“Padagos Mong Ingatan an Ministeryo na Saimong Inako sa Kagurangnan”
“Padagos Mong Ingatan an Ministeryo na Saimong Inako sa Kagurangnan”
“Padagos mong ingatan an ministeryo na saimong inako sa Kagurangnan, na iyan otobon mo.”—COL. 4:17.
1, 2. Ano an paninimbagan kan mga Kristiano sa katawohan?
IGWA kita nin seryosong paninimbagan sa mga tawo na nabubuhay sa palibot niato. An mga desisyon na ginigibo ninda ngonyan mangangahulogan nin saindang buhay o kagadanan durante kan “dakulang kahorasaan.” (Kap. 7:14) An pinasabngan na kagsurat kan libro nin Talinhaga nagsabi: “Iligtas mo an mga dinadara sa kagadanan; asin an mga nagriripaydipay pasiring sa gadanan, O pugolan mo logod sinda.” Nakakaapod nanggad nin atension an mga tataramon na iyan! An dai niato pag-otob sa satong paninimbagan na magpatanid sa mga tawo dapit sa pagpili na dapat nindang gibohon puedeng magin dahelan na magkasala kita sa dugo. Sa katunayan, an iyo man sanang kabtang kan Kasuratan nagsabi pa: “Kun magsabi ka: ‘Uya! Dai mi ini aram,’ bako daw na maririsa iyan kan mismong nagsisiyasat kan puso, asin maaaraman kan mismong nagbabantay kan saimong kalag asin siertong babalosan nia an daganon na tawo segun sa saiyang aktibidad?” Malinaw nanggad, dai puedeng sabihon kan mga lingkod ni Jehova na ‘dai ninda aram’ an peligro na napapaatubang sa mga tawo.—Tal. 24:11, 12.
2 Mahalaga ki Jehova an buhay. Sinasadol nia an saiyang mga lingkod na gibohon an gabos na posibleng paghihingoa tanganing matabangan ninda na makaligtas an pinakadakol na buhay na mapupuede. An lambang ministro nin Dios dapat na magbalangibog kan nagliligtas-buhay na mensahe na nasa Tataramon nin Dios. An satong gibohon kaagid nin sarong bantay na nagtatao nin patanid kun makaheling sia nin nagdadangadang na peligro. Habo niatong singilon sa sato an dugo kan mga namemeligrong malaglag. (Ezeq. 33:1-7) Kun siring, mahalaga nanggad na magmaigot kita na ‘ihulit an tataramon’!—Basahon an 2 Timoteo 4:1, 2, 5.
3. Anong mga topiko an pag-oolayan sa artikulong ini asin sa masunod na duwang artikulo?
3 Ipapaliwanag sa artikulong ini kun paano nindo mapapangganahan an mga olang sa saindong nagliligtas-buhay na ministeryo asin kun paano nindo matatabangan an mas dakol pang tawo. Tatabangan kamo kan minasunod na artikulo kun paano nindo mapapatalubo an abilidad sa pagtotokdo kan mahalagang marhay na mga katotoohan. Isasaysay kan ikatolong artikulong pag-aadalan an nagkapira sa nakakaparigon sa boot na mga resulta na nakakamtan kan mga parabalangibog kan Kahadean sa bilog na kinaban. Minsan siring, bago niato pag-olayan an mga topikong ini, marahay na repasohon niato kun taano man nanggad ta delikadong gayo an satong mga panahon.
Kun Taano ta an Dakol Mayo nin Paglaom
4, 5. Ano an naeeksperyensiahan nin katawohan, asin ano an reaksion nin dakol na tawo huli kaini?
4 Ipinapaheling kan mga pangyayari sa kinaban na nabubuhay kita sa “pagtatapos kan sistema nin mga bagay” asin na haranihon na an katapusan. Naeeksperyensiahan kan katawohan an mga pangyayari asin kamugtakan na sinabi ni Jesus saka kan saiyang mga disipulo na magigin tanda kan “huring mga aldaw.” An “mga kolog nin kasakitan,” kaiba na an mga guerra, kakulangan nin kakanon, linog, asin iba pang kalamidad, nagpapasakit sa katawohan. Lakop an tampalasan, maimot, asin bakong diosnon na mga kaisipan. Dawa para sa mga tawo na naghihingoang mamuhay kaoyon kan mga pamantayan sa Biblia, ini “delikadong mga panahon na masakit pakibagayan.”—Mat. 24:3, 6-8, 12; 2 Tim. 3:1-5.
5 Minsan siring, an dakulang mayoriya nin katawohan dai nakakaaram kan tunay na kahulogan nin mga pangyayari sa kinaban. Bilang resulta, nahahadit an dakol manongod sa kaligtasan kan saindang sadiri asin kan saindang pamilya. Nakokolgan an boot nin dakol huli sa pagkagadan nin mga namomotan o iba pang personal na mga trahedya. Huling mayo nin tamang kaaraman dapit sa kun taano ta nangyayari an siring na mga bagay asin kun saen puedeng manompongan an solusyon, an mga tawong ini mayo nin paglaom.—Efe. 2:12.
6. Taano ta dai natatabangan kan “Dakulang Babilonya” an saiyang mga parasunod?
6 An “Dakulang Babilonya,” an pambilog na kinaban na imperyo nin falsong relihion, daing gayo nakatao nin karangahan sa katawohan. Sa kabaliktaran, paagi sa “arak kan saiyang pakikisaro,” sia an nagin dahelan na an dakol na tawo magripaydipay sa espirituwal na karibarawan. Dugang pa, paagi sa paggawe na siring sa sarong patotot, inakit asin kinontrol kan falsong relihion an “mga hade kan daga,” na ginagamit an falsong mga doktrina asin espiritistikong mga gibo tanganing papagdanayon an mayoriya kan katawohan na magsunod na daing pagduwaduwa sa saindang gobyerno. Sa siring, an falsong relihion nagkaigwa nin kapangyarihan asin impluwensia, alagad kadungan kaiyan, lubos niang isinikwal an katotoohan.—Kap. 17:1, 2, 5; 18:23.
7. Ano an kaaabtan kan mayoriya sa katawohan, alagad paano matatabangan an nagkapira?
7 Itinokdo ni Jesus na an kadaklan sa katawohan naglalakaw sa halakbang na dalan na pasiring sa kalaglagan. (Mat. 7:13, 14) An nagkapirang tawo yaon sa halakbang na dalan na iyan huli ta tinuyo nindang isikwal an itinotokdo kan Biblia, alagad an dakol na iba pa yaon dian huli ta sinda dinaya, o pinabayaan na nasa kadikloman, manongod sa kun ano man nanggad an kahagadan sa sainda ni Jehova. Tibaad bagohon kan nagkapira an saindang pamumuhay kun matawan sinda kan malinaw na sono sa Kasuratan na mga rason na gibohon iyan. Alagad an mga nagdadanay sa Dakulang Babilonya asin an mga padagos na nagsisikwal sa mga pamantayan sa Biblia dai ililigtas sa “dakulang kahorasaan.”—Kap. 7:14.
Padagos na Maghulit na “Daing Ontok”
8, 9. Ano an reaksion kan mga Kristiano kan enot na siglo kan sinda mapaatubang sa pagtumang, asin taano?
8 Sinabi ni Jesus na an saiyang mga disipulo maghuhulit kan maogmang bareta kan Kahadean asin magibo nin mga disipulo. (Mat. 28:19, 20) Kun siring, an pagpartisipar sa paghuhulit pirmeng minamansay kan tunay na mga Kristiano bilang kaimbodan sa Dios asin pundamental na kahagadan sa saindang pagtubod. Huli kaini, an enot na mga parasunod ni Jesus nagpadagos na maghulit dawa sa ibong nin pagtumang. Sinda nanarig ki Jehova para sa kosog, na namibi na tabangan logod nia sinda na padagos na ‘magtaram kan saiyang tataramon na may bilog na pagkapusoan.’ Bilang simbag, pinano sinda ni Jehova nin banal na espiritu, asin pusoan nindang ipinahayag an tataramon nin Dios.—Gibo 4:18, 29, 31.
9 Kan magin madahas an pagtumang, nag-urong-sulong daw an mga parasunod ni Jesus sa saindang determinasyon na ihulit an maogmang bareta? Dai nanggad. An mga apostol inaresto, pinatakot, asin binugbog kan Judiong mga lider nin relihion na naanggot huli sa saindang paghuhulit. Pero, an mga apostol ‘nagpadagos na daing ontok sa pagtokdo asin pagpahayag kan maogmang bareta dapit sa Cristo, si Jesus.’ Malinaw nindang nasabotan na dapat nindang ‘kuyogon an Dios bilang namamahala imbes na mga tawo.’—Gibo 5:28, 29, 40-42.
10. Anong mga kadepisilan an inaatubang nin mga Kristiano ngonyan, pero ano an tibaad magin resulta kan saindang marahay na paggawe?
10 An kadaklan na lingkod nin Dios ngonyan dai kaipuhan na magtios nin mga pambubugbog o pagkabilanggo huli sa saindang paghuhulit. Minsan siring, an gabos na tunay na Kristiano napapaatubang sa manlaenlaen na pagbalo asin kasakitan. Halimbawa, tibaad pahiroon kamo kan saindong konsensia na sinanay sa Biblia na gumawe sa paagi na bakong suno kan kadaklan o na magigin dahelan na kamo mapalaen sa iba. Tibaad isipon kan saindong mga katrabaho, kaeskuela, o kataed na kamo napapalaen huli ta ibinabasar nindo sa mga prinsipyo sa Biblia an saindong mga desisyon. Minsan siring, an saindang negatibong reaksion dai maninigong magpadesganar sa saindo. An kinaban nasa espirituwal na kadikloman, alagad an mga Kristiano dapat na ‘magliwanag siring sa mga ilaw.’ (Fil. 2:15) An saindong marahay na mga gibo tibaad maheling asin hangaan nin nagkapirang sinserong nagmamasid, dangan pamurawayon ninda si Jehova bilang resulta.—Basahon an Mateo 5:16.
11. (a) Ano an tibaad reaksion nin nagkapira sa gibohon na paghuhulit? (b) Anong klaseng pagtumang an napaatubang ki apostol Pablo, asin ano an saiyang reaksion dian?
11 Kaipuhan an kosog nin boot tanganing padagos kitang makapaghulit kan mensahe kan Kahadean. An nagkapirang tawo, dawa mga paryente, tibaad olog-ologon kamo o probaran na desganaron kamo sa iba pang paagi. (Mat. 10:36) Si apostol Pablo binugbog nin labi sa sarong beses huli ta maimbod niang ginibo an saiyang ministeryo. Mangnoha kun ano an saiyang reaksion sa siring na pagtumang: “Pakatapos na kami magdusa nguna asin trataron nin daing galang,” an sinabi nia, “kami nagpakapusoan paagi sa samong Dios na magtaram sa saindo kan maogmang bareta nin Dios na may dakulang paglapigot.” (1 Tes. 2:2) Seguradong kinaipuhan ni Pablo an kosog nin boot tanganing padagos na maghulit kan maogmang bareta pagkatapos na sia dakopon, hubaan, hampakon, asin ibilanggo. (Gibo 16:19-24) Ano an nagtao sa saiya nin pagkapusoan na magpadagos? An saiyang nangingibabaw na kamawotan na gibohon an sugo sa saiya nin Dios na maghulit.—1 Cor. 9:16.
12, 13. Anong mga kadepisilan an inaatubang nin nagkapira, asin ano an ginibo ninda sa pagprobar na mapangganahan iyan?
12 Puedeng depisil man na papagdanayon an satong kaigotan sa mga teritoryo na dian an mga tawo bihirang manompongan sa harong o bakong interesado sa mensahe kan Kahadean. Ano an magigibo niato sa siring na mga kamugtakan? Tibaad kaipuhan kitang orog pang magpakapusoan na makipag-olay nin impormal sa mga tawo. Tibaad kaipuhan man na ibagay niato an satong iskedyul o ikonsentrar an satong mga paghihingoa na maghulit sa mga lugar na dian mas dakol na tawo an satong makakaolay.—Ikomparar an Juan 4:7-15; Gibo 16:13; 17:17.
13 An iba pang kadepisilan na kaipuhan na atubangon nin dakol iyo an paggurang asin maluyang salud, na tibaad nakakalimitar sa rasonableng magigibo ninda sa paghuhulit. Kun igwa kamo nin siring kaiyan na kadepisilan, dai madesganar. Aram na marhay ni Jehova an saindong mga limitasyon asin naoogma sia sa kun ano an kaya nindong gibohon. (Basahon an 2 Corinto 8:12.) Ano man na problema an tibaad inaatubang nindo—pagtumang, kawaran nin interes, o maluyang salud—gibohon an gabos nindong makakaya sa paghuhulit kan maogmang bareta sa iba ano man an saindong kamugtakan.—Tal. 3:27; ikomparar an Marcos 12:41-44.
‘Padagos na Ingatan an Saindong Ministeryo’
14. Anong halimbawa an itinao ni apostol Pablo para sa mga kapwa Kristiano, asin anong hatol an itinao nia?
14 Mahigos na ginibo ni apostol Pablo an saiyang ministeryo, asin pinarigon nia an mga kapagtubod na gibohon man iyan. (Gibo 20:20, 21; 1 Cor. 11:1) An sarong tawo na pinili ni Pablo tanganing partikularmenteng parigonon an boot iyo an Kristiano kan enot na siglo na an ngaran Arquipo. Sa saiyang surat sa mga taga Colosas, si Pablo nagsabi: “Sabihan nindo si Arquipo: ‘Padagos mong ingatan an ministeryo na saimong inako sa Kagurangnan, na iyan otobon mo.’” (Col. 4:17) Dai niato aram kun siisay si Arquipo o kun ano an saiyang mga kamugtakan, alagad malinaw na sia nag-ako nin ministeryo. Kun ika nagdusay na Kristiano, ika nag-ako man nin ministeryo. Padagos mo daw na iniingatan an ministeryo tanganing otobon iyan?
15. Ano an kahulogan nin Kristianong pagdusay, asin anong mga hapot an minalataw?
15 Bago kita nabautismohan, idinusay niato an satong buhay ki Jehova paagi sa odok sa pusong pamibi. Ini nangahulogan na determinado kitang gibohon an saiyang kabotan. Kaya marahay na hapoton niato ngonyan an satong sadiri, ‘An paggibo daw kan kabotan nin Dios an talagang pinakamahalaga sa sakong buhay?’ Puedeng igwa kita nin manlaenlaen na paninimbagan na inaasahan ni Jehova na aasikasohon niato—siring baga nin pagtao kan mga pangangaipo kan satong pamilya. (1 Tim. 5:8) Alagad paano niato ginagamit an natatada pa niatong panahon asin kosog? Ano an satong prioridad sa buhay?—Basahon an 2 Corinto 5:14, 15.
16, 17. Anong mga posibilidad an puedeng pag-isipan kan Kristianong mga hoben o kan mga indibiduwal na medyo dikit an paninimbagan?
16 Ika daw sarong nagdusay na Kristianong hoben na tapos na o matatapos na sa haiskul? Posibleng marhay na mayo ka pa nin magabat na mga paninimbagan sa pamilya. Kaya, ano an pinaplano mong gibohon sa saimong buhay? Anong mga desisyon an pinakamakakatabang sa saimo tanganing otobon an saimong panuga na gibohon an kabotan ni Jehova? Inareglar nin dakol an saindang mga aktibidad tanganing magpayunir, asin nakaeksperyensia sinda nin dakulang kagayagayahan asin pagkakontento bilang resulta.—Sal. 110:3; Ecl. 12:1.
17 Tibaad saro kang hoben na adulto. Igwa ka nin bilog na panahon na sekular na trabaho alagad dikit an saimong paninimbagan apuera sa pagsuportar sa saimong sadiri. Daing duwa-duwa na naoogma kang magpartisipar sa mga aktibidad kan kongregasyon sagkod na itinotogot kan saimong iskedyul. Puede ka daw na magkaigwa nin orog pa nganing kagayagayahan? Napag-isip-isip mo na daw na magpartisipar sa iba pang kabtang kan ministeryo? (Sal. 34:8; Tal. 10:22) Sa nagkapirang teritoryo, dakol pa an kaipuhan na gibohon tanganing mapaabotan an gabos na tawo duman kan nagtatao nin buhay na mensahe nin katotoohan. Puede ka daw na gumibo nin mga pagliliwat sa saimong buhay, tibaad tanganing maglingkod sa lugar na dian mas dakula an pangangaipo para sa mga parabalangibog kan Kahadean?—Basahon an 1 Timoteo 6:6-8.
18. Anong mga pagliliwat an ginibo nin sarong hoben pang mag-agom, asin may anong mga resulta?
18 Isip-isipa nindo an halimbawa ni Kevin asin Elena na taga Estados Unidos. * Siring sa nakatodan na para sa mga hoben pang bagong kasal sa saindang lugar, inisip ninda na kaipuhan sindang bumakal nin harong. Pareho sindang nagtatrabaho nin bilog na panahon asin puede nindang mapagdanay an komportableng estilo nin pamumuhay. Pero an panahon ninda haros maubos sa saindang iskedyul sa trabaho asin mga gibohon sa harong kaya dikit na sana an panahon ninda para sa paglilingkod sa langtad. Napag-isip-isip ninda na idinudusay ninda an haros gabos nindang panahon asin kosog sa pag-asikaso sa saindang mga rogaring. Minsan siring, kan maobserbaran ni Kevin asin Elena an simpleng estilo nin pamumuhay nin sarong maogmang mag-agom na payunir, nagdesisyon sinda na bagohon an saindang prioridad sa buhay. Pagkatapos na mamibi tanganing hagadon an paggiya ni Jehova, ipinabakal ninda an saindang harong asin nagbalyo sinda sa sarong apartment. Ininaan ni Elena an saiyang panahon sa sekular na trabaho asin nagin siang payunir. Huling naparigon an boot ni Kevin kan maogmang mga eksperyensia sa ministeryo kan saiyang agom, nagpondo sia sa saiyang bilog na panahon na trabaho asin nagpoon siang magpayunir. Paghaloyhaloy, nagbalyo sinda sa sarong nasyon sa Amerika del Sur tanganing maglingkod kun saen dakula an pangangaipo para sa mga parahulit kan Kahadean. “Pirme nang maogma kaidto an samong buhay bilang mag-agom,” an sabi ni Kevin, “alagad kan hiningoa niamong aboton an espirituwal na mga pasohan, nagin mas dakula pa ngani an samong kaogmahan.”—Basahon an Mateo 6:19-22.
19, 20. Taano ta an paghuhulit kan maogmang bareta iyo an pinakamahalagang gibohon ngonyan?
19 An paghuhulit kan maogmang bareta iyo an pinakamahalagang gibohon ngonyan digdi sa daga. (Kap. 14:6, 7) Nakakatabang iyan sa pagpakangbanal kan ngaran ni Jehova. (Mat. 6:9) Pinapakarhay kan mensahe kan Biblia an buhay nin rinibong tawo na nag-aako kaiyan kada taon, asin puede ining magresulta sa saindang kaligtasan. Pero, “paano . . . sinda makakadangog kun mayo nin parahulit?” an hapot ni apostol Pablo. (Roma 10:14, 15) Paano man nanggad? Taano ta dai magin determinado na gibohon an gabos na posibleng pinakamakakaya nindo tanganing otobon an saindong ministeryo?
20 An saro pang paagi tanganing matabangan nindo an mga tawo na masabotan an kahalagahan kan delikadong mga panahon na ini asin an mga kaaabtan kan saindang mga desisyon iyo an pagpaoswag kan saindong abilidad sa pagtotokdo. Ipapaliwanag sa minasunod na artikulo kun paano nindo magigibo ini.
[Nota sa Ibaba]
^ par. 18 Sinalidahan an mga ngaran.
Ano an Isisimbag Nindo?
• Ano an paninimbagan kan mga Kristiano sa katawohan?
• Paano niato aatubangon an mga olang sa satong paghuhulit?
• Paano niato maootob an ministeryo na inako niato?
[Mga Hapot Para sa Pag-adal]
[Ritrato sa pahina 5]
Kaipuhan an kosog nin boot tanganing makapaghulit sa ibong nin pagtumang
[Ritrato sa pahina 7]
Ano an magigibo nindo kun naghuhulit kamo sa mga teritoryo na dian an mga tawo bihirang manompongan sa harong?