Kun Paano Inorganisar an Namamahalang Grupo

AN Namamahalang Grupo kan Mga Saksi ni Jehova kompuesto nin nagdusay na mga lalaking linahidan na mga lingkod nin Dios. Irinerepresentar ninda an grupong maimbod asin mapagmansay na oripon, na may paninimbagan na magtao nin espirituwal na kakanon asin magdirehir saka magdagka dapit sa paghuhulit kan Kahadean sa bilog na daga.​—Mat. 24:14, 45-47.

An mga miting kan Namamahalang Grupo ginigibo kada semana, na sa parate Mierkoles. Pinangyayari kaini na an mga tugang na ini maglingkod na sararo. (Sal. 133:1) An mga miembro kan Namamahalang Grupo naglilingkod man sa manlaenlaen na komite. Sa pag-asikaso sa intereses kan Kahadean, an kada komite igwa nin pinapangatamanan na mga klase nin aktibidad, siring kan maheheling sa masunod na halipot na sumaryo.

▪ KOMITE KAN MGA NAGKOKOORDINAR: An komiteng ini kompuesto nin nagkokoordinar sa kada saro kan iba pang mga komite kan Namamahalang Grupo asin nin sekretaryo na miembro man kan Namamahalang Grupo. Sinisierto kaiyan na an gabos na komite nagpupunsionar nin areglado asin episiente. Inaasikaso man kaiyan an mayor na mga emerhensia, persekusyon, kalamidad, asin iba pang importanteng mga bagay na nakakaapektar sa Mga Saksi ni Jehova sa bilog na kinaban.

▪ KOMITE SA TAWOHAN: Ipinagkatiwala sa mga tugang sa komiteng ini an pangangataman sa mga areglo para sa personal asin espirituwal na ikakarahay saka tabang sa mga miembro nin pamilyang Bethel sa bilog na daga. An komiteng ini an nagdidirehir sa pagpili asin pag-imbitar sa bagong mga miembro nin mga pamilyang Bethel saka nag-aasikaso sa mga hapot mapadapit sa saindang paglilingkod sa Bethel.

▪ KOMITE SA PAGPUBLIKAR: An komiteng ini an nag-aadministrar sa pag-imprenta, pagpublikar, asin pagpaktora nin mga literatura sa Biblia sa bilog na kinaban. Iyan an nangangataman sa mga imprentahan asin rogaring na sadiri saka pinapamahalaan kan manlaenlaen na korporasyon na ginagamit kan Mga Saksi ni Jehova. Inaareglo kan komiteng ini an pinakamarahay na paggamit kan pondo na idinonar para sa pambilog na kinaban na gibohon na pang-Kahadean.

▪ KOMITE SA PAGLILINGKOD: An mga kabilang sa komiteng ini nangangataman sa paghuhulit asin sa mga bagay na may koneksion sa mga kongregasyon, payunir, kamagurangan, asin nagbibiaheng mga paraataman. Iyan an nag-aadministrar sa pag-andam kan An Satong Ministeryo sa Kahadean asin nag-aapod sa mga estudyante kan Paadalan nin Gilead asin kan Paadalan sa Ministeryal na Pagsasanay, na sa huri tinatawan sinda nin mga asignasyon pagkagradwar ninda.

▪ KOMITE SA PAGTOTOKDO: An komiteng ini an nagdidirehir sa pagtotokdong itinatao sa mga asamblea, kombension, asin pagtiripon kan kongregasyon. Inaareglo kaiyan an espirituwal na mga programa para sa mga miembro kan pamilyang Bethel asin nangangataman iyan sa manlaenlaen na paadalan, siring kan Paadalan nin Gilead asin kan Paadalan sa Paglilingkod Bilang Payunir, saka sa pag-andam nin mga programa sa audio patin video.

▪ KOMITE SA PAGSURAT: Paninimbagan kan komiteng ini an pag-asikaso sa pagsurat nin espirituwal na kakanon na ipupublikar asin ididistribwir sa mga kapagtubod asin sa publiko sa pangkagabsan. An komiteng ini an nagsisimbag sa mga hapot sa Biblia asin nag-aaprobar sa mga materyal arog baga nin mga script sa drama saka mga outline sa pahayag. Dinidirehiran man kaiyan an pagtradusir na ginigibo sa bilog na kinaban.

Inagid ni apostol Pablo an kongregasyon nin mga linahidan sa hawak nin tawo asin idinoon nia an mahahalagang kabtang kan gabos na miembro saka an saindang pagsinarigan, pagkamoot, patin kooperasyon sa paghaman kan gibohon na itinao nin Dios. (Roma 12:4, 5; 1 Cor. 12:12-31) Itinatao kan Payo, si Jesu-Cristo, sa mga kabtang kan grupo kun ano an kaipuhan para sa marahay na kooperasyon, koordinasyon, asin pagpakakan sa espirituwal na paagi. (Efe. 4:15, 16; Col. 2:19) Sa paaging ini, an Namamahalang Grupo inorganisar tanganing mangenot oyon sa paggiya sa sainda ni Jehova paagi sa banal na espiritu.