Nagigirumdoman daw Nindo?
Nagigirumdoman daw Nindo?
Naapresyar daw nindo an pagbasa kan dai pa sana nahahaloy na mga isyu kan An Torrengbantayan asin The Watchtower? Bueno, helingon kun masisimbag nindo an minasunod na mga hapot:
• Kasuarin nagsongko ki Jesus an mga astrologo?
Nagkomento an sarong edisyon kan Biblia: “An mga Mago dai nagsongko ki Jesus sa bahogan kan banggi na sia mamundag na siring kan pagsongko kan mga pastor. Nag-abot sinda pakalihis nin nagkapirang bulan.” Kan panahon na iyan, si Jesus sadit nang “aki” asin nakaistar sa sarong harong. (Mat. 2:7-11) Kun tinawan si Jesus nin bulawan asin iba pang mahalagang mga regalo kan banggi na sia mamundag, duwang gamgam sana daw kutana an idinolot ni Maria sa templo pakalihis nin 40 aldaw?—Ene.–Mar., pahina 31.
• Ano an magigibo nin dakol tanganing paoswagon an kualidad kan saindang buhay?
Puedeng ihapot nin saro, ‘Maliliwat ko daw an sakong mga kamugtakan asin mapapasimple an sakong estilo nin pamumuhay?’ Ginibo iyan ni Amy. Sia may kaya alagad bakong maogma. Narealisar nia na an pagmamaigot na kamtan an sarong karera sa kinaban na ini haros ikinalagalag sia parayo sa pagtubod. Huli kaini, sia nagdesisyon na enoton an intereses kan Kahadean asin sia nakapagpayunir sa kadikit na panahon. Si Amy nagsabi, “Nakakamate na ako ngonyan nin pagkakontento na dai ko noarin man naeksperyensiahan” kan pinagmamaigotan kong maabot an sekular na mga pasohan.—1/15, pahina 19.
• Ano an puedeng makatabang sa nagkapirang ina na makanompong nin pagkakontento?
Dakol na ina an nagtatrabaho sa luwas kan harong. Ginigibo ini nin nagkapira tanganing ikatao an pundamental na mga pangangaipo kan pamilya, asin an iba man, tanganing magin independiente sa pinansial o tanganing magkaigwa nin mga luho. An iba pa ginigibo iyan huli ta ikinakaogma ninda an saindang trabaho. An Kristianong mga ina igwa nin mahalagang marhay na papel sa harong—nangorogna durante kan pagkaomboy nin aki. Pinili nin nagkapira na limitaran an saindang sekular na trabaho o dai na magtrabaho nin sekular tanganing tawan nin orog na atension an pamilya, asin bilang resulta ini nagtatao nin dakulang pagkakontento.—2/1-E, pahina 28-31.
• Anong “kapag-arakian” an pinanonongdan ni Jesus sa saiyang mga tataramon na nakasurat sa Mateo 24:34?
Parateng ginagamit kaidto ni Jesus sa negatibong paagi an tataramon na “kapag-arakian” kun nagtataram sa, o manongod sa, maraot na mga tawo. Alagad dai nia iyan ginamit sa siring na paagi kan nakikipag-olay sa saiyang mga disipulo, na lalahidan nin banal na espiritu sa dai na mahahaloy. Sinda an pinakamakakagibo kan mga kongklusyon na nasambitan sa Mateo 24:32, 33. Kaya minalataw na an pinanonongdan ni Jesus iyo an saiyang linahidan na mga parasunod, kaidtong enot na siglo asin sa presenteng aplikasyon kan saiyang mga tataramon.—2/15, pahina 23-4.
• Paano nagin paratokdo an Ley, siring kan nasambitan sa Galacia 3:24?
Sa parate an suanoy na paratokdo sarong pinagtitiwalaan na oripon na iyo an nagsisierto na ligtas sa peligro an aki asin sinesegurado nia na iginagalang an mga kagustohan kan ama. Sa kaagid na paagi, prinotehiran kan Ley an mga Judio sa nakakadigtang mga impluwensia, arog baga nin pakipag-agoman sa mga pagano. Alagad arog nin paratokdo sa aki, an Ley temporaryo, na nagpunsionar sagkod na dumatong si Cristo.—3/1-E, pahina 18-21.
• Kaoyon kan Santiago 3:17, anong mga kualidad an maninigo niatong ipaheling?
Huling mabini, kaipuhan na tolos-tolos niatong isikwal an maraot na mga bagay. (Gen. 39:7-9) Maninigo man kitang magin mapagpatoninong, na linilikayan na magin agresibo o gumawe na makakaraot sa katoninongan. Kaya maninigong hapoton kan lambang saro sa sato an saiyang sadiri: ‘Ako daw midbid bilang parapatoninong o paraparibok? Parate ko daw na dai nakakasundo an iba? Madali daw na makolgan an sakong boot, o parate daw na nakakakolog ako sa boot nin iba? O ako daw andam na magpatawad asin dai tolos ipinipirit na sunodon an sakong personal na mga pamantayan?’—3/15, pahina 24-5.
• Taano ta pinaomayan ni Jesus nin luway-luway an sarong tawong buta? (Mar. 8:22-26)
An Biblia dai nagtatao nin eksaktong paliwanag. Minsan siring, posible na sa kamugtakan na ini, paagi sa pagpaomay nin luway-luway sa tawong buta, tinawan sia ni Jesus nin panahon na matuod sa bagong pagmate na nakakaheling na sia. Ipinapaheling kaini an mamomoton na pagmakolog ni Jesus sa tawong buta.—Abr.–Hun., pahina 30.