Tawan Nindo nin Atension an Saindong “Abilidad sa Pagtotokdo”
Tawan Nindo nin Atension an Saindong “Abilidad sa Pagtotokdo”
“Ihulit mo an tataramon, . . . magsagwe, magtuyaw, magsadol, na may bilog na pakatios asin abilidad sa pagtotokdo.”—2 TIM. 4:2.
1. Anong pagboot an itinao ni Jesus sa saiyang mga disipulo, asin anong halimbawa an itinao nia?
SA IBONG kan makangangalas na mga pagpaomay na ginibo ni Jesus durante kan saiyang ministeryo digdi sa daga, sia sa pangenot namidbid, bakong bilang parabolong o paramilagro, kundi bilang paratokdo. (Mar. 12:19; 13:1) An pagpahayag kan maogmang bareta kan Kahadean nin Dios an prioridad ni Jesus, asin iyo man para sa mga parasunod nia ngonyan. An mga Kristiano isinugo na ipadagos an paggibo nin mga disipulo paagi sa pagtokdo sa mga tawo na otobon an gabos na bagay na ipinagboot ni Jesus.—Mat. 28:19, 20.
2. Ano an kaipuhan niatong gibohon tanganing otobon an sugo sa sato na maghulit?
2 Tanganing otobon an sugo sa sato na gumibo nin mga disipulo, pirme niatong hinihingoa na mapaoswag an satong abilidad na magtokdo. Idinoon ni apostol Pablo an kahalagahan kan abilidad na ini kan magsurat sia sa saiyang kaibaiba sa paghuhulit na si Timoteo. Sia nagsabi: “Pirme mong tawan nin atension an saimong sadiri asin an saimong pagtotokdo. Magdanay ka sa mga bagay na ini, huli ta sa paggibo mo kaini ililigtas mo an saimong sadiri sagkod idtong mga naghihinanyog sa saimo.” (1 Tim. 4:16) An klase nin pagtotokdo na nasa isip ni Pablo bako sanang pagtao nin kaaraman. An epektibong Kristianong mga ministro tinataros an puso kan mga tawo asin minomotibar sinda na gumibo nin mga pagbabago sa saindang buhay. Iyan sarong abilidad. Kaya paano niato mapapaoswag an “abilidad sa pagtotokdo” kun ipinepresentar niato sa iba an maogmang bareta kan Kahadean nin Dios?—2 Tim. 4:2.
Pagpaoswag sa “Abilidad sa Pagtotokdo”
3, 4. (a) Paano niato mapapaoswag an “abilidad sa pagtotokdo”? (b) Paano kita tinatabangan kan Teokratikong Paadalan sa Pagmiministro na magin epektibong mga paratokdo?
3 Segun sa sarong diksionaryo, an “abilidad” “nakukua paagi sa pag-adal, pag-aplikar, o pag-obserbar.” Kaipuhan niatong tawan nin atension an gabos na tolong elementong ini tanganing kita magin epektibong paratokdo kan maogmang bareta. Makukua niato an tamang pakasabot sa satong pinag-aadalan paagi sana sa pag-adal kaiyan na may kaibang pamibi. (Basahon an Salmo 119:27, 34.) An pag-obserbar sa epektibong mga ministro mantang sinda nagtotokdo nakakatabang sa sato na manodan an saindang mga pamamaagi asin arogon iyan. Asin an regular na pagmamaigot na iaplikar an satong nanonodan matabang sa sato na mapaoswag an satong mga abilidad.—Luc. 6:40; 1 Tim. 4:13-15.
4 Si Jehova an satong Kaharohalangkaweng Paratokdo. Paagi sa naheheling na kabtang kan saiyang organisasyon, tinatawan nia an saiyang mga lingkod digdi sa daga nin paggiya kun paano ninda maninigong otobon an sugo sa sainda na maghulit. (Isa. 30:20, 21) Mapadapit digdi, an lambang kongregasyon nagsasagibo nin semanal na Teokratikong Paadalan sa Pagmiministro, na dinisenyo tanganing tabangan an gabos na nakalista dian na magin epektibong mga parabalangibog kan Kahadean nin Dios. An prinsipal na librong ginagamit sa paadalan na ini iyo an Biblia. Sinasabi sa sato kan ipinasabong na Tataramon ni Jehova kun ano an itotokdo niato. Dugang pa, ipinapaheling kaiyan kun anong mga pamamaagi nin pagtotokdo an epektibo asin angay. An Teokratikong Paadalan sa Pagmiministro regular na nagpapagirumdom sa sato na kita magigin mas mahusay na mga paratokdo kun ibinabasar niato sa Tataramon nin Dios an satong itinotokdo, kun epektibo kitang naggagamit nin mga hapot, kun nagtotokdo kita sa simpleng paagi, asin kun nagpapaheling kita nin sinserong interes sa iba. Saro-saro niatong siyasaton an mga puntong ini. Dangan pag-oolayan niato kun paano tataroson an puso nin inaadalan sa Biblia.
Ibasar sa Tataramon nin Dios an Saindong Itinotokdo
5. Ano an maninigong basehan kan satong itinotokdo, asin taano?
5 Si Jesus, an pinakadakula sa gabos na tawong paratokdo, ibinasar sa Kasuratan an saiyang itinokdo. (Mat. 21:13; Juan 6:45; 8:17) Sia nagtaram, bakong sa sadiri niang ngaran, kundi sa ngaran kan Saro na nagsugo sa saiya. (Juan 7:16-18) Iyan an halimbawa na sinusunod niato. Kaya, an satong sinasabi sa ministeryong pagharongharong o sa mga pag-adal sa Biblia maninigong nakasentro sa autoridad kan Tataramon nin Dios. (2 Tim. 3:16, 17) An ano man na madonong na pangangatanosan niato dai makakapantay sa pagigin epektibo asin pagigin mapuersa kan ipinasabong na Kasuratan. An Biblia igwa nin autoridad. Ano man na punto an pinagmamaigotan niatong masabotan kan inaadalan sa Biblia, an pinakamarahay na pamamaagi na magagamit niato iyo na ipabasa sa saiya an sinasabi kan Kasuratan manongod dian.—Basahon an Hebreo 4:12.
6. Paano masesegurado nin paratokdo na talagang nasasabotan kan inaadalan sa Biblia an pinag-aadalan?
6 Siempre, dai boot sabihon na an Kristianong paratokdo dai na kaipuhan na mag-andam para sa pag-adal sa Biblia. Sa kabaliktaran, maninigong maingat na planohon kun arin sa sitadong mga teksto an babasahon sa Biblia kan paratokdo o kan inaadalan sa Biblia durante kan pag-adal. Sa pangkagabsan, marahay na basahon an mga teksto na nagtatao nin basehan para sa satong mga paniniwala. Kaipuhan man na tabangan an inaadalan sa Biblia na masabotan an lambang teksto na binabasa nia.—1 Cor. 14:8, 9.
Gumamit nin Epektibong mga Hapot
7. Taano ta epektibong pamamaagi nin pagtotokdo an paggamit nin mga hapot?
7 An ekspertong paggamit nin mga hapot nakakapukaw sa isip asin nakakatabang sa paratokdo na taroson an puso kan inaadalan sa Biblia. Kaya imbes na ipaliwanag nindo an mga teksto sa saindong inaadalan sa Biblia, sabihon sa saiya na ipaliwanag iyan sa saindo. Kun beses tibaad kaipuhan an dugang pang hapot o sunod-sunod na hapot pa ngani tanganing tabangan an inaadalan sa Biblia na magkaigwa nin tamang pakasabot. Sa katunayan, kun siring kaini an paagi kan saindong pagtotokdo sa inaadalan sa Biblia, bako sanang tinatabangan nindo sia na masabotan an basehan kan ano man na kongklusyon kundi tinatabangan man nindo sia na personal na makombensir kan kongklusyon na iyan.—Mat. 17:24-26; Luc. 10:36, 37.
8. Paano niato mababatid kun ano an nasa puso nin inaadalan sa Biblia?
8 An paagi nin pag-adal sa satong mga publikasyon iyo an paggamit nin mga hapot asin simbag. Daing duwa-duwa, an mayoriya kan mga tawo na inaadalan nindo sa Biblia masisimbag tolos an nakaimprentang mga hapot, na ginagamit an impormasyon sa pinapanongdan na mga parapo. Pero, an may pakabatid na paratokdo dai sana makokontento sa tamang mga simbag. Halimbawa, tibaad ikapaliwanag nin tama kan inaadalan sa Biblia kun ano an sinasabi kan Biblia manongod sa pakikisaro. (1 Cor. 6:18) Minsan siring, an paggamit nin mataktikang mga hapot tanganing maaraman an punto de vista puedeng magparisa kun ano talaga an saboot kan inaadalan sa Biblia manongod sa saiyang nanonodan. Sa siring puedeng ihapot kan paratokdo: “Taano ta kinokondenar kan Biblia an pakikidorog sa bakong agom? Ano an masasabi mo sa restriksion na ini na itinao nin Dios? Sa paghona mo daw igwa nin ano man na pakinabang an pamumuhay sono sa mga pamantayan nin Dios sa moral?” An simbag kan inaadalan sa Biblia sa siring na mga hapot puedeng maghayag kan nasa puso nia.—Basahon an Mateo 16:13-17.
Gibohon Iyan na Simple
9. Ano an maninigo niatong girumdomon kun ipinapasabot niato an sono sa Kasuratan na impormasyon?
9 An kadaklan sa mismong mga katotoohan na nasa Tataramon nin Dios medyo simple. Pero, tibaad an mga tawo na inaadalan niato sa Biblia naribaraw kan mga doktrina nin falsong relihion. An satong papel bilang mga paratokdo iyo na gibohon na madaling masabotan an Biblia. An epektibong mga paratokdo ipinapasabot an impormasyon sa simple, malinaw, asin tamang paagi. Kun sinusunod niato an giyang ini, dai niato gigibohon na magin mas komplikado an katotoohan kisa sa kinakaipuhan. Dai magtao nin dai kaipuhan na mga detalye. Dai kaipuhan na komentohan an lambang aspekto nin teksto na binabasa niato. Magkonsentrar sana sa kun ano an mahalagang marhay sa paglinaw kan puntong pinag-aadalan. Dikit-dikit na masasabotan kan inaadalan sa Biblia an mas hararom na mga katotoohan na sono sa Kasuratan mantang nag-ooswag an saiyang pakasabot.—Heb. 5:13, 14.
10. Ano an mga nagdedeterminar kun gurano kadakol na impormasyon an pag-oolayan durante nin pag-adal sa Biblia?
10 Gurano kadakol an maninigong pag-adalan sa kada sesyon? Kaipuhan digdi an pakabatid. Nagkakalaenlaen an mga abilidad asin kamugtakan kan inaadalan sa Biblia sagkod kan paratokdo, alagad maninigo na pirme niatong girumdomon na an satong katuyohan bilang mga paratokdo iyo na tabangan an satong inaadalan sa Biblia na makapatalubo nin masarig na pagtubod. Kaya tatawan niato sia nin igong panahon na basahon, masabotan, asin akoon an mga katotoohan na itinotokdo sa Tataramon nin Dios. Dai niato pag-aadalan an dakol na impormasyon na labi sa kaya niang masabotan. Kadungan kaiyan, ipinapadagos niato an pag-adal sa rasonableng rikas. Kun masabotan na kan inaadalan sa Biblia an sarong punto, mabalyo na kita sa sunod na punto.—Col. 2:6, 7.
11. Anong leksion mapadapit sa pagtotokdo an manonodan niato ki apostol Pablo?
11 Ginibo ni apostol Pablo na simple an mensahe kan maogmang bareta kun nakikipag-olay sia sa mga bagohan. Minsan ngani halangkaw na marhay an saiyang inadalan, dai sia naggamit nin hararom na mga termino. (Basahon an 1 Corinto 2:1, 2.) An sinserong mga tawo naaakit asin naoogma sa pagigin simple kan mga katotoohan na sono sa Kasuratan. Dai kaipuhan na an siisay man magin halangkaw an inadalan tanganing masabotan iyan.—Mat. 11:25; Gibo 4:13; 1 Cor. 1:26, 27.
Tabangan an mga Inaadalan sa Biblia na Pahalagahan an Saindang Nanonodan
12, 13. Ano an puedeng magmotibar sa inaadalan sa Biblia na humiro segun sa saiyang nanonodan? Iilustrar.
12 Tanganing magin epektibo, an satong pagtotokdo kaipuhan na nakakamotibar sa puso nin inaadalan sa Biblia. Kaipuhan na masabotan kan inaadalan sa Biblia kun paano an impormasyon personal na minaaplikar sa saiya, kun paano sia makikinabang dian, asin kun paano mapaparahay an saiyang buhay kun susunodon nia an sono sa Kasuratan na paggiya.—Isa. 48:17, 18.
13 Halimbawa, tibaad pinag-oolayan niato an Hebreo 10:24, 25, na nagdadagka sa mga Kristiano na makipagtipon sa mga kapagtubod para sa sono sa Kasuratan na pagparigon sa boot asin mamomoton na pakikiasosyar. Kun an inaadalan sa Biblia dai pa nag-aatender sa mga pagtiripon kan kongregasyon, puede niatong iladawan sa halipot kun paano iyan ginigibo asin kun ano an totokaron dian. Puede niatong sambiton na an mga pagtiripon kan kongregasyon kabtang kan satong pagsamba asin ipaheling niato na personal kitang nakikinabang dian. Dangan puede niatong imbitaran an inaadalan sa Biblia na umatender. An nagmomotibar sa saiya na himateon an sono sa Kasuratan na mga pagboot maninigo na an kamawotan nia na kuyogon si Jehova, asin bako na paogmahon an nagtotokdo sa saiya.—Gal. 6:4, 5.
14, 15. (a) Ano an puedeng manodan nin inaadalan sa Biblia manongod ki Jehova? (b) Paano puedeng makinabang an inaadalan sa Biblia sa saiyang kaaraman dapit sa personalidad nin Dios?
14 An sarong pundamental na pakinabang na makukua kan mga inaadalan sa Biblia sa pag-adal kan Kasuratan asin pag-aplikar kan mga prinsipyo kaiyan iyo na mamimidbid saka mamomotan ninda si Jehova bilang persona. (Isa. 42:8) Bako sana siang mamomoton na Ama asin Kaglalang patin Kagsadiri kan uniberso kundi ihinahayag man nia an saiyang personalidad saka mga abilidad sa mga namomoot asin naglilingkod sa saiya. (Basahon an Exodo 34:6, 7.) Kan papangenotan na ni Moises an nasyon nin Israel paluwas sa pagkabihag sa Egipto, ipinamidbid ni Jehova an saiyang sadiri na ginagamit an pananaram na: “Ako magigin ano man na gusto kong ako magin.” (Ex. 3:13-15) Ipinaparisa kaini na si Jehova magigin an ano man na kaipuhan niang magin tanganing otobon an saiyang mga katuyohan mapadapit sa saiyang piniling banwaan. Huli kaini namidbid kan mga Israelita si Jehova bilang Paraligtas, Parapakilaban, Paratao, asin Paraotob nin mga panuga, patin iba pa.—Ex. 15:2, 3; 16:2-5; Jos. 23:14.
15 An satong mga inaadalan sa Biblia tibaad dai man makaeksperyensia nin milagrosong pagtabang ni Jehova sa saindang buhay siring kan pambihirang nangyari ki Moises. Minsan siring, mantang an satong mga inaadalan sa Biblia nagtatalubo sa saindang pagtubod asin sa pag-apresyar sa nanonodan ninda saka mantang pinoponan nindang iaplikar iyan, daing duda na masasabotan ninda an pangangaipo na magtiwala ki Jehova para sa kosog nin boot, kadonongan, patin paggiya. Mantang ginigibo ninda iyan, mamimidbid man ninda si Jehova bilang madonong asin mapagtitiwalaan na Parahatol, Paraprotehir, saka buka an palad na Paratao kan gabos nindang pangangaipo.—Sal. 55:22; 63:7; Tal. 3:5, 6.
Magpaheling nin Mamomoton na Interes
16. Taano ta an natural na abilidad bakong iyo an pinakamahalaga sa satong pagigin epektibo bilang paratokdo?
16 Kun naghohona kamo na bako kamong eksperto sa pagtotokdo siring sa gusto nindo, dai madesganar. Ginigiyahan ni Jehova asin ni Jesus an programa sa pagtotokdo na ginigibo ngonyan sa bilog na kinaban. (Gibo 1:7, 8; Kap. 14:6) Puede nindang bendisyonan an satong mga paghihingoa tanganing an satong mga tataramon magkaigwa nin positibong epekto sa tawong may tamang kamugtakan nin puso. (Juan 6:44) An sinserong pagkamoot nin paratokdo sa saiyang inaadalan sa Biblia makakahipno nanggad sa ano man na kakulangan nin natural na abilidad. Ipinaheling ni apostol Pablo na nasabotan nia an kahalagahan nin pagkamoot sa mga tinotokdoan.—Basahon an 1 Tesalonica 2:7, 8.
17. Paano kita makakapaheling nin sinserong interes sa lambang inaadalan sa Biblia?
17 Kaagid kaiyan, makakapaheling kita nin sinserong interes sa lambang inaadalan sa Biblia paagi sa pagtao nin panahon na mamidbid sia. Mantang ipinapakipag-olay niato sa saiya an mga prinsipyo sa Kasuratan, posibleng marhay na maaaraman niato an saiyang mga kamugtakan. Tibaad maobserbaran niato na inaaplikar na nia sa saiyang buhay an nagkapira sa mga punto na nanodan nia sa Biblia. Sa ibang bagay, tibaad kaipuhan pa niang gumibo nin mga pagliliwat. Paagi sa pagtabang sa inaadalan sa Biblia na masabotan kun paano nia personal na ikakaaplikar an impormasyon na nanodan durante kan mga pag-adal sa Biblia, mamomoton niatong matatabangan sia na magin tunay na disipulo ni Cristo.
18. Taano ta mahalagang sambiton niato an satong inaadalan sa Biblia mantang kita namimibi kaiba nia?
18 An pinakamahalaga sa gabos, puede niatong sambiton an satong inaadalan sa Biblia mantang kita namimibi kaiba nia. Maninigong magin malinaw sa saiya na an satong katuyohan iyo na tabangan sia na orog pang mamidbid an saiyang Kaglalang, orog pang dumayupot sa Saiya, asin makinabang sa Saiyang paggiya. (Basahon an Salmo 25:4, 5.) Kun namimibi kita na bendisyonan logod ni Jehova an mga paghihingoa kan inaadalan sa Biblia na iaplikar an saiyang nanonodan, masasabotan kan inaadalan sa Biblia an kahalagahan nin pagigin “paraotob kan tataramon.” (Sant. 1:22) Asin mantang naghihinanyog an inaadalan sa Biblia sa satong sinserong mga pamibi, sia man makakanood kun paano mamibi. Nakakagayagaya nanggad na tabangan an mga inaadalan sa Biblia na pataluboon an saindang sadiring relasyon ki Jehova!
19. Ano an pag-oolayan sa minasunod na artikulo?
19 Nakakaparigon sa boot na maaraman na labing anom may kabangang milyon na Saksi sa bilog na kinaban an sibot sa pagpaoswag kan saindang “abilidad sa pagtotokdo,” sa katuyohan na tabangan an mga sadiosan an puso na otobon an gabos na bagay na ipinagboot ni Jesus. Ano an nagigin mga resulta kan satong paghuhulit? An simbag sa hapot na ini pag-oolayan sa minasunod na artikulo.
Nagigirumdoman daw Nindo?
• Taano ta kaipuhan kan mga Kristiano na paoswagon an “abilidad sa pagtotokdo”?
• Anong mga pamamaagi an magagamit niato tanganing magin mas epektibo an satong pagtotokdo?
• Ano an makakahipno sa ano man na kakulangan niato nin natural na abilidad?
[Mga Hapot Para sa Pag-adal]
[Ritrato sa pahina 9]
Ika daw nakalista sa Teokratikong Paadalan sa Pagmiministro?
[Ritrato sa pahina 10]
Taano ta mahalaga na dagkahon an saindong inaadalan sa Biblia na magbasa nin teksto sa Biblia?
[Ritrato sa pahina 12]
Sambiton an saindong inaadalan sa Biblia mantang kamo namimibi kaiba nia