Magin Magayagaya sa Saindong Pagigin May Agom
Magin Magayagaya sa Saindong Pagigin May Agom
“Paagi sa kadonongan an kasararo sa harong mapapakosog, asin paagi sa pakabatid iyan magigin masarig.”—TAL. 24:3.
1. Paano ipinaheling nin Dios an kadonongan kun dapit sa enot na lalaki?
ARAM kan satong madonong na langitnon na Ama kun ano an marahay para sa sato. Halimbawa, aram nin Dios na tanganing mahaman an Saiyang katuyohan, “bakong marahay na an lalaki magsolosolo” sa hardin nin Eden. An pangenot na kabtang kan katuyohan na iyan iyo na an mga mag-agom magkaigwa nin mga aki asin ‘panoon an daga.’—Gen. 1:28; 2:18.
2. Anong areglo an ginibo ni Jehova para sa kapakinabangan nin katawohan?
2 “Magibo ako nin katabang para sa saiya,” an sabi ni Jehova, “bilang komplemento nia.” Sa siring, pinatorog nin Dios nin nanok an enot na lalaki, asin hale sa sangkap na hawak kan lalaki nagkua Sia nin gusok asin ginibo Nia iyan na magin babae. Kan darahon ni Jehova ki Adan an sangkap na babaeng ini, si Eva, an lalaki nagsabi: “Sa katapustapusi ini tolang nin sakong mga tolang asin laman nin sakong laman. An sarong ini aapodon na Babae, huli ta sa lalaki an sarong ini kinua.” Si Eva talagang sarong komplemento ni Adan. An kada saro sa sainda mapaheling nin bakong magkaparehong mga ugale asin kualidad, pero sindang duwa sangkap saka ginibo sa ladawan nin Dios. Sa siring na paagi, inareglo ni Jehova an enot na pag-agoman. Inako tolos ni Adan asin Eva an areglong ini nin Dios na maresulta sa pagtinabangan asin pagsinuportaran ninda.—Gen. 1:27; 2:21-23.
3. Paano minamansay nin dakol an regalo nin pagigin may agom, na minagiya sa anong mga hapot?
3 Makamomondo, sarong rebeldeng espiritu an nag-iimpluwensia sa kinaban ngonyan. An mga problema na resulta kaiyan bakong gikan sa Dios. Dakol an nagtutuya sa regalo nin Dios na pag-agoman, na minamansay iyan na lihis na sa uso, sarong gikanan nin pagkadiskontento o iriwal. Sa dakol na nagpapakasal, ordinaryo na sana an pagdiborsio. Tibaad an mga magurang dai ikinakapaheling sa mga aki an natural na kapadangatan asin tibaad gamiton ninda an mga ini tanganing maniobrahon an mga bagay-bagay para sa sadiri nindang kapakinabangan. Dakol na magurang an dai nagigin rasonable, dawa para sa katoninongan asin pagkasararo. (2 Tim. 3:3) Kun siring, paano mapagdadanay an kagayagayahan sa pag-agoman sa delikadong mga panahon na ini? Ano an kabtang kan pagigin rasonable sa mapangganang paglaban sa posibilidad na magsuwayan an mag-agom? Ano an manonodan niato sa modernong mga halimbawa nin mga nakapagpadanay nin kagayagayahan sa saindang pagigin may agom?
Pagpasakop sa Paggiya ni Jehova
4. (a) Anong paggiya an itinao ni Pablo manongod sa pag-agom? (b) Paano sinusunod nin makinuyog na mga Kristiano an paggiya ni Pablo?
4 An Kristianong si apostol Pablo nagtao nin ipinasabong na paggiya sa mga babaeng balo na kun sinda mapaagom giraray, maninigo nindang gibohon iyan “basta sa Kagurangnan.” (1 Cor. 7:39) Bako ining bagong ideya para sa mga Kristiano na Judio an pinaghalean. An Ley nin Dios sa Israel malinaw na nagboot na “dai [sinda] makipag-alyansa paagi sa pag-agom” sa siisay man na hale sa paganong mga nasyon sa palibot ninda. Si Jehova nagtao nin dugang pang paliwanag na nagtatampok sa peligro nin dai pag-intindi sa pamantayan na ini nin Dios. “Huli ta papatalikodon [nin bakong Israelita] an saimong aking lalaki sa pagsunod sa sako, asin sinda siertong maglilingkod sa ibang mga dios; asin an kaanggotan ni Jehova malaad nanggad tumang sa saindo, asin siertong paparaon ka nia tolos-tolos.” (Deut. 7:3, 4) Ano an linalaoman ni Jehova na magigin paninindogan kan mga lingkod nia sa presenteng panahon mapadapit sa pagpili nin magigin agom? Siempre pa, maninigong pilion nin sarong lingkod nin Dios na magin agom an saro na “sa Kagurangnan,” sarong nagdusay, bautisadong kapwa parasamba. An pagpasakop sa paggiya ni Jehova may koneksion sa pagpiling ini iyo an madonong na gibohon.
5. Paano minamansay ni Jehova asin kan may agom na mga Kristiano an sumpaan sa kasal?
5 An sumpaan sa kasal sagrado sa pagheling nin Dios. Mapadapit sa enot na pag-agoman, an Aki mismo nin Dios, si Jesus, nagsabi: “An pinagsaro nin Dios dai pagsuwayon nin siisay man.” (Mat. 19:6) Ipinapagirumdom sa sato kan salmista an kaseryosohan kan mga promesa: “Magdolot ka nin pagpasalamat bilang saimong atang sa Dios, asin otobon mo sa Kaharohalangkawe an saimong mga promesa.” (Sal. 50:14) Minsan ngani puedeng maeksperyensiahan nin mag-agom an dakulang kagayagayahan, an pagsumpaan sa aldaw kan kasal seryoso asin may kaibang paninimbagan.—Deut. 23:21.
6. Ano an manonodan niato sa halimbawa ni Jefte?
6 Isip-isipon an kamugtakan ni Jefte, na naglingkod bilang hokom sa Israel kan ika-12 siglo B.C.E. Ginibo nia an promesang ini ki Jehova: “Kun itao mo nanggad an mga aki ni Amon sa sakong kamot, mangyari man na an maluwas, na magluwas sa mga tata kan sakong harong tanganing sabaton ako pagpuli ko na may katoninongan hale sa mga aki ni Amon, magigin man ki Jehova, asin idodolot ko an sarong iyan bilang dolot na tinotong.” Kan maheling ni Jefte na an saiyang aking babae, na solong aki nia, iyo an nagluwas tanganing sabaton sia pagpuli nia sa harong nia sa Mizpa, hiningoa daw nia na balgahon an saiyang promesa? Dai. Sia nagsabi: “Ibinuka ko na an sakong ngoso ki Jehova, asin dai ko na mababawi pa.” (Hok. 11:30, 31, 35) Inotob ni Jefte an saiyang panuga ki Jehova, minsan ngani nangahulogan ini na mayo nang kapag-arakian na magikan sa saiya na magpapadagos kan saiyang mana. An promesa ni Jefte laen sa sumpaan sa kasal, alagad an pag-otob nia kaiyan nagseserbing marahay na halimbawa para sa Kristianong mga agom na lalaki asin babae kun manongod sa saindang sinumpaan sa kasal.
Ano an Nakakakontribwir sa Mapangganang Pag-agoman?
7. Anong pakikibagay an kaipuhan na gibohon kan mga bagong kasal?
7 Dakol na mag-agom an gustong-gustong girumdomon an saindang pag-ilusyonan. Nakakaogmang marhay nanggad na mamidbid an saindang magigin agom! Mientras na mas dakol na panahon sindang magkaibanan, mas orog sindang nagigin dayupot. Alagad, kan sa katapustapusi sinda nagin mag-agom na, baga man huli sa pag-ilusyonan o huli sa kasundoan nin mga magurang, mahalagang marhay pa man giraray an pakikibagay. Sarong agom na lalaki an nag-admitir: “An mayor na problema mi kan bago pa sana kaming mag-agom iyo na kaipuhan ming marealisar na bako na kaming soltero o daraga. Sa kadikit na panahon nadepisilan kaming ibugtak sa tamang lugar an relasyon mi sa samong mga katood asin kapamilya.” Saro pang agom na lalaki, na ngonyan 30 taon nang may agom, an nakarealisar kan sia bago pa sanang mag-agom na tanganing magin timbang, kaipuhan na isipon nia na duwa na sinda. Bago umako nin imbitasyon o umoyon sa sarong kasundoan, kinokonsulta nia nguna an saiyang agom dangan sia nagdedesisyon, na kinokonsiderar an kapakinabangan nindang duwa. Sa siring na situwasyon, nakakatabang an pagigin rasonable.—Tal. 13:10.
8, 9. (a) Taano ta mahalaga an marahay na komunikasyon? (b) Sa anong mga bagay nakakatabang an pagigin madaling makibagay, asin taano?
8 Kun beses pinagsasaro nin pag-agoman an duwang tawo na magkalaen an pinaghalean na kultura. Nangorognang kaipuhan digdi an bukas na komunikasyon. Magkalaen an mga estilo nin pakikikomunikar. An pag-obserbar kun paano nakikipag-olay an saindong agom sa saiyang mga paryente makakatabang sa saindo na orog na masabotan an saindong agom. Kun beses, an naghahayag kan panlaog na kaisipan nin saro bakong kun ano an sinasabi kundi kun paano iyan sinasabi. Asin dakol an puedeng manodan sa mga bagay na dai sinasabi. (Tal. 16:24; Col. 4:6) An pakabatid mahalagang marhay para sa kaogmahan.—Basahon an Talinhaga 24:3.
9 Mapadapit sa pagpili nin mga dibersion asin aling-alingan, napatunayan nin dakol na tawo na mahalaga na magin madaling makibagay. Bago kamo nagin mag-agom, tibaad dakol na panahon an ginagamit kan saindong agom sa isport o iba pang pag-aling-aling. Angay daw na gumibo ngonyan nin pagliliwat? (1 Tim. 4:8) Puede man iyan na ihapot kun manongod sa panahon na ginagamit sa pakikiiba sa mga paryente. Siempre, kaipuhan nin mag-agom an panahon tanganing gibohon ninda nin magkaibanan an pag-adal sa Biblia asin pagsamba saka an iba pang aktibidad.—Mat. 6:33.
10. Paano an pagigin rasonable nakakakontribwir sa marahay na relasyon nin mga magurang asin nin may agom na mga aki?
10 Kun an sarong lalaki mag-agom, binabayaan nia an saiyang ama asin ina, asin arog man kaiyan an ginigibo nin babae. (Basahon an Genesis 2:24.) Pero, aplikado pa man giraray an pagboot nin Dios na igalang an ama asin ina. Kaya dawa kun sinda mag-agom na, posibleng marhay na magkakaigwa sinda nin panahon na makaibaiba an saindang mga magurang asin panugangan. Sarong agom na lalaki, na 25 taon nang may agom, an nagsabi: “Kun beses, depisil na balansehon an manlaenlaen na kagustohan asin pangangaipo kan agom saka kan mga magurang, tugang, patin panugangan. Sa pagdesisyon kun ano an pinakamarahay na gibohon, naheling ko na nakakatabang an Genesis 2:24. An saro kaipuhan na magin maimbod sa ibang miembro kan pamilya asin may mga paninimbagan sia sa sainda, pero ipinaheling sa sako kan tekstong ini na dapat kong enoton an kaimbodan sa sakong agom.” Huli kaiyan, aakoon kan rasonableng Kristianong mga magurang na an saindang mga aki na may agom na, igwa na nin sadiring pamilya na dian an agom na lalaki an pangenot na may paninimbagan sa paggiya sa pamilyang iyan.
11, 12. Taano ta mahalaga para sa mga mag-agom an pampamilyang pag-adal asin pamimibi?
11 Kaipuhan an marahay na kaugalean sa pampamilyang pag-adal. Pinapatunayan iyan kan eksperyensia nin dakol na Kristianong pamilya. Tibaad bakong pasil na establisaron an siring na pag-adal o na papagdanayon iyan. An sarong payo nin pamilya nag-admitir: “Kun ikakabalik kutana niamo an panahon asin kun may puede kaming bagohon, iyan iyo na seguradohon an estriktong pagsunod niamo sa marahay na kaugalean sa pampamilyang pag-adal sa kapinonan pa sana kan samong pag-agoman.” Idinugang nia: “Sarong marahayon nanggad na regalo na maobserbaran an kagayagayahan kan sakong agom kun sia napapahiro huli sa interesanteng katotoohan sa Biblia na nakukua mi sa samong pag-adal.”
12 An pamimibi na magkaibanan saro pang tabang. (Roma 12:12) Kun an mag-agom nagkakasaro sa pagsamba ki Jehova, an saindang dayupot na relasyon sa Dios puedeng magpakosog sa saindang bogkos nin pag-agoman. (Sant. 4:8) Sarong Kristianong agom na lalaki an nagpaliwanag: “An paghagad tolos nin dispensasyon huli sa mga sala asin an pagsambit kan mga salang iyan kun magkaibanan na namimibi, sarong paagi nin pagpaheling nin sinserong pagkamondo dawa sa sarong sadit na bagay na dahelan nin pakakolog nin boot.”—Efe. 6:18.
Magin Rasonable sa Relasyon nin Mag-agom
13. Anong sadol an itinao ni Pablo manongod sa seksuwal na relasyon nin mag-agom?
13 Kaipuhan na likayan nin may agom na mga Kristiano an mga gibo na naghahale nin onra sa seksuwal na relasyon nin mag-agom, arog baga kan mga gibo na lakop na gayo sa kinaban ngonyan na bangkag sa sekso. Manongod sa temang ini, si Pablo naghatol: “Itao kan agom na lalaki sa saiyang agom na babae an nanonongod sa saiya; alagad siring man kaiyan an gibohon nin agom na babae sa saiyang agom na lalaki. An agom na babae mayong autoridad sa saiyang sadiring hawak, kundi an saiyang agom na lalaki; siring man, an agom na lalaki mayong autoridad sa saiyang sadiring hawak, kundi an saiyang agom na babae.” Dangan itinao ni Pablo an malinaw na paggiyang ini: “Dai kamo magpasarusayuma, apuera sana kun may pagtogot kan lambang saro sa sarong itinalaan na panahon.” Taano? “Tanganing kamo makapagdusay nin panahon sa pamibi asin magsaro liwat, tanganing dai kamo padagos na sugotan ni Satanas huli sa saindong kadaihan nin pagpugol sa sadiri.” (1 Cor. 7:3-5) Sa pagsambit sa pamibi, ipinaheling ni Pablo an mga prioridad para sa sarong Kristiano. Alagad lininaw man nia na an lambang may agom na Kristiano maninigong magin sensitibo sa pisikal asin emosyonal na mga pangangaipo kan saiyang agom.
14. Paano aplikado an mga prinsipyo sa Kasuratan mapadapit sa seksuwal na relasyon nin mag-agom?
14 An agom na lalaki asin babae kaipuhan na magin prangka sa lambang saro asin aram ninda na an kawaran nin konsiderasyon sa seksuwal na relasyon puedeng magresulta sa mga problema. (Basahon an Filipos 2:3, 4; ikomparar an Mateo 7:12.) Totoo ini sa nagkapirang mag-agom na an saro sa mag-agom mayo sa katotoohan. Dawa kun igwa nin mga dai pagkakaoyon, sa parate puedeng pakarhayon kan Kristiano an mga bagay-bagay paagi sa marahay na paggawe, kabootan, asin kooperasyon. (Basahon an 1 Pedro 3:1, 2.) An pagkamoot ki Jehova asin sa agom, kaiba an pagigin rasonable, makakatabang sa aspektong ini nin pag-agoman.
15. Ano an kahalagahan nin paggalang sa maogmang pag-agoman?
15 Sa ibang aspekto man, an maboot na agom na lalaki tatrataron an saiyang agom na may paggalang. Halimbawa, tatawan nia nin konsiderasyon an saiyang mga pagmate, dawa sa saradit na bagay. An sarong agom na lalaki na 47 taon nang may agom nag-admitir: “Igwa pa man giraray akong nanonodan sa bagay na ini.” Sinasadol an Kristianang mga agom na magkaigwa nin hararom na paggalang sa saindang agom. (Efe. 5:33) An pagtaram nin negatibong mga bagay manongod sa saindang agom, na idinodoon an saindang mga depekto sa atubangan nin iba, bako nanggad na pagpaheling nin paggalang. An Talinhaga 14:1 nagpapagirumdom sa sato: “An tunay na madonong na babae itinotogdok an saiyang harong, alagad an lolong ginagaba iyan kan saiyang sadiring mga kamot.”
Dai Pagtawan nin Lugar an Diablo
16. Paano ikakaaplikar nin mga mag-agom an Efeso 4:26, 27 sa saindang pag-agoman?
16 “Maanggot kamo nin grabe, alagad ta dai kamo magkasala; dai nindo pagpasolnopon an saldang na kamo may kaanggotan, ni tawan man nin lugar an Diablo.” (Efe. 4:26, 27) Kun inaaplikar, an mga tataramon na ini makakatabang sa sato na resolberan o likayan an dai pagkakaoyon sa pag-agoman. “Mayo man lamang ako nin nagigirumdoman na kaming mag-agom nagkaigwa nin dai pagkakaoyon na dai mi pinag-olayan dawa kun ini mangahulogan nin dakol na oras tanganing maresolberan an problema,” an paggirumdom kan sarong tugang na babae. Sa kapinonan kan saindang pag-agoman, determinado sinda na dai ninda papalipason an aldaw na dai rineresolberan an saindang dai pagkakaoyon. “Ano man an problema, nagdesisyon kami na magpatawad asin lingawan iyan saka magpoon giraray.” Sa siring, nagsayuma sindang ‘tawan nin lugar an Diablo.’
17. Ano an puedeng makatabang dawa kun garo baga bakong magkabagay an mag-agom?
17 Alagad paano kun sa paghona nindo bako kamong magkabagay kan agom nindo? Tibaad naeeksperyensiahan nindo ngonyan an sarong relasyon na garo baga bakong siring kamapagpadangat na arog kan sa iba. Sa ibong kaiyan, makakatabang sa saindo an paggirumdom sa pagmansay kan Kaglalang dapit sa bogkos nin pag-agoman. Paagi sa pagpasabong, hinatolan ni Pablo an mga Kristiano: “Magin logod kagalanggalang sa gabos an pag-agoman, asin dai pagdigtaan an higdaan kan mag-agom, huli ta hohokoman nin Dios an mga parapakisaro asin parasambay.” (Heb. 13:4) Asin dai man paglingawan an mga tataramon na ini: “An lubid na tinolotolo dai tolos mapuputol.” (Ecl. 4:12) Kun an agom na lalaki asin agom na babae parehong interesadong marhay sa pagpakangbanal kan ngaran ni Jehova, sinda nagigin dayupot sa lambang saro asin nagigin dayupot man sa Dios. Dapat sindang magmaigot na magin mapanggana an saindang pag-agoman, na naaaraman na magtatao ini nin marahay na impresyon ki Jehova, an Kagtugdas nin pag-agoman.—1 Ped. 3:11.
18. Sa ano kamo makakasierto mapadapit sa pagigin may agom?
18 Sierto nanggad na posible para sa mga Kristiano na magin magayagaya sa pagigin may agom. Tanganing magibo iyan kaipuhan an paghihingoa asin an pagpaheling nin Kristianong mga kualidad, na an saro dian iyo an pagigin rasonable. Ngonyan, sa mga kongregasyon kan Mga Saksi ni Jehova sa bilog na kinaban, igwa nin kadakol na mag-agom na nagpapatunay na magigibo iyan.
Ano an Isisimbag Nindo?
• Taano ta realistiko na magin magayagaya sa pagigin may agom?
• Ano an makakatabang sa pag-agoman na magin mapanggana?
• Anong mga kualidad an kaipuhan na paoswagon kan mga mag-agom?
[Mga Hapot Para sa Pag-adal]
[Ritrato sa pahina 9]
An mga mag-agom madonong na nagkokomunikar bago umako nin imbitasyon o umoyon sa sarong kasundoan
[Ritrato sa pahina 10]
Pagmaigotan na an dai pagkakaoyon resolberan sa aldaw na nangyari iyan, na dai ‘tinatawan nin lugar an Diablo’