Sinadol an mga Naggradwar sa Gilead na “Ponan an Pagkalot”
Ika-123 na Gradwasyon sa Gilead
Sinadol an mga Naggradwar sa Gilead na “Ponan an Pagkalot”
KAN Sabado, Setyembre 8, 2007, sarong grupo nin 6,352 hale sa 41 nasyon an presente sa gradwasyon kan ika-123 na klase kan Paadalan sa Biblia kan Watchtower sa Gilead. Kan alas 10 nin aga, maogmang inako kan tsirman kan programa, si Anthony Morris kan Namamahalang Grupo, an mga nagdadangog. Pakatapos kan pambukas na mga tataramon, inintrodusir nia an enot na ispiker, si Gary Breaux na miembro kan Komite kan Sangang Opisina sa Estados Unidos.
Inasegurar ni Tugang na Breaux an mga estudyante na ano man an saindang pisikal na itsura, an mga naggigibo kan kabotan ni Jehova magayon sa Saiyang pagheling. (Jer. 13:11) Sinadol nia an mga naggradwar na papagdanayon an arog kaiyan na klase nin kagayonan. Sunod, idinoon ni Gerrit Lösch kan Namamahalang Grupo na angay na maglaom nin balos kun naglilingkod kita ki Jehova. (Heb. 11:6) Minsan siring, maninigo na an satong motibo iyo an bakong maimot na pagkamoot.
Sunod, an paraataman kan Departamento sa Teokratikong mga Paadalan, si William Samuelson, nagsadol sa mga naggradwar na magdanay sa may dignidad na asignasyon na pagpaisi manongod sa namamahalang Hade asin ipaheling an saindang dignidad paagi sa saindang marahay na gawe-gawe. * Dinagka ni Sam Roberson, katabang na paraataman kan Departamento sa Teokratikong mga Paadalan, an mga naggradwar na pirmeng hanapon an marahay na mga kualidad sa iba. Dangan mas mahihimo kan mga naggradwar na ‘mamoot sa bilog na kasararoan nin mga tugang.’—1 Ped. 2:17.
Pakatapos kan nakakapahirong mga pahayag na idto, ininterbio kan instruktor sa Gilead na si Mark Noumair an nagkapira sa mga naggradwar na nagsaysay nin mga eksperyensia ninda sa paglilingkod sa langtad durante kan kurso sa Gilead. Heling-heling kan mga naghihinanyog an saindang pagkamoot sa ministeryo asin an saindang pagmawot na tabangan an iba. Dangan ininterbio ni Kent Fischer na hale sa Opisina kan Bethel sa Patterson an mga miembro kan Komite kan Sangang Opisina hale sa tolong nasyon na may mga misyonero. An mga tataramon kan marahayon na mga tugang na lalaking ini nag-asegurar sa mga nagdadangog, kaiba an dakol sa mga magurang kan mga naggradwar, na inaasikasong marhay an bagong mga misyonero sa saindang destino. Sunod na ininterbio ni Izak Marais kan Departamento nin Serbisyo Para sa mga Paratradusir an nagkapirang haloy nang misyonero, na may mga eksperyensia na nagtao sa mga naggradwar nin panamit kan mga kagayagayahan na maeeksperyensiahan ninda.
An pangenot na pahayag sa programa, na itinao ni Geoffrey Jackson kan Namamahalang Grupo, may temang “Pagkatapos kan Gabos Nindong Nadangog—Ano an Gigibohon Nindo?” Tinokar ni Tugang na Jackson, na naglingkod bilang misyonero sa laog nin haros 25 taon sa Timog Pasipiko, an kongklusyon sa Sermon sa Bukid. Sa diskursong iyan, si Jesus nagtaram manongod sa duwang tawo, an saro mapagmansay asin an saro pa lolong, na nagtogdok nin mga harong. Sinabi kan ispiker na an duwang harong tibaad yaon sa parehong pangkagabsan na lokasyon. Minsan siring, an tawong lolong nagtogdok sa ibabaw, sa baybay, mantang an tawong mapagmansay nagkalot sagkod na manompongan nia an sarong pundasyon na gapo na totogdokan. Kan magkaigwa nin makosogon na bagyo, an harong na itinogdok sa gapo dai nagaba alagad an harong na itinogdok sa baybay nagaba.—Mat. 7:24-27; Luc. 6:48.
Ipinaliwanag ni Jesus na an tawong lolong kapareho kan mga naghinanyog sana alagad dai nag-aplikar kan mga katokdoan ni Jesus. An tawong madonong kapareho kan mga naghinanyog asin nag-aplikar kan mga tataramon ni Jesus. Sinabihan ni Tugang na Jackson an mga naggradwar, “Kun iaaplikar nindo sa langtad nin pagmimisyonero an nanodan nindo paagi sa pag-adal sa Biblia, magigin arog kamo kan tawong mapagmansay.” Kaya bilang kongklusyon, sinadol nia an mga naggradwar na “ponan an pagkalot” sa saindang asignasyon bilang mga misyonero.
Sa katapustapusi, inako kan mga naggradwar an saindang diploma asin destino, saka nagtao si Tugang na Morris nin pantapos na konseho. Dinagka nia an mga naggradwar na pirmeng magsunod ki Jesus asin pirmeng magsarig ki Jehova para sa kosog. Dangan tinapos an programa sa gradwasyon.
[Nota sa Ibaba]
^ par. 5 An Departamento sa Teokratikong mga Paadalan, na nasa pangangataman kan Komite sa Pagtotokdo, iyo an nagdidirehir sa Gilead, sa paadalan para sa mga miembro kan Komite kan Sangang Opisina, asin sa paadalan para sa nagbibiaheng mga paraataman.
[Kahon sa pahina 31]
ESTADISTIKA KAN KLASE
Bilang nin mga nasyon na irinepresentar: 10
Bilang nin mga nasyon na inasignaran: 24
Bilang nin mga estudyante: 56
Promedyong edad: 33.5
Promedyong taon sa katotoohan: 17.9
Promedyong taon sa bilog na panahon na ministeryo: 13.8
[Ritrato sa pahina 32]
Ika-123 na Naggradwar na Klase kan Paadalan sa Biblia kan Watchtower sa Gilead
Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala sagkod sa too sa kada raya.
(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.