Minamansay daw Nindo an Iba Siring kan Pagmansay ni Jehova?

“Dai magkaigwa nin pagkabaranga sa hawak . . . Magkaigwa nin pararehong pagmakolog sa lambang saro an mga kabtang kaiyan.”—1 COR. 12:25.

1. Ano an namatean nindo kan enot kamong lumaog sa espirituwal na paraiso?

KAN enot kitang sumiblag sa maraot na kinaban na ini asin magpoon nang makiasosyar sa banwaan ni Jehova, posibleng marhay na naogma nanggad kita na maeksperyensiahan an mainit na pagkamoot asin pagmakolog na yaon sa sainda. Kabaliktaran nanggad sa daing modo, maongison, asin parapakisuhay na mga tawo na kontrolado ni Satanas! Luminaog kita sa espirituwal na paraiso, na pano nin katoninongan asin pagkasararo.—Isa. 48:17, 18; 60:18; 65:25.

2. (a) Ano an tibaad makaapektar sa pagmansay niato sa iba? (b) Ano an tibaad kaipuhan niatong gibohon?

² Minsan siring, sa pag-agi nin panahon, tibaad magkaigwa kita nin bakong tamang pagmansay sa satong mga tugang huli sa pagkabakong sangkap niato. An satong pagkabakong sangkap puedeng magin dahelan na padakulaon niato an mga sala kan satong mga tugang imbes na helingon an kabilogan kan saindang espirituwal na mga kualidad. Sa simpleng pagtaram, nalilingawan niatong mansayon sinda siring kan pagmansay sa sainda ni Jehova. Kun nangyayari ini sa sato, panahon nang siyasaton an pagmansay niato sa iba asin ioyon iyan sa malinaw na pagmansay ni Jehova.—Ex. 33:13.

Kun Ano an Pagheling ni Jehova sa Satong mga Tugang

3. Sa ano ikinokomparar kan Biblia an Kristianong kongregasyon?

³ Arog kan nakarekord sa 1 Corinto 12:2-26, an kongregasyon nin linahidan na mga Kristiano ikinomparar ni apostol Pablo sa hawak na igwa nin “dakol na kabtang.” Kun paanong an mga organo sa hawak magkakalaen, an mga miembro kan  kongregasyon magkakalaen nanggad kun dapit sa saindang mga karakteristiko asin abilidad. Pero, inaako ni Jehova an pagkakalaen na ini. Namomotan asin pinapahalagahan nia an lambang miembro kaiyan. Siring man, sinasadol kita ni Pablo na an mga miembro kan kongregasyon “magkaigwa nin pararehong pagmakolog sa lambang saro.” Tibaad depisil ini huli ta an personalidad kan iba laen sa sadiri niatong personalidad.

4. Taano ta tibaad kaipuhan niatong bagohon an pagmansay niato sa satong mga tugang?

⁴ Tibaad may tendensia pa ngani kitang pagparahelingon na sana an mga kaluyahan kan satong mga tugang. Sa paggibo kaiyan, garo man sana pigpaparaheling niato an espesipikong kabtang nin sarong retrato. Minsan siring, mas mahiwas an pagmansay ni Jehova, na garo hineheling nia an bilog na retrato. Tibaad may tendensia kitang pagparahelingon na sana an sarong bagay na dai niato gusto, mantang hineheling ni Jehova an bilog na pagkatawo, kaiba na an gabos na marahay na kualidad nin indibiduwal. Mantang orog kitang nagmamaigot na arogon si Jehova, orog man kitang makakatabang sa pagpaoswag kan espiritu nin pagkamoot asin pagkasararo sa kongregasyon.—Efe. 4:1-3; 5:1, 2.

5. Taano ta bakong tama na husgaran an iba?

⁵ Aram na marhay ni Jesus na sa parate may tendensia an bakong sangkap na mga tawo na magin mapaghusgar. Sia naghatol: “Dai na kamo maghokom tanganing dai man kamo hokoman.” (Mat. 7:1) Mangnoha na dai sinabi ni Jesus: “Dai kamo maghokom”; an sinabi nia: “Dai na kamo maghokom.” Aram nia na an dakol sa mga naghihinanyog sa saiya ugale na an pagparakritika sa iba. Posible daw na ugale na man niato iyan? Kun igwa kita kan tendensiang iyan, dapat kitang magmaigot na magbago tanganing dai man kita hokoman. An totoo, siisay man kita tanganing husgaran an saro na ginagamit ni Jehova sa nombradong katongdan o na magsabi na dai sia maninigo na magin kabtang kan kongregasyon? Tibaad may mga pagkukulang an sarong tugang, alagad kun padagos siang inaako ni Jehova, tama daw na sia haboan niato? (Juan 6:44) Talaga daw na nagtutubod kita na pinapangenotan ni Jehova an saiyang organisasyon, asin na mahiro sia sa saiyang itinalaan na panahon kun kaipuhan na gumibo nin mga pagbabago?—Basahon an Roma 14:1-4.

6. Paano minamansay ni Jehova an saiyang mga lingkod?

⁶ Marahayon si Jehova huli ta naheheling nia an potensial kan indibiduwal na mga Kristiano oras na magin sangkap na sinda sa bagong kinaban. Aram man nia an nagibo na nindang pag-oswag sa espirituwal. Kun siring, mayo sia nin dahelan na magparaheling na sana sa lambang kaluyahan. Mababasa niato sa Salmo 103:12: “Kun gurano kaharayo kan subangan sa solnopan, siring man kaiyan kaharayo sa sato na saiyang ibinugtak an satong mga kalapasan.” Personalmente nanggad kitang makakapagpasalamat huli kaiyan!—Sal. 130:3.

7. Ano an manonodan niato sa pagmansay ni Jehova ki David?

⁷ Maheheling niato sa Kasuratan an ebidensia na si Jehova igwa nin pambihirang kakayahan na helingon an marahay na mga kualidad nin sarong tawo. Ilinadawan nin Dios si David bilang ‘an lingkod kong si David, na nag-otob kan sakong mga togon asin nagsunod sa sako sa bilog niang puso paagi sa paggibo sana kan tama sa sakong pagheling.’ (1 Ha. 14:8) Siempre, aram niato na may mga nagibong sala si David. Pero, pinili ni Jehova na helingon an marahay na mga kualidad ni David huli ta aram Nia na tanos an puso kaini.—1 Cron. 29:17.

 Helingon an Saindong mga Tugang Siring kan Pagheling sa Sainda ni Jehova

8, 9. (a) Sa anong paagi maaarog niato si Jehova? (b) Paano ini puedeng iilustrar, asin anong leksion an manonodan niato digdi?

⁸ Si Jehova nakakabasa nin mga puso, mantang kita dai. Ini mismo sarong marahay na dahelan na dai kita magin mapaghusgar. Dai niato aram an gabos na motibo nin sarong tawo. Maninigo kitang magmaigot na arogon si Jehova paagi sa dai pagparaheling na sana sa pagkabakong sangkap nin tawo, na mawawara na pag-abot nin panahon. Bako daw na marahayon na pasohan na arogon sia sa bagay na ini? An paggibo niato kaiyan makakatabang nin dakula sa matoninong na relasyon sa satong mga tugang.—Efe. 4:23, 24.

⁹ Sa pag-ilustrar, isip-isipa an sarong harong na may mga raot na—nagkakahurulog na an mga sagurong kan atop, raraot na an mga bintana, asin may mga toro na an kisame. Tibaad an kadaklan na tawo na magheling sa harong na iyan magkongklusyon na maninigo nang gabaon iyan ta makanos iyan paghelingon. Alagad tibaad hineling man iyan nin sarong tawo na may biyong laen na pagmansay. Tibaad dai sana sia nagheling sa risang mga problema kundi naheling man nia na makosog pa an estruktura kaiyan asin na puede pang ibalik sa dati an harong na iyan. Binakal nia an harong asin hinirahay an risang mga raot kaiyan patin pinagayon nia an itsura kaiyan. Pagkatapos, an mga nag-aagi nagsarabi na iyan nakakaogmang marhay na istaran. Puede daw niatong arogon an tawong ini na nagmaigot na hirahayon o ibalik sa dati an harong na iyan? Imbes na pagparahelingon na sana an risang mga depekto kan satong mga tugang, puede daw niatong helingon an saindang marahay na mga kualidad asin an saindang potensial na orog pang magtalubo sa espirituwal? Kun gigibohon niato iyan, mamomotan niato an satong mga tugang huli sa saindang espirituwal na kagayonan, siring kan ginigibo ni Jehova.—Basahon an Hebreo 6:10.

10. Paano makakatabang sa sato an sadol na nasa Filipos 2:3, 4?

¹⁰ May itinaong sadol si apostol Pablo na makakatabang sa satong relasyon sa gabos na nasa kongregasyon. Sinadol nia an mga Kristiano: ‘Dai kamo maggibo nin ano man huli sa pagpasuruhay o huli sa sobrang pagpaimportante sa sadiri, kundi sa kababaan nin isip ibilang an iba na mas halangkaw kisa sa saindo, na nagririsa, bakong sa personal na interes sa sadiri sana nindong mga bagay-bagay, kundi siring man sa personal na interes sa mga bagay-bagay kan iba.’ (Fil. 2:3, 4) An kapakumbabaan matabang sa sato na magkaigwa nin tamang pagmansay sa iba. An pagpaheling nin personal na interes sa iba asin paghanap kan marahay na kualidad ninda matabang man sa sato na mansayon sinda siring kan pagmansay sa sainda ni Jehova.

11. Anong mga pagbabago an nakaapektar sa nagkapirang kongregasyon?

¹¹ Sa nakaagi pa sanang mga panahon, dakol na tawo an nagbalyo sa ibang lugar huli sa mga pangyayari sa bilog na kinaban. An nagkapirang siudad iniistaran na ngonyan nin mga tawo hale sa dakol na laen-laen na kadagaan. An nagkapira sa mga tawo na nagbalyo sa satong lugar nagin interesado sa katotoohan sa Biblia, asin nakiayon sinda sa sato sa pagsamba ki Jehova. An mga ini “hale sa gabos na nasyon asin tribo asin banwaan patin lenguahe.” (Kap. 7:9) Bilang resulta, dakol sa mga kongregasyon niato an kompuesto na ngonyan nin mga tawo hale sa laen-laen na nasyon.

12. Anong pagmansay sa lambang saro an kaipuhan niatong papagdanayon, asin taano ta kun beses tibaad depisil ini?

¹² Sa satong kongregasyon, tibaad kaipuhan niatong magtao nin orog na atension sa pagpapadanay nin tamang pagmansay sa lambang saro. Nangangaipo iyan na girumdomon niato an sadol ni apostol Pedro na magpaheling nin “bakong ipokritong kapadangatan na sa magturugang” asin na ‘magkaminorootmootan nin makosog gikan sa puso.’ (1 Ped. 1:22) An pagpatalubo nin tunay na pagkamoot asin kapadangatan puedeng magin depisil sa sarong kongregasyon na kompuesto nin mga tawo hale sa laen-laen na nasyon. Tibaad an kultura kan mga kapwa niato parasamba laen na gayo sa satong kultura, siring man an saindang inadalan, kamugtakan nin pagbuhay, asin rasa. Nadedepisilan daw kamong saboton an kaisipan o mga reaksion nin nagkapira sa sainda? Tibaad siring man kaiyan an saindang saboot manongod sa saindo. Minsan siring, kita gabos pinagbobotan: “Mamoot kamo sa bilog na kasararoan nin mga tugang.”—1 Ped. 2:17.

13. Anong mga pagbabago sa satong kaisipan an tibaad kaipuhan niatong gibohon?

 ¹³ Tibaad kaipuhan kitang gumibo nin nagkapirang pagbabago sa satong kaisipan tanganing mapahiwas niato an satong pagkamoot sa gabos niatong tugang. (Basahon an 2 Corinto 6:12, 13.) Nagsasabi daw kita nin arog baga nin “Bako man sa may diskriminasyon ako, alagad . . . ” dangan isinasaysay niato an nagkapirang negatibong karakteristiko na ibinibilang niato na ordinaryo na sana sa mga miembro nin sarong rasa? Tibaad ihayag kan siring na kaisipan an pangangaipo na haleon niato an diskriminasyon na yaon pa sa boot niato. Puede niatong hapoton an satong sadiri, ‘Dayaday daw akong naghihingoa na mamidbid an mga tawo na laen sa sako an kultura?’ An siring na pagsiyasat sa sadiri tibaad makatabang sa sato na mapaoswag an pag-ako asin pagpahalaga niato sa satong internasyonal na kasararoan nin magturugang.

14, 15. (a) Magtao nin mga halimbawa kan mga nagbago kan saindang pagmansay sa iba. (b) Paano niato sinda maaarog?

¹⁴ An Biblia nagtatao sa sato nin marahay na mga halimbawa kan mga talagang nagbago kan saindang pagmansay, na an saro sa sainda iyo si apostol Pedro. Bilang Judio, lilikayan kutana ni Pedro na maglaog sa harong nin sarong Hentil. Imahinara na sana an namatean nia kan sabihan sia na dumalaw sa harong kan bakong turing Hentil na si Cornelio! Si Pedro guminibo nin mga pagbabago, ta nasasabotan nia na an kabotan nin Dios iyo na an mga tawo kan gabos na nasyon magin kabtang kan Kristianong kongregasyon. (Gibo 10:9-35) Si Saulo, na kan huri nagin si apostol Pablo, kinaipuhan man na gumibo nin mga pagbabago asin haleon sa saiyang sadiri an diskriminasyon. Inadmitir nia na naongis siang gayo sa mga Kristiano kaya “sagkod sa punto nin pagpakalabilabi padagos [niang] pinersegir an kongregasyon nin Dios asin linaglag iyan.” Pero, kan si Pablo itanos kan Kagurangnan na Jesus, sia guminibo nin dakulang mga pagbabago asin nagpoon pa nganing umako nin paggiya hale sa mga pinepersegir nia kan enot.—Gal. 1:13-20.

¹⁵ Daing duwa-duwa na makakagibo kita nin mga pagbabago sa satong kaisipan paagi sa tabang kan espiritu ni Jehova. Kun naheheling niato na igwa kita nin nakatago pang diskriminasyon sa boot niato, magmaigot kita na haleon iyan asin “otobon an pagkasararo kan espiritu sa nakakapasararong bogkos nin katoninongan.” (Efe. 4:3-6) Dinadagka kita kan Biblia na ‘isulog niato an pagkamoot, huli ta iyan sangkap na bogkos nin pagkasararo.’—Col. 3:14.

Pag-arog ki Jehova sa Satong Ministeryo

16. Ano an kabotan nin Dios mapadapit sa mga tawo?

¹⁶ “An Dios daing ipinapaorog,” an surat ni apostol Pablo. (Roma 2:11) Katuyohan ni Jehova na iiba sa saiyang areglo para sa pagsamba an mga tawo kan gabos na nasyon. (Basahon an 1 Timoteo 2:3, 4.) Tanganing maotob iyan, inareglo nia na an “maogmang bareta” ikapahayag “sa lambang nasyon asin tribo asin lenguahe patin banwaan.” (Kap.  14:6) Si Jesus nagsabi: “An oma iyo an kinaban.” (Mat. 13:38) Ano an kahulogan kaiyan para sa saindo asin sa saindong pamilya?

17. Paano niato matatabangan an gabos na klase nin tawo?

¹⁷ Bakong gabos makakaduman sa hararayong parte kan kinaban tanganing ihulit sa iba an mensahe kan Kahadean. Minsan siring, tibaad nasa kamugtakan nanggad kita na ihulit an mensaheng ini sa mga tawo hale sa gabos na parte kan daga na nag-iistar sa satong teritoryo. Alisto daw kita sa mga oportunidad na makapagpatotoo sa gabos na klase nin tawo, bako sana sa mga hinuhulitan na niato sa laog nin dakol na taon? Taano ta dai kamo magin determinado na hulitan an iba na dai pa lubos na napatotoohan?—Roma 15:20, 21.

18. Anong pagmakolog sa mga tawo an ipinaheling ni Jesus?

¹⁸ Namatean na marhay ni Jesus an pangangaipo na tabangan an gabos. Dai sia naghulit sa saro sanang lugar. An sarong pagkasaysay sa Biblia nagsasabi sa sato na sia “naglibot sa gabos na siudad asin baryo.” Dangan, “kan maheling nia an mga kadaklan naherak sia sa sainda” asin ipinahayag nia an pangangaipo na tabangan sinda.—Mat. 9:35-37.

19, 20. Ano an nagkapirang paagi na ikakapaheling niato an pagmakolog ni Jehova asin ni Jesus sa gabos na klase nin tawo?

¹⁹ Ano an nagkapirang paagi na ikakapaheling nindo an kaparehong kaisipan? An nagkapira naghingoa na makapagpatotoo sa mga parte kan saindang teritoryo na bihirang mahulitan. Tibaad kaiba digdi an komersial na mga lugar, parke, terminal, o atubangan nin residensial na mga edipisyo na guardiado. An iba naghingoa na mag-adal nin ibang lenguahe tanganing makapaghulit sa nagkapirang grupo nin mga tawo na laen an rasa na nag-iistar na ngonyan sa saindang lugar o sa mga grupo na bihirang mapatotoohan kan nakaagi. An pag-adal kun paano kukumustahon an mga tawong iyan sa sadiri nindang lenguahe puedeng magpaheling na interesado nanggad kamo sa saindang ikakarahay. Kun mayo kita sa kamugtakan na mag-adal nin ibang lenguahe, puede daw niatong parigonon an boot kan mga naggigibo kaiyan? Tunay nanggad na habo niatong magin negatibo o kuestionon kun taano ta an iba naggigibo nin siring na paghihingoa na hulitan an mga tawong hale sa ibang nasyon. An gabos na buhay mahalagang marhay sa pagheling nin Dios, asin gusto niatong mansayon an mga bagay sa siring man kaiyan na paagi.—Col. 3:10, 11.

²⁰ An pagkaigwa kan pagmansay nin Dios sa mga tawo nangangahulogan man na hulitan niato an gabos, ano man an saindang mga kamugtakan. An nagkapira tibaad mayo nin harong, maati, o risang-risa na imoral an pamumuhay. Kun bakong maboot an pagtratar sa sato nin nagkapirang indibiduwal, dai iyan maninigo na magin dahelan na magkaigwa kita nin negatibong mga opinyon manongod sa saindang nasyonalidad o rasa sa kabilogan. Bakong maboot an nagin pagtratar nin nagkapira ki Pablo, alagad dai nia tinogotan na magin dahelan iyan na magpondo na sia sa paghuhulit sa mga tawo na may arog kaiyan na pinaghalean. (Gibo 14:5-7, 19-22) Nagtiwala sia na an nagkapirang indibiduwal mahimate na may pag-apresyar.

21. Paano makakatabang an pagkaigwa nindo kan pagmansay ni Jehova sa iba?

²¹ Mas malinaw ngonyan sa sato na an pagkaigwa nin tamang pagmansay—an pagmansay ni Jehova—kaipuhan sa pagtratar niato sa satong mga tugang sa lokal, sa satong internasyonal na kasararoan nin magturugang, asin sa mga tawo sa langtad. Mantang orog niatong ipinapaheling an pagmansay ni Jehova, orog man kitang makakatabang para sa katoninongan asin pagkasararo. Asin mas magigin may kakayahan kita sa pagtabang sa iba na pahalagahan si Jehova, an Dios na “dai nagpapaheling nin pagpaorog” kundi nagpapaheling nin mamomoton na interes sa gabos, “huli ta sinda gabos gibo kan saiyang mga kamot.”—Job 34:19.

Masisimbag daw Nindo?

• Anong pagmansay sa satong mga tugang an maninigo niatong pagmaigotan na likayan?

• Paano niato maaarog si Jehova sa kun paano niato minamansay an satong mga tugang?

• Anong mga leksion an saindong nanodan manongod sa pagmansay niato sa satong internasyonal na kasararoan nin magturugang?

• Paano niato maaarog an pagmansay ni Jehova sa mga tawo kun kita nasa ministeryo?

[Mga Hapot Para sa Pag-adal]

[Ritrato sa pahina 26]

Paano nindo mamimidbid an mga tawo na iba an kultura?

[Mga Ritrato sa pahina 28]

Sa anong mga paagi nindo ikakahulit sa mas dakol na tawo an maogmang bareta?