Maglakaw sa mga Dalan ni Jehova
Maglakaw sa mga Dalan ni Jehova
“Maogma an gabos na natatakot ki Jehova, na naglalakaw sa saiyang mga dalan.”—SAL. 128:1.
1, 2. Taano ta makakasierto kita na posibleng makamtan an kaogmahan?
KAOGMAHAN—an gabos gusto kaiyan. Alagad daing duda na maoyon kamo na an pagmawot nin kaogmahan asin an pagmamaigot pa ngani na makamtan iyan iba man sa pakaeksperyensia kaiyan.
2 Pero, posibleng makamtan an kaogmahan. “Maogma an gabos na natatakot ki Jehova, na naglalakaw sa saiyang mga dalan,” an sabi sa Salmo 128:1. Puede kitang magin maogma kun sasambahon niato an Dios asin maglalakaw kita sa saiyang mga dalan paagi sa paggibo kan saiyang kabotan. Ano an puedeng magin epekto kaini sa satong paggawe asin sa mga kualidad na ipinapaheling niato?
Magin Kang Mapagtitiwalaan
3. Paano an pagigin mapagtitiwalaan konektado sa pagdusay niato sa Dios?
3 An mga natatakot ki Jehova mapagtitiwalaan, kun paanong sia mapagtitiwalaan man. Inotob ni Jehova an gabos na ipinanuga nia sa suanoy na Israel. (1 Ha. 8:56) An satong pagdusay sa Dios iyo na an pinakamahalagang panuga na magigibo niato, asin an dayaday na pamimibi makakatabang sa sato na otobon iyan. Puede kitang mamibi nin arog ki salmistang David: “Naghinanyog ka, O Dios, sa sakong mga promesa. . . . Mag-aawit ako nin melodiya sa saimong ngaran sagkod lamang, tangani na maotob ko an sakong mga promesa aroaldaw.” (Sal. 61:5, 8; Ecl. 5:4-6) Tanganing magin mga katood nin Dios, dapat na kita mapagtitiwalaan.—Sal. 15:1, 4.
4. Paano minansay ni Jefte asin kan saiyang aking babae an promesa nia ki Jehova?
4 Kan mga panahon kan mga Hokom sa Israel, si Jefte nagpromesa na kun tatawan sia ni Jehova nin kapangganahan sa mga Amonita, itatao nia bilang “dolot na tinotong” an enot na magsabat sa saiya pagpuli nia hale sa ralaban. An sarong iyan iyo palan an aking babae ni Jefte—an solong aki nia. Huling may pagtubod ki Jehova, inotob ni Jefte sagkod kan saiyang daing agom na aking babae an saiyang promesa. Minsan ngani pinapahalagahan na marhay sa Israel an pag-agom asin pagkaigwa nin mga aki, an aking babae ni Jefte gikan sa boot na nagdanay na mayong agom asin ikinaogma an pribilehio na gibohon an sagradong paglilingkod sa santuaryo ni Jehova.—Hok. 11:28-40.
5. Sa anong paagi nagin mapagtitiwalaan si Ana?
5 An diosnon na babaeng si Ana nagin mapagtitiwalaan. Nag-istar sia kaiba kan saiyang Levitang agom, si Elcana, asin kan saro pang agom kaini, si Penina, sa mabukid na rehion nin Efraim. Si Penina nagkaigwa nin nagkapirang aki asin dinuduhagi nia an baog na si Ana partikularmente kun an pamilya minaduman sa tabernakulo. Sa saro kan mga pangyayaring ini, si Ana nagpromesa na kun sia mangangaki nin aking lalaki, ini itatao nia ki Jehova. Dai nahaloy, sia nagbados asin nangaki na nginaranan na Samuel. Kan butason na ini sa pagsuso, idinolot ini ni Ana sa Dios sa Silo, na ipinapasubli si Samuel ki Jehova “sa gabos na aldaw kan saiyang buhay.” (1 Sam. 1:11) Sa siring, inotob nia an saiyang promesa minsan ngani dai nia aram na pag-abot nin panahon magkakaigwa sia nin iba pang aki.—1 Sam. 2:20, 21.
6. Paano ipinaheling an pagigin mapagtitiwalaan ni Tiquico?
6 An enot na siglong Kristiano na si Tiquico sarong mapagtitiwalaan asin “maimbod na ministro.” (Col. 4:7) Si Tiquico nagbiahe kaiba ni apostol Pablo poon sa Grecia sagkod sa Macedonia, pasiring sa Asia Minor, asin tibaad sagkod sa Jerusalem. (Gibo 20:2-4) Posibleng sia “an tugang” na nagtabang ki Tito tanganing pamahalaan an pagtao nin regalo para sa daing sukat na mga kapagtubod sa Judea. (2 Cor. 8:18, 19; 12:18) Kan si Pablo enot na mabilanggo sa Roma, isinugo nia an mapagtitiwalaan na representanteng si Tiquico na darahon an mga surat sa mga kapagtubod sa Efeso asin Colosas. (Efe. 6:21, 22; Col. 4:8, 9) Sa ikaduwang pagkabilanggo ni Pablo sa Roma, isinugo nia si Tiquico sa Efeso. (2 Tim. 4:12) Kun kita mapagtitiwalaan, mag-aako man kita nin mga asignasyon sa paglilingkod ki Jehova.
7, 8. Taano ta masasabi niato na si David asin Jonatan tunay na magkatood?
7 Linalaoman nin Dios na kita magigin mapagtitiwalaan na mga katood. (Tal. 17:17) An aki ni Hadeng Saul na si Jonatan nagin katood ni David. Kan madangog ni Jonatan na ginadan ni David si Goliat, “an mismong kalag ni Jonatan nagin dayupot sa kalag ni David, asin namotan sia ni Jonatan na siring sa saiyang sadiring kalag.” (1 Sam. 18:1, 3) Pinatanidan pa ngani ni Jonatan si David kan gusto ining gadanon ni Saul. Pakadulag ni David, nakipaghelingan asin nakipagtipan sa saiya si Jonatan. Haros gadanon ni Saul si Jonatan huli sa pakipag-olay kaini ki David, alagad naghelingan liwat an duwang magkatood asin pinakosog giraray an saindang pagkakatood. (1 Sam. 20:24-41) Sa huring paghelingan ninda, pinakosog ni Jonatan an kamot ni David “mapadapit sa Dios.”—1 Sam. 23:16-18.
8 Si Jonatan nagadan sa pakikipaglaban sa mga Filisteo. (1 Sam. 31:6) Sa sarong panambitan, si David nag-awit: “Namomondo ako sa saimo, tugang kong Jonatan, nagin kang marahayon sa sakuya. An saimong pagkamoot sa sako orog na makangangalas kisa sa pagkamoot nin mga babae.” (2 Sam. 1:26) An pagkamoot na ini kapadangatan nin magkatood asin mayo nin seksuwal na implikasyon. Si David asin Jonatan tunay na magkatood.
Pirmeng Magin “Mapakumbaba sa Isip”
9. Paano ipinapaheling sa Hokom kapitulo 9 an kahalagahan nin kapakumbabaan?
9 Tanganing magin mga katood nin Dios, dapat kitang magin “mapakumbaba sa isip.” (1 Ped. 3:8; Sal. 138:6) Ipinapaheling an kahalagahan nin kapakumbabaan sa Hokom kapitulo 9. An aki ni Gedeon na si Jotam nagsabi: “Kaidtong enot na panahon an kakahoyan naglahid nin sarong hade sa sainda.” Nasambitan an poon nin olibo, poon nin higera, asin poon nin ubas. Irinepresentar kan mga ini an maninigong mga indibiduwal na dai naghingoang pamahalaan an saindang mga kapwa Israelita. Alagad an binit—na magagamit sana na panggatong—irinepresentar an paghade kan mapalangkaw na si Abimelec, sarong paragadan na gustong-gustong magdominar sa iba. Minsan ngani sia “nagpakangprinsipe sa Israel nin tolong taon,” sia nagadan na dai pa napapanahon. (Hok. 9:8-15, 22, 50-54) Mas marahay nanggad na magin “mapakumbaba sa isip”!
10. Ano an nanodan nindo ki Herodes sa dai nia ‘pagtao nin kamurawayan sa Dios’?
10 Kan enot na siglo C.E., nagkaigwa nin tension sa pag-oltanan kan mapalangkaw na si Hadeng Herodes Agripa nin Judea asin kan mga nag-eerok sa Tiro asin Sidon, na gustong makipagkatoninongan sa saiya. Sa sarong pangyayari, kan si Herodes nagpapahayag sa publiko, nagkururahaw sinda: “Tingog nin sarong dios, asin bakong nin sarong tawo!” Si Herodes dai nagsayuma sa siring na labi-labing paghanga, asin hinampak sia kan anghel ni Jehova kaya nagadan sia sa makangingiring paagi “huli ta dai nia itinao an kamurawayan sa Dios.” (Gibo 12:20-23) Paano kun kita medyo matibay na ispiker o paratokdo kan mga katotoohan sa Biblia? Kun siring, dapat niatong pasalamatan an Dios huli sa itinotogot niang magibo niato.—1 Cor. 4:6, 7; Sant. 4:6.
Magmakosog an Boot Asin Magpakakosog Kamo
11, 12. Paano ipinapaheling kan eksperyensia ni Enoc na tinatawan ni Jehova nin kosog nin boot asin kakosogan an saiyang mga lingkod?
11 Kun mapakumbaba kitang naglalakaw sa mga dalan ni Jehova, tatawan nia kita nin kosog nin boot asin kakosogan. (Deut. 31:6-8, 23) Si Enoc, an ikapitong tawo sa kasaysayan nin linahe poon ki Adan, may kosog nin boot na naglakaw na kaibanan nin Dios paagi sa pagmamaigot na sundon an tanos na dalan sa tahaw kan marigsok niang mga katemporanyo. (Gen. 5:21-24) Pinakosog ni Jehova si Enoc na ipaabot sa sainda an sarong mapuersang mensahe huli kan saindang bakong diosnon na mga tataramon asin gibo. (Basahon an Judas 14, 15.) Kamo daw igwa nin kosog nin boot tanganing ipahayag an mga paghokom nin Dios?
12 Hinokoman ni Jehova an mga bakong diosnon paagi sa lakop sa globong Baha kan panahon ni Noe. Minsan siring, an hula ni Enoc nagpaparigon sa boot niato, huling an bakong diosnon na mga tawo sa satong panahon lalaglagon sa dai na mahahaloy kan manampulong ribong banal nin Dios. (Kap. 16:14-16; 19:11-16) Bilang simbag sa satong mga pamibi, tinatawan kita ni Jehova nin kosog nin boot na ipahayag an saiyang mensahe, baga man iyan may koneksion sa saiyang mga paghokom o mga bendisyon sa irarom kan pamamahala kan Kahadean.
13. Taano ta makakasierto kita na ikakatao nin Dios an kosog nin boot asin kakosogan na kaipuhan niato tanganing matagalan an mga problema na nagtatao nin makuring kamondoan?
13 Kaipuhan niato an itinatao nin Dios na kosog nin boot asin kakosogan tanganing matagalan an mga problema na nagtatao nin makuring kamondoan. Kan si Esau mag-agom nin duwang Hitea, “sinda ginikanan nin kapaitan nin boot [kan mga magurang nia na si] Isaac asin Rebeca.” Nanambitan pa ngani si Rebeca: “Ikinakasurang ko na nin makuri an buhay kong ini huli sa mga aking babae ni Het. Kun [an satong aki na] si Jacob maagom sa mga aking babae ni Het na arog kan mga ini na hale sa mga aking babae kan daga, aanhon ko pa an buhay?” (Gen. 26:34, 35; 27:46) Huminiro si Isaac asin isinubol nia si Jacob tanganing maghanap nin magigin agom sa mga nagsasamba ki Jehova. Minsan ngani dai na mababago ni Isaac asin Rebeca an ginibo ni Esau, tinawan sinda nin Dios nin kadonongan, kosog nin boot, asin kakosogan tanganing magdanay na maimbod sa Saiya. Kun mamimibi kita para sa kinakaipuhan na tabang, gigibohon man iyan ni Jehova sa sato.—Sal. 118:5.
14. Paano nagpaheling nin kosog nin boot an sarong daragitang Israelita?
14 Pakalihis nin dakol na siglo, sarong daragitang Israelita na binihag nin sarong grupo nin mga parasalakat an nagin surugoon sa harong kan Siriong komandante nin hukbo na si Naaman, saro na may daot. Huling nadangog an manongod sa mga milagro nin Dios na ginibo ni propeta Eliseo, may kosog nin boot na sinabi kan daragita sa agom ni Naaman: ‘Kun an kagurangnan ko maduman sa Israel, papaomayan sia kan propeta ni Jehova sa saiyang daot.’ Si Naaman nagduman nanggad sa Israel, asin sia milagrosong pinaomayan. (2 Ha. 5:1-3) Marahayon nanggad na halimbawa an daragitang iyan para sa mga hoben na nananarig ki Jehova para sa kosog nin boot na magpatotoo sa mga maestra, kaeskuela, asin iba pa!
15. Anong makosog an boot na aksion an ginibo ni Abdias na mayordomo sa harong ni Acab?
15 An itinatao nin Dios na kosog nin boot nagtatabang sa sato na tagalan an persekusyon. Estudyare an mayordomo sa harong ni Hadeng Acab na si Abdias, na katemporanyo ni propeta Elias. Kan ipagboot ni Reyna Jezebel na gadanon an mga propeta nin Dios, itinago ni Abdias an 100 sa sainda “na tigsingkuenta sa sarong lungib.” (1 Ha. 18:13; 19:18) Kamo daw may kosog nin boot na matabang sa pinepersegir na mga kapwa Kristiano, kapareho kan pagtabang ni Abdias sa mga propeta ni Jehova?
16, 17. Ano an nagin reaksion ni Aristarco asin Gayo sa persekusyon?
16 Kun kita pinepersegir, makakasarig kita na tatabangan kita ni Jehova. (Roma 8:35-39) Sa sarong daing atop na teatro sa Efeso, an mga kapwa trabahador ni Pablo na si Aristarco asin Gayo napaatubang sa sarong pagsururog na posibleng marhay na rinibo an bilang. An platerong si Demetrio an nagpoon nin pagkariribok. Sia asin an mga kapwa platero naggigibo nin platang mga altar kan diosang si Artemis, asin nameligro an saindang maganansiang negosyo huli ta an paghuhulit ni Pablo nagin dahelan na bayaan kan dakol sa mga nag-eerok sa siudad an pagsamba sa idolo. Ginuyod kan sururog si Aristarco asin Gayo pasiring sa teatro saka sinda padagos na nagkururahaw: “Dakula si Artemis kan mga taga Efeso!” Posibleng linaoman ni Aristarco asin Gayo na magagadan sinda, alagad pinatoninong kan rehistrador kan siudad an kadaklan.—Gibo 19:23-41.
17 Kun nagkaigwa kamo nin siring kaiyan na eksperyensia, hihingoahon daw kutana nindo na magkaigwa nin mas pasil na pamumuhay? Mayo nin nagpaparisa na si Aristarco o Gayo nawaran nin kosog nin boot. Huling taga Tesalonica, aram ni Aristarco na an pagbalangibog kan maogmang bareta puedeng magresulta sa persekusyon. Bago kaidto, sarong pagkariribok an nangyari kan si Pablo naghulit duman. (Gibo 17:5; 20:4) Huli ta si Aristarco asin Gayo naglakaw sa mga dalan ni Jehova, igwa sinda kan tao nin Dios na kakosogan asin kosog nin boot na tagalan an persekusyon.
Pagrisa sa Intereses nin Iba
18. Paano si Prisca asin Aquila “nagririsa” sa intereses nin iba?
18 Baga man pinepersegir kita ngonyan o dai, maninigo kitang magin interesado sa mga kapwa Kristiano. Si Prisca asin Aquila “nagririsa” sa intereses nin iba. (Basahon an Filipos 2:4.) An arogan na mag-agom na iyan posibleng nagtao nin dagosan ki Pablo sa Efeso, na duman an platerong si Demetrio nagpoon nin pagkariribok na nasambitan sa enotan. Posibleng an kamugtakan na iyan an nagpahiro ki Aquila asin Prisca na ‘isapeligro an saindang liog’ para ki Pablo. (Roma 16:3, 4; 2 Cor. 1:8) Ngonyan, an pagmakolog sa mga tugang niato na pinepersegir ginigibo kitang “maingat siring sa mga halas.” (Mat. 10:16-18) Ginigibo niato an satong gibohon na may pag-iingat asin dai niato sinda ipinapahamak paagi sa paghayag kan saindang ngaran o iba pang impormasyon sa mga nagpepersegir.
19. Anong marahay na mga bagay an ginibo ni Dorcas para sa iba?
19 Igwa nin manlaenlaen na paagi an pagrisa sa intereses nin iba. An nagkapirang Kristiano igwa nin mga pangangaipo, asin tibaad mapapanigoan niato an mga pangangaipong iyan. (Efe. 4:28; Sant. 2:14-17) Sa enot na siglong kongregasyon sa Jope, igwa nin sarong matinao na an ngaran Dorcas. (Basahon an Gibo 9:36-42.) Si Dorcas “pano nin marahay na mga gibo asin mga balaog nin pagkaherak” na minalataw na kaiba an paggibo nin mga gubing para sa daing sukat na mga balo. Nagin dahelan nin grabeng kamondoan kan mga balo an pagkagadan nia kan 36 C.E. Ginamit nin Dios si apostol Pedro tanganing buhayon liwat si Dorcas, asin posibleng marhay na ginamit ni Dorcas an natatada niang buhay sa daga sa magayagayang paghuhulit kan maogmang bareta saka paggibo nin marahay na mga bagay para sa iba. Naoogma nanggad kita na makaibanan ngonyan an siring na bakong maimot na mga Kristiana!
20, 21. (a) Ano an koneksion kan pagparigon sa boot sa pagpaheling nin interes sa iba? (b) Ano an magigibo nindo tanganing magin nakakaparigon sa boot?
20 Nagpapaheling kita nin interes sa iba paagi sa pagparigon sa boot ninda. (Roma 1:11, 12) An kapwa trabahador ni Pablo na si Silas nagin sarong gikanan nin pagparigon sa boot. Pagkatapos na an isyu manongod sa pagturi madesisyonan kan mga 49 C.E., an namamahalang grupo sa Jerusalem nagsugo nin mga representante tanganing darahon an sarong surat sa mga Kristiano sa ibang lugar. Dinara iyan sa Antioquia ni Silas, Judas, Bernabe, asin Pablo. Duman ‘pinarigon ni Silas asin Judas an boot kan mga tugang paagi sa dakol na diskurso asin pinakosog sinda.’—Gibo 15:32.
21 Sa huri, ibinilanggo si Pablo asin Silas sa Filipos, alagad huli sa sarong linog, nagin posible na sinda makapagpatotoo asin maheling na magin mga paratubod an bantay sa bilanggoan saka an kasararo kaini sa harong. Bago maghale sa siudad na iyan si Pablo asin Silas, pinarigon ninda an boot kan mga tugang. (Gibo 16:12, 40) Kapareho ni Pablo asin Silas, maghingoa na parigonon an boot nin iba paagi sa saindong mga komento, pahayag, asin maigot na paglilingkod sa langtad. Asin kun igwa kamo nin “tataramon na pamparigon sa boot,” sige “sabihon nindo” iyan.—Gibo 13:15.
Padagos na Maglakaw sa mga Dalan ni Jehova
22, 23. Paano talaga kita makikinabang sa mga pagkasaysay sa Biblia?
22 Makakapagpasalamat nanggad kita para sa mga pagkasaysay na totoong nangyari sa buhay na isinurat sa Tataramon ni Jehova, an “Dios nin bilog na pagparigon sa boot”! (2 Cor. 1:3, Byington) Tanganing makinabang kita sa mga eksperyensiang ini, dapat niatong iaplikar sa satong buhay an mga leksion sa Biblia asin togotan niato an satong sadiri na giyahan kan banal na espiritu nin Dios.—Gal. 5:22-25.
23 An paghorophorop sa mga pagkasaysay sa Biblia matabang sa sato na ipaheling an diosnon na mga kualidad. Papakosogon kaiyan an satong relasyon ki Jehova, na nagtatao sa sato nin “kadonongan asin kaaraman patin kaogmahan.” (Ecl. 2:26) Bilang resulta, mapapagayagaya niato an mamomoton na puso nin Dios. (Tal. 27:11) Logod na magin determinado kita na gibohon iyan paagi sa padagos na paglakaw sa mga dalan ni Jehova.
Ano an Isisimbag Nindo?
• Paano nindo mapapatunayan na kamo mapagtitiwalaan?
• Taano ta maninigo kitang magin “mapakumbaba sa isip”?
• Paano an mga pagkasaysay sa Biblia makakatabang sa sato na magin makosog an boot?
• Sa anong mga paagi na danay niatong rinirisa an intereses nin iba?
[Mga Hapot Para sa Pag-adal]
[Ritrato sa pahina 8]
Inotob kan mapagtitiwalaan na si Jefte asin kan saiyang aking babae an saiyang promesa, minsan ngani depisil an paggibo kaiyan
[Ritrato sa pahina 10]
Mga hoben, ano an nanodan nindo sa daragitang Israelita?
[Ritrato sa pahina 11]
Paano pinanigoan ni Dorcas an mga pangangaipo kan mga kapwa Kristiano?