Pagpalakop kan Maogmang Bareta sa Kaitaasan kan Andes

YAON kami duman, 18 kami, sa salog na daga. Mantang nagkikibigkibig sa samong mga sleeping bag, nadadangog mi an makosogon na oran na minatama sa atop na sim. Huli sa kamugtakan kan saditon na kamalig, inisip-isip mi kun baga kami an enot na mga tawong nag-okupar dian.

Taano ta dadalawon nin 18 katawo an lugar na ini? An simbag nakasentro sa samong pagmawot na humiro kaoyon kan pagboot ni Jesus na ihulit an maogmang bareta “sagkod sa kaporoporohi kan daga.” (Gibo 1:8; Mat. 24:14) Nagbiahe kami tanganing maghulit sa sarong harayoon na teritoryo sa Andes sa Bolivia.

Pagpasiring Duman

An enot na kadepisilan iyo nanggad an pagpasiring duman. Naaraman mi na mayo nin eksaktong iskedyul an pampublikong transportasyon pasiring sa harayong mga lugar na iyan. Kan mag-abot an samong bus, naheling mi na mas sadit iyan kisa sa inaasahan mi, kaya an nagkapira sa samo mayo na nin matutukawan. Alagad sa katapustapusi nakaabot kami sa samong destinasyon.

An samong katuyohan iyo na maghulit sa mga tawo sa mga baryo sa kaitaasan kan Andes sa Bolivia. Kaya pakatapos kan pagbiahe sa bus, an kada saro sa samong grupo, na may darang suplay na kakanon, surunodan na maingat na nagtukad sa bukid.

 Minsan ngani garo baga sadit an mga baryo, suruwaysuway na gayo an mga harong, kaya kinaipuhan an dakol na oras tanganing madalaw an kada baryo. Gurano man kaharayo kan linalakaw mi, garo baga pirmeng may harong pa sa harayo. Parate kaming nawawara sa nakakaribong asin pasikosikong mga dalan sa mga tanoman.

“Taano ta Dai Kamo Nagdigdi Kaidto?”

Sarong babae an naghangang marhay huli ta harayo nanggad an linakaw mi kaya ipinagamit nia sa samo an saiyang kusina asin panggatong tanganing makaluto kami kan samong pangudtohan. Kan manodan nin sarong lalaki an itinotokdo kan Biblia mapadapit sa kamugtakan kan mga gadan, naghapot sia, “Taano ta dai kamo nagdigdi kaidto?” Interesado siang marhay kaya paghale mi sa saiyang baryo, nag-iba sia sa samo tanganing maghapot pa mantang nasa dalan. Saro pang lalaki an dai pa noarin man nakadangog manongod sa Mga Saksi ni Jehova asin nagpaheling sia nin dakulang interes sa satong mga publikasyon. Pinasalamatan nia kaming marhay sa pagduman asin itinao sa samo an liabe sa sarong kamalig na matotorogan mi.

Sarong banggi, huling madiklomon, dai mi tinutuyong ikinatogdok an samong mga tolda sa tahaw kan istaran nin darakulang hantik. Kinaragat tolos kami kaiyan ta nadisturbo mi sinda. Pagalon na kami kaya dai na kami nagbalyo, asin marahay sana ta dai nahaloy garo baga dai na kami inintindi kan mga hantik.

Kan primero, nagkokorolog an samong likod asin gusok huli sa pagtorog mi sa daga, alagad kun banggi natuod na kami dian. Asin pagkaaga nalilingawan mi na an ano man na kolog mantang tinatanaw mi an malinigon na mga kababan na may mga panganoron na luway-luway na  naghihiro sa mga gilid kaiyan patin an kahangahangang alitoktok nin kabukidan na natatakopan nin niebe na nasa harayo. An nadadangog sana iyo an nagbuburokbusok na sapa asin an huni nin mga gamgam.

Pakatapos niamong magkarigos sa sapa, iriba ming pinag-oolayan an sarong teksto sa Biblia, namamahaw kami asin luway-luway na kaming nagpopoon na magtukad pasiring sa iba pang hararayong baryo. Bawi nanggad an paghihingoang magtukad. Nakaolay mi an sarong may edad nang babae na napahibi kan maaraman nia na nasa Biblia an ngaran nin Dios, an Jehova. Nagin emosyonal sia. Ngonyan puede na niang sambiton sa saiyang mga pamibi an ngaran nin Dios!

Sarong may edad nang lalaki an nagsabi na seguradong nagirumdoman sia nin Dios, asin bigla na sana siang uminawit na isinugo kami kan mga anghel. Saro pang lalaki, na may grabeng helang kaya dai makahale sa saiyang harong, an nagsabi sa samo na mayo ni saro sa saiya mismong baryo an naghingoang dalawon sia. Nagngalas sia na kami hale pa sa La Paz. An saro pang lalaki naghangang marhay na an mga Saksi ni Jehova nagdadalaw sa mga tawo sa saindang harong, mantang an ibang mga relihion inaapod sana sinda paagi sa mga bagting nin kampana.

Mayo nin kuryente an mga harong sa lugar na iyan, kaya an mga tawo nagtotorog kun madiklom na asin nagmamata kun may saldang na. Kun siring, tanganing maabotan an mga tawo sa harong, kinaipuhan na magpoon kaming maghulit nin alas sais nin aga. Ta kun dai, an kadaklan na tawo nakahale na tanganing magtrabaho sa mga tanoman. Pagtaodtaod, an nagkapira na nagtatrabaho na, andam na pumondo tanganing maghinanyog sa samong mensahe hale sa Tataramon nin Dios, na tibaad tinatawan an baka nin kinakaipuhan na pahingalo sa pag-arado. Dakol sa mga tawong nanompongan sa harong an nagbubugtak nin mga balukag nin karnero na matutukawan mi asin inaapod ninda an saindang pamilya tanganing iribang maghinanyog. An nagkapirang paratanom nagtao nin darakulang bag na may mais bilang pagpasalamat sa mga literatura sa Biblia na iwinalat mi sa sainda.

“Dai Nindo Ako Nalingawan”

Siempre, tanganing umoswag an mga tawo sa kaaraman sa Biblia, labi pa sa sarong pagdalaw an kaipuhan ninda. Dakol an nakimaherak sa samo na magbalik tanganing tokdoan pa sinda. Huli kaini, nagkapirang beses kaming nagbiahe pasiring sa parteng ini nin Bolivia.

Sa sarong pagbiahe mi kan huri, naogma an sarong may edad nang babae na nagbalik kami asin sia nagsabi: “Kamo garo naman sana mga aki ko. Dai nindo ako nalingawan.” Sarong lalaki an nagpasalamat sa samo huli sa samong gibohon asin inimbitaran kami na magdagos sa saiyang harong sa sunod ming pagduman. Tibaad an kadarudakulaing balos sa mga paghihingoa mi iyo an kan maaraman mi na an sarong babae na nakaolay sa saro kan nakaaging mga pagdalaw niamo nagbalyo na sa siudad poon kaidto asin naghuhulit na ngonyan kan maogmang bareta.

Sa huring aldaw kan samong enot na pagbiahe, naubosan kami nin gas para sa kalan na ginagamit sa kamping asin haros naubos mi na an samong suplay na kakanon. Nagtipon kami nin igong kahoy na panggatong, linuto mi an samong huring pagkakan, asin nagpoon kaming maglakaw pabalik. Dakol na kilometro an rayo mi sa banwaan kun saen puede kaming makasakay nin bus. Sa kahurihurihi, banggi na kan makaabot kami.

Pagpuli

Nagkaproblema kami sa pagbiahe pabalik huli ta nagkaaberiya an bus. Pagtaodtaod, nakasakay kami sa likod nin sarong trak na pano-pano nin tawo. Nagtao ini sa samo nin oportunidad na maghulit sa mga kapwa pasahero na nagngangalas kun taano ta yaon kami duman. Minsan ngani an mga tawo duman natural nang masusupgon, sa pangkagabsan sinda makikatood asin maboot.

Pakatapos nin siyam na oras na pagsakay sa likod kan trak na iyan, nakapuli kami—na basa-basa asin nagkukubogkubog huli ta malipoton. Pero, bakong sayang an pagbiaheng iyan. Mantang nagbibiahe, nakapag-areglo kami nin pag-adal sa Biblia sa sarong babae na nakaistar sa siudad.

Sarong pribilehio nanggad na ipahayag an maogmang bareta sa mga tawo sa siring kaharayong mga lugar. Nakapaghulit na kami sa apat na baryo asin sa dakol na sadit na baryo. Dai mi mapugolan na magirumdoman an mga tataramon na: “Abaang gayon sa ibabaw kan kabukidan kan mga bitis kan nagdadara nin maogmang bareta, kan nagbabalangibog nin katoninongan, kan nagdadara nin maogmang bareta dapit sa bagay na orog karahay, kan nagbabalangibog nin kaligtasan.”—Isa. 52:7; Roma 10:15.

[Ritrato sa pahina 17]

Andam nang maghulit kan maogmang bareta