Dinadangog ni Jehova an Satong mga Pag-agrangay Para sa Tabang

“An mga mata ni Jehova nakaturuhok sa mga matanos, asin an saiyang mga talinga nagdadangog sa saindang pag-agrangay para sa tabang.”—SAL. 34:15.

1, 2. (a) Ano an namamatean ngonyan nin dakol na tawo? (b) Taano ta dai niato ipinagngangalas ini?

KAMO daw nakakaeksperyensia nin kasakitan? Kun iyo, dai kamo nagsosolo. Minilyon an nagmamaigot na marhay na atubangon an aroaldaw na mga kasakitan sa pamumuhay sa maraot na sistemang ini nin mga bagay. Para sa nagkapira, iyan garo baga haros dai makayanan. An saindang namamatean kaparehong gayo kan namatean ni salmistang David, na nagsurat: “Ako namagol asin lupaypay nang biyo; nag-atungal ako huli sa agrangay kan sakong puso. An sakong puso nagkurabkutab, nawara an sakong kosog, asin an liwanag man kan sakong mga mata mayo na sa sako.”—Sal. 38:8, 10.

² Bilang mga Kristiano, dai niato ipinagngangalas an mga kasakitan sa buhay. Nasasabotan niato na an “mga kolog nin kasakitan” kabtang kan ihinulang tanda kan presensia ni Jesus. (Mar. 13:8; Mat. 24:3) An termino sa orihinal na lenguahe na trinadusir na “mga kolog nin kasakitan” nanonongod sa grabeng kolog na naeeksperyensiahan sa pangangaki. Tama nanggad na ilinaladawan kaiyan an grabeng pagdusa kan mga tawo sa ‘delikado,’ o “masakit,” na mga panahon na ini na talagang “masakit pakibagayan”!—2 Tim. 3:1; Marahay na Bareta Biblia.

Nasasabotan ni Jehova an Satong mga Kasakitan

3. Ano an aram na marhay kan banwaan nin Dios?

³ Aram na marhay kan banwaan ni Jehova na bako sindang libre sa mga epekto kan mga kasakitan na ini, asin posibleng marhay na orog pa nganing magrabe an masakit na mga kamugtakan na ini. Apuera sa naeeksperyensiahan kan katawohan sa pangkagabsan, bilang mga lingkod nin Dios napapaatubang man kita sa sarong “kaiwal, an Diablo,” na determinadong paluyahon an satong pagtubod. (1 Ped. 5:8) Madali sanang mamatean an arog kan namatean ni David: “Linugad nin pag-olog-olog an sakuyang puso, asin dai naoomayan an lugad. Asin padagos akong naglaom na may magpaheling nin pakidumamay, alagad ta mayo; asin na magkaigwa nin mga pararanga, alagad ta mayo akong nanompongan”!—Sal. 69:20.

4. Ano an nakakaranga sa sato kun nakakaeksperyensia kita nin mga kasakitan?

⁴ An boot daw sabihon ni David mayo talaga sia nin ano man na paglaom? Dai. Mangnohon an dugang pang mga tataramon nia sa salmong iyan: “Si Jehova naghihinanyog sa mga dukha, asin dai nanggad nia duduhagion an saiya mismong mga bilanggo.” (Sal. 69:33) Sa pangkagabsan na kahulogan, tibaad namamatean niato kun beses na garo kita ibinibilanggo kan satong mga kasakitan o makuring sakit. Tibaad garo baga dai talaga nasasabotan kan iba an satong kamugtakan—asin dai gayod. Alagad arog ni David, puede kitang maranga sa pakaaram na lubos na nasasabotan ni Jehova an satong mga kasakitan.—Sal. 34:15.

5. Sa ano nagsasarig si Hadeng Salomon?

⁵ An aki ni David na si Salomon itinampok an katunayan na ini sa dedikasyon kan templo sa Jerusalem. (Basahon an 2 Cronica 6:29-31.) Nakimaherak sia ki Jehova na dangogon an pamibi kan lambang sadiosan an puso na minadolok sa Saiya mapadapit sa ‘saiyang sadiring damat asin sa saiyang sadiring kolog.’ Ano an magigin reaksion nin Dios sa mga pamibi kan nasasakitan na mga indibiduwal na ini? Ipinahayag ni Salomon an saiyang pagsarig na bako sanang dadangogon nin Dios an saindang mga pamibi kundi mahiro man sia para sa sainda. Taano? Huli ta talagang naaaraman nia kun ano an nasa “puso kan mga aki nin katawohan.”

6. Paano niato makakaya an kahaditan, asin taano?

⁶ Puede man na idolok niato ki Jehova paagi sa pamibi an mapadapit sa ‘satong sadiring damat asin satong sadiring kolog,’ an mga kasakitan niato bilang indibiduwal. Maninigo kitang maranga sa  pakaaram na nasasabotan nia an satong mga kasakitan asin na sia nagmamakolog sa sato. Pinatunayan ini ni apostol Pedro kan sia magsabi: “[Itao] nindo an gabos nindong kahaditan sa saiya, huli ta sia may pagmakolog sa saindo.” (1 Ped. 5:7) Si Jehova talagang nagmamakolog sa nangyayari sa sato. Idinoon ni Jesus an mamomoton na pagmakolog ni Jehova, na nagsasabi: “Bakong ipinapabakal an duwang dignos nin sarong sentimo na kadikit sana an halaga? Pero mayo ni saro sa sainda na mahuhulog sa daga na dai naaaraman kan saindong Ama. Alagad an mismong buhok kan saindong payo bilang gabos. Kun siring dai kamo matakot: orog kamong mahalaga kisa dakol na dignos.”—Mat. 10:29-31.

Magsarig sa Tabang ni Jehova

7. Anong tabang an sinesegurado sa sato?

⁷ Sinesegurado nanggad sa sato na si Jehova andam asin kayang tumabang sa sato kun kita may makuring mga kasakitan. “An Dios pailihan asin kosog para sa sato, sarong tabang na tolos na makukua sa panahon nin mga kasakitan.” (Sal. 34:15-18; 46:1) Paano itinatao nin Dios an tabang na iyan? Isip-isipon an sinasabi sa 1 Corinto 10:13: “Maimbod an Dios, asin dai nia itotogot na kamo masugotan nin labi sa saindong makakaya, kundi kaibahan kan sugot matao man sia nin luluwasan tanganing iyan matagalan nindo.” Puedeng maniobrahon ni Jehova an mga bagay-bagay tanganing haleon an satong kasakitan, o tibaad itao nia sa sato an kosog na kaipuhan niato tanganing matagalan iyan. Arin man dian, tatabangan kita ni Jehova.

8. Paano niato maaako an tabang nin Dios?

⁸ Paano niato maaako an tabang na iyan? Mangnohon an ihinahatol sa sato na gibohon: “[Itao] nindo an gabos nindong kahaditan sa saiya.” Nangangahulogan ini na sa piguratibong paagi itinatao niato ki Jehova an gabos niatong kahaditan asin kapurisawan. Pinagmamaigotan niatong dai maghadit asin pasensiosong magtiwala sa saiya na aasikasohon nia an satong mga pangangaipo. (Mat. 6:25-32) An siring na pagtitiwala nangangaipo nin kapakumbabaan, na dai nagsasarig sa sadiri niatong kosog o kadonongan. Paagi sa pagpapakumbaba niato “sa irarom kan poderosong kamot nin Dios,” minimidbid niato an satong hamak na kamugtakan. (Basahon an 1 Pedro 5:6.) Dangan, tinatabangan kita kaini na makaya an ano man na itinotogot nin Dios. Tibaad hinihimuyawot niato an tolos-tolos na kaginhawahan, alagad nagtitiwala kita na aram ni Jehova nin eksakto kun noarin asin kun paano sia mahiro para sa sato.—Sal. 54:7; Isa. 41:10.

9. Anong klaseng pagabat an kaipuhan na itao ni David ki Jehova?

⁹ Girumdomon an mga tataramon ni David na nakasurat sa Salmo 55:22: “Itao mo ki Jehova mismo an pagabat sa saimo, asin sia mismo matabang sa saimo. Noarin man dai nia totogotan na matanyog an matanos.” Kan isurat ni David an mga tataramon na iyan, grabe an saiyang kasakitan. (Sal. 55:4) Masasabotan na isinurat an salmong ini kan an saiyang aking si Absalon nagpakanang agawon sa saiya an pagigin hade. An pinakapinagtitiwalaan ni David na konsehero, si Ahitofel, uminiba man sa pagkasapakat. Kinaipuhan ni David na dumulag sa Jerusalem tanganing iligtas an saiyang buhay. (2 Sam. 15:12-14) Dawa sa masakit na mga kamugtakan na iyan, si David padagos na nagtiwala sa Dios, asin dai sia nasudya.

10. Ano an kaipuhan niatong gibohon kun napapaatubang sa mga kasakitan?

¹⁰ Mahalagang marhay na, kapareho ni David, idolok niato ki Jehova paagi sa pamibi an ano man na mga kasakitan na tibaad naeeksperyensiahan niato. Helingon niato kun ano an isinadol ni apostol Pablo na gibohon niato mapadapit sa bagay na ini. (Basahon an Filipos 4:6, 7.) Ano an magigin resulta kan siring na odok na pamibi? “An katoninongan nin Dios na minalampas sa gabos na kaisipan mag-iingat kan [satong] puso asin kan [satong] mga pag-isip paagi ki Cristo Jesus.”

11. Paano an “katoninongan nin Dios” nagpoprotehir sa satong puso asin mga pag-isip?

 ¹¹ Puede daw na magbago an saindong situwasyon huli sa pamibi? Posible iyan. Pero, maninigo niatong masabotan na dai pirmeng sinisimbag ni Jehova an satong mga pamibi sa paagi na tibaad gusto niato. Minsan siring, tinatabangan kita kan pamibi na mapagdanay na timbang an satong kaisipan, tanganing dai kita malunosan kan mga kasakitan niato. Puede kitang parigonon kan “katoninongan nin Dios” kun kita nagagabatan huli sa masakit na mga emosyon. Siring sa sarong grupo nin mga soldados na idinestino tanganing protehiran an sarong siudad sa agresibong pananakop, an “katoninongan nin Dios” maprotehir sa satong puso asin mga pag-isip. Papangyayarihon man kaiyan na mapangganahan niato an satong mga pagduwaduwa, pagkatakot, asin negatibong mga kaisipan saka ilinilikay kita kaiyan sa pabiglabigla patin bakong madonong na reaksion.—Sal. 145:18.

12. Iilustrar kun paano an saro puedeng magkaigwa nin katoninongan nin isip.

¹² Paano kita magkakaigwa nin katoninongan nin isip mantang tinatagalan an mga kasakitan? Isip-isipon an sarong ilustrasyon na sa nagkapirang bagay nakakapareho sa satong kamugtakan. Sarong empleyado an tibaad nagtatrabaho sa sarong mapanlibak na manedyer. Minsan siring, an empleyado igwa nin oportunidad na ipahayag an saiyang saboot sa kagsadiri kan kompanya, na maboot asin rasonableng tawo. An empleyado inasegurar kan kagsadiri na nasasabotan kaini an situwasyon asin ihinayag kaini na sa dai na mahahaloy an manedyer hahaleon sa saiyang posisyon. Ano daw an mamamatean kan empleyado huli kaiyan? An paniniwala sa pag-asegurar na iyan asin an pakaaram sa mangyayari mapakosog kan saiyang desisyon na magpadagos, dawa kun kaipuhan niang atubangon an nagkapira pang problema mantang dai pa hinahale an manedyer. Siring man, aram niato na nasasabotan ni Jehova an satong situwasyon, asin inaasegurar nia kita na sa dai na mahahaloy “iaapon an namamahala sa kinaban na ini.” (Juan 12:31) Nakakaranga nanggad iyan!

13. Apuera sa pamibi, ano pa an dapat niatong gibohon?

¹³ Kun siring, igo na daw para sa sato na basta na sana idolok ki Jehova paagi sa pamibi an satong mga problema? Dai. Labi pa dian an kaipuhan. Kaipuhan niatong humiro kaoyon kan satong mga pamibi. Kan si Hadeng Saul magsugo nin mga lalaki sa harong ni David tanganing gadanon ini, si David namibi: “Iligtas mo ako sa sakong mga kaiwal, O Dios ko; sa mga minatumang sa sako protehiran mo logod ako. Iligtas mo ako sa mga naggigibo nin nakakadanyar, asin iligtas mo ako sa mga tawong nagkasala sa dugo.” (Sal. 59:1, 2) Apuera sa pamibi, naghinanyog si David sa saiyang agom asin ginibo an kaipuhan na paghiro tanganing makadulag. (1 Sam. 19:11, 12) Sa kaagid na paagi, puede kitang mamibi na logod tawan kita nin praktikal na kadonongan tangani na matabangan kita na atubangon asin tibaad pakarhayon an satong masakit na mga kamugtakan.—Sant. 1:5.

Kun Paano Kita Magkakaigwa nin Kosog Tanganing Makatagal

14. Ano an makakatabang sa sato na makatagal kun napapaatubang sa kasakitan?

¹⁴ Tibaad dai tolos-tolos mahale an satong mga kasakitan. Puede pa nganing magpadagos iyan sa harohalawig na panahon. Kun siring kaiyan an kamugtakan, ano an makakatabang sa sato na makatagal? Enot, girumdomon na kun kita padagos na maimbod na maglilingkod ki Jehova sa ibong nin mga problema, pinapatunayan niato an satong pagkamoot sa saiya. (Gibo 14:22) Girumdomon an akusasyon ni Satanas mapadapit ki Job: “Magsasamba daw si Job sa saimo kun mayo siang nakukuang pakinabang diyan? Danay mo siang sinusurog asin an saiyang pamilya patin an mga rogaring nia. Binebendisyonan mo an gabos niyang gibo, asin tinawan mo siya nin dakul na hayop na pwedeng makapano kan daga. Alagad baloang halea an gabos na sadiri niya, kun dai ka niya maldisyonon.” (Job 1:9-11, Marahay na Bareta Biblia) Paagi sa integridad ni Job, pinatunayan nia na an akusasyon na iyan sarong maraoton na kaputikan. Paagi sa pagtagal niato  sa irarom nin masakit na mga kamugtakan, kita igwa man nin oportunidad na patunayan na putikon si Satanas. Dangan, an satong pakatagal nagpapakosog sa satong pagtubod asin pagsarig ki Jehova.—Sant. 1:4.

15. Anong mga halimbawa an puedeng magpakosog sa sato?

¹⁵ Ikaduwa, tandaan na “an siring man na mga pagtios nangyayari sa bilog na kasararoan nin saindong mga tugang sa kinaban.” (1 Ped. 5:9) Iyo, “mayong sugot na uminabot sa saindo kundi kun ano sana an komun na sa mga tawo.” (1 Cor. 10:13) Kun siring, puede kamong mag-ako nin kosog asin rigon nin boot paagi sa paghorophorop sa mga halimbawa nin iba imbes na magkonsentrar sa sadiri nindong mga problema. (1 Tes. 1:5-7; Heb. 12:1) Magtao nin panahon na horophoropon an halimbawa kan mga midbid nindo na maimbod na nakatagal sa ibong nin grabeng mga kasakitan. Nagsiyasat na daw kamo nin ipinublikar na mga eksperyensia sa buhay, na hinahanap an mga estorya na nakakaagid sa naeeksperyensiahan nindo? An mga ini puedeng magpakosog na marhay sa saindo.

16. Paano kita pinapakosog nin Dios kun kita napapaatubang sa manlaenlaen na pagbalo?

¹⁶ Ikatolo, girumdomon na si Jehova iyo “an Ama nin maboot na mga pagkaherak asin an Dios nin gabos na karangahan, na minaranga sa sato sa gabos niatong kahorasaan, tanganing maranga niato an mga nasa ano man na klase nin kahorasaan paagi sa karangahan na irinaranga mismo sa sato nin Dios.” (2 Cor. 1:3, 4) Garo man sana nakatindog an Dios sa kataed niato tanganing parigonon asin pakosogon kita, bako sanang sa presenteng kahorasaan niato kundi “sa gabos niatong kahorasaan.” Sa siring, ini an nagpapangyari sa sato na rangahon an iba na “nasa ano man na klase nin kahorasaan.” Personal na naeksperyensiahan ni Pablo an pagigin totoo kan mga tataramon na ini.—2 Cor. 4:8, 9; 11:23-27.

17. Paano makakatabang sa sato an Biblia na atubangon an mga kasakitan sa buhay?

¹⁷ Ikaapat, yaon sa sato an Tataramon nin Dios, an Biblia, na “kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, biyong nasangkapan para sa gabos na marahay na gibo.” (2 Tim. 3:16, 17) An Tataramon nin Dios dai sana kita ginigibong “may kakayahan” asin “nasangkapan para sa gabos na marahay na gibo.” Tinatabangan man kita kaiyan na atubangon an mga kasakitan sa buhay. Ginigibo kita kaiyan na “lubos na may kakayahan” asin “biyong nasangkapan.” An mga tataramon na ini posibleng ginamit kan suanoy na mga panahon manongod sa sarong barko na sinangkapan nin gabos na kaipuhan para sa paglayag o manongod sa sarong makina na kayang gibohon an ano man na gusto nindang gibohon kaiyan. Kaagid kaiyan, paagi sa saiyang Tataramon itinatao ni Jehova sa sato an gabos na kaipuhan niato tanganing makaya an ano man na tibaad mapaatubang sa sato. Huli kaiyan, makakasabi kita: “Kun iyan itinotogot nin Dios, makakaya ko iyan, paagi sa saiyang tabang.”

 Pagkakalda sa Gabos Niatong Kasakitan

18. Sa ano dapat nakasentro an satong isip tanganing orog kitang tabangan na maimbod na magtagal?

¹⁸ Ikalima, pirmeng papagdanayon na nakasentro an isip sa makangangalas na katunayan na sa dai na mahahaloy papaginhawahon ni Jehova an katawohan sa gabos na kasakitan. (Sal. 34:19; 37:9-11; 2 Ped. 2:9) Sa katapustapusi, an pagkalda nin Dios sa sato nangangahulogan nin bako sanang pagkakalda sa presenteng mga kasakitan kundi nin oportunidad man na magkaigwa nin buhay na daing katapusan, baga man sa kalangitan na kaibanan ni Jesus o sa sarong paraisong daga.

19. Paano posible an maimbod na pakatagal?

¹⁹ Sagkod na dai pa minaabot an panahon na iyan, padagos niatong aatubangon an masakit na mga kamugtakan sa maraot na kinaban na ini. Hinihimuyawot nanggad niato an panahon na mayo na an mga bagay na ini! (Sal. 55:6-8) Girumdomon niato na an satong maimbod na pakatagal nagpapatunay na an Diablo sarong putikon. Logod na mag-ako kita nin kosog paagi sa satong mga pamibi asin sa satong Kristianong kasararoan nin magturugang, na ginigirumdom na an satong mga tugang nakakaeksperyensia nin mga pagbalo na kapareho kan naeeksperyensiahan niato. Padagos na magin lubos na may kakayahan asin biyong nasangkapan paagi sa epektibong paggamit kan Tataramon nin Dios. Nungkang togotan na lumuya an saindong pagtitiwala sa mamomoton na pagmakolog na itinatao kan “Dios nin gabos na karangahan.” Girumdomon na “an mga mata ni Jehova nakaturuhok sa mga matanos, asin an saiyang mga talinga nagdadangog sa saindang pag-agrangay para sa tabang.”—Sal. 34:15.

Masisimbag daw Nindo?

• Ano an namatean ni David manongod sa mga kasakitan na inatubang nia?

• Anong pagsarig an ipinahayag ni Hadeng Salomon?

• Ano an makakatabang sa sato na makaya kun ano an itinotogot ni Jehova?

[Mga Hapot Para sa Pag-adal]

[Ritrato sa pahina 13]

Si Salomon nagsarig na si Jehova mahiro sa kapakanan kan Saiyang nasasakitan na banwaan

[Ritrato sa pahina 15]

Paagi sa pamibi, itinao ni David an saiyang pagabat ki Jehova dangan naghiro sia kaoyon kan saiyang ipinamibi