Makanood nin Leksion sa mga Sala kan mga Israelita

ARAM kan mga Israelita kun ano an inaasahan sa sainda ni Jehova mantang palaog sinda sa Dagang Panuga. Paagi ki Moises, ipinagboot nin Dios: “Dapat nindong palayason sa atubangan nindo an gabos na nag-eerok sa daga saka raoton an gabos na rebultong gapo ninda, patin an gabos nindang imahen na minoldeng metal maninigo nindong raoton, asin an gabos na sagradong haralangkaw na lugar ninda maninigo nindong gabaon.”—Bil. 33:52.

An banwaan nin Israel kaipuhan na dai makipagtipan sa mga nag-eerok sa daga, ni makipag-alyansa man sinda paagi sa pag-agom sa sainda. (Deut. 7:2, 3) Sa katunayan, pinatanidan an piniling banwaan nin Dios: “Mag-ingat ka sa saimo man sana na dai ka makipagtipan sa mga nag-eerok sa daga na saimong lalaogan, ta tibaad iyan magin sarong siod sa tahaw mo.” (Ex. 34:12) Pero, an mga Israelita nakisuway sa Dios asin nasiod. Ano an nagin dahelan kan pagkapahamak ninda? Anong nagpapatanid na mga leksion an manonodan niato sa saindang eksperyensia?—1 Cor. 10:11.

Nagpoon sa Dayupot na Pakikiasosyar na Suminagkod sa Idolatriya

Sa pagsakop sa Dagang Panuga, nanggana kan enot an mga Israelita tumang sa mga nag-eerok dian. Minsan siring, dai kinuyog nin lubos kan mga aki ni Israel an mga pagboot nin Dios. Dai ninda pinalayas an mga kaiwal. (Hok. 1:1–2:10) Sa kabaliktaran, kan mag-erok an mga Israelita sa tahaw kan “pitong nasyon” na nag-istar sa daga, an regular na pakikiasosyar sa mga tawo kan mga nasyon na idto naggiya sa pakikikatood sa sainda. (Deut. 7:1) Paano ini nakaapektar sa mga Israelita? An Biblia nagsabi: “Kinua ninda an saindang mga aking babae bilang mga agom ninda, saka an sainda mismong mga aking babae itinao ninda sa saindang mga aking lalaki, patin nagpoon sindang maglingkod sa saindang mga dios. Kaya ginibo kan mga aki ni Israel an maraot sa pagheling ni Jehova, asin liningawan ninda si Jehova na saindang Dios saka naglingkod sinda sa mga Baal patin sa mga sagradong palo.” (Hok. 3:5-7) An dayupot na pakikiasosyar kan banwaan nin Israel sa mga nag-eerok sa dagang iyan naggiya sa pakipag-agoman sa sainda asin sa idolatriya. Kan  makipag-alyansa sinda paagi sa pag-agom, nainaan an posibilidad na palayason kan Israel an mga pagano sa daga. Naraot an tunay na pagsamba, asin an mga Israelita mismo nagpoon na maglingkod sa falsong mga dios.

Bilang mga katood kan mga Israelita, an mga nag-eerok sa Dagang Panuga nagtao nin mas dakulang espirituwal na peligro sa sainda kisa kan kaiwal pa ninda an mga ini. Isip-isipa an saro pang paagi na tibaad nangyari an karatan sa relihion.

Nagpoon sa Pag-oma na Suminagkod sa Pagsamba ki Baal

Sa paglaog sa Dagang Panuga, an mga aki ni Israel nagpondo na sa pagigin mga parabaklay asin dakol an nagin paraoma. An pamamaagi sa pag-oma na ginamit ninda posibleng kapareho kan pamamaaging ginamit kan mga tawong naenot na nagtanom sa daga bago sinda. Minalataw na an pagbabagong ini labi pa sa posibleng paggamit sana sa pamamaagi kan mga Cananeo sa pag-oma. An pakikiasosyar sa mga tawo duman nakaakit man sa mga Israelita na akoon an saindang mga paniniwala na konektado sa pag-oma.

An mga Cananeo nagsamba sa dakol na Baal—mga dios na pinapaniwalaan na nagpapataba sa daga. Apuera sa pag-oma sa daga asin pag-ani kan bunga kaiyan, pag-abot nin panahon an mga Israelita nakiayon sa pagsamba sa mga dios nin mga Cananeo, na ibinibilang an mga dios na ini na iyo an nagtatao nin abundansia. Sa siring, dakol sa Israel an sagin-sagin na nagsasamba ki Jehova, alagad an totoo sinda nakikikabtang nin lubos sa apostasiya.

Mapuersang Patanid Para sa Sato Ngonyan

Tibaad an mga Israelita mayo nin ano man na intension na maimbuelto sa pagsamba ki Baal asin sa karigsokan kaiyan kan enot nindang makaasosyar an mga tawo sa Dagang Panuga. Pero, dian suminagkod an saindang pakikiasosyar. Bako daw na maninigo niatong asahan an siring na nakakadanyar na mga epekto kun dayupot kitang nakikiasosyar sa mga tawo na tibaad makikatood alagad bakong kapareho niato kun dapit sa Kristianong mga tinutubod, pamantayan asin prinsipyo? Siempre, minsan paano tibaad kaipuhan an pakikiasosyar sa mga daing pagtubod sa satong pinagtatrabahohan, sa eskuelahan, o tibaad sa harong pa ngani. Minsan siring, an eksperyensia kan mga Israelita sarong patanid sa sato na an paghanap nin siring na pakikiasosyar garo paghanap nin problema. Sinasabi kan Biblia an dai madudulagan na katotoohan na ini: “An maraot na pag-iriba nakakaraot sa marahay na mga ugale.”—1 Cor. 15:33.

Ngonyan, napapaatubang kita sa dakol na pagbalo na kaagid kan mga napaatubang sa mga Israelita. An sosyedad sa presenteng panahon may dakol na iniidolo. Kaiba dian an kuarta, mga sikat sa langtad nin aling-alingan, mga sikat sa isport, politikal na mga sistema, nagkapirang namomoon sa relihion, asin mga kapamilya pa ngani. An arin man sa mga ini posibleng magin pangenot sa satong buhay. An pagpatalubo nin dayupot na pakikikatood sa mga dai namomoot ki Jehova puedeng maggiya sa sato sa espirituwal na kapahamakan.

An bawal na sekso sarong pundamental na kabtang kan pagsamba ki Baal na nakaakit asin nagin sugot sa dakol na Israelita. An kaparehong mga siod nakakaakit pa man giraray sa nagkapira sa tahaw kan banwaan nin Dios. Halimbawa, an pagheling nin pornograpiya sa Internet paagi sa komputer sa pribadong harong mismo nin saro tibaad iyo sana an kaipuhan tanganing maraot an malinig na konsensia nin saro na mapag-usyoso o madaling madaya. Makamomondo nanggad kun an sarong Kristiano maakit nin pornograpiya sa Internet!

“Maogma an mga Nag-ootob sa Saiyang mga Pagirumdom”

Personal na bagay an pagdesisyon na kumuyog o dai kumuyog ki Jehova sa pagpili sa satong mga kaibaiba. (Deut. 30:19, 20) Huli kaini, kaipuhan niatong hapoton an satong sadiri: ‘Kiisay ako nakikiibaiba mantang naglilibang? Ano an saindang mga pamantayan asin moral? Sinasamba daw ninda si Jehova? An pakikiibaiba daw sa sainda madagka sa sako na magin mas marahay na Kristiano?’

An salmista nag-awit: “Maogma an mga daing sala sa saindang dalan, an mga naglalakaw sa ley ni Jehova. Maogma an mga nag-ootob sa saiyang mga pagirumdom; sa bilog na puso sia padagos na hinahanap ninda.” (Sal. 119:1, 2) Tunay nanggad, “maogma an gabos na natatakot ki Jehova, na naglalakaw sa saiyang mga dalan.” (Sal. 128:1) Kun mapadapit sa pagpili niato nin mga kaibaiba, logod na makanood kita nin leksion sa mga sala kan mga Israelita asin magin biyong makinuyog ki Jehova.—Tal. 13:20.

[Ritrato sa pahina 26]

An dayupot na pakikiasosyar sa mga dai namomoot ki Jehova puedeng maggiya sa sato sa idolatriya