An Presensia ni Cristo—Ano an Kahulogan Kaiyan Para sa Saindo?
An Presensia ni Cristo—Ano an Kahulogan Kaiyan Para sa Saindo?
“Ano an magigin tanda kan saimong presensia asin kan pagtatapos kan sistema nin mga bagay?”—MAT. 24:3.
1. Ano an interesanteng ihinapot ki Jesus kan saiyang mga apostol?
HAROS duwang ribong taon na an nakaagi, sarong hapot an ibinangon kan apat sa mga apostol ni Jesus sa sarong pribadong pakikipag-olay ninda sa saindang Kagurangnan sa Bukid nin mga Olibo. Sinda naghapot: “Noarin mangyayari an mga bagay na ini, asin ano an magigin tanda kan saimong presensia asin kan pagtatapos kan sistema nin mga bagay?” (Mat. 24:3) Sa hapot na iyan, naggamit an mga apostol nin duwang interesanteng marhay na pananaram, “saimong presensia” asin “pagtatapos kan sistema nin mga bagay.” Sa ano nanonongod an mga pananaram na iyan?
2. Ano an pangenot na kahulogan kan tataramon na “pagtatapos”?
2 Pag-olayan nguna niato an terminong “pagtatapos,” an panduwang pananaram na ginamit, na traduksion kan Griegong tataramon na syn·teʹlei·a. Sa New World Translation, an tataramon na ini pirmeng tinatradusir na “pagtatapos,” mantang an konektadong Griegong tataramon na te’los, trinadusir na “katapusan.” An pagkakalaen sa kahulogan kan duwang tataramon na ini puedeng iagid sa sarong pahayag sa Kingdom Hall. An pagtatapos o kongklusyon kan pahayag iyo an ultimong kabtang, na dian an ispiker naggagamit nin dikit na panahon tanganing ipagirumdom sa mga nagdadangog an tinokar nia dangan ipinapaheling nia kun paano minaaplikar sa sainda an impormasyon na iyan. An katapusan kan pahayag iyo an paghale kan ispiker sa plataporma. Sa kaagid na paagi, oyon sa Biblia, an pananaram na “pagtatapos kan sistema nin mga bagay” nanonongod sa peryodo nin panahon na minasagkod sa, asin kaibanan an, katapusan kaiyan.
3. Ano an nagkapira sa mga bagay na mangyayari durante kan presensia ni Jesus?
3 Kumusta man an terminong “presensia” na ihinapot kan mga apostol? Ini an traduksion kan Griegong tataramon na pa·rou·siʹa. * An pa·rou·siʹa, o presensia ni Cristo, nagpoon sa pagpatukaw ki Jesus sa langit bilang Hade kan 1914 asin nagpapadagos iyan sagkod sa panahon kan “dakulang kahorasaan,” na durante kaiyan madatong sia tanganing laglagon an mga maraot. (Mat. 24:21) Dakol na laen-laen na bagay an mangyayari durante kan presensiang ini ni Jesus, kaiba dian an “huring mga aldaw” kan marigsok na sistemang ini nin mga bagay, an pagtipon sa mga pinili, asin an saindang pagkabuhay liwat pasiring sa langitnon na buhay. (2 Tim. 3:1; 1 Cor. 15:23; 1 Tes. 4:15-17; 2 Tes. 2:1) Masasabi na an peryodong iyan nin “pagtatapos kan sistema nin mga bagay” (syn·teʹlei·a) iyo man an peryodo na inaapod na presensia (pa·rou·siʹa) ni Cristo.
Sarong Halawig na Peryodo nin Panahon
4. Paanong an presensia ni Jesus nakakapareho sa mga pangyayari kan panahon ni Noe?
4 An bagay na an tataramon na pa·rou·siʹa nanonongod sa sarong halawig na peryodo nin panahon nakakaoyon sa sinabi ni Jesus mapadapit sa saiyang presensia. (Basahon an Mateo 24:37-39.) Mangnohon na dai inagid ni Jesus an saiyang presensia sa medyo halipot na peryodo nin panahon na durante kaiyan nangyari an Baha kan panahon ni Noe. Imbes, ikinomparar nia an saiyang presensia sa mas halawig na peryodo nin panahon na suminagkod sa Baha. Kaiba sa peryodong iyan an pagtogdok ni Noe kan arka asin an saiyang paghuhulit, na suminagkod sa panahon na nag-abot sa katapustapusi an Baha. An mga pangyayaring idto luminawig nin dakol na dekada. Sa kaparehong paagi, kaiba sa presensia ni Cristo an mga pangyayari na masagkod sa, asin kaiba an, dakulang kahorasaan.—2 Tes. 1:6-9.
5. Paano ipinaparisa kan mga tataramon sa Kapahayagan kapitulo 6 na an presensia ni Jesus sarong halawig na peryodo nin panahon?
5 Malinaw na ipinapaheling kan iba pang hula sa Biblia na an presensia ni Cristo nanonongod sa sarong halawig na peryodo nin panahon asin bako sanang sa pag-abot nia tanganing laglagon an mga maraot. An libro nin Kapahayagan ilinaladawan si Jesus na nangangabayo sa puting kabayo asin tinawan nin korona. (Basahon an Kapahayagan 6:1-8.) Pagkatapos na koronahan bilang Hade kan 1914, ilinaladawan si Jesus na nagluwas tanganing ‘mandaog asin taposon an saiyang pandadaog.’ Dangan, ipinapaheling kan pagkasaysay na sinusundan sia kan mga parakabayo na nakasakay sa mga kabayo na manlaenlaen an kolor. An mga ini makahulang nagrerepresentar sa guerra, kakulangan nin kakanon, asin mga peste, na an gabos na iyan nangyari sa laog nin halawig na peryodo nin panahon na inaapod na “huring mga aldaw.” Naheheling na niato an kaotoban kan hulang ini sa panahon na kita nabubuhay.
6. Paano nakakatabang sa sato an Kapahayagan kapitulo 12 na masabotan an manongod sa presensia ni Cristo?
6 An Kapahayagan kapitulo 12 nagtatao nin dugang pang detalye mapadapit sa pagkaestablisar kan Kahadean nin Dios sa langit. Mababasa niato dian an manongod sa sarong ralaban sa dai naheheling na rona. Si Miguel—na iyo si Jesu-Cristo sa saiyang langitnon na kamugtakan—asin an saiyang mga anghel nakikipaglaban sa Diablo asin sa saiyang mga demonyo. Bilang resulta, si Satanas na Diablo asin an saiyang mga kampon ihinulog sa daga. Sa puntong iyan, an sabi sa sato kan pagkasaysay, an Diablo igwa nin dakulang kaanggotan, “sa pakaaram na halipot na sana an saiyang panahon.” (Basahon an Kapahayagan 12:7-12.) Kun siring, malinaw nanggad na an pagkaestablisar sa langit kan Kahadean ni Cristo sinundan nin sarong peryodo nin panahon na dian maheheling an nag-oorog na grabeng sakit sa daga asin sa mga nag-eerok dian.
7. Manongod sa ano an sinasabi kan ikaduwang salmo, asin anong oportunidad an ilinaladawan dian?
7 Makahula man na sinasabi kan ikaduwang salmo an manongod sa pagpatukaw ki Jesus bilang Hade sa langitnon na Bukid nin Sion. (Basahon an Salmo 2:5-9; 110:1, 2.) Minsan siring, ipinaparisa man kan salmong ini na igwa nin peryodo nin panahon na an mga namamahala sa daga, kaiba an saindang mga nasasakopan, tinatawan nin oportunidad na magpasakop sa pamamahala ni Cristo. Sinda sinasadol na ‘gumamit nin pakarorop’ asin pabayaan ninda na sinda “itanos.” Iyo, sa panahon na iyan “maogma an gabos na minapaili sa saiya [Dios]” paagi sa paglilingkod ki Jehova asin sa saiyang ninombrahan na Hade. Kaya, bukas an siring na oportunidad durante kan presensia ni Jesus na may kapangyarihan bilang hade.—Sal. 2:10-12.
Pagmidbid sa Tanda
8, 9. Siisay an makakamidbid sa tanda kan presensia ni Cristo asin makakasabot sa kahulogan kaiyan?
8 Kan si Jesus hapoton kan mga Fariseo manongod sa panahon kan pagdatong kan Kahadean, sinabi nia na dai iyan madatong na “risang marhay” segun sa saindang punto de vista. (Luc. 17:20, 21) Dai iyan masasabotan kan mga daing pagtubod. Paano ninda masasabotan iyan? Dai ngani ninda minidbid si Jesus bilang magigin Hade ninda. Kaya siisay an makakamidbid sa tanda kan presensia ni Cristo sagkod makakasabot sa kahulogan kaiyan?
9 Si Jesus padagos na nagsabi na an tanda maheheling kan saiyang mga disipulo nin siring kalinaw kan pakaheling ninda sa “kikilat, sa pagsilyab kaini, [na] minaliwanag paghale sa sarong kabtang sa sirong nin langit sagkod sa saro pang kabtang.” (Basahon an Lucas 17:24-29.) Interesanteng mangnohon na an Mateo 24:23-27 direktang ikinokonektar an parehong punto sa tanda kan presensia ni Cristo.
An Kapag-arakian na Makakaheling kan Tanda
10, 11. (a) Anong paliwanag an itinao kaidto mapadapit sa “kapag-arakian” na nasambitan sa Mateo 24:34? (b) Sairisay an kaiba sa “kapag-arakian” na iyan segun sa daing pagdudang pakasabot kan mga disipulo ni Jesus?
10 Kaidto, ipinaliwanag kan magasin na ini na kan enot na siglo, “an kapag-arakian na ini” na nasambitan sa Mateo 24:34 nanonongod sa “magkakakontemporanyong kapag-arakian nin daing pagtubod na mga Judio.” * Garo baga rasonable an paliwanag na iyan huli ta an gabos na iba pang pagsambit ni Jesus sa terminong “kapag-arakian” negatibo an itinataong ideya, asin sa kadaklan na kamugtakan, si Jesus naggamit nin negatibong tataramon, siring kan “maraot,” tanganing iladawan an kapag-arakian na iyan. (Mat. 12:39; 17:17; Mar. 8:38) Sa siring, ipinahayag kan magasin na ini na sa kaotoban sa presenteng panahon, an pinanonongdan ni Jesus iyo an maraot na “kapag-arakian” nin mga daing pagtubod na makakaheling sa mga kabtang na magpapamidbid sa “pagtatapos kan sistema nin mga bagay” (syn·teʹlei·a) asin sa katapusan kan sistemang iyan (teʹlos).
11 Totoo na kun ginagamit ni Jesus sa negatibong paagi an tataramon na “kapag-arakian,” sia nagtataram sa, o manongod sa, maraot na mga tawo kan panahon nia. Alagad iyan man daw an kahulogan kan sinabi nia sa Mateo 24:34? Girumdomon na apat sa mga disipulo ni Jesus an nagdorolok sa saiya “sa pribado.” (Mat. 24:3) Huling si Jesus dai naggamit nin negatibong mga tataramon kan sinasabi nia sa sainda an manongod sa “kapag-arakian na ini,” daing duda na an pakasabot kan mga apostol iyo na sinda asin an saindang mga kapwa disipulo magigin kabtang kan “kapag-arakian” na dai malihis “sagkod na an gabos na bagay na ini mangyari.”
12. Ano an ihinahayag kan konteksto mapadapit sa kun siisay an pinanonongdan ni Jesus kan gamiton nia an terminong “kapag-arakian”?
12 Paano kita nakakaabot sa siring na kongklusyon? Paagi sa maingat na pag-estudyar sa konteksto. Siring kan nakasurat sa Mateo 24:32, 33, si Jesus nagsabi: “Ngonyan manodan nindo an puntong ini sa higera bilang sarong ilustrasyon: Oras na an bagong sanga kaiyan magsoli asin magdahon, aram nindo na an tig-init harani na. Siring man kamo, kun maheling na nindo an gabos na bagay na ini, aramon nindo na sia harani na sa mga tata.” (Ikomparar an Marcos 13:28-30; Lucas 21:30-32.) Dangan, sa Mateo 24:34, mababasa niato: “Totoong sinasabi ko sa saindo na an kapag-arakian na ini dai noarin man makakalihis sagkod na an gabos na bagay na ini mangyari.”
13, 14. Taano ta masasabi niato na an “kapag-arakian” na pinanonongdan ni Jesus siertong iyo an saiyang mga disipulo?
13 Sinabi ni Jesus na an saiyang mga disipulo, na lalahidan nin banal na espiritu sa dai na mahahaloy, an maninigong makagibo nin siertong mga kongklusyon kun maheling ninda “an gabos na bagay na ini” na nangyayari. Kaya siertong an saiyang mga disipulo an pinanonongdan ni Jesus kan sia magsabi: “An kapag-arakian na ini dai noarin man makakalihis sagkod na an gabos na bagay na ini mangyari.”
14 Bakong arog kan mga daing pagtubod, bako sanang maheheling kan mga disipulo ni Jesus an tanda kundi masasabotan man ninda an kahulogan kaiyan. Sinda ‘makakanood’ sa mga kabtang kan tandang iyan asin ‘makakaaram’ sa tunay na kahulogan kaiyan. Lubos nindang masasabotan na “sia harani na sa mga tata.” Minsan ngani totoo na parehong naheling kan daing pagtubod na mga Judio asin kan maimbod na linahidan na mga Kristiano an limitadong kaotoban kan mga tataramon ni Jesus kan enot na siglo, solamenteng an saiyang linahidan na mga parasunod kan panahon na idto an makakanood sa mga pangyayaring ini—na makakasabot sa tunay na kahulogan kan saindang naheling.
15. (a) Siisay an minakompuesto sa “kapag-arakian” sa presenteng panahon na pinanonongdan ni Jesus? (b) Taano ta dai niato makukuenta an eksaktong lawig kan “kapag-arakian na ini”? (Helingon an kahon sa pahina 25.)
15 An mga mayo nin espirituwal na pakasabot ngonyan naniniwala na mayo man nin “risang marhay” kun dapit sa tanda kan presensia ni Jesus. Nangangatanosan sinda na an gabos na bagay pareho man sana kan nakaagi. (2 Ped. 3:4) Sa ibong na lado, an maimbod na linahidan na mga tugang ni Cristo, an grupong Juan sa presenteng panahon, namidbid an tandang ini siring sa silyab nin kikilat asin nasabotan ninda an tunay na kahulogan kaiyan. Bilang sarong grupo, an mga linahidan na ini minakompuesto sa “kapag-arakian” nin magkakakontemporanyo sa presenteng panahon na dai makakalihis “sagkod na an gabos na bagay na ini mangyari.” * Ini nagsusuherir na an nagkapira kan linahidan na tugang ni Jesus buhay pa sa daga kun magpoon na an ihinulang dakulang kahorasaan.
“Magdanay Kamong Mapagbantay”
16. Ano an dapat gibohon kan gabos na disipulo ni Cristo?
16 Pero, orog pa an kaipuhan kisa pagmidbid sana sa tanda. Si Jesus nagpadagos sa pagsabi: “An isinasabi ko sa saindo isinasabi ko sa gabos, Magdanay kamong mapagbantay.” (Mar. 13:37) Pinakamahalaga ini para sa sato gabos ngonyan baga man kita kabilang sa linahidan o sa dakulang kadaklan. Siyam na dekada na an nakalihis poon kan patukawon si Jesus bilang Hade sa langit kan 1914. Minsan ngani tibaad depisil na gibohon, dapat na patunayan niato na andam kita asin danay na nagbabantay. Makakatabang sa sato na gibohon iyan kun sasaboton niato na si Cristo presente baga man dai naheheling asin may kapangyarihan sa Kahadean. Iyan nagpapatanid man sa sato na sa dai na mahahaloy madatong sia tanganing laglagon an saiyang mga kaiwal “sa oras na dai [niato] pinaghohona.”—Luc. 12:40.
17. An pakasabot na ini maninigong magpahiro sa sato na makamate nin ano, asin ano an maninigong magin determinado niatong gibohon?
17 An satong pakasabot manongod sa kahulogan kan presensia ni Cristo nakakatabang sa sato na paorogon an satong pakamate nin pag-apura. Aram niato na si Jesus presente na asin nagrereynar na baga man dai naheheling bilang Hade sa langit poon kan 1914. Sa dai na mahahaloy sia madatong tanganing laglagon an mga maraot asin magibo nin dakulang mga pagbabago sa enterong globong ini. Kun siring, maninigo kitang magin orog na determinado kisa kasuarin man na aktibong makikabtang sa gibohon na ihinula ni Jesus kan sia magsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan [teʹlos].”—Mat. 24:14.
[Mga Nota sa Ibaba]
^ par. 3 An kahulogan kan pa·rou·siʹa maheheling sa pagkakalaen kan panahon kan “presensia” ni apostol Pablo asin kan panahon na “mayo” sia, na parehong mababasa sa 2 Corinto 10:10, 11 asin Filipos 2:12. Para sa detalyadong paliwanag, helingon an Insight on the Scriptures, Volume 2, pahina 676-9.
^ par. 10 Helingon An Torrengbantayan na Nobyembre 1, 1995, pahina 11-15, 19, 30, 31.
^ par. 15 An peryodo nin panahon na kinabubuhayan kan “kapag-arakian na ini” garo baga nanonongod sa peryodo na sakop kan enot na bisyon sa libro nin Kapahayagan. (Kap. 1:10–3:22) An kabtang na ini kan aldaw kan Kagurangnan nagpoon kan 1914 asin nagpapadagos sagkod na an ultimong miembro kan maimbod na mga linahidan magadan asin buhayon liwat.—Helingon an Kapahayagan—Harani Na an Mamuraway na Kulminasyon Kaiyan! pahina 24, parapo 4.
Ano an Isisimbag Nindo?
• Paano niato naaaraman na an presensia ni Jesus sarong halawig na peryodo nin panahon?
• Siisay an nakakamidbid sa tanda kan presensia ni Jesus asin nakakasabot sa kahulogan kaiyan?
• Sairisay an minakompuesto sa kapag-arakian sa presenteng panahon na nasambitan sa Mateo 24:34?
• Taano ta dai niato makukuenta an eksaktong lawig kan “kapag-arakian na ini”?
[Mga Hapot Para sa Pag-adal]
[Kahon sa pahina 25]
Makukuenta daw Niato an Lawig kan “Kapag-arakian na Ini”?
An tataramon na “kapag-arakian” sa parate nanonongod sa mga tawo na magkakalaen an edad asin nagkakainabotan na mabuhay durante nin sarong partikular na peryodo nin panahon o pangyayari. Halimbawa, an Exodo 1:6 nagsasabi sa sato: “Pag-abot nin panahon nagadan si Jose, asin man an gabos niang tugang saka an bilog na kapag-arakian na iyan.” Magkakalaen an edad ni Jose asin kan saiyang mga tugang, alagad magkapareho an saindang eksperyensia durante nin parehong peryodo nin panahon. Kaiba sa “kapag-arakian na iyan” an nagkapira sa mga tugang ni Jose na namundag bago sia mamundag. An nagkapira sa mga ini nabuhay nin mas halawig kisa ki Jose. (Gen. 50:24) An iba sa “kapag-arakian na iyan,” siring ki Benjamin, mas huring namundag kisa ki Jose asin tibaad padagos na nabuhay pagkatapos na sia magadan.
Kaya kun an terminong “kapag-arakian” ginagamit may koneksion sa mga tawo na nabuhay sa sarong partikular na panahon, dai masasabi an eksaktong lawig kan panahon na iyan apuera sa talagang igwa iyan nin katapusan asin dai iyan magigin halawig na marhay. Kun siring, paagi sa paggamit kan pananaram na “kapag-arakian na ini,” na nakasurat sa Mateo 24:34, dai tinawan ni Jesus an saiyang mga disipulo nin pormula tanganing madeterminaran ninda kun noarin matatapos an “huring mga aldaw.” Imbes, idinoon ni Jesus na dai ninda maaaraman an “aldaw asin oras na iyan.”—2 Tim. 3:1; Mat. 24:36.
[Ritrato sa pahina 22, 23]
Pagkatapos na koronahan bilang Hade kan 1914, ilinaladawan si Jesus bilang ‘nandadaog’
[Ritrato sa pahina 24]
“An kapag-arakian na ini dai noarin man makakalihis sagkod na an gabos na bagay na ini mangyari”