Pinaoswag Ninda an Kualidad kan Saindang Buhay—Magigibo Man daw Nindo Iyan?

SI Marc, sarong tugang sa Canada, nagtatrabaho sa sarong kompanya na naggigibo nin komplikadong mga kasangkapan na nagpupunsionar na siring sa robot na ginagamit kan mga ahensiang pang-espasyo. Nagtatrabaho sia nin por ora sana asin naglilingkod bilang regular payunir. Dangan, inalok si Marc nin sarong superbisor nin mas halangkaw na puesto—sarong bilog na panahon na posisyon na may dakulang sueldo. Ano an ginibo ni Marc?

Si Amy, sarong tugang sa Pilipinas, naglilingkod bilang regular payunir mantang tinatapos an saiyang pag-eskuela. Pakagradwar, inalokan sia nin bilog na panahon na posisyon na mangangaipo nin dakol na panahon alagad dakula nanggad an sueldo. Ano an pinili ni Amy?

Magkalaen na desisyon an ginibo ni Marc asin Amy, saka an mga resulta kan saindang mga pinili nagpapaheling kan kadonongan kan hatol na itinao sa mga Kristiano sa suanoy na Corinto. Si apostol Pablo nagsurat: “An mga minagamit kan kinaban [magin] siring sa mga dai naggagamit kaiyan nin lubos.”—1 Cor. 7:29-31.

Gamiton an Kinaban Alagad Bakong Lubos

Bago niato maaraman kun ano an nangyari ki Marc asin Amy, estudyaran niato sa halipot an kahulogan kan pananaram na an “kinaban” (o, koʹsmos sa Griego) na ginamit ni Pablo sa saiyang surat sa mga taga Corinto. Sa tekstong iyan sa Biblia, an koʹsmos nanonongod sa sistema nin kinaban na kinabubuhayan niato—an sosyedad nin tawo sa kabilogan—asin kaiba dian an ordinaryong mga bagay na kabtang kan pangaroaldaw na buhay, arog baga nin istaran, kakanon, saka gubing. * Tanganing magkaigwa kan siring na  pangaroaldaw na mga pangangaipo, an kadaklan sa sato kaipuhan na may trabaho. Tunay nanggad, mayo kitang magigibo kundi gamiton an kinaban tanganing magibo an satong obligasyon na sono sa Kasuratan na sustentohan an satong sadiri asin an satong pamilya. (1 Tim. 5:8) Minsan siring, kadungan kaiyan, aram niato na “an kinaban malihis sana.” (1 Juan 2:17) Kun siring, ginagamit niato an kinaban sagkod na kaipuhan alagad bakong “lubos.”—1 Cor. 7:31.

Huling minomotibar kan hatol na iyan sa Biblia na limitaran sagkod sa mapupuede an paggamit ninda kan kinaban, hinorophorop giraray nin dakol na tugang an saindang mga kamugtakan, ininaan ninda an oras sa pagtatrabaho, asin pinasimple ninda an saindang estilo nin pamumuhay. Pagkatapos na gibohon iyan, tolos na naaraman ninda na sa katunayan napaoswag ninda an kualidad kan saindang buhay huli ta mas dakol na sindang panahon na makaibanan an saindang pamilya asin na makapaglingkod ki Jehova. Dugang pa, an saindang simpleng buhay nagpangyari na mainaan an saindang pagsarig sa kinaban alagad madugangan an pagsarig ki Jehova. Magigibo man daw nindo iyan—pasimplehon an saindong buhay tanganing mapaoswag an intereses kan Kahadean nin Dios?—Mat. 6:19-24, 33.

“Nagin Mas Dayupot Kami ki Jehova Kisa Kasuarin Man”

Si Marc, na nasambitan sa enotan, naghimate sa sadol kan Biblia na dai paggamiton nin lubos an kinaban. Sinayumahan nia an alok sa saiya na mas halangkaw na puesto na may dakulang sueldo. Pakalihis nin pira sanang aldaw, inalok si Marc kan saiyang superbisor nin mas dakula pa nganing sueldo tanganing kombensiron sia na akoon an bagong trabaho. “Iyan sarong pagbalo,” an sabi ni Marc, “alagad nagsayuma giraray ako.” Ipinaliwanag nia kun taano: “Gusto mi kan sakong agom na si Paula na idusay an samong buhay sa paglilingkod ki Jehova sa pinakalubos na mapupuede. Kun siring, nagdesisyon kami na pasimplehon an samong estilo nin pamumuhay. Namibi kami ki Jehova na logod tawan kami nin kadonongan tangani na maabot an samong pasohan asin nagbugtak kami nin espesipikong petsa na mapoon kaming maglingkod nin mas lubos ki Jehova.”

Nagsabi si Paula: “Nagtatrabaho ako nin tolong aldaw sa sarong semana bilang sekretarya sa sarong ospital asin igwa ako nin tama sanang sueldo. Naglilingkod man ako bilang regular payunir. Minsan siring, arog ni Marc, gusto kong maglingkod ki Jehova saen man may mas dakulang pangangaipo para sa mga parabalangibog kan Kahadean. Pero, kan magdemitir ako, an sakong superbisor nagsabi na kualipikado ako sa posisyon na sekretarya de ehekutibo na nabakante pa sana. Iyan an trabaho bilang sekretarya na may pinakahalangkaw na sueldo sa ospital, alagad nagdanay ako sa sakong desisyon na magdemitir. Kan sabihon ko sa sakong superbisor an dahelan kun taano ta dai ako nag-aplay para sa posisyon na iyan, tinawan nia ako nin komendasyon huli sa sakong pagtubod.”

Dai nahaloy pakatapos kaiyan, si Marc asin Paula nadestinong maglingkod bilang mga espesyal payunir sa sarong sadit na kongregasyon sa harayong lugar sa Canada. Ano an nagin resulta kan saindang pagbalyo? Si Marc nagsabi: “Pakatapos kong bayaan an sarong seguradong trabaho na may halangkaw na sueldo na ginibo ko sa laog nin haros kabanga kan sakong buhay, nahandal ako, alagad binendisyonan ni Jehova an samong ministeryo. Nakamate kami nin dakulaon na kagayagayahan sa pagtao nin espirituwal na mga regalo sa iba. An bilog na panahon na paglilingkod nakapaoswag man sa kualidad kan samong pag-agoman. An samong mga pag-orolay nakasentro sa mga bagay na talagang mahalaga—espirituwal na mga tema. Nagin mas dayupot kami ki Jehova kisa kasuarin man.” (Gibo 20:35) Sinabi pa ni Paula: “Kun bayaan nindo an saindong trabaho asin an mga kaginhawahan nin sarong kinatodan na istaran, kaipuhan  nindong ibugtak an gabos nindong pagtitiwala ki Jehova. Ginibo mi iyan, asin binendisyonan kami ni Jehova. Ipinamate sa samo kan namomotan na mga tugang sa samong bagong kongregasyon na namomotan asin kaipuhan ninda kami. Ginagamit ko na ngonyan an kosog na dating ginagamit ko sa sakong trabaho tanganing tabangan an mga tawo sa espirituwal na paagi. Labi-labi an sakong kagayagayahan na maglingkod sa destinong ini.”

‘May Kaya Alagad Bakong Maogma’

Si Amy, na nasambitan sa enotan, laen an pinili. Inako nia an alok sa saiya na bilog na panahon na posisyon na halangkaw an sueldo. Si Amy nagsabi: “Sa enot na taon, nagdanay akong aktibo sa ministeryo alagad nanompongan ko na an pangenot na bagay sa sakong buhay luway-luway na nagbago hale sa intereses kan Kahadean pasiring sa pagkaigwa nin mas halangkaw na puesto sa trabaho. Nakaresibi ako nin nakakaakit na mga alok sa pag-asenso asin pinonan kong gamiton an sakong kosog sa paghihingoang lumangkaw an puesto. Mantang nagdadakol an sakong mga paninimbagan sa trabaho, padikit nang padikit an panahon na ginagamit ko sa ministeryo. Pag-abot nin panahon, biyo na akong nagpondo sa paghuhulit.”

Sa paggirumdom sa panahon na iyan, sinabi ni Amy: “May kaya ako sa pinansial. Nagpaparabiahe ako asin nakamtan ko an prestihio na kaiba sa sakong propesyonal na posisyon. Pero, bako akong maogma. Sa ibong kan pagkaigwa nin kuarta, kadakol ako nin problema. Inisip-isip ko kun ano an sala. Dangan sa katapustapusi narealisar ko na sa pagmamaigot na kamtan an sarong karera sa kinaban na ini, dikit pa akong ‘malagalag parayo sa pagtubod.’ Bilang resulta, na eksakto nanggad sa sinasabi kan Tataramon nin Dios, nakaeksperyensia ako nin ‘dakol na kakologan.’”—1 Tim. 6:10.

Ano an ginibo ni Amy? Sia nagsabi: “Nakiolay ako sa kamagurangan na tabangan ninda akong ikabalik an sakong marahay na relasyon sa Dios asin nagpoon akong mag-atender sa mga pagtiripon. Mantang nag-aawit, nagpoon akong maghibi. Nagirumdoman ko kun gurano ako kaogma kaidto durante kan limang taon na nakikabtang ako sa pag-ani bilang sarong payunir, minsan ngani ako dukha sa materyal kaidto. Aram ko na kaipuhan kong ipondo an pagsayang kan sakong panahon sa pagmamaigot na magganar nin kuarta asin na kaipuhan kong enoton an intereses kan Kahadean. Inako ko an mas hababang posisyon sa trabaho, na nangahulogan na 50 porsiento kan sakong sueldo an naina, asin nagpoon akong makikabtang giraray sa paghuhulit.” Maogmang nagsabi si Amy: “Nagin magayagaya ako sa paglilingkod bilang payunir sa laog nin pirang taon. Nakakamate na ako ngonyan nin pagkakontento na dai ko noarin man naeksperyensiahan kan ginagamit ko an kadaklan kan sakong panahon sa pagtrabaho para sa kinaban.”

Maliliwat daw nindo an saindong mga kamugtakan asin mapapasimple an saindong estilo nin pamumuhay? Kun an panahon na makukua nindo pakatapos na gibohon iyan gagamiton nindo tanganing paoswagon an intereses kan Kahadean, mapapaoswag man nindo an kualidad kan saindong buhay.—Tal. 10:22.

[Nota sa Ibaba]

[Blurb sa pahina 19]

Maliliwat daw nindo an saindong mga kamugtakan asin mapapasimple an saindong estilo nin pamumuhay?

[Kahon/Ritrato sa pahina 19]

“Ikinakaogma Ko Nang Marhay Iyan!”

Si David, sarong Kristianong magurang sa kongregasyon sa Estados Unidos, nagmawot na umiba sa saiyang agom asin mga aki sa bilog na panahon na paglilingkod. Ikinaareglar nia na magkaigwa nin por ora sanang trabaho sa kompanyang pinagtatrabahohan nia, asin nagpoon siang maglingkod bilang regular payunir. Napaoswag daw kan pagbabagong iyan an kualidad kan saiyang buhay? Pakalihis nin nagkapirang bulan, nagsurat si David sa sarong amigo: “Mayo na nin mas nakakakontento kisa sa pagigin lubos na kalabot sa paglilingkod ki Jehova kaiba kan pamilya. Talagang hinona ko na kakaipuhanon ko an medyo halawig na panahon tanganing matuod ako sa pagpapayunir, alagad ikinakaogma ko nang marhay iyan! Nakakaginhawang marhay iyan.”

[Ritrato sa pahina 18]

Si Marc asin Paula sa ministeryo