na ini nagin sarong maboot na tawo. Mayo na nin naggagamit sa saiya tanganing maningil nin utang, pero kontento si Ignacio na an mga katotoohan sa Biblia asin an espiritu nin Dios nagpabago sa saiyang personalidad. Nagpapasalamat man sia huli ta daing ipinapaorog an mga parahayag kan Kahadean na naghingoang adalan sia.

11. Taano ta padagos niatong dinadalaw liwat an mga tawo?

 ¹¹ An saro sa mga dahelan kun taano ta padagos niatong dinadalaw liwat an mga tawo na nakaolay na niato manongod sa maogmang bareta iyo na an saindang mga kamugtakan asin kaisipan puedeng magbago asin talagang nagbabago. Poon kan satong huring pagdalaw, an nagkapira tibaad nagkaigwa nin grabeng helang, nawaran nin trabaho, o nagadanan nin namomotan. (Basahon an Eclesiastes 9:11.) An mga pangyayari sa kinaban tibaad magmotibar sa mga tawo na pakaisipon nin seryoso an manongod sa saindang ngapit. An siring na mga pangyayari puedeng magin dahelan na maghimate an sarong tawo na dating mayong interes o kontra pa ngani. Kun siring, dai kita maninigong magpugol na ihulit sa iba an maogmang bareta sa lambang angay na kamugtakan.

12. Paano niato maninigong mansayon an mga tawo na hinuhulitan niato, asin taano?

¹² Minalataw na tendensia nin mga tawo na magpalaenlaen asin husgaran an iba. Pero, hineheling ni Jehova an mga tawo bilang mga indibiduwal. Naheheling nia an marahay na mga kualidad nin lambang saro. (Basahon an 1 Samuel 16:7.) Maninigong gibohon man niato iyan sa satong ministeryo. Ipinapaheling nin dakol na eksperyensia an marahay na mga resulta kan pagkaigwa nin positibong pagmansay sa gabos na tawong hinuhulitan niato.

13, 14. (a) Taano ta an sarong payunir nagkaigwa nin negatibong reaksion sa sarong babae na nanuparan nia sa ministeryo? (b) Ano an manonodan niato sa eksperyensiang ini?

¹³ Si Sandra, na sarong payunir, naghuhulit sa harong-harong sa sarong isla sa Caribe kan manuparan nia si Ruth, na nakikiayon na gayo sa mga selebrasyon sa karnabal. Si Ruth duwang beses nang nakoronahan bilang reyna kan nasyonal na karnabal. Nagpaheling sia nin pambihirang interes sa sinabi ni Sandra, kaya inareglo an sarong pag-adal sa Biblia. Nagigirumdoman ni Sandra: “Mantang naglalakaw ako pasiring sa saiyang sala, naheling ko an sarong dakulang retrato ni Ruth na nakasulot nin kompleto asin magarbong kostium na pangkarnabal, saka mga tropeo na ginanahan nia. Nasala ako sa paghona na an sarong tawo na popular na gayo asin nakikiayon na gayo sa kaorogmahan sa karnabal dai magdadanay na interesado sa katotoohan. Kaya ipinondo ko an pagdalaw sa saiya.”

¹⁴ Paghaloyhaloy, nagduman si Ruth sa Kingdom Hall, asin pagkatapos kan pagtiripon hinapot nia si Sandra, “Taano ta nagpondo ka na sa pagduman sa sako tanganing adalan ako?” Si Sandra naghagad nin dispensasyon asin inareglo nia na ipadagos an pag-adal. Si Ruth marikas na nag-oswag, hinale an saiyang mga retrato sa karnabal, nagpoon na magpartisipar sa gabos na aktibidad kan kongregasyon, asin idinusay an saiyang buhay ki Jehova. Siempre, napag-isip-isip ni Sandra na sala an enot niang reaksion dapit ki Ruth.

15, 16. (a) Ano an nagin resulta kan pagpapatotoo nin sarong parahayag sa saiyang bayaw? (b) Taano ta an mga kamugtakan nin sarong paryente dai maninigong magpadesganar sa sato na magpatotoo sa saiya?

¹⁵ Nakaeksperyensia man nin positibong mga resulta an dakol na Saksi na nagpatotoo sa daing pagtubod na mga miembro nin pamilya, dawa ngani garo baga harayo an posibilidad na mahimate an mga ini. Arog halimbawa ni Joyce, na sarong Kristiana sa Estados Unidos. An saiyang bayaw pabalikbalik na sa bilanggoan poon pa kan tinedyer ini. “Sinabi nin mga tawo na mayo nin halaga an saiyang buhay,” an estorya ni Joyce, “huli ta imbuelto sia sa mga droga, saro siang parahabon, asin naggibo sia nin dakol na  iba pang maraot na bagay. Dawa siring, sa ibong nin mga kadepisilan, padagos kong ihinulit sa saiya an mga katotoohan sa Biblia sa laog nin 37 taon.” An saiyang mapasensiang paghihingoa abundang binendisyonan kan sa kahurihurihi an saiyang bayaw magpoon nang makipag-adal sa Biblia sa mga Saksi ni Jehova asin tolos na guminibo nin mga pagbabago sa buhay nia. Kasuarin pa sana, sa edad na 50, an bayaw ni Joyce nabautismohan sa sarong pandistritong kombension sa California, E.U.A. Si Joyce nagsabi: “Napahibi ako huli sa kagayagayahan. Ogmahon ako na nungka akong nawaran nin paglaom na mabago sia!”

¹⁶ Tibaad mag-alangan kamong makipag-olay sa nagkapirang paryente nindo manongod sa mga katotoohan sa Biblia huli sa saindang mga kamugtakan. Pero, si Joyce dai nag-alangan na makipag-olay sa saiyang bayaw. Total, paano maaaraman nin saro an nasa puso nin ibang tawo? An tawong iyan tibaad biyong sinsero na naghahanap kan katotoohan. Huli kaini, dai kamo magpugol na itao sa saiya an oportunidad na manompongan iyan.—Basahon an Talinhaga 3:27.

Sarong Epektibong Pantabang sa Pag-adal sa Biblia

17, 18. (a) Ano an ipinapaheling kan mga report hale sa bilog na kinaban manongod sa kahalagahan kan Ano Man Nanggad an Itinotokdo kan Biblia? (b) Ano an saindong nagin positibong mga eksperyensia sa paggamit kan librong ini?

¹⁷ Ipinapaheling kan mga report hale sa mga nasyon sa bilog na kinaban na dakol na tawong sadiosan an puso an may marahay na reaksion sa pantabang sa pag-adal sa Biblia na Ano Man Nanggad an Itinotokdo kan Biblia? Si Penni, na sarong payunir sa Estados Unidos, nakapagpoon nin nagkapirang pag-adal sa Biblia na ginagamit an publikasyon na ini. An duwa sa sainda may edad na asin mga debotong miembro kan saindang kinabibilangan na iglesia. Dai segurado ni Penni kun ano an saindang magigin reaksion sa mga katotoohan na sono sa Kasuratan na ipinepresentar sa librong Itinotokdo kan Biblia. Minsan siring, sia nagsabi, “Huli sa malinaw, lohiko, asin deretso sa puntong pagkapresentar kan impormasyon, tinubod tolos ninda na an saindang nanonodan iyo an katotoohan, na mayo nin argumento o pagkapurisaw sa emosyon.”

¹⁸ Si Pat, na sarong parahayag sa Britania, nagpoon na adalan sa Biblia an sarong babaeng dulag hale sa sarong nasyon sa Asia. An babae napiritan na humale sa saiyang nasyon pagkatapos na an saiyang agom saka mga aking lalaki kuanon kan rebeldeng mga soldados, asin dai na nia noarin man naheling sinda. Hinuma an saiyang buhay, sinolo an saiyang harong, asin linugos sia nin sarong gang. Huli kan gabos na ini, sia nagsaboot na mayo na nin katuyohan an saiyang buhay, asin nagkapirang beses na siang nag-isip na maghugot. Minsan siring, an pag-adal sa Biblia nagtao sa saiya nin paglaom. “An pagigin simple kan mga paliwanag asin ilustrasyon sa librong Itinotokdo kan Biblia nagkaigwa nin pambihirang epekto sa saiya,” an sabi ni Pat. An inaadalan sa Biblia marikas na nag-oswag, nakualipikar na magin  dai pa bautisadong parahayag, asin nagpahayag kan saiyang kamawotan na magpabautismo sa sunod na asamblea. Nakakagayagaya nanggad na tabangan an sinserong mga tawo na masabotan asin maapresyar an paglaom na itinatao kan Kasuratan!

“Dai Kita Mag-ontok sa Paggibo nin Karahayan”

19. Taano ta apuradong gayo an paghuhulit?

¹⁹ Sa kada aldaw na minaagi, nagigin mas apurado an sugo sa sato na maghulit asin gumibo nin mga disipulo. Rinibong tawo na may tamang inklinasyon an naghihimate sa satong paghuhulit kada taon. Pero, “an dakulang aldaw ni Jehova harani na,” na nangangahulogan na an mga tawong nagdadanay sa espirituwal na kadikloman “nagriripaydipay pasiring sa gadanan.”—Sof. 1:14; Tal. 24:11.

20. Ano an maninigo na determinadong gibohon nin lambang saro sa sato?

²⁰ Matatabangan pa niato an siring na mga tawo. Alagad tanganing magibo niato iyan, mahalagang marhay na arogon niato an mga Kristiano kan enot na siglo, na ‘nagpadagos na daing ontok sa pagtokdo asin pagpahayag kan maogmang bareta dapit sa Cristo, si Jesus.’ (Gibo 5:42) Sunodon an saindang halimbawa paagi sa pagmamaigot sa ibong nin kasakitan, paagi sa pagtao nin atension sa saindong “abilidad sa pagtotokdo,” asin paagi sa paghuhulit sa gabos na tawo na daing ipinapaorog! “Dai kita mag-ontok sa paggibo nin karahayan,” huli ta kun magmamaigot kita, aakoon niato an abundang mga bendisyon nin pag-oyon nin Dios.—2 Tim. 4:2; basahon an Galacia 6:9.

[Nota sa Ibaba]

Ano an Isisimbag Nindo?

• Sairisay an naghihimate sa maogmang bareta?

• Taano ta dai niato maninigong husgaran tolos an mga tawong hinuhulitan niato?

• Ano an nagigin mga resulta nin paggamit kan publikasyon na Ano Man Nanggad an Itinotokdo kan Biblia?

[Mga Hapot sa Pag-adal]

[Mga Ritrato sa pahina 13]

Naghihimate an rinibong tawo na sadiosan an puso

[Mga Ritrato sa pahina 15]

Ano an manonodan niato sa mga pagbabagong ginibo ni apostol Pablo?

[Ritrato sa pahina 16]

An mga parabalangibog kan maogmang bareta dai tolos hinuhusgaran an mga tawo