Pagigin May Agom Asin Pagigin Magurang sa Panahon na Ini nin Katapusan

“Nainaan na an panahon na natatada.”​—1 COR. 7:29.

1. (a) Anong mga pagbabago sa presente an kabilang sa mga bagay na “masakit pakibagayan”? (b) Taano ta interesado kita sa nagbabagong mga pamantayan sa buhay pampamilya?

IHINULA kan Tataramon nin Dios na an “panahon kan katapusan” mamimidbid paagi sa mga guerra, linog, tiggutom, asin peste. (Dan. 8:17, 19; Luc. 21:10, 11) Nagpatanid man an Biblia na an kritikal na peryodong ini sa kasaysayan nin tawo magigin peryodo nin dakulang mga pagbabago sa sosyedad. An grabeng karibarawan sa buhay pampamilya magigin kabilang sa mga bagay na “masakit pakibagayan” sa delikadong “huring mga aldaw” na ini. (2 Tim. 3:1-4) Taano ta interesado kita sa siring na mga pagbabago? Huling an mga iyan lakop na gayo saka mapuersang gayo kaya puede kaiyan na maimpluwensiahan kun paano minamansay kan mga Kristiano ngonyan an pagigin may agom asin pagigin magurang. Sa anong paagi?

2. Paano minamansay kan kinaban sa pangkagabsan an pag-agom asin pagdiborsio?

² Ngonyan na mga panahon, nagin pasil asin lakop an pagdiborsio, saka marikas na naglalangkaw an bilang  nin pagdiborsio sa dakol na nasyon. Minsan siring, maninigo niatong papagdanayon nin malinaw sa isip na biyong laen an pagmansay ni Jehova Dios sa pag-agom asin pagdiborsio kisa sa inaako sa kinaban sa pangkagabsan. Kun siring, ano an pagmansay dian ni Jehova?

3. Paano minamansay ni Jehova asin ni Jesu-Cristo an pag-agom?

³ Linalaoman ni Jehova Dios na an mga may agom magdadanay na maimbod sa saindang sinumpaan sa kasal. Kan pinagsaro nia an enot na lalaki asin babae bilang mag-agom, sinabi ni Jehova na an “lalaki . . . dapat na magdanay sa saiyang agom na babae asin sinda dapat na magin sarong laman.” Sa huri, inotro ni Jesu-Cristo an pananaram na iyan asin idinugang nia: “Kun siring, an pinagsaro nin Dios dai pagsuwayon nin siisay man.” Si Jesus nagsabi pa: “An siisay man na idiborsio an saiyang agom na babae, apuera sana sa dahelan na pakikisaro, asin mag-agom nin iba nakakaginibo nin pagsambay.” (Gen. 2:24; Mat. 19:3-6, 9) Huli kaini, minamansay ni Jehova asin ni Jesus an pag-agom bilang bilog na buhay na bogkos na napuputol sana kun magadan an agom. (1 Cor. 7:39) Mantang an pag-agom sarong sagradong areglo, an pagdiborsio sarong seryosong marhay na bagay. Sa katunayan, sinasabi kan tataramon nin Dios na ikinakaongis ni Jehova an pagdiborsio na mayong basehan sa Kasuratan. *​—Basahon an Malaquias 2:13-16; 3:6.

Magin Responsable sa Pag-agom

4. Taano ta pinagbabasolan nin nagkapirang Kristianong hoben na sinda naghidaling mag-agom?

⁴ An bakong diosnon na kinaban na kinabubuhayan niato bangkag sa sekso. Aroaldaw, puede kitang makaheling nin kadakoldakol na malaswang retrato asin pasale. Dai niato puedeng ipasipara an puedeng magin epekto kaiyan sa sato, nangorogna sa satong padangat na mga hoben sa kongregasyon. Ano an maninigong magin reaksion kan Kristianong mga hoben sa nakakaraot na impluwensiang ini, na puedeng makapukaw sa seksuwal na kamawotan dawa kun tumang sa boot ninda? An nagkapira prinobaran na atubangon iyan paagi sa pag-agom sa amay na gayong edad. Sa paaging iyan, naglaom sinda na malilikayan nindang mapalabot sa seksuwal na imoralidad. Pero, dai nahaloy, pinagbasolan nin nagkapira an desisyon na iyan. Taano? Kan mainaan na an kaogmahan nin pagigin bagong kasal, narealisar ninda na sindang mag-agom bako palan magkabagay kun manongod sa pang-aroaldaw na rutina sa buhay. Natural sana na napapaatubang na sa seryosong problema an siring na mga mag-agom.

5. Ano an makakatabang sa mga mag-agom na magdanay na maimbod sa saindang sinumpaan sa kasal? (Helingon man an nota sa ibaba.)

⁵ Masakit nanggad an magin agom nin saro na laen na gayo kisa sa inaasahan nindo, dawa sia kapwa Kristiano. (1 Cor. 7:28) Minsan siring, gurano man kasakit kan situwasyon, aram kan tunay na mga Kristiano na an bakong sono sa Kasuratan na pagdiborsio bakong akseptableng solusyon sa mga problema na konektado sa mamondong pag-agom. Huli kaini, maninigong igalang asin mamomoton na tabangan kan Kristianong kongregasyon an mga padagos na nagmamaigot na ingatan an saindang pag-agoman huli ta gusto nindang magdanay na maimbod sa saindang sinumpaan sa kasal. *

6. Paano maninigong mansayon nin Kristianong mga hoben an posibilidad na mag-agom?

⁶ Ika daw hoben asin mayo pang agom? Kun iyo, paano mo maninigong mansayon an posibilidad na mag-agom? Malilikayan mo an grabeng kamondoan kun ika mahalat sagkod na ika andam na sa pisikal, mental, asin espirituwal tanganing mag-agom bago mo ponan an romantikong relasyon sa sarong Kristiano na bakong kasekso. Siempre, an Kasuratan dai nagsasabi nin edad para sa pag-agom. * Minsan siring, ipinapaheling nanggad kan Biblia na marahay na  maghalat ka sagkod na lihis ka na sa panahon sa buhay na dian makosogon an mga pagmate sa sekso. (1 Cor. 7:36) Taano man? Huli ta an makosog na mga pagmate sa sekso puedeng makaraot sa marahay na paghusgar asin magin dahelan na makagibo kamo nin bakong madonong na mga desisyon na sa huri puedeng magresulta sa kamondoan. Girumdomon, para sa saindong kapakinabangan asin kaogmahan an madonong na hatol ni Jehova na nasa Biblia manongod sa pag-agom.​—Basahon an Isaias 48:17, 18.

Pagigin Responsable Bilang Magurang

7. Ano an naeeksperyensiahan nin nagkapirang hoben na mag-agom, asin taano ta puedeng makapagabat ini sa saindang mag-agom?

⁷ An nagkapirang mag-agom nagigin mga magurang mantang sinda mismo hoben pang gayo. Dai pa talaga sinda nagkaigwa nin panahon na mamidbid nin tama an lambang saro bago sinda nagkaigwa nin aki, na nangangaipo nin atension 24 oras kada aldaw. Talagang natural sana na an pangenot na atension kan ina yaon sa bagong mamundag na omboy, kaya tibaad mag-imon an hoben na agom na lalaki. Dugang pa, huli sa mga banggi na daing torog puedeng magkaigwa nin tension na nagigin pagabat sa relasyon kan mag-agom. Bigla na sanang nindang narerealisar na bako na sindang libreng-libre. Ngonyan sinda bako nang libre na mamasyar asin gibohon an mga bagay-bagay siring kan dati. Paano ninda maninigong mansayon an nagbago nang situwasyon ninda?

8. Paano maninigong mansayon an pagigin magurang, asin taano?

⁸ Kun paanong an pag-agom maninigong gibohon sa responsableng paagi, an pagigin magurang maninigo man na mansayon bilang tao nin Dios na paninimbagan asin pribilehio. Ano man na mga pagbabago an puedeng mangyari sa buhay nin sarong Kristianong mag-agom huli sa pagkamundag nin sarong omboy, maninigo nindang gibohon an pinakamakakaya ninda tanganing atubangon an mga pagbabagong ini sa responsableng paagi. Mantang an mga tawo tinawan ni Jehova nin kakayahan na magkaigwa nin mga aki, kaipuhan na mansayon nin mga magurang an bagong mamundag na omboy bilang “mana hale ki Jehova.” (Sal. 127:3) Pagmamaigotan nin Kristianong ina asin ama na akoon an saindang paninimbagan bilang “mga magurang kasaro kan Kagurangnan.”​—Efe. 6:1.

9. (a) Ano an kalabot sa pagpadakula nin aki? (b) Ano an magigibo kan agom na lalaki tanganing tabangan an saiyang agom na magdanay na makosog sa espirituwal?

⁹ Kalabot sa pagpadakula nin aki an dakol na taon nin pagsakripisyo kan sadiri. Nangangaipo iyan nin dakol nanggad na panahon asin kosog. Kaipuhan na masabotan nin Kristianong agom na lalaki na sa laog nin nagkapirang taon pagkamundag nin omboy, posibleng marhay na madisturbo an saiyang agom durante nin mga pagtiripon asin tibaad mas kadikit an oportunidad kaini para sa personal na pag-adal sa Biblia saka paghorophorop. Puedeng magkaigwa ini nin nakakapaluyang epekto sa saiyang espirituwal na salud. An pagigin responsableng magurang nangangaipong ginigibo kan agom na lalaki an gabos na rasonableng magigibo nia tanganing tumabang sa pag-asikaso sa aki. Puede niang pagmaigotan na hipnoan an tibaad nalipasan kan saiyang agom sa mga pagtiripon paagi sa pagtokar sa saiya kan nagkapira sa mga punto kan programa kun sinda nasa harong na. Puede  man siang tumabang sa pag-asikaso sa omboy tanganing matawan an saiyang agom nin oportunidad na magkaigwa nin makahulogan na pakikikabtang sa paghuhulit kan Kahadean.​—Basahon an Filipos 2:3, 4.

10, 11. (a) Paano pinapadakula an mga aki sa “paggiya sa isip gikan ki Jehova”? (b) Taano ta dakol na Kristianong magurang an maninigo na tawan nin komendasyon?

¹⁰ Bako sanang pagtao sa aki nin kakanon, gubing, istaran, asin medikal na pag-asikaso sa salud an kalabot sa pagigin responsableng magurang. Partikularmente sa peligrosong panahon na ini kan katapusan, kaipuhan na manodan kan mga hoben an moral na mga prinsipyo na susundon ninda mantang sinda aki pang marhay. Maninigong padakulaon an mga aki “sa disiplina asin paggiya sa isip gikan ki Jehova.” (Efe. 6:4) Kalabot sa “paggiya sa isip” na ini an pagtadom kan kaisipan ni Jehova sa isip nin aki poon sa pagkaomboy kaini sagkod sa kritikal na mga taon nin pagkahoben.​—2 Tim. 3:14, 15.

¹¹ Kan sabihan ni Jesus an saiyang mga parasunod na maninigo sindang ‘gumibo nin mga disipulo sa mga tawo kan gabos na nasyon,’ sierto nanggad na an boot niang sabihon iyo na maninigong tabangan nin mga magurang an saindang mga aki na magin mga disipulo. (Mat. 28:19, 20) Depisil iyan huli sa pang-iimpluwensia kan kinaban na ini sa mga hoben. Kun siring, an mga magurang na mapanggana sa pagpadakula sa saindang mga aki sagkod na magin nagdusay na mga Kristiano talagang maninigo na tawan nin mainit na komendasyon kan gabos na nasa kongregasyon. ‘Nadaog’ ninda an impluwensia kan kinaban paagi sa saindang pagtubod asin kaimbodan bilang responsableng mga magurang.​—1 Juan 5:4.

Daing Agom o Mayong Aki Para sa Nobleng Katuyohan

12. Taano ta nagdedesisyon an nagkapirang Kristiano na magdanay na daing agom sa laog nin sarong panahon?

¹² Mantang “nainaan na an panahon na natatada” asin “an kamugtakan kan kinaban na ini nagbabago,” sinasadol kita kan Tataramon nin Dios na isip-isipon an mga bentaha nin pagigin daing agom. (1 Cor. 7:29-31) Huli kaini, mas gusto nin nagkapirang Kristiano na magdanay na daing agom sa bilog na buhay o nagdedesisyon sinda na magdanay na daing agom sa laog nin nagkapirang taon bago mag-agom. Kaomaw-omaw na dai ninda inaaprobetsaran an pagigin libre ninda huli sa pagigin daing agom tanganing pagmaigotan na kamtan an paslong intereses. Dakol an nagdadanay na daing agom tanganing maglingkod ki Jehova na “mayo nin disturbo.” (Basahon an 1 Corinto 7:32-35.) An nagkapirang daing agom na Kristiano naglilingkod bilang mga payunir o Bethelite. Dakol an naghihingoa na palawigon an saindang pagigin andam na gamiton sa organisasyon ni Jehova paagi sa pagigin kualipikado na mag-adal sa Paadalan sa Ministeryal na Pagsasanay. Sa katunayan, an mga naglingkod nin harohalawig na panahon bilang bilog na panahon na mga ministro mantang mayo pang agom, dangan nag-agom sa huri, sa parate nakakamate na nakikinabang pa man giraray sinda bilang mag-agom sa mahahalagang leksion na nanodan ninda durante kan mga taon na idto.

13. Taano ta nagdedesisyon an nagkapirang Kristianong mag-agom na dai magkaigwa nin mga aki?

¹³ Sa nagkapirang parte kan kinaban, saro pang pagbabago sa buhay pampamilya an nangyayari​—dakol na mag-agom an nagdesisyon na magdanay na mayong aki. Ginigibo iyan kan  nagkapira huli sa pinansial na mga dahelan; an iba ginigibo iyan huli ta gusto nindang magin libre na maghanap nin halangkaw an sueldong karera. Sa mga Kristiano, igwa man nin mga mag-agom na habong magkaigwa nin mga aki. Minsan siring, sa parate ginigibo ninda iyan tanganing mas libre sinda sa paglilingkod ki Jehova. Dai ini nangangahulogan na an siring na mga mag-agom mayo nin normal na buhay bilang mag-agom. Normal man an buhay ninda. Minsan siring, andam sinda na enoton an intereses kan Kahadean kisa sa nagkapira sa mga bendisyon na may koneksion sa pagigin may agom. (1 Cor. 7:3-5) An nagkapira sa mga mag-agom na iyan naglilingkod ki Jehova asin sa saindang mga tugang paagi sa gibohon sa sirkito asin distrito o sa Bethel. An iba naglilingkod bilang mga payunir o misyonero. Dai malilingawan ni Jehova an saindang gibo asin an pagkamoot na ipinapaheling ninda para sa saiyang ngaran.​—Heb. 6:10.

‘Kahorasaan sa Laman’

14, 15. Anong “kahorasaan sa saindang laman” an puedeng maeksperyensiahan nin Kristianong mga magurang?

¹⁴ Sinabihan ni apostol Pablo an may agom na mga Kristiano na magkakaigwa sinda nin “kahorasaan sa saindang laman.” (1 Cor. 7:28) Puedeng kalabot digdi an mga problema sa salud kan mag-agom, kan saindang mga aki, o kan saindang naggugurang nang mga magurang. Puedeng kalabot man dian an mga problema asin kamondoan na konektado sa pagpadakula sa saindang mga aki. Siring kan nasambitan sa kapinonan kan artikulong ini, ihinula kan Biblia na an “huring mga aldaw” maresulta sa “delikadong mga panahon na masakit pakibagayan.” Kabilang sa mga bagay na masakit pakibagayan iyo an mga aki na “masumbikal sa mga magurang.”​—2 Tim. 3:1-3.

¹⁵ An pagpadakula nin mga aki sarong magabat na angat para sa Kristianong mga magurang. Bako kitang protektado sa maraot na mga epekto kan presenteng “delikadong mga panahon.” Huli kaini, kaipuhan kan Kristianong mga magurang na padagos na makipaglaban sa nakakagadan na impluwensia sa saindang mga aki kan “sistema nin mga bagay kan kinaban na ini.” (Efe. 2:2, 3) Asin dai pirmeng nagigin mapanggana an pakikipaglaban na iyan! Kun an sarong aki sa sarong Kristianong pamilya magpondo na sa paglilingkod ki Jehova, tunay nanggad na iyan “kahorasaan” para sa mga magurang na nagmaigot na sia padakulaon sa katotoohan nin Dios.​—Tal. 17:25.

“Magkakaigwa nin Dakulang Kahorasaan”

16. Anong “kahorasaan” an ihinula ni Jesus?

¹⁶ Minsan siring, malalabihan nin saro pang mas dakula nanggad na kahorasaan an ano man na “kahorasaan” na konektado sa pag-agom asin pag-aki. Sa saiyang hula manongod sa saiyang presensia asin sa pagtatapos kan sistema nin mga bagay, sinabi ni Jesus: “Magkakaigwa nin dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.” (Mat. 24:3, 21) Ihinayag ni Jesus kan huri na sarong dakulang kadaklan an makakaligtas sa “dakulang kahorasaan” na ini. Minsan siring, an sistema ni Satanas padagos na makikilaban paagi sa todo-todo asin pangultimong pagsalakay sa matoninong na mga Saksi ni Jehova. Daing duwa-duwa, magigin masakit na panahon iyan para sa sato gabos​—pareho sa mga nasa edad na asin mga aki.

17. (a) Taano ta puede niatong atubangon an ngapit na may pagsarig? (b) Ano an maninigong makaimpluwensia sa satong pagmansay sa pagigin may agom asin pagigin magurang?

¹⁷ Minsan siring, dai kita maninigong matakot nin labi-labi manongod sa ngapit. Makakalaom an mga magurang na maimbod ki Jehova na poprotehiran sinda kaiba an saindang sadit na mga aki. (Basahon an Isaias 26:20, 21; Sof. 2:2, 3; 1 Cor. 7:14) Pero, para sa ngonyan, logod na an pakaaram manongod sa delikadong mga panahon na kinabubuhayan niato makaimpluwensia sa satong kaisipan manongod sa pagigin may agom asin pagigin magurang sa panahon na ini kan katapusan. (2 Ped. 3:10-13) Sa paaging iyan, an satong buhay​—baga man kita daing agom o may agom, may aki o mayong aki—​magtataong onra asin kaomawan ki Jehova saka sa Kristianong kongregasyon.

[Mga Nota sa Ibaba]

Bilang Repaso

• Taano ta an Kristianong mga hoben dai maninigong maghidali sa pag-agom?

• Ano an kalabot sa pagpadakula nin aki?

• Taano ta dakol na Kristiano an nagdadanay na daing agom o kun may agom man, mayong aki?

• Anong “kahorasaan” an puedeng maeksperyensiahan nin Kristianong mga magurang?

[Mga Hapot Para sa Pag-adal]

[Ritrato sa pahina 17]

Taano ta madonong para sa Kristianong mga hoben na maghalat sagkod na nasa tama nang edad tanganing mag-agom?

[Ritrato sa pahina 18]

Dakol an magigibo nin agom na lalaki tanganing tabangan an saiyang agom na magkaigwa nin makahulogan na pakikikabtang sa espirituwal na mga aktibidad

[Ritrato sa pahina 19]

Taano ta nagdedesisyon an nagkapirang Kristianong mag-agom na dai magkaigwa nin mga aki?