Hanapon an Paggiya nin Dios sa Gabos na Bagay

“An Dios na ini iyo an satong Dios sagkod sa panahon na daing talaan, sagkod lamang pa ngani. Sia mismo an magiya sa sato sagkod na kita magadan.”​—SAL. 48:14.

1, 2. Taano ta maninigo kitang sumunod sa paggiya ni Jehova imbes na magtiwala sa sadiri niatong kadonongan, asin anong mga hapot an minalataw?

KUN iniisip-isip niato an mga bagay na daing kamanungdanan o nakakaraot, madali sanang dayaon an satong sadiri. (Tal. 12:11) Kun talagang gusto niatong gibohon an sarong bagay na bakong angay para sa sarong Kristiano, an satong puso parateng nakakahanap nin nakakakombensir na mga dahelan na gibohon iyan. (Jer. 17:5, 9) Huli kaini, an salmista nagpaheling nin kadonongan kan sia mamibi ki Jehova: “Sugoan an saimong liwanag asin an saimong katotoohan. An mga ini logod gumiya sa sako.” (Sal. 43:3) Sia nagtiwala ki Jehova, bakong sa sadiri niang limitadong kadonongan, huli ta sa Saiya sana sia makakaasa nin pinakamarahay na paggiya. Arog kan salmista, marahay na umasa man kita sa Dios para sa paggiya.

² Pero, taano ta maninigo kitang magtiwala sa paggiya ni Jehova nin orog kisa sa ano pa man? Noarin niato maninigong hanapon iyan? Ano an maninigong magin kaisipan niato tanganing makinabang dian, asin paano kita ginigiyahan ni Jehova ngonyan? Pag-oolayan sa artikulong ini an mahalagang mga hapot na ini.

 Taano ta Dapat Magtiwala sa Paggiya ni Jehova?

3-5. Huli sa anong mga dahelan na igwa kita nin lubos na kompiansa sa paggiya ni Jehova?

³ Si Jehova an satong langitnon na Ama. (1 Cor. 8:6) Lubos niang midbid an lambang saro sa sato asin nababasa nia an sato mismong mga puso. (1 Sam. 16:7; Tal. 21:2) Si Hadeng David nagsabi sa Dios: “Ika mismo nakakaaram kan sakong pagtukaw asin kan sakong pagtindog. Tinawan mo nin atension an sakong kaisipan hale sa harayo. Huli ta mayo ni sarong tataramon sa sakong dila, alagad, uya! O Jehova, iyan aram mo na gabos.” (Sal. 139:2, 4) Mantang kita midbid na marhay ni Jehova, taano ta pagdududahan niato na aram nia an pinakamarahay para sa sato? Apuera kaiyan, si Jehova madonong sa gabos. Naheheling nia an gabos na bagay, mas hararom an saiyang pagheling kisa sa siisay man na tawo, asin aram nia an kaaabtan nin mga bagay poon pa sa kapinonan kaiyan. (Isa. 46:9-11; Roma 11:33) Sia an “Dios, na iyo sana an madonong.”​—Roma 16:27.

⁴ Dugang pa, namomotan kita ni Jehova asin an pirme niang gusto iyo an pinakamarahay para sa sato. (Juan 3:16; 1 Juan 4:8) Bilang mamomoton na Dios, buka an saiyang palad sa sato. Si disipulo Santiago nagsurat: “An lambang marahay na balaog asin lambang sangkap na regalo hale sa itaas, huling iyan naghahale sa Ama kan langitnon na mga liwanag.” (Sant. 1:17) An mga nagpapagiya sa Dios nakikinabang nin dakula sa saiyang pagigin buka an palad.

⁵ Ultimo, si Jehova makakamhan sa gabos. Mapadapit digdi, an salmista nagsabi: “An siisay man na nag-eerok sa hilom na lugar kan Kaharohalangkawe makakakua nin ontokan sa mismong limpoy kan Makakamhan sa Gabos. Magsasabi ako ki Jehova: ‘Ika an sakuyang pailihan asin an sakuyang kuta, an sakuyang Dios, na sakuyang pagtitiwalaan.’” (Sal. 91:1, 2) Kun sinusunod niato an paggiya ni Jehova, nagpapaili kita sa Dios na dai nasusudya. Dawa kun mapaatubang kita sa pagtumang, tinatabangan kita ni Jehova. Dai nia susudyaon an satong linalaoman. (Sal. 71:4, 5; Basahon an Talinhaga 3:19-26.) Iyo, aram ni Jehova an pinakamarahay para sa sato, an gusto nia iyo an pinakamarahay para sa sato, asin may kapangyarihan siang itao an pinakamarahay para sa sato. Kamangmangan nanggad na baliwalaon niato an saiyang paggiya! Pero, noarin niato kaipuhan an paggiyang iyan?

Noarin Niato Kaipuhan an Paggiya?

6, 7. Noarin niato kaipuhan an paggiya ni Jehova?

⁶ An totoo, kaipuhan niato an paggiya nin Dios sa bilog niatong buhay, poon sa pagkaaki sagkod sa paggurang. An salmista nagsabi: “An Dios na ini iyo an satong Dios sagkod sa panahon na daing talaan, sagkod lamang pa ngani. Sia mismo an magiya sa sato sagkod na kita magadan.” (Sal. 48:14) Arog kan salmista, an madonong na mga Kristiano nungkang minapondo sa pag-asa sa Dios para sa paggiya.

⁷ Siempre, may mga panahon na nakakamate kita na nangorognang kaipuhan niatong marhay an tabang. Kun beses kita nasa “masakit na kamugtakan,” na tibaad napapaatubang sa persekusyon, igwa nin grabeng helang, o biglang nawaran nin trabaho. (Sal. 69:16, 17) Sa siring na mga panahon, nakakarangang dumolok ki Jehova, asin kompiado kita na papakosogon nia kita na makatagal asin gigiyahan nia  kita na gumibo nin madonong na mga desisyon. (Basahon an Salmo 102:17.) Minsan siring, kaipuhan man niato an saiyang tabang sa iba pang mga panahon. Halimbawa, kun hinuhulitan niato an satong mga kataed manongod sa maogmang bareta kan Kahadean, kaipuhan niato an paggiya ni Jehova tanganing magin epektibo an satong pagpapatotoo. Asin kun kaipuhan niatong magdesisyon​—baga man manongod sa pag-aling-aling, paggubing asin pagpakarhay sa sadiri, pag-iriba, trabaho, edukasyon, o iba pang bagay—​minagawe kita na may kadonongan kun sinusunod niato an paggiya ni Jehova. Sa katunayan, kadakol pang situwasyon na kaipuhan niato an paggiya.

An mga Peligro kun Dai Hinahanap an Paggiya nin Dios

8. Ano an nagin kahulogan kan pagkakan ni Eva kan ipinapangalad na bunga?

⁸ Pero, girumdomon na kaipuhan niatong magin andam na sunodon an paggiya ni Jehova. Dai kita pipiriton nin Dios na gibohon iyan kun habo niato. An enot na tawo na nagdesisyon na dai magsunod sa paggiya ni Jehova iyo si Eva, asin an saiyang halimbawa nagpapaheling kun gurano kaseryoso an puedeng magin resulta kan siring na maraot na desisyon. Isipon man an kahulogan kan ginibo ni Eva. Kinakan nia an ipinapangalad na bunga huli ta gusto nia na ‘magin arog nin Dios, na nakakamidbid kan marahay asin maraot.’ (Gen. 3:5) Sa paggibo kaiyan, gusto niang agawon an katongdan nin Dios, asin gusto niang magsadiring desisyon dapit sa kun ano an marahay asin maraot imbes na sunodon an mga giya ni Jehova. Sa siring, tinalikdan nia an soberaniya ni Jehova. Gusto nia na sia man an magdesisyon. An saiyang agom, si Adan, nagrebelde man.​—Roma 5:12.

9. Kun isinisikwal niato an paggiya ni Jehova, ano an garo man sana ginigibo niato, asin taano ta bako nanggad iyan madonong?

⁹ Ngonyan, kun dai niato sinusunod an paggiya ni Jehova, dai man niato rinerekonoser an saiyang soberaniya. Halimbawa, isipon niato an sarong tawo na nagin ugale na an magparaheling nin pornograpiya. Kun nakaasosyar sia sa Kristianong kongregasyon, aram nia an mga giya ni Jehova dapit sa bagay na ini. Kun dai ngani maninigong sambiton an mga bagay na maati, lalo nang dai maninigong pagparahelingon iyan na may seksuwal na horot. (Efe. 5:3) Paagi sa pagsikwal sa mga giya ni Jehova, dinedeharan kan siring na tawo an soberaniya ni Jehova, na isinisikwal an Saiyang pagkapayo. (1 Cor. 11:3) Bako nanggad iyan madonong, huli ta siring kan sinabi ni Jeremias, “bakong kapot nin tawong naglalakaw dawa an paggiya sa saiyang lakad.”​—Jer. 10:23.

10. Taano ta maninigo kitang magin responsable sa paggamit niato kan satong libreng kabotan?

¹⁰ An nagkapira tibaad dai mag-oyon sa mga tataramon ni Jeremias, na nagsasaboot na mantang tinawan kita ni Jehova nin libreng kabotan, dai sia maninigong magkritika sa sato sa paggamit kaiyan. Minsan siring, dai paglingawan na an libreng kabotan sarong responsibilidad saka balaog. Maninimbag kita sa mga bagay na pinipili niatong sabihon asin gibohon. (Roma 14:10) Si Jesus nagsabi: “Gikan sa kapanoan kan puso nagtataram an ngoso.” Sinabi man nia: “Gikan sa puso minaluwas an maraot na mga pangangatanosan, mga paggadan, mga pagsambay, mga pakikisaro, mga paghabon, putik na mga patotoo, mga paglanghad.” (Mat. 12:34; 15:19) Huli kaini, an kamugtakan kan satong puso nahahayag sa satong mga tataramon asin gibo. Ipinapaheling kaiyan kun ano man nanggad kita. Iyan an dahelan kun taano ta hinahanap nin madonong na Kristiano an paggiya ni Jehova sa gabos na bagay. Sa paaging iyan, sia maheheling ni Jehova na “may matanos na puso” asin sia ‘gigibohan Nia nin marahay.’​—Sal. 125:4.

11. Ano an manonodan niato sa kasaysayan nin Israel?

¹¹ Girumdoma an kasaysayan nin Israel. Kan an nasyon na iyan naggibo nin madonong na mga desisyon, na nagkukuyog sa mga pagboot ni Jehova, sinda prinotehiran ni Jehova. (Jos. 24:15, 21, 31) Pero, sa parate inabuso ninda an saindang libreng kabotan. Kan panahon ni Jeremias, si Jehova nagsabi dapit sa sainda: “Sinda dai naghinanyog, ni ikiniling man ninda an saindang talinga, kundi sinda naglakaw segun sa mga hatol asin kasutilan kan saindang maraot na puso, kaya sinda nagin  pasibog asin bakong paabante.” (Jer. 7:24-26) Makamomondo nanggad! Nungka logod niatong isikwal an paggiya ni Jehova huli sa katagasan nin payo o pagpanigo sa sadiri asin nungka logod kitang maglakaw segun sa sadiri niatong mga hatol asin sa siring magin “pasibog asin bakong paabante”!

Ano an Kaipuhan Tanganing Masunod an Hatol nin Dios?

12, 13. (a) Anong kualidad an nagmomotibar sa sato na booton na magsunod sa paggiya ni Jehova? (b) Taano ta mahalagang marhay an pagtubod?

¹² An pagkamoot niato ki Jehova nagmomotibar sa sato na booton na magsunod sa saiyang paggiya. (1 Juan 5:3) Minsan siring, sinambit ni Pablo an saro pang bagay na kaipuhan niato kan sia magsabi: “Kita naglalakaw segun sa pagtubod, bakong segun sa naheheling.” (2 Cor. 5:6, 7) Taano ta mahalaga an pagtubod? Bueno, ginigiyahan kita ni Jehova sa “mga dalan nin katanosan,” alagad an mga dalan na iyan dai matao nin kayamanan o prestihio sa kinaban na ini. (Sal. 23:3) Sa dahelan na iyan, an satong mata nin pagtubod kaipuhan na isentro sa daing kaparehong espirituwal na mga bendisyon na ibinubunga nin paglilingkod ki Jehova. (Basahon an 2 Corinto 4:17, 18.) Asin tinatabangan kita nin pagtubod na manigoan na sa tama sanang materyal na mga probisyon.​—1 Tim. 6:8.

¹³ Ipinarisa ni Jesus na kalabot sa tunay na pagsamba an pagsasakripisyo kan sadiri, na nangangaipo man nin pagtubod. (Luc. 9:23, 24) An nagkapirang maimbod na parasamba guminibo nin dakulang mga pagsasakripisyo, na nagtagal nin kadukhaan, pang-aapi, pagpalaenlaen, asin grabeng persekusyon pa ngani. (2 Cor. 11:23-27; Kap. 3:8-10) Solamente an makosog na pagtubod an nakatabang sa sainda na magibo iyan na may kagayagayahan. (Sant. 1:2, 3) Huli sa makosog na pagtubod, lubos kitang nagkokompiar na an pagsunod sa paggiya ni Jehova iyo an pirmeng pinakamarahay. Iyan pirmeng para sa pinakaikakarahay niato. Mayo kita nin ano man na pagduda na an balos para sa mga maimbod na nagtatagal nakakalabing marhay kisa sa ano man na temporaryong pagsakit.​—Heb. 11:6.

14. Taano ta kinaipuhan ni Agar na magpaheling nin kapakumbabaan?

¹⁴ Isip-isipa man an papel nin kapakumbabaan sa pagsunod sa paggiya ni Jehova. Ipinapaheling ini kan halimbawa ni Agar, an surugoon na babae ni Sara. Kan si Sara padagos na dai nagkakaaki, itinao nia si Agar ki Abraham, asin ipinagbados ni Agar an aki ni Abraham. Dangan, si Agar nagin arogante sa saiyang baog na kagurangnan na babae. Bilang resulta, ‘pinonan siang supogon’ ni Sara, asin si Agar luminayas. Tinagbo si Agar nin sarong anghel ni Jehova asin sinabihan sia kaini: “Bumalik ka sa saimong kagurangnan na babae asin magpakumbaba ka sa irarom kan saiyang kamot.” (Gen. 16:2, 6, 8, 9) Tibaad ibang paggiya kutana an mas gusto ni Agar. Kaipuhan niang haleon an saiyang aroganteng ugale tanganing sunodon an instruksion kan anghel. Minsan siring, mapakumbabang ginibo ni Agar an sinabi kan anghel, asin an saiyang aki, si Ismael, namundag na napoprotehiran sa kampamento ni Abraham.

15. Iladawan an nagkapirang situwasyon na an pagsunod sa paggiya ni Jehova tibaad magkaipo na kita magpakumbaba.

¹⁵ An pagsunod sa paggiya ni Jehova tibaad mangahulogan na kaipuhan man niatong magpakumbaba. Tibaad kaipuhan na akoon nin nagkapira an punto de vista na ikinakaanggot ni Jehova an sarong klase nin pag-aling-aling na gusto ninda. Tibaad nakolgan nin sarong Kristiano an boot nin saro asin kaipuhan niang maghagad nin dispensasyon. O tibaad nakagibo sia nin sala asin kaipuhan niang admitiron iyan. Paano kun an saro makagibo nin magabat na kasalan? Kaipuhan niang magpakumbaba asin ituga an kasalan sa kamagurangan. Tibaad matiwalag pa  ngani an sarong indibiduwal. Tanganing akoon giraray sa kongregasyon, dapat na sia mapakumbabang magsolsol asin magbakle. Sa mga ini asin sa kaparehong mga situwasyon, nakakaranga an mga tataramon sa Talinhaga 29:23: “An daganon na tawo ibababa kan saiya mismong kaabhawan, alagad sia na may mapakumbabang espiritu magkakamit nin kamurawayan.”

Paano Kita Ginigiyahan ni Jehova?

16, 17. Paano kita makikinabang nin lubos sa Biblia bilang ginigikanan nin paggiya nin Dios?

¹⁶ An pangenot na ginigikanan nin paggiya nin Dios iyo an Biblia, an saiyang ipinasabong na Tataramon. (Basahon an 2 Timoteo 3:16, 17.) Tanganing makinabang nin lubos sa Tataramon na iyan, madonong na dai na niato paghalaton na mag-abot an masakit na situwasyon bago niato hanapon sa Kasuratan an mga tataramon na makakatabang sa sato. Imbes, uugaleon niato na basahon an Biblia aroaldaw. (Sal. 1:1-3) Sa paaging iyan, magigin pamilyar kita sa ipinasabong na mga tataramon. An mga kaisipan nin Dios magigin satong kaisipan, asin andam kitang atubangon dawa an dai linalaoman na mga problema.

¹⁷ Dugang pa, mahalagang horophoropon an binabasa niato sa Kasuratan asin mamibi may koneksion dian. Kun may hinohorophorop kitang mga bersikulo sa Biblia, iniisip niato kun paano iyan tibaad minaaplikar sa espesipikong mga situwasyon. (1 Tim. 4:15) Kun napapaatubang kita sa seryosong mga problema, kita namimibi ki Jehova, na naghahagad nin tabang na logod makua an kinakaipuhan niatong paggiya. An espiritu ni Jehova matabang sa sato na magirumdoman an nakakatabang na mga prinsipyong sono sa Kasuratan na nabasa niato sa Biblia mismo o sa mga publikasyon na basado sa Biblia.​—Basahon an Salmo 25:4, 5.

18. Sa anong mga paagi ginagamit ni Jehova an Kristianong kasararoan nin magturugang tanganing giyahan kita?

¹⁸ An satong Kristianong kasararoan nin magturugang saro pang mahalagang tabang sa paghanap kan paggiya ni Jehova. An sarong mahalagang marhay na kabtang kan kasararoan na iyan nin magturugang iyo an “maimbod asin mapagmansay na oripon” kaiba an representante kaiyan na Namamahalang Grupo, na nagtatao nin dayaday na suplay nin espirituwal na kakanon paagi sa inimprentang mga babasahon asin mga programa para sa mga pagtiripon saka mga asamblea. (Mat. 24:45-47; ikomparar an Gibo 15:6, 22-31.) Dugang pa, igwa nin maygurang na mga indibiduwal sa Kristianong kasararoan nin magturugang, nangorogna an kamagurangan, na kualipikadong magtao nin personal na tabang asin sono sa Kasuratan na hatol. (Isa. 32:1) An mga hoben sa Kristianong mga pamilya igwa nin dugang pang makukuanan nin mahalagang tabang. An saindang may pagtubod na mga magurang tinawan nin Dios nin autoridad na magtao sa sainda nin paggiya asin pirme sindang dinadagka na hagadon sa saindang mga magurang an paggiyang iyan.​—Efe. 6:1-3.

19. Anong mga bendisyon an nakakamtan niato huli sa padagos na paghanap sa paggiya ni Jehova?

¹⁹ Iyo, si Jehova nagtatao nin paggiya sa dakol na paagi, asin marahay na lubos niatong aprobetsaran iyan. Sa pagtaram dapit sa panahon na an Israel nagin maimbod, si Hadeng David nagsabi: “Sa saimo nagtiwala an samong mga ama; nagtiwala sinda, asin padagos mo sindang tinawan nin dudulagan. Sa saimo sinda nag-agrangay, asin sinda nakaligtas; sa saimo sinda nagtiwala, asin sinda dai napasupog.” (Sal. 22:3-5) Kun may pagtitiwala niatong sinusunod an paggiya ni Jehova, kita man ‘dai mapapasupog.’ Dai masusudya an satong linalaoman. Kun ‘ipinapamahala niato ki Jehova an satong dalan,’ imbes na nananarig sa sadiri niatong kadonongan, abundang mga bendisyon an magigin resulta dawa ngonyan. (Sal. 37:5) Asin kun maimbod kitang nagpapadagos sa paggibo kaiyan, an mga bendisyon na iyan magigin daing sagkod. Si Hadeng David nagsurat: “Si Jehova mamomoton sa hustisya, asin dai nia papabayaan an mga maimbod sa saiya. Sagkod sa panahon na daing talaan sinda babantayan nanggad . . . An mga matanos mismo makakasadiri kan daga, asin sinda mag-eerok dian sagkod lamang.”​—Sal. 37:28, 29.

Ikakapaliwanag daw Nindo?

• Taano ta nagtitiwala kita sa paggiya ni Jehova?

• Ano an magigin kahulogan kun isisikwal niato an paggiya ni Jehova?

• Ano an nagkapirang situwasyon na kaipuhan nin Kristiano an kapakumbabaan?

• Paano kita ginigiyahan ni Jehova ngonyan?

[Mga Hapot Para sa Pag-adal]

[Mga Ritrato sa pahina 8]

Nag-aasa daw kamo ki Jehova sa gabos na aspekto kan saindong buhay?

[Ritrato sa pahina 9]

Tinalikdan ni Eva an soberaniya ni Jehova

[Ritrato sa pahina 10]

Anong kualidad an kinaipuhan ni Agar tanganing masunod nia an paggiya kan anghel?