Ano an Nagpapangyaring Magin Kapakipakinabang an Buhay?

“Matakot ka sa tunay na Dios asin otobon mo an saiyang mga togon.”​—ECL. 12:13.

1, 2. Paano kita makikinabang sa pag-estudyar sa libro nin Eclesiastes?

IMAHINARON an sarong lalaki na garo baga yaon na sa saiya an gabos na bagay. Sia bantog na estadista, saro sa mga pinakamayaman sa kinaban, asin an pinakamadonong sa saiyang henerasyon. Minsan siring, sa ibong kan gabos na nagibo nia, garo baga hinahapot pa man giraray nia an saiyang sadiri, ‘Ano an nagpapangyaring magin kapakipakinabang an buhay?’

² Talagang nabuhay an siring na lalaki​—mga tolong ribong taon na an nakalihis. An saiyang ngaran Salomon, asin sa libro nin Eclesiastes, mababasa niato an saiyang paglaladawan sa paghanap nia nin pagkakontento. (Ecl. 1:13) Dakol an manonodan niato sa eksperyensia ni Salomon. Sa katunayan, an kadonongan na yaon sa libro nin Eclesiastes puedeng makatabang sa sato na makapagbugtak nin mga pasohan na matao nin tunay na kahulogan sa satong buhay.

“Paglapag sa Doros”

3. Anong nakakapagpaisip na katunayan manongod sa buhay nin tawo an kaipuhan na atubangon niato gabos?

³ Ipinapaliwanag ni Salomon na linalang nin Dios an kadakol na magayon na bagay sa daga​—sarong daing katapusan asin pambihirang gikanan nin interesante saka makangangalas na mga bagay na padagos niatong ikinakaogma. Minsan siring, dai ngani talaga kita makakapoon sa pagsiyasat sa mga linalang nin Dios huli ta halipoton an satong buhay. (Ecl. 3:11; 8:17) Siring kan sinasabi sa Biblia, kakadikit sana an satong mga aldaw asin madaling minalihis an mga iyan. (Job 14:1, 2; Ecl. 6:12) An nakakapagpaisip na katunayan na ini maninigong magpahiro sa sato na madonong na gamiton an satong buhay. Iyan bakong pasil na gibohon, huli ta puedeng itokdo sa sato kan kinaban ni Satanas an salang direksion.

4. (a) Ano an kahulogan kan pananaram na “daing kamanungdanan”? (b) Anong mga pinagmamaigotan na makamtan sa buhay an pag-oolayan niato?

⁴ Tanganing ikatampok an peligro na masayang an satong buhay, ginamit ni Salomon nin mga 30 beses sa Eclesiastes an pananaram na “daing kamanungdanan.” An Hebreong termino na trinadusir na “daing kamanungdanan” nanonongod sa sarong bagay na daing laog, daing pakinabang, daing kahulogan, daing serbi, o mayo nin nagdadanay na halaga. (Ecl. 1:2, 3) Kun beses ginagamit ni Salomon an pananaram na “daing kamanungdanan” bilang katumbas nin “paglapag sa doros.” (Ecl. 1:14; 2:11) Siempre pa, daing kamanungdanan an ano man na pagprobar na dakopon an doros. An siisay man na nagmamaigot na gibohon iyan mayo nin madadakop. An pagmamaigot na aboton an bakong madonong na mga pasohan magigin siring man kanakakadesganar. An buhay sa presenteng sistemang ini halipoton kaya dai dapat na sayangon sa mga paghihingoa na mayo nin pakinabang. Huli kaini, tanganing matabangan kita na malikayan an salang iyan, estudyaran niato an nagkapirang halimbawa na itinao ni Salomon manongod sa ordinaryong mga pinagmamaigotan na makamtan sa buhay. Enot, pag-oolayan niato an pagmamaigot na magkaigwa nin kaogmahan asin mga rogaring. Pagkatapos kaiyan, pag-oolayan niato an kahalagahan nin gibohon na nakakapaogma sa Dios.

Magpapagayagaya daw sa Sato an Pagmamaigot na Magkaigwa nin Kaogmahan?

5. Saen si Salomon naghanap nin pagkakontento?

⁵ Arog nin dakol na tawo ngonyan, pinagmaigotan ni Salomon na makanompong nin pagkakontento paagi sa pagmamaigot na magkaigwa nin maogmang  buhay. Sia nagsabi: “Dai ko pinugolan an sakong puso sa ano man na klase nin paggayagaya.” (Ecl. 2:10) Saen sia naghanap nin kaogmahan? Oyon sa Eclesiastes kapitulo 2, ‘pinaogma nia an saiyang laman paagi sa arak’​—kadungan kaiyan pinapagdanay nia an pagpupugol sa sadiri—​asin pinagmaigotan nia na magibo an siring kan landscaping, pagdisenyo nin mga palasyo, paghinanyog sa musika, saka pagkakan nin masisiram na kakanon.

6. (a) Taano ta bakong sala na ikaogma an nagkapira sa marahay na mga bagay sa buhay? (b) Mapadapit sa pag-aling-aling, anong pagkatimbang an kaipuhan?

⁶ Kinokondenar daw kan Biblia an pag-ogma kaiba nin mga katood? Dai nanggad. Halimbawa, sinabi ni Salomon na sarong balaog nin Dios an pagkakan sa sarong trangkilong palibot pakatapos nin mapagal na trabaho sa maghapon. (Basahon an Eclesiastes 2:24; 3:12, 13.) Apuera dian, si Jehova mismo nag-iimbitar sa mga hoben na ‘maggayagaya asin togotan na gumibo sa sainda nin karahayan an saindang puso’ sa responsableng paagi. (Ecl. 11:9) Kaipuhan niato an pagpaharohayahay asin kapakipakinabang na pag-aling-aling. (Ikomparar an Marcos 6:31.) Minsan siring, an pag-aling-aling dai maninigong magin pangenot na katuyohan kan satong buhay. Imbes, an pagpaharohayahay maninigong magin siring sa pangdulse pakatapos nin pagkakan, bakong an pinakaputahe. Maoyon kamo na gurano man nindo kagusto an mahamis na mga pangdulse, madali kamong magsasawa sa mga ini kun mayo na kamo nin ibang kakakanon, asin dai iyan magtatao nin dakol na sustansia. Kaagid kaiyan, narealisar ni Salomon na an buhay na nakasentro sa kaogmahan, sarong “paglapag sa doros.”​—Ecl. 2:10, 11.

7. Taano ta maninigo niatong maingat na pilion an satong pag-aling-aling?

⁷ Dugang pa, bakong gabos na pag-aling-aling kapakipakinabang. Dakol dian an nakakadanyar nanggad—sa espirituwal sagkod sa moral. Pirang milyon na tawo an nakaeksperyensia nin grabeng kamondoan huli sana ta ‘gusto nindang magpasiramsiram,’ na nagdodroga, nagpapangana sa inomon na de alkohol, o nagsusugal? Si Jehova maboot na nagpapatanid sa sato na kun totogotan niato an satong puso o an satong mga mata na iyo an gumiya sa sato sa nakakadanyar na mga bagay, dapat niatong laoman na sasaparon niato an mga epekto kaiyan.​—Gal. 6:7.

8. Taano ta madonong na horophoropon an satong pamumuhay?

⁸ Apuera dian, an bakong timbang na pagmamaigot na magkaigwa nin kaogmahan maolang sa sato na magtao nin tamang atension sa mas importanteng mga bagay. Girumdomon na an buhay marikas na minalihis, asin mayo nin garantiya na sa halipot na buhay niato pirme kitang may marahay na salud asin mayo nin mga problema. Kaya, siring kan sinabi pa ni Salomon, puede kitang makakua nin orog na pakinabang sa pagduman sa sarong lobong​—nangorogna sa lobong nin sarong maimbod na tugang na Kristiano—​kisa sa pagduman sa “harong nin pag-ogma.” (Basahon an Eclesiastes 7:2, 4.) Taano ta arog kaiyan? Mantang hinihinanyog niato an pahayag sa lobong asin hinohorophorop niato an pamumuhay kan nagadan na maimbod na lingkod ni Jehova, puede kitang mapahiro na siyasaton an sato mismong pamumuhay. Bilang resulta, tibaad makapagkongklusyon kita na kaipuhan niatong liwaton an satong mga pasohan tanganing madonong na magamit an natatada pang buhay niato.​—Ecl. 12:1.

Magtatao daw sa Sato nin Pagkakontento an Materyal na mga Rogaring?

9. Ano an narealisar ni Salomon mapadapit sa pagkaigwa nin kayamanan?

⁹ Si Salomon saro sa mga pinakamayaman sa kinaban kan isurat nia an Eclesiastes. (2 Cron. 9:22) Igwa sia nin mga paagi na makua an ano man na gusto nia. “An ano man na hinagad kan sakong mga mata dai ko isinayuma sa sainda,” an isinurat nia. (Ecl. 2:10) Minsan siring, narealisar nia na an mga rogaring bako mismo an nagtatao nin pagkakontento. “An mamomoton sa plata dai makokontento sa plata, ni an siisay man na mamomoton sa kayamanan makokontento man sa ginaganar,” an kongklusyon nia.​—Ecl. 5:10.

10. Ano an minagiya pasiring sa tunay na pagkakontento asin tunay na kayamanan?

¹⁰ Sa ibong kan pagigin temporaryo sana kan kahalagahan nin mga rogaring, an kayamanan igwa pa man giraray nin mapuersang pang-akit. Sa sarong dai pa sana nahahaloy na surbey sa Estados Unidos, 75 porsiento kan gabos na estudyante sa unibersidad na nasa primera anyo an nagsabi na an pangenot na pasohan ninda sa buhay iyo an magin “mayamanon.” Dawa kun naabot ninda an saindang pasohan, talaga daw na magigin maogma sinda? Dai man. Sinabi kan mga parasiyasat na an pagpahalaga sa materyalismo, sa katunayan, sarong olang sa kaogmahan asin pagkakontento. Kaidtong haloy nang panahon, arog na man kaiyan an kongklusyon ni Salomon. Sia nagsurat: “Nagtipon man ako nin plata asin bulawan para sa  sakong sadiri, asin nin rogaring na para sa mga hade . . . Asin, uya! an gabos daing kamanungdanan asin paglapag sa doros.” * (Ecl. 2:8, 11) Sa kabaliktaran, kun ginagamit niato an satong buhay tanganing maglingkod ki Jehova nin bilog na puso asin huli kaiyan kita nag-aako kan saiyang bendisyon, kakamtan niato an tunay na kayamanan.​—Basahon an Talinhaga 10:22.

Anong Klaseng Gibohon an Nagtatao nin Tunay na Pagkakontento?

11. Ano an ipinaparisa kan Kasuratan manongod sa kahalagahan nin paggibo?

¹¹ Si Jesus nagsabi: “An sakong Ama sagkod ngonyan padagos na naggigibo, asin ako padagos na naggigibo.” (Juan 5:17) Daing duda na si Jehova asin si Jesus nakakua nin pagkakontento sa paggibo. Ipinaparisa kan Biblia an pagkakontento ni Jehova sa saiyang paglalang kan iyan magsabi: “Naheling nin Dios an gabos niang ginibo asin, uya! idto marahayon.” (Gen. 1:31) An mga anghel “nagkururahaw sa pag-omaw” kan maheling ninda an gabos na ginibo nin Dios. (Job 38:4-7) Inapresyar man ni Salomon an kahalagahan nin makatuyohan na paggibo.​—Ecl. 3:13.

12, 13. (a) Paano ipinahayag nin duwang indibiduwal an pagkakontento na nakukua ninda sa sadiosan na paggibo? (b) Taano ta nakakadesganar kun beses an sekular na trabaho?

¹² Dakol na tawo an nakakasabot sa kahalagahan nin sadiosan na paggibo. Halimbawa, si Jose, na sarong mapangganang pintor, nagsabi, “Kun ikinakapinta nindo an retrato na nasa isip nindo, an pagmate nindo garo natukad nindo an sarong halangkaw na bukid.” Si Miguel, * na sarong negosyante, nagsabi: “An paggibo nagtatao nin pagkakontento huli ta nagpapangyari iyan sa saindo na masustentohan an saindong pamilya. Puede man iyan na magtao sa saindo nin pakamate na may nagibo kamo.”

¹³ Sa ibong na lado, dakol na trabaho an nakakauyam asin dikit sana an itinataong oportunidad na magin mapag-imbento. Kun beses an pinagtatrabahohan mismo an ginigikanan nin pagkadiskontento asin iyan lugar pa ngani nin inhustisya. Siring kan sinabi ni Salomon, an hugakon puedeng mag-ako​—tibaad huli sa paggamit nia kan saiyang impluwensia sa mga tawo na may autoridad—​kan balos na para sa mahigos na trabahador. (Ecl. 2:21) An iba pang nakakakontribwir na bagay puedeng maggiya man sa pagkadesganar. An dating garo baga maganansiang marhay na negosyo tibaad bumagsak sa huri huli sa pagruro nin ekonomiya o mga pagkanorongod. (Basahon an Eclesiastes 9:11.) Dakol na beses na an saro na maigot na naghihingoa tanganing magin mapanggana sa huri nagkakaigwa nin kapaitan sa boot asin nadedesganar, huli sa pakarealisar na sia “nagpaparahigos sa doros.”​—Ecl. 5:16.

14. Anong gibohon an pirmeng nagtatao nin tunay na pagkakontento?

¹⁴ Igwa daw nin ano man na gibohon na nungkang nakakadesganar? Si Jose, an pintor na nasambitan sa enotan, nagkomento: “Sa paglihis nin dakol na taon, puedeng mawara o maraot an mga ipininta. Bako iyan na totoo sa espirituwal na mga bagay. Paagi sa pagkuyog ki Jehova sa paghuhulit kan maogmang bareta, natabangan ko an iba na magin marahay asin matatakton sa Dios na mga Kristiano, asin iyan sarong bagay na nagdadanay. Daing kaagid an halaga kaiyan.” (1 Cor. 3:9-11) Nagsabi man si Miguel na an paghuhulit kan mensahe kan Kahadean nagtatao sa saiya nin orog nanggad na pagkakontento kisa sa sekular na  trabaho nia. “Mayo nin makakaribay sa kagayagayahan na namamatean nindo kun ipinapaliwanag nindo sa sarong tawo an katotoohan sa Kasuratan asin kun namamatean nindo na napapahiro kaiyan an saiyang puso,” an sabi nia.

“Iapon Mo an Saimong Tinapay”

15. Ano an nagpapangyaring magin talagang kapakipakinabang an buhay?

¹⁵ Bilang kongklusyon, ano talaga an nagpapangyaring magin kapakipakinabang an buhay? Namamatean niato an tunay na pagkakontento kun ginagamit niato an satong halipot na buhay sa sistemang ini nin mga bagay tanganing gumibo nin marahay asin paogmahon si Jehova. Puede niatong pataluboon an dayupot na relasyon sa Dios, puede niatong itokdo sa satong mga aki an espirituwal na mga pamantayan, puede niatong tabangan an iba na mamidbid si Jehova, asin puede niatong pataluboon an nagdadanay na pakikikatood sa satong mga tugang. (Gal. 6:10) An gabos na paghihingoang ini igwa nin permanenteng kahalagahan asin nagtatao nin mga bendisyon sa mga nakakagibo kaiyan. Ginamit ni Salomon an interesante nanggad na pagkokomparar tanganing iladawan an kahalagahan nin paggibo nin marahay. Sia nagsabi: “Iapon mo an saimong tinapay sa ibabaw kan katubigan, huli ta pakaagi nin dakol na aldaw makukua mo giraray iyan.” (Ecl. 11:1) Sinadol ni Jesus an saiyang mga disipulo: “Magin matinao, asin an mga tawo magtatao sa saindo.” (Luc. 6:38) Apuera kaini, si Jehova mismo nanunuga na babalosan nia an mga naggigibo nin marahay sa iba.​—Tal. 19:17; basahon an Hebreo 6:10.

16. Noarin an tamang panahon na magplano sa magigin pamumuhay niato?

¹⁶ Sinasadol kita kan Biblia na mantang hoben pa gumibo na kita nin madonong na mga desisyon mapadapit sa kun paano niato gagamiton an satong buhay. Sa paaging iyan, malilikayan niato an pagkadesganar sa maabot na mga taon. (Ecl. 12:1) Magigin makamomondo nanggad kun sasayangon niato an pinakamarahay na mga taon kan satong buhay sa garo paglapag sa mga pang-aakit kan kinaban, dangan madiskobre na garo man sana iyan paglapag sa doros!

17. Ano an makakatabang sa saindo na pilion an pinakamarahay na pamumuhay?

¹⁷ Arog nin siisay man na mamomoton na ama, gusto ni Jehova na kamo mag-ogma sa buhay, gumibo nin marahay, asin makalikay sa dai kaipuhan na kamondoan. (Ecl. 11:9, 10) Ano an matabang sa saindo na magibo iyan? Magbugtak nin espirituwal na mga pasohan dangan pagmaigotan na aboton iyan. Haros 20 taon na an nakalihis, kinaipuhan ni Javier na magdesisyon kun baga an pipilion nia iyo an halangkaw an sueldong karera sa medisina o an bilog na panahon na ministeryo. “Minsan ngani an trabaho nin sarong doktor puedeng magin nakakakontento, mayo nin ikakakomparar sa kagayagayahan na namatean ko kan matabangan ko an nagkapirang tawo na maaraman an katotoohan,” an sabi nia. “An bilog na panahon na paglilingkod an dahelan na lubos kong ikinakaogma an buhay. An solamenteng pinagbabasolan ko iyo na dai ko tolos iyan pinonan kaidto.”

18. Taano ta nagin kapakipakinabang na marhay an buhay ni Jesus digdi sa daga?

 ¹⁸ Kun siring, ano an pinakamahalagang bagay na maninigo niatong pagmaigotan na mapasato? An libro nin Eclesiastes nagsasabi: “An ngaran mas marahay kisa sa marahay na lana, asin an aldaw nin pagkagadan kisa sa aldaw nin pagkamundag.” (Ecl. 7:1) Mayo nang mas marahay na makakapag-ilustrar kaini kisa sa buhay ni Jesus. Siertong nakagibo sia nin marahayon na ngaran ki Jehova. Kan si Jesus magadan na maimbod, ibinindikar nia an soberaniya kan saiyang Ama asin itinao nia an atang na pantubos, na nagbukas kan dalan para sa kaligtasan niato. (Mat. 20:28) Durante kan saiyang halipot na panahon digdi sa daga, itinao ni Jesus an sangkap na halimbawa nin kapakipakinabang nanggad na buhay​—sarong halimbawa na pinagmamaigotan niatong arogon.​—1 Cor. 11:1; 1 Ped. 2:21.

19. Anong madonong na hatol an itinao ni Salomon?

¹⁹ Makakagibo man kita nin marahay na ngaran sa Dios. Para sa sato, an pagkaigwa nin marahay na reputasyon sa pagheling ni Jehova orog nanggad na mahalaga kisa sa pagkaigwa nin kayamanan. (Basahon an Mateo 6:19-21.) Aroaldaw, makakahanap kita nin mga paagi tanganing gibohon an mga bagay na marahay sa pagheling ni Jehova asin makakapaoswag kan kualidad kan satong buhay. Halimbawa, puede niatong sabihon sa iba an maogmang bareta, pakosogon an satong pag-agoman asin an satong pamilya, saka pararomon an satong espirituwalidad paagi sa personal na pag-adal patin pag-atender sa mga pagtiripon. (Ecl. 11:6; Heb. 13:16) Kaya, kun siring, gusto daw nindong magkaigwa nin tunay nanggad na kapakipakinabang na buhay? Kun iyo, padagos na sunodon an hatol ni Salomon: “Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.”​—Ecl. 12:13.

[Mga Nota sa Ibaba]

Ano an Isisimbag Nindo?

• Ano an maninigong magpahiro sa sato na seryosong pag-isipan an manongod sa mga pasohan niato sa buhay?

• Paano niato maninigong mansayon an pagmamaigot na magkaigwa nin kaogmahan asin mga rogaring?

• Anong klaseng gibohon an magtatao nin nagdadanay na pagkakontento?

• Anong mahalagang bagay an maninigo niatong pagmaigotan na mapasato?

[Mga Hapot Para sa Pag-adal]

[Ritrato sa pahina 23]

Ano an maninigong magin lugar sa satong buhay nin pag-aling-aling?

[Ritrato sa pahina 24]

Ano an nagpapangyari na magin nakakakontentong marhay an paghuhulit?