Sarong Mahalagang Marhay na Olayan na Maghelingan

IGWA ako nin mahalagang marhay na pakipag-olay na maghelingan. Togotan nindo akong ipaliwanag kun ano an naggiya sa sako, sarong hoben na Kastilang ina, na gibohon an pakipag-olay na iyan na maghelingan.

Mayo nin katoninongan asin pagkaoroyon sa harong kan sakong mga magurang. Nalunosan an samong pamilya kan magadan sa makaturotristeng aksidente an sakong kuatro anyos na nguhod na tugang na lalaki. Apuera kaini, huli sa maraot na mga ugale kan sakong ama, nagin depisil sa sakong ina na makamate nin dakulang kaogmahan sa pagigin may agom. Minsan siring, an problemang iyan dai nakaolang sa sakong ina na itadom sa sako asin sa matua kong tugang na lalaki an mga pamantayan sa moral.

Pag-abot nin panahon, nag-agom an sakong tugang, asin iyo man ako. Dai nahaloy pakatapos kaiyan, nadiskobre na may kanser an sakong ina, na pag-abot nin panahon iyo an ikinagadan nia. Alagad bago sia magadan, may ipinamana siang kayamanan sa samo.

Sinabi sa saiya kan saro sa mga kamidbid nia an manongod sa sono sa Kasuratan na paglaom na pagkabuhay liwat, asin inako kan sakong ina an alok na pag-adal sa Biblia. Sa huring kabtang kan saiyang buhay, an mensahe nin paglaom na nasa Biblia iyo an nagtao nin kahulogan sa saiyang buhay asin nakatabang sa saiya na makanompong nin kaogmahan.

Kan maheling mi an positibong epekto sa saiya kan mensahe na nasa Biblia, nagpoon man kaming magtugang na mag-adal sa Tataramon nin Dios. Nabautismohan ako bilang saro sa Mga Saksi ni Jehova sarong bulan bago mamundag an ikaduwa kong aki, na magayon na omboy na nginaranan ming Lucia.

Mahalagang marhay para sa sako an aldaw kan sakong bautismo. An sarong dahelan iyo na sadiri na ako ngonyan ni Jehova, huling idinusay ko an sakong sadiri sa saiya tanganing paglingkodan sia sagkod lamang. An saro pang dahelan iyo na puede kong sabihon sa sakong namomotan na marhay na aking lalaki asin babae an sakong pagtubod.

Pero, dai nahaloy naputol an ikaduwang dahelan na iyan kan sakong kaogmahan. Kan kuatro anyos na si Lucia, nagpoon siang magkaigwa nin grabeng pagkolog nin tulak. Pakatapos nin nagkapirang pagsiyasat, ipinaliwanag kan radiologist na may tumor na siring kadakula nin orange sa saiyang katoy. Ipinaliwanag kan doktor na si Lucia may neuroblastoma, sarong marikas magdakulang tumor na may kanser. Sa siring nagpoon an pitong taon na pakikipaglaban ni Lucia sa kanser, na dian kaiba an haralawig na pagkaospital.

Sarong Espiritu nin Pagsasakripisyo

Sa depisil na mga taon na ini, parateng pinaparigon ni Lucia an sakong boot paagi sa mamomoton na mga kugos asin nakakapakosog liwat sa boot na mga hadok. Napahanga man an mga tawohan sa ospital sa paagi kan pag-atubang nia sa helang. Pirme siang entusiastiko na makipagtabangan sa mga nars, na tinatabangan sinda na maghatod nin yogurt, juice, asin iba pa, sa mga aki na nasa ospital sa kaharaning mga kuarto. Tinawan pa ngani kan mga nars si Lucia nin sarong pang-ibabaw na puting gubing asin lapel badge na nagpapamidbid sa saiya bilang “katabang nin nars.”

“Napahiro ni Lucia an puso ko,” an paggirumdom nin sarong nagtatrabaho sa ospital. “Sia aktibo asin artistikong aki, saka hilig niang magdrowing. Sia bibo asin garo maygurang na nanggad kun gumawe.”

Nakakua si Lucia nin kosog asin karigonan hale sa Tataramon nin Dios. (Heb. 4:12) Kombensido sia na sa bagong kinaban, “dai na magkakaigwa nin kagadanan, ni magkakaigwa pa man nin pagmondo o pagtangis o kolog,” siring kan ipinapanuga kan Tataramon nin Dios. (Kap. 21:4) Interesado sia sa iba, asin ginamit nia an lambang oportunidad na sabihon sa iba an mensahe kan Biblia. An marigon na paglaom ni Lucia sa pagkabuhay liwat nakatabang sa saiya na magdanay na kalmado asin magayagaya minsan ngani dikiton sana an posibilidad na maomayan pa sia. (Isa. 25:8) Pinagdanay nia an kaisipan na iyan sagkod sa aldaw na magadan sia huli sa kanser.

 Sa aldaw na iyan ginibo ko an mahalagang marhay na pakipag-olay na maghelingan. Haros dai ikamuklat ni Lucia an saiyang mga mata. Kapot kan saiyang ama an sarong kamot ni Lucia mantang kapot ko man an saro pa. “Dai ka mahadit, dai taka babayaan,” an ihininghing ko. “Maghangos ka sana nin luway-luway. Pagmata mo, magigin marahay na an pagmate mo. Dai ka na giraray matios nin kolog, asin makakaibanan mo ako.”

Ngonyan kaipuhan kong otobon an pakipag-olay na iyan na maghelingan. Aram ko na dai magigin pasil an paghalat. Alagad aram ko man na kun mapasensia akong magtitiwala ki Jehova asin papagdadanayon ko an sakong integridad sa saiya, yaon ako duman kun sia buhayon na liwat.

An Pamana ni Lucia

An halimbawa ni Lucia nin kosog nin boot, saka an marahayon na pagsuportar kan kongregasyon, nakapahangang marhay sa sakong agom, na bako kong kapagtubod. Kan aldaw na magadan si Lucia, sinabi nia sa sako na kaipuhan niang horophoropon giraray an mga bagay-bagay. Pakalihis nin pirang semana, nakiolay sia sa sarong magurang sa kongregasyon na adalan sia sa Biblia. Dai nahaloy an sakong agom nagpoon nang mag-atender sa gabos na pagtiripon. Sa tabang ni Jehova nagpondo na sia sa paninigarilyo, sarong bagay na dai pa nia nagibo bago kaidto.

An sakong kamondoan huli sa pagkagadan ni Lucia dai man biyong nawara, pero nagpapasalamat akong marhay ki Jehova sa pamanang iwinalat ni Lucia. Nagririnangahan kaming mag-agom paagi sa makangangalas na paglaom na pagkabuhay liwat, na iniimahinar pa ngani an panahon na maheheling mi giraray si Lucia—an saiyang mga mata na buhay na buhay asin bilog, saka nakahuyom na may lusot (dimple) sa saiyang mga pisngi.

An makaturotristeng eksperyensia kan sakong aki nakapahiro man partikularmente sa saro sa samong pagtaraed. Sarong maoran na Sabadong aga, nagduman sa harong mi an sarong babae na may aking lalaki na nag-aadal sa eskuelahan na duman man nag-adal si Lucia. Nagadanan sia nin saro pang aking lalaki, na 11 anyos kaidto, huli sa iyo man sanang helang. Kan maaraman kan babae an nangyari ki Lucia, naaraman nia kun saen kami nakaistar asin dinalaw nia kami. Gusto niang maaraman kun paano ko nakakaya an pagkagadan ni Lucia asin isinuherir nia na magbilog kami nin sarong grupo na naghihingoang rangahon an iba pang ina na nasa kaagid na mga kamugtakan.

Ipinaliwanag ko na personalmente akong nakanompong nin tunay na karangahan sa saro kan mga panuga na nasa Biblia, na nakakalabi nanggad kisa sa ano man na ikakaalok nin mga tawo. Naheling ko sa saiyang mga mata an paglaom mantang binabasa ko sa saiya an mga tataramon ni Jesus na nakasurat sa Juan 5:28, 29. Nag-ako sia nin pag-adal sa Biblia asin dai nahaloy nagpoon na siang makamate kan “katoninongan nin Dios na minalampas sa gabos na kaisipan.” (Fil. 4:7) Sa parate kun nag-aadal kami sa Biblia, nagpopondo nguna kami asin iniimahinar niamo an samong sadiri na nasa bagong kinaban, na maogmang inaako an samong mga namomotan na binuhay liwat.

Iyo, an halipot na buhay ni Lucia nagwalat nin nagdadanay na pamana. An saiyang pagtubod nakatabang na pagsararoon an samong pamilya sa paglilingkod sa Dios, asin siring man dinugangan kaiyan an sakong determinasyon na magdanay na marigon sa pagtubod. Daing duda, an gabos sa sato na nagadanan nin mga namomotan na posibleng buhayon liwat igwa nin mahalagang marhay na olayan na maghelingan.

[Ritrato sa pahina 20]

An Paraiso na idrinowing ni Lucia