Harani Na an Pagliligtas kan Kahadean nin Dios!

“Dumatong logod an kahadean mo. Gibohon logod an kabotan mo, kun paano sa langit, siring man sa daga.”​—MAT. 6:10.

1. Ano an pangenot na katokdoan ni Jesus?

KAN itao ni Jesu-Cristo an saiyang Sermon sa Bukid, iniba nia an sarong modelong pamibi na nagsumaryo sa pangenot na katokdoan nia. Tinokdoan nia an saiyang mga parasunod na mamibi sa Dios: “Dumatong logod an kahadean mo. Gibohon logod an kabotan mo, kun paano sa langit, siring man sa daga.” (Mat. 6:9-13) Si Jesus “naglibot sa lambang siudad asin lambang baryo, na naghuhulit asin nagpapahayag kan maogmang bareta kan kahadean nin Dios.” (Luc. 8:1) Sinadol ni Cristo an saiyang mga parasunod: ‘Padagos na hanapon nguna an kahadean asin an katanosan nin Dios.’ (Mat. 6:33) Mantang pinag-aadalan nindo an artikulong ini, humanap kamo nin mga paagi na magamit ini sa saindong ministeryo. Halimbawa, estudyaran kun ano an puede nindong isimbag sa mga hapot na ini: Gurano kahalaga an mensahe kan Kahadean? Sa ano kaipuhan na iligtas an katawohan? Asin paano matao nin pagliligtas an Kahadean nin Dios?

2. Gurano kahalaga an mensahe kan Kahadean?

² Ihinula ni Jesus: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mat. 24:14) An maogmang bareta manongod sa Kahadean nin Dios iyo an pinakamahalaga. Tunay nanggad na iyan an pinakamahalagang mensahe sa kinaban! Sa labing 100,000 na kongregasyon kan Mga Saksi ni Jehova sa bilog na daga, mga pitong milyon na lingkod nin Dios an nakikikabtang sa daing kaagid na paghuhulit, na sinasabi sa iba na an Kahadean naestablisar na. Maogmang bareta an pakaestablisar kaiyan huli ta nangangahulogan iyan na an Dios nagpatindog nin sarong gobyerno sa langit tanganing lubos na kontrolon an mga gibo-gibo sa daga. Sa irarom kan pamamahala kan Kahadean, an kabotan ni Jehova gigibohon na sa daga kun paano sa langit.

3, 4. Ano an magigin resulta kun an kabotan nin Dios gibohon na sa daga?

³ Ano an mangyayari sa katawohan kun an kabotan nin Dios gibohon na sa daga? “Papahidon [ni Jehova] an gabos na luha sa saindang mga mata, asin dai na magkakaigwa nin kagadanan, ni magkakaigwa pa man nin pagmondo o pagtangis o kolog.” (Kap. 21:4) An mga tawo dai na maghehelang o magagadan huli sa minanang kasalan asin pagkabakong sangkap. An mga gadan na nasa memorya nin Dios magkakaigwa nin oportunidad na mabuhay sagkod lamang, huli ta an Biblia nanunuga: “Magkakaigwa nin pagkabuhay liwat an mga matanos sagkod an mga bakong matanos.” (Gibo  24:15) Mayo na nin guerra, helang, o pagkagutom, asin an daga magigin nang sarong paraiso. Dawa an mga hayop na peligroso ngonyan magigin nang matoninong sa mga tawo asin sa ibang mga hayop.​—Sal. 46:9; 72:16; Isa. 11:6-9; 33:24; Luc. 23:43.

⁴ Huli sa siring na makangangalas na mga bendisyon na resulta kan pamamahala kan Kahadean, bakong makangangalas na an hula sa Biblia nagtataram manongod sa buhay sa panahon na iyan paagi sa nakakarangang mga tataramon na ini: “An mga mahoyo mismo makakasadiri kan daga, asin tunay na manonompongan ninda an saindang labi-labi nanggad na kaogmahan sa nagsosopay na katoninongan.” Alagad kumusta man an mga nagpaparibok? Ihinuhula kan Kasuratan: “Dai na mahahaloy, asin an maraot mawawara na.” Minsan siring, “an mga naglalaom ki Jehova iyo an mga makakasadiri kan daga.”​—Sal. 37:9-11.

5. Ano an mangyayari sa presenteng sistema nin mga bagay?

⁵ Tanganing mangyari an gabos na ini, kaipuhan na haleon an presenteng sistema nin mga bagay kaiba an nagkokorontrahan na mga gobyerno, relihion, asin sistema nin komersio kaiyan. Asin iyan an eksaktong gigibohon kan langitnon na gobyerno. Si propeta Daniel pinasabngan na maghula: “Sa mga aldaw kan mga hadeng idto [na nag-eeksister ngonyan] an Dios nin langit mapatindog nin sarong kahadean [sa langit] na dai noarin man malalaglag. Asin an kahadean mismo dai itatao sa arin man na ibang banwaan. Iyan an maronot asin matapos kan gabos na kahadean na ini [sa presente], asin iyan mismo magdadanay sagkod sa mga panahon na daing talaan.” (Dan. 2:44) Sa panahon na iyan, an Kahadean nin Dios​—sarong bagong langitnon na gobyerno—​an mamamahala sa sarong bagong sosyedad sa daga. Magkakaigwa nin “bagong kalangitan asin sarong bagong daga . . . , asin sa mga ini magdadanay an katanosan.”​—2 Ped. 3:13.

Mas Dakulang Pangangaipo Para sa Pagliligtas Ngonyan

6. Paano ilinaladawan kan Biblia an karatan kan maraoton na kinaban na ini?

⁶ Kan magrebelde sa Dios si Satanas, Adan, asin Eva, na gustong magdesisyon para sa saindang sadiri kun ano an tama asin kun ano an sala, nagpoon na an kapahapahamak na kasaysayan kan pamilya nin tawo. Bago an lakop sa globong Baha, pakalihis nin labing 1,600 na taon, “an karatan nin tawo kadakol na sa daga asin an gabos na tendensia kan mga kaisipan kan saiyang puso danay na maraot na sana.” (Gen. 6:5) Mga 1,300 na taon pakalihis kaiyan, naheling ni Salomon na maraot na gayo an mga kamugtakan kaya sia nagsurat: “Inomaw ko an mga gadan na nagadan na imbes na an mga nabubuhay na buhay pa. Kaya orog karahay kisa sa saindang duwa an dai pa ipinapangaki, na dai pa nakaheling kan maraot na gibo na ginigibo sa sirong kan saldang.” (Ecl. 4:2, 3) Mga 3,000 na taon pa iyo na an panahon niato, na an karatan padagos na nag-oorog.

7. Taano ta igwa nin mas dakulang pangangaipo ngonyan para sa pagliligtas nin Dios?

⁷ Minsan ngani totoo na haloy nang nag-eeksister an karatan, igwa nin mas dakulang pangangaipo ngonyan para sa pagliligtas kan Kahadean nin Dios kisa arin man na ibang panahon. An mga kamugtakan sa nakalihis na 100 na taon mas maraot pa kisa kasuarin man, asin padagos iyan na nagraraot. Halimbawa, an Institusyon sa Pagmasid sa Kinaban nagbareta: “Mas dakol nin tolong beses an nagadan sa guerra kan [ika-20] siglo kisa sa gabos na guerra kan enot na siglo AD sagkod 1899.” Poon  1914, labing 100 milyones an nagadan sa mga guerra! Kinakarkulo nin sarong ensiklopedya na sagkod sa 60 milyones an nagadan kan Guerra Mundial II. Mantang an nagkapirang nasyon ngonyan armado na nin nuklear na mga armas, igwa na nin kakayahan an mga tawo na pohoon an dakulaon na parte kan populasyon kan kinaban. Asin dawa sa ibong nin mga pag-oswag sa siensia asin medisina, mga limang milyon pang aki an nagagadan kada taon huli sa gutom.​—Helingon an kapitulo 9 kan librong Ano Man Nanggad an Itinotokdo kan Biblia?

8. Ano an daing dudang pinatunayan kan rinibong taon na pamamahala nin tawo?

⁸ Nasudya an mga paghihingoa nin tawo na taposon an karatan. Nungkang napanigoan kan politikal, komersial, asin relihiosong mga institusyon kan kinaban na ini an pundamental na pangangaipo nin katawohan para sa katoninongan, kaginhawahan, asin marahay na salud. Imbes na resolberan an darakulang problema na napapaatubang ngonyan sa katawohan, an mga institusyon na ini nagdagdag pa sa mga problemang iyan. Segurado nanggad na napatunayan kan rinibong taon na pamamahala nin tawo an pagigin totoo kan mga tataramon na: “Bakong kapot kan daganon na tawo an saiyang dalan. Bakong kapot nin tawong naglalakaw dawa an paggiya sa saiyang lakad.” (Jer. 10:23) Iyo, “an tawo nagsakop sa tawo sa saiyang ikakaraot.” (Ecl. 8:9) Dugang pa, “an gabos na linalang padagos na nag-aaragrangay nin iriba asin nakokolgan nin iriba.”​—Roma 8:22.

9. Anong mga kamugtakan an linalaoman kan tunay na mga Kristiano na maheling sa “huring mga aldaw” na ini?

⁹ Mapadapit sa panahon niato, ihinula kan Biblia: “Sa huring mga aldaw maabot an delikadong mga panahon na masakit pakibagayan.” Pagkatapos na iladawan an mga kamugtakan kan huring mga aldaw sa irarom kan pamamahala nin tawo, an hula nagsasabi: “An mga maraot asin nandadaya orog na magraraot.” (Basahon an 2 Timoteo 3:1-5, 13.) Iyan an linalaoman nin mga Kristiano, huli ta “an bilog na kinaban namumugtak sa kapangyarihan kan saro na marigsok,” si Satanas. (1 Juan 5:19) Minsan siring, an maogmang bareta iyo na ililigtas nin Dios sa dai na mahahaloy an mga namomoot sa saiya. Ililigtas sinda sa kinaban na ini, na marikas asin orog na nagraraot.

An Solamenteng Masasarigan na Gikanan nin Pagliligtas

10. Taano ta si Jehova an solamenteng masasarigan na Gikanan nin pagliligtas?

¹⁰ Mantang ihinuhulit nindo an maogmang bareta, ipaliwanag sa mga naghihinanyog sa saindo na si Jehova an solamenteng masasarigan na Gikanan nin pagliligtas. Sia sana an may kapangyarihan asin kamawotan na iligtas an saiyang mga lingkod sa ano man na maraot na situwasyon. (Gibo 4:24, 31; Kap. 4:11) Makakasierto kita na pirmeng ililigtas ni Jehova an saiyang banwaan asin ootobon nia an saiyang mga katuyohan, huli ta sia nanunuga: “Sierto nanggad na kun ano an sakong inisip, iyan an dapat na mangyari.” An saiyang tataramon “dai mabalik sa [saiya] na mayong nahaman.”​—Basahon an Isaias 14:24, 25; 55:10, 11.

11, 12. Anong garantiya an itinatao nin Dios sa saiyang mga lingkod?

¹¹ Si Jehova nagtatao nin garantiya na ililigtas nia an saiyang mga lingkod kun hokoman na nia an mga maraot. Kan sugoon nin Dios si propeta Jeremias tanganing magtaram nin mapuso sa mga parakasala nin labi-labi, Sia nagsabi: “Dai ka matakot.” Taano ta dai? “Ako kaibanan mo tanganing iligtas ka.” (Jer. 1:8) Kaagid kaiyan, kan lalaglagon na ni Jehova an maraot na Sodoma asin Gomorra, nagsugo sia nin duwang anghel tanganing ligtas na giyahan si Lot asin an saiyang pamilya paluwas sa lugar na iyan. “Dangan nagpaoran si Jehova nin asupre asin kalayo . . . sa Sodoma asin sa Gomorra.”​—Gen. 19:15, 24, 25.

¹² Dawa pa sa bilog na kinaban, kayang iligtas ni Jehova an mga naggigibo kan saiyang kabotan. Kan laglagon nia paagi sa Baha an suanoy na maraot na kinaban, “ilinigtas [nia] si Noe, sarong parahulit nin katanosan, kaibanan nin pito pa.” (2 Ped. 2:5) Ililigtas giraray ni Jehova an mga tanos kun laglagon na nia an presenteng maraot na kinaban. Sa siring, an saiyang Tataramon nagsasabi: “Hanapa nindo si Jehova, kamo gabos na mahoyo sa daga . . . Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.” (Sof. 2:3) Bilang resulta kan pambilog na kinaban na paglaglag na iyan, ‘an mga tanos mag-eerok sa daga, alagad an mga maraot popohoon dian.’​—Tal. 2:21, 22.

13. Paano ikakaligtas an mga lingkod ni Jehova na nagadan na?

 ¹³ Minsan siring, dakol sa mga lingkod nin Dios an nagadan na huli sa helang, persekusyon, asin iba pang dahelan. (Mat. 24:9) Kun siring, paano ikakaligtas an gabos na ini? Siring sa sinabi sa enotan, “magkakaigwa nin pagkabuhay liwat an mga matanos.” (Gibo 24:15) Kanigoan na karangahan an maaraman na mayo nin makakaolang ki Jehova sa pagliligtas sa saiyang mga lingkod!

Sarong Matanos na Gobyerno

14. Taano ta nagsasarig kita na an Kahadean nin Dios sarong matanos na gobyerno?

¹⁴ Sa saindong ministeryo, puede nindong ipaliwanag na an langitnon na Kahadean ni Jehova sarong matanos na gobyerno. Totoo ini huling ihinahayag kaiyan an marahayon na mga kualidad nin Dios, arog kan hustisya, katanosan, asin pagkamoot. (Deut. 32:4; 1 Juan 4:8) Itinao nin Dios an Kahadean ki Jesu-Cristo, an pinakakualipikadong mamahala sa daga. Katuyohan man ni Jehova na an 144,000 na linahidan na mga Kristiano kuanon sa daga asin buhayon liwat pasiring sa langitnon na buhay bilang mga kapwa paramana ni Cristo na kaiba nia sa pamamahala sa daga.​—Kap. 14:1-5.

15. Ikomparar an pagkakalaen kan pamamahala kan Kahadean nin Dios asin kan pamamahala nin tawo.

¹⁵ Dakula nanggad an magigin pagkakalaen kan pamamahala ni Jesus asin kan 144,000 kisa sa pamamahala kan bakong sangkap na mga tawo! An mga namamahala sa sistemang ini nin mga bagay parateng maringis asin itinutulod an saindang mga sakop na makiguerra, na nagreresulta sa kagadanan nin minilyon. Bakong makangangalas na hinahatolan kita kan Kasuratan na dai kita magtiwala sa tawo, “na sa saiya mayo nin kaligtasan”! (Sal. 146:3) Alagad kanigoan karahay kan magigin pamamahala ni Cristo! “Madia kamo sa sako, kamo gabos na nagpapagal asin nagagabatan,” an sabi ni Jesus, “asin papaginhawahon ko kamo. Pasana nindo an sakong sakal asin makanood kamo sa sako, huli ta ako mahoyo asin may kababaan an puso, asin makakakua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.”​—Mat. 11:28-30.

An Huring mga Aldaw Madali Nang Matapos!

16. Paano matatapos an huring mga aldaw na ini?

¹⁶ Poon kan taon nin 1914, an kinaban na ini nasa huring mga aldaw na, o “pagtatapos kan sistema nin mga bagay.” (Mat. 24:3) Dai na nanggad mahahaloy poon ngonyan, mangyayari na an inapod ni Jesus na “dakulang kahorasaan.” (Basahon an Mateo 24:21.) An daing kaagid na kahorasaan na iyan maresulta sa katapusan kan bilog na kinaban ni Satanas. Alagad paano mapoon an dakulang kahorasaan? Asin paano iyan matatapos?

17. Ano an ipinaparisa kan Biblia mapadapit sa pagpopoon kan dakulang kahorasaan?

¹⁷ An dakulang kahorasaan mapoon nin bigla. Iyo, an “aldaw ni Jehova” maabot nin bigla “kun noarin sinda nagsasarabi: ‘Katoninongan asin katiwasayan!’” (Basahon an 1 Tesalonica 5:2, 3.) Mapoon an ihinulang kahorasaan kun an mga nasyon naghohona na madali na nindang maresolberan an nagkapira sa dakulang mga problema ninda. Mabibigla an kinaban sa biglang pagkalaglag kan  “Dakulang Babilonya,” an pambilog na kinaban na imperyo nin falsong relihion. Magngangalas an mga hade asin an iba pa kun gibohon na an paghokom sa Dakulang Babilonya.​—Kap. 17:1-6, 18; 18:9, 10, 15, 16, 19.

18. Paano mahiro si Jehova sa pagsalakay ni Satanas sa Saiyang banwaan?

¹⁸ Sa sarong kritikal na panahon, magkakaigwa nin “mga tanda sa saldang asin bulan patin mga bitoon,” saka “an tanda kan Aki nin tawo malataw sa langit.” Sa panahon na iyan, puede kitang ‘tumindog nin tanos huli ta an satong pagkaligtas naghaharani na.’ (Luc. 21:25-28; Mat. 24:29, 30) Gagamiton ni Satanas, o Gog, an saiyang mga hukbo tumang sa banwaan nin Dios. Alagad mapadapit sa mga minasalakay sa maimbod na mga lingkod ni Jehova, sia nagsasabi: “An nagtitikwil sa saindo nagtitikwil sa sakong mata.” (Zac. 2:8) Kun siring, dai magigin mapanggana an pagprobar ni Satanas na laglagon sinda. Taano? Huli ta an Soberanong Kagurangnan na Jehova mahiro tolos tanganing iligtas an saiyang mga lingkod.​—Ezeq. 38:9, 18.

19. Taano ta makakasarig kita na lalaglagon kan mga hukbo nin Dios na manggagadan an sistema ni Satanas?

¹⁹ Kun an Dios humiro na tumang sa mga nasyon, ‘maaaraman ninda na sia si Jehova.’ (Ezeq. 36:23) Susugoon nia an saiyang mga hukbo na manggagadan​—an manampulong ribong espiritung mga linalang na pinapangenotan ni Cristo Jesus—​tanganing laglagon an natatada pang kabtang kan sistema ni Satanas sa daga. (Kap. 19:11-19) Girumdomon niato na sa sarong pangyayari, saro sanang anghel an kinaipuhan tanganing “lugadon [sa saro sanang banggi] an siento otsenta y singko mil” kan mga kaiwal nin Dios. Kun siring, makakasarig man kita na sa Armagedon, na iyo an kulminasyon kan dakulang kahorasaan, madali sanang lalaglagon kan langitnon na hukbo an gabos na natatada pang kabtang kan sistema ni Satanas sa daga. (2 Ha. 19:35; Kap. 16:14, 16) Si Satanas asin an saiyang mga demonyo ihuhulog sa bûngaw sa laog nin sangribong taon. Sa kahurihurihi, gagadanon sinda.​—Kap. 20:1-3.

20. Ano an gigibohon ni Jehova paagi sa Kahadean?

²⁰ Sa siring, mawawara na an karatan sa daga, saka an mga matanos mag-eerok sagkod lamang sa kinaban na ini. Si Jehova magigin nanggad an Dakulang Paraligtas. (Sal. 145:20) Paagi sa Kahadean, ibibindikar nia an saiyang soberaniya, papakangbanalon nia an saiyang banal na ngaran, asin ootobon nia an saiyang marahayon na katuyohan para sa daga. Maeksperyensiahan logod nindo an dakulang kagayagayahan sa saindong ministeryo mantang ibinabalangibog nindo an maogmang baretang ini asin tinatabangan nindo an mga “may tamang inklinasyon sa buhay na daing katapusan” na biyong maaraman na harani na an pagliligtas kan Kahadean nin Dios!​—Gibo 13:48.

Nagigirumdoman daw Nindo?

• Paano itinampok ni Jesus an kahalagahan kan Kahadean?

• Taano ta igwa nin mas dakulang pangangaipo para sa pagliligtas ngonyan kisa kasuarin pa man?

• Anong mga pangyayari an puede niatong laoman durante kan dakulang kahorasaan?

• Paano pinapatunayan ni Jehova na sia Dakulang Paraligtas?

[Mga Hapot Para sa Pag-adal]

[Mga Ritrato sa pahina 12, 13]]

Ihinula kan Tataramon nin Dios an daing kaagid na pambilog na kinaban na paghuhulit sa satong panahon

[Ritrato sa pahina 15]

Kun paanong ilinigtas ni Jehova si Noe asin an saiyang pamilya, kaya man Nia kitang iligtas

[Ritrato sa pahina 16]

‘Papahidon ni Jehova an gabos na luha, asin dai na magkakaigwa nin kagadanan.’​—Kap. 21:4