Arogon an Pinakanangongorog na Misyonero
Arogon an Pinakanangongorog na Misyonero
“Magin kamong mga paraarog sa sako, siring na ako paraarog ki Cristo.”—1 COR. 11:1.
1. Taano ta maninigo niatong arogon si Jesu-Cristo?
INAROG ni apostol Pablo an pinakanangongorog na Misyonero, si Jesu-Cristo. Sinadol man ni Pablo an mga kapwa nia Kristiano: “Magin kamong mga paraarog sa sako, siring na ako paraarog ki Cristo.” (1 Cor. 11:1) Pakatao ni Jesus sa saiyang mga apostol nin praktikal na halimbawa dapit sa kapakumbabaan paagi sa mapakumbabang paghanaw kan saindang mga bitis, sinabihan nia sinda: “Ako nagtao sa saindo nin arogan, tanganing, kun ano an ginibo ko sa saindo, iyo man an maninigong gibohon nindo.” (Juan 13:12-15) Bilang mga Kristiano sa presenteng panahon, may obligasyon kita na arogon si Jesu-Cristo sa satong mga tataramon asin gibo patin sa mga kualidad na ipinapaheling niato.—1 Ped. 2:21.
2. Dawa kun dai kamo ninombrahan kan Namamahalang Grupo bilang misyonero, ano an puede nindong magin kaisipan?
2 Sa naenot na artikulo, nanodan niato na an misyonero saro na isinugo bilang ebanghelisador—saro na nagpapaabot sa iba kan maogmang bareta. Mapadapit digdi, ibinangon ni Pablo an nagkapirang interesanteng hapot. (Basahon an Roma 10:11-15.) Mangnoha na an apostol naghapot: “Paano . . . sinda makakadangog kun mayo nin parahulit?” Dangan kinotar nia an mga tataramon hale sa hula ni Isaias: “Abaang gayon kan mga bitis kan mga nagpapahayag kan maogmang bareta dapit sa marahay na mga bagay!” (Isa. 52:7) Dawa kun dai kamo ninombrahan asin idinestino na maglingkod bilang misyonero sa ibang nasyon, puede kamong magkaigwa kan espiritu nin pag-ebanghelyo, na inaarog si Jesus bilang maigot na parabalangibog kan maogmang bareta. Kan nakaaging taon, 6,957,852 na parahayag kan Kahadean an ‘naggibo kan gibohon nin mga ebanghelisador’ sa 236 na kadagaan.—2 Tim. 4:5.
“Binayaan Mi Na an Gabos na Bagay Asin Nagsunod sa Saimo”
3, 4. Ano an binayaan ni Jesus sa langit, asin ano an dapat niatong gibohon tanganing magin saiyang mga parasunod?
3 Tanganing otobon an papel na inasignar sa saiya digdi sa daga, si Jesus “nagpakadai sa sadiri asin nagpakang-oripon,” na binayaan an saiyang langitnon na buhay asin kamurawayan. (Fil. 2:7) An ano man na gibohon niato sa pag-arog ki Cristo dai ikakakomparar sa ginibo ni Jesus kan magdigdi sia sa daga. Alagad makakapagdanay kitang marigon bilang saiyang mga parasunod, na dai nanganganugon sa mga bagay na dating yaon sa sato sa kinaban ni Satanas.—1 Juan 5:19.
4 Sa sarong pangyayari, sinabihan ni apostol Pedro si Jesus: “Uya! Binayaan mi na an gabos na bagay asin nagsunod sa saimo.” (Mat. 19:27) Tolos na binayaan ni Pedro, Andres, Santiago, asin ni Juan an saindang hikot kan agdahon sinda na sumunod ki Jesus. Binayaan ninda an negosyo na paninira asin an ministeryo an nagin pangenot nindang gibohon. Oyon sa pagkasaysay kan Ebanghelyo ni Lucas, si Pedro nagsabi: “Uya! Binayaan mi na an samong sadiring mga bagay asin nagsunod sa saimo.” (Luc. 18:28) Dai man kinaipuhan kan kadaklan sa sato na bayaan an gabos na ‘sadiri niatong bagay’ tanganing sumunod ki Jesus. Minsan siring, talagang kinaipuhan niatong ‘paindahan an satong sadiri’ tanganing magin mga parasunod ni Cristo asin bilog na pusong mga lingkod ni Jehova. (Mat. 16:24) An siring na gibo nagbunga nin abundang mga bendisyon. (Basahon an Mateo 19:29.) An pagkaigwa nin espiritu nin pag-ebanghelyo bilang pag-arog ki Cristo nagpapagayagaya sa satong puso, nangorogna kun nagkaigwa kita nin dawa sadit na kabtang sa pagtabang sa sarong tawo na rumani sa Dios asin sa saiyang namomotan na Aki.
5. Isaysay an sarong eksperyensia na nagpapaheling kun ano an puedeng magin desisyon nin sarong imigrante na nakanood kan katotoohan sa Biblia.
5 Si Valmir sarong paramina nin bulawan na taga Brazil asin nakaistar sa puerang lugar nin Suriname. Sia sarong alkoholiko na imoral an buhay. Sarong beses kan sia yaon sa sarong siudad, pinonan siang konduktahan nin pag-adal sa Biblia kan mga Saksi ni Jehova. Sia nag-adal sa Biblia aroaldaw, guminibo nin dakol na pagbabago, asin dai nahaloy nabautismohan. Kan maheling nia na an saiyang trabaho nagpapadepisil sa saiya na mamuhay kaoyon kan saiyang bago pa sanang manompongan na pagtubod, ipinabakal nia an saiyang maganansiang negosyo asin nagbalik sia sa Brazil tanganing tabangan an saiyang pamilya na makanompong nin espirituwal na kayamanan. Kan manodan an katotoohan sa Biblia, dakol na imigrante an nagin andam na bayaan an saindang trabaho sa mayaman na mga nasyon asin nagbalik sa pinaghalean nindang lugar tanganing matabangan an saindang mga paryente patin iba pa sa espirituwal na paagi. An siring na mga parahayag kan Kahadean nagpapaheling nin tunay na espiritu nin pag-ebanghelyo.
6. Ano an puede niatong gibohon kun dai kita puedeng bumalyo sa lugar na mas dakula an pangangaipo para sa mga parabalangibog kan Kahadean?
6 Nagibo nin dakol na Saksi na bumalyo sa mga lugar na dian mas dakula an pangangaipo para sa mga parahulit kan Kahadean. An nagkapira naglingkod pa ngani sa ibang nasyon. Personalmente, tibaad mayo kita sa kamugtakan na bumalyo sa ibang lugar, alagad maaarog niato si Jesus kun pirme niatong gigibohon an satong pinakamakakaya sa ministeryo.
Si Jehova Nagtatao kan Kinakaipuhan na Pagsasanay
7. Anong mga paadalan an dinisenyo tanganing sanayon an mga gustong mapaoswag an saindang abilidad bilang mga parabalangibog kan Kahadean?
7 Kun paanong si Jesus nag-ako nin pagsasanay hale sa saiyang Ama, puede man kitang makinabang sa pagtotokdo na itinatao ni Jehova ngonyan. Si Jesus mismo nagsabi: “Nasusurat sa Mga Propeta, ‘Asin sinda gabos totokdoan ni Jehova.’” (Juan 6:45; Isa. 54:13) Ngonyan, may mga paadalan na espesyalmenteng dinisenyo tanganing sangkapan kita bilang mga parabalangibog kan Kahadean. Daing duwa-duwa, gabos kita nakinabang minsan paano sa Teokratikong Paadalan sa Pagmiministro sa satong lokal na mga kongregasyon. An mga payunir may pribilehiong umatender sa Paadalan sa Paglilingkod Bilang Payunir. Dakol na haloy nang payunir an naogmang makaatender nin ikaduwang beses sa paadalan na ini. An mga magurang sa kongregasyon asin ministeryal na lingkod nag-atender sa Pangkahadean na Paadalan sa Pagmiministro tanganing mapaoswag an saindang abilidad sa pagtotokdo asin an paglilingkod ninda sa mga kapagtubod. Dakol na mayong agom na magurang sa kongregasyon asin ministeryal na lingkod an tinokdoan sa Paadalan sa Ministeryal na Pagsasanay, na sinasangkapan sinda na tabangan an iba sa paghuhulit. Asin dakol sa mga tugang na idinestino bilang mga misyonero sa ibang mga nasyon an sinanay sa Paadalan sa Biblia kan Watchtower sa Gilead.
8. Paano ipinaheling kan nagkapirang tugang an saindang pagpapahalaga sa pagsasanay na itinatao ni Jehova?
8 Dakol na Saksi ni Jehova an naggibo nin mga pagliliwat tanganing makaatender sa mga paadalan na ini. Tanganing makaatender si Yugu sa Paadalan sa Ministeryal na Pagsasanay sa Canada, nagdemitir sia sa saiyang sekular na trabaho huli ta dai sia tinogotan kan saiyang among na magbakasyon. “Dai ko iyan pinagbasolan,” an sabi ni Yugu. “Sa katunayan, kun tinogotan ninda ako na magbakasyon, tibaad asahan ninda na bilang balos mapermanente ako sa kompanya. Alagad ngonyan andam akong akoon an ano man na asignasyon na tibaad itatao pa sa sako ni Jehova.” Tanganing aprobetsaran an pagsasanay na itinatao nin Dios, dakol an nagin andam na isakripisyo an mga bagay na dati mahalagang marhay sa sainda.—Luc. 5:28.
9. Magtao nin halimbawa na nagpapaheling kan marahay na mga resulta kan sono sa Kasuratan na pagtotokdo asin maigot na paghihingoa.
9 An sono sa Kasuratan na pagtotokdo asin maigot na paghihingoa epektibong marhay. (2 Tim. 3:16, 17) Isip-isipa an nangyari ki Saulo sa Guatemala. Sia namundag na may dikit na kaninan sa isip, asin an saro sa saiyang mga maestra nagsabi sa ina nia na dai kaini dapat piriton an aki na makanood na magbasa huling iyan makakadesganar sana sa saiya. Nagpondo si Saulo sa pag-eskuela na dai nakanood magbasa. Minsan siring, sarong Saksi an nagtokdo ki Saulo na magbasa, na ginagamit an brosyur na Apply Yourself to Reading and Writing. Pag-abot nin panahon, si Saulo nag-oswag sagkod na sia nagkakaigwa na nin kabtang sa Teokratikong Paadalan sa Pagmiministro. Paghaloyhaloy, an maestra nanuparan kan ina ni Saulo sa ministeryo sa harong-harong. Kan maaraman kan maestra na si Saulo nakanood nang magbasa, pinakiolayan kaini an saiyang ina na iiba si Saulo sa harong kan maestra sa sunod na semana. Kan suminunod na semana, hinapot kan maestra si Saulo, “Ano an itotokdo mo sa sako?” Pinonan na basahon ni Saulo an sarong parapo sa librong Ano Man Nanggad an Itinotokdo kan Biblia? “Dai ako makapaniwala na tinotokdoan mo na ako ngonyan,” an sabi kan maestra. Dai nia napugolan na mapahibi sa kaogmahan asin kinugos nia si Saulo.
Pagtotokdo na Nakakapahiro sa Puso
10. Anong ekselenteng kasangkapan an magagamit niato sa pagtotokdo kan katotoohan sa Biblia?
10 Ibinasar ni Jesus an saiyang pagtotokdo sa direktang itinokdo sa saiya ni Jehova asin sa instruksion na yaon sa nasusurat na Tataramon nin Dios. (Luc. 4:16-21; Juan 8:28) Inaarog niato si Jesus paagi sa pag-aplikar kan saiyang hatol asin pagtotokdo basado sa Kasuratan. Sa siring, gabos kita nagtataram asin nag-iisip na may pagkaoroyon, asin nakakatabang ini sa satong pagkasararo. (1 Cor. 1:10) Nagpapasalamat nanggad kita na “an maimbod asin mapagmansay na oripon” nagtatao nin mga publikasyon na basado sa Biblia tanganing tabangan kita na mapagdanay an pagkasararo sa satong pagtotokdo asin na maotob an satong gibohon bilang mga ebanghelisador! (Mat. 24:45; 28:19, 20) An saro sa mga publikasyon na ini iyo an librong Itinotokdo kan Biblia, na makukua na ngonyan sa 179 lenguahe.
11. Paano napangganahan nin sarong tugang sa Etiopia an pagtumang paagi sa paggamit kan librong Itinotokdo kan Biblia?
11 An pag-adal sa Kasuratan na ginagamit an librong Itinotokdo kan Biblia puede pa nganing makapabago sa puso nin mga nagtutumang. Sa sarong pangyayari si Lula, na sarong payunir sa Etiopia, nagkokondukta nin pag-adal kan an sarong paryente kan inaadalan sa Biblia daing galang na suminabad asin nagsabi na dai ninda kaipuhan an siring na pag-adal. Si Lula kalmadong nangatanosan sa paryente, na ginagamit an ilustrasyon manongod sa palsipikadong kuarta na nasa kapitulo 15 kan librong Itinotokdo kan Biblia. An paryente kuminalma asin tinogotan sindang ipadagos an pag-adal sa Biblia. Sa katunayan, yaon sia kan suminunod na pag-adal sa Biblia asin nakiolay na konduktahan man sia nin pag-adal sa Biblia, na nag-alok pa nganing magbayad para dian! Dai nahaloy tolong beses na siang kinokonduktahan nin pag-adal sa Biblia kada semana asin nagin marahay an saiyang pag-oswag sa espirituwal.
12. Magtao nin halimbawa tanganing ipaheling kun paano an mga hoben epektibong makakapagtokdo kan mga katotoohan sa Biblia.
12 An mga hoben puedeng makatabang sa iba paagi sa paggamit kan librong Itinotokdo kan Biblia. Kan an 11 anyos na si Keanu sa Hawaii nagbabasa kan librong ini sa eskuelahan, an saro sa mga kaklase nia naghapot sa saiya, “Taano ta dai ka nagseselebrar nin mga kapiestahan?” Binasa ni Keanu an simbag sa mismong kabtang kan apendise na may topikong “Maninigo daw Niatong Selebraron an mga Kapiestahan?” Dangan binuksan nia an lista nin mga laog kan libro asin hinapot nia an saiyang kaklase kun arin na tema an pinakainteresante sa saiya. Naponan an sarong pag-adal sa Biblia. Kan nakaaging taon nin paglilingkod, an Mga Saksi ni Jehova nakapagkondukta nin 6,561,426 na pag-adal sa Biblia, na an dakol kaiyan naggamit kan librong Itinotokdo kan Biblia. Ginagamit daw nindo an kasangkapan na ini sa mga pag-adal sa Biblia?
13. Sa anong paagi na an pag-adal sa Biblia puedeng magkaigwa nin makosog na impluwensia sa mga tawo?
13 An pag-adal sa Kasuratan na ginagamit an librong Itinotokdo kan Biblia puedeng magkaigwa nin makosog na impluwensia sa mga nagmamawot na gibohon an kabotan nin Dios. An sarong mag-agom na espesyal payunir sa Norway nakapoon nin pag-adal sa Biblia sa sarong pamilya na hale sa Zambia. An mag-agom na taga Zambia igwa nin tolong aking babae asin habo na nindang magkaaki pa. Kaya kan magbados an babae, nagdesisyon sinda na magpaaborsion. Pirang aldaw na sana bago sinda magpadoktor, pinag-adalan ninda an kapitulo na may titulong “Sarong Diosnon na Pagmansay sa Buhay.” An retrato nin omboy na nasa matris pa sa kapitulong iyan nakapahirong marhay sa boot kan mag-agom kaya nagdesisyon sinda na dai na magpaaborsion. Nagpadagos an saindang marahay na pag-oswag sa espirituwal asin an inginaran ninda sa bagong mamundag na omboy iyo an ngaran kan lalaking espesyal payunir.
14. Isaysay kun paano an pamumuhay kaoyon kan itinotokdo niato puedeng magbunga nin marahay na mga resulta.
14 An sarong mahalagang aspekto kan paagi nin pagtotokdo ni Jesus iyo na namuhay sia kaoyon kan itinokdo nia. Dakol na tawo an naghahanga sa marahay na gawe-gawe kan Mga Saksi ni Jehova, na nag-aarog ki Jesus sa bagay na ini. Sa New Zealand, linaog an kotse nin sarong negosyante asin hinabon an saiyang portpolyo. Irineport nia ini sa pulis, na nagsabi sa saiya: “Makakabalik sana sa saimo an portpolyo mo kun saro sa Mga Saksi ni Jehova an makakua kaiyan.” Sarong Saksi na naghahatod nin mga diaryo an nakakua kan portpolyo. Kan maisihan ini kan kagsadiri, nagduman sia sa harong kan tugang. Nakaginhawa sia kan maheling nia na yaon duman an dokumento na mahalagang marhay sa saiya. Sinabihan sia kan tugang, “Angay sana na ibalik ko an portpolyo, nangorogna ta ako saro sa Mga Saksi ni Jehova.” An negosyante nagngalas, huli ta nagirumdoman nia an sinabi sa saiya kan pulis kan mismong agang iyan. Malinaw nanggad, an tunay na mga Kristiano namumuhay kaoyon kan mga katokdoan na nasa Biblia asin bilang pag-arog ki Jesus.—Heb. 13:18.
Arogon an Pagmansay ni Jesus sa mga Tawo
15, 16. Paano niato maaakit an mga tawo sa mensahe na ihinuhulit niato?
15 An pagmansay ni Jesus sa mga tawo nagin dahelan na naakit sinda sa saiyang mensahe. Halimbawa, naakit sa saiya an mga hamak huli sa saiyang pagkamoot asin kapakumbabaan. Nagpaheling sia nin pagmalasakit sa mga nagdolok sa saiya asin rinanga nia sinda paagi sa maboot na mga tataramon, na pinapaomayan sa pisikal an dakol. (Basahon an Marcos 2:1-5.) Dai kita makakagibo nin mga milagro, alagad makakapaheling kita nin pagkamoot, kapakumbabaan, asin pagmalasakit—mga kualidad na nakakatabang na maakit sa katotoohan an mga tawo.
16 An pagmalasakit nakatabang kan an espesyal payunir na si Tariua nagdalaw sa harong nin sarong may edad nang lalaki na an ngaran Beere, na nakaistar sa saro sa mga mas puerang isla nin Kiribati sa Timog Pasipiko. Minsan ngani ipinarisa kan lalaki na habo kaining maghinanyog, nariparo ni Tariua na ini medyo paralisado asin nakamate sia nin pagmalasakit sa tawong ini. “Naaraman na daw po nindo an panuga nin Dios para sa mga may helang asin may edad na?” an hapot nia. Dangan binasa nia an sarong kabtang kan hula ni Isaias. (Basahon an Isaias 35:5, 6.) Huling napangalas an lalaki, ini nagsabi, “Dakol na taon na akong nagbabasa sa Biblia asin dinadalaw nin sarong misyonero sa sakong relihion, alagad dai ko pa noarin man naheling iyan sa Biblia.” Naponan an sarong pag-adal sa Biblia ki Beere, asin nagin marahay an pag-oswag nia sa espirituwal. Iyo, grabe an pagkakimay nia, alagad sia bautisado na ngonyan, nangengenot sa pag-asikaso sa sarong napapasuway na grupo, asin nakakalakaw sa bilog na isla sa paghulit kan maogmang bareta.
Padagos na Arogon si Cristo
17, 18. (a) Paano ka puedeng magin sarong mapangganang ebanghelisador? (b) Ano an nakatagama para sa mga sineseryoso an saindang ministeryo?
17 Siring kan paorootrong pinapatunayan nin magayagayang mga eksperyensia sa ministeryo, kita puedeng magin mapangganang mga ebanghelisador kun pinapatalubo asin ipinapaheling niato an mga kualidad na ipinaheling ni Jesus. Kun siring, angay nanggad na arogon niato si Cristo bilang maigot na mga ebanghelisador!
18 Kan an nagkapira magin disipulo ni Jesus kan enot na siglo, si Pedro naghapot: “Ano man nanggad an yaon para sa samo?” Si Jesus nagsimbag: “An gabos na nagbaya nin mga harong o mga tugang na lalaki o mga tugang na babae o ama o ina o mga aki o mga daga para sa sakuyang ngaran maako nin mas dakol pa asin magmamana nin buhay na daing katapusan.” (Mat. 19:27-29) Siertong maeeksperyensiahan niato iyan kun padagos niatong aarogon an pinakanangongorog na Misyonero, si Jesu-Cristo.
Ano an Isisimbag Nindo?
• Paano kita sinasanay ni Jehova na magin mga ebanghelisador?
• Taano ta epektibo sa satong ministeryo an librong Itinotokdo kan Biblia?
• Paano niato maaarog si Jesus dapit sa satong pagmansay sa mga tawo?
[Mga Hapot Para sa Pag-adal]
[Ritrato sa pahina 17]
Kan agdahon ni Jesus si Pedro, Andres, Santiago, asin si Juan na sumunod sa saiya, sinda tolos-tolos na naghimate
[Ritrato sa pahina 19]
An mga publikasyon na siring baga kan librong “Itinotokdo kan Biblia” nagtatabang sa sato na mapagdanay an pagkasararo sa satong pagtotokdo