Tampok na mga Kabtang sa Libro nin Gibo
An Tataramon ni Jehova Buhay
Tampok na mga Kabtang sa Libro nin Gibo
AN LIBRO sa Biblia na Gibo nagtatao nin kompletong kasaysayan kan pagkaestablisar kan Kristianong kongregasyon asin kan suminunod na pagdakula kaiyan. Isinurat kan doktor na si Lucas, iyan sarong buhay na marhay na pagkasaysay kan Kristianong aktibidad sa laog nin mga 28 taon—poon 33 C.E. sagkod 61 C.E.
An enot na kabtang kan Gibo sa pangenot manongod sa aktibidad ni apostol Pedro, asin an huring kabtang manongod sa aktibidad ni apostol Pablo. Paagi sa paggamit nin mga pronombre (pronoun) na siring kan “kami” asin “sato,” ipinarisa ni Lucas na yaon sia sa nagkapirang pangyayaring isinaysay. An pagtao nin atension sa mensahe kan libro nin Gibo mapakosog kan pag-apresyar niato sa puersa kan nasusurat na Tataramon nin Dios asin sa saiyang banal na espiritu. (Heb. 4:12) Iyan mapahiro man sa sato na magin mapagsakripisyo asin mapakosog kan satong pagtubod sa paglaom sa Kahadean.
GINAMIT NI PEDRO AN “MGA LIABE KAN KAHADEAN”
Pakatapos na mag-ako kan banal na espiritu, an mga apostol pusoan na nagpatotoo. Ginamit ni Pedro an enot sa “mga liabe kan kahadean kan kalangitan” tanganing bukasan an garo pinto nin kaaraman asin oportunidad para sa mga Judio saka proselito na “nag-ako kan saiyang tataramon” tanganing an mga ini makalaog sa Kahadean. (Mat. 16:19; Gibo 2:5, 41) Nagkasuruwaysuway an mga disipulo huli sa biglang paggrabe nin persekusyon, alagad ini nagresulta sa paghiwas kan paghuhulit.
Kan madangog kan mga apostol sa Jerusalem na inako kan Samaria an tataramon nin Dios, isinugo ninda si Pedro asin Juan sa mga taga Samaria. Paagi sa pagbukas sa mga Samaritano kan oportunidad sa Kahadean, ginamit ni Pedro an ikaduwang liabe. (Gibo 8:14-17) Tibaad sa laog nin sarong taon pagkabuhay liwat ni Jesus, may nangyaring makangangalas na pagkaliwat ki Saulo nin Tarso. Kan 36 C.E., ginamit ni Pedro an ikatolong liabe, asin an daing bayad na balaog kan banal na espiritu ibinubo sa bakong turing mga tawo kan mga nasyon.—Gibo 10:45.
Mga Hapot sa Kasuratan na Sinimbag:
2:44-47; 4:34, 35—Taano ta ipinabakal nin mga may pagtubod an saindang mga rogaring asin idinistribwir an kabaklan? An dakol na nagturubod hale pa sa hararayong lugar asin mayo nin igong suplay na kakanon tanganing magdanay pa sinda sa Jerusalem. Minsan siring, minawot nindang magdanay duman nin mas halawig tanganing makanood pa nin orog manongod sa saindang bagong pagtubod asin magpatotoo sa iba. Tanganing tabangan an siring na mga tawo, ipinabakal nin nagkapirang Kristiano an saindang rogaring, asin idinistribwir an pondo sa mga nangangaipo.
4:13—Si Pedro asin Juan daw mangmang o bakong edukado? Bako. Inapod sindang “daing inadalan asin ordinaryo” huli ta dai sinda nag-eskuela sa rabinikong mga paadalan para sa relihiosong pagsasanay.
5:34-39—Paano naaraman ni Lucas an sinabi ni Gamaliel sa sarong eksklusibong sesyon kan Sanhedrin? Igwa nin kisiera tolong posibilidad: (1) si Pablo, na dating estudyante ni Gamaliel, iyo an nagsabi ki Lucas; (2) kinonsulta ni Lucas an sarong may simpatiyang miembro kan Sanhedrin, arog ni Nicodemo; (3) inako ni Lucas an impormasyon na ini paagi sa pasabong hale sa Dios.
7:59—Si Esteban daw namimibi kaidto ki Jesus? Dai. An pagsamba nin saro—asin kun siring an mga pamibi nin saro—maninigo na ki Jehova Dios sana. (Luc. 4:8; 6:12) Sa normal na mga kamugtakan, si Esteban mamimibi kutana ki Jehova sa ngaran ni Jesus. (Juan 15:16) Pero, sa pangyayaring ini, si Esteban nagkaigwa nin bisyon manongod sa “Aki nin tawo [na] nagtitindog sa too nin Dios.” (Gibo 7:56) Huling lubos na nakakaaram na si Jesus tinawan kan kapangyarihan na buhayon liwat an mga gadan, si Esteban nakipag-olay, alagad dai namibi, nin direkta ki Jesus, na hinahagad sa Saiya na protehiran an saiyang espiritu.—Juan 5:27-29.
Mga Leksion Para sa Sato:
1:8. An pambilog na kinaban na paghuhulit na ginigibo kan mga parasamba ki Jehova dai mahahaman kun mayo an tabang kan banal na espiritu.
4:36–5:11. Si Jose nin Chipre inaapod na Bernabe, na nangangahulogan “Aki nin Karangahan.” Tibaad nginaranan sia kan mga apostol na Bernabe huli ta sia madinamayon, maboot, asin matinabang sa iba. Maninigo na kita magin arog nia asin bakong arog ni Ananias saka Safira, na naggamit nin pagsaginsagin, pagkaipokrito, asin katusohan.
9:23-25. Bakong pagkakobarde an pagdulag sa satong mga kaiwal tanganing makapadagos sa paghuhulit.
9:28-30. Kun an pagpatotoo sa nagkapirang pagtaraed o indibiduwal nagigin peligroso sa pisikal, moral, o espirituwal, kaipuhan kitang magkaigwa nin marahay na paghusgar asin magin mapamili kun saen asin noarin kita mahulit.
9:31. Sa medyo matoninong na mga panahon, maninigo kitang magmaigot na pasarigon an satong pagtubod paagi sa pag-adal asin paghorophorop. Tatabangan kita kaini na lumakaw na may pagkatakot ki Jehova paagi sa pag-aplikar kan satong nanonodan asin na magin maigot sa ministeryo.
AN MAIGOT NA PAGMIMINISTERYO NI PABLO
Kan 44 C.E., si Agabo nagpasiring sa Antioquia, na duman nagtotokdo na si Bernabe asin Saulo “sa laog nin sarong taon.” Ihinula ni Agabo an “grabeng tiggutom,” na nangyari pakalihis nin duwang taon. (Gibo 11:26-28) “Pagkatapos na lubos na magibo an pagtao nin ayuda sa Jerusalem,” nagbalik si Bernabe asin Saulo sa Antioquia. (Gibo 12:25) Kan 47 C.E.—mga 12 taon pakalihis kan pagkakombertir ni Saulo—si Bernabe asin Saulo isinugo kan banal na espiritu na magbiahe sa pagmimisyonero. (Gibo 13:1-4) Kan 48 C.E., nagbalik sinda sa Antioquia, “na duman sinda idinusay sa dai na kutana maninigong kabootan nin Dios.”—Gibo 14:26.
Pakalihis nin mga siyam na bulan, pinili ni Pablo (na midbid man na Saulo) si Silas bilang saiyang kaibaiba asin pinonan nia an saiyang ikaduwang pagbiahe. (Gibo 15:40) Nag-iba ki Pablo si Timoteo asin Lucas mantang nagbibiahe. Nagdanay si Lucas sa Filipos mantang si Pablo duminiretso sa Atenas dangan sa Corinto, na duman namidbid nia si Aquila asin Priscila saka nagdanay sia nin saro may kabangang taon. (Gibo 18:11) Binayaan si Timoteo asin Silas sa Corinto, iniba ni Pablo si Aquila saka Priscila patin naglayag pasiring sa Siria sa kapinonan nin 52 C.E. (Gibo 18:18) Inibanan sia ni Aquila asin Priscila sagkod sa Efeso, na duman sinda nagdanay.
Pakatapos na gamiton an pirang panahon sa Antioquia sa Siria, pinonan ni Pablo an saiyang ikatolong pagbiahe, kan 52 C.E. (Gibo 18:23) Sa Efeso, ‘an tataramon ni Jehova padagos na nagtatalubo asin nangingibabaw.’ (Gibo 19:20) Mga tolong taon an ginamit ni Pablo duman. (Gibo 20:31) Kan Pentecostes nin 56 C.E., nasa Jerusalem si Pablo. Pakatapos na arestaron, daing takot siang nagpatotoo sa atubangan kan mga autoridad. Sa Roma, an apostol ibinilanggo sa harong sa laog nin duwang taon (mga 59-61 C.E.), asin hale duman naghanap sia nin mga paagi tanganing maghulit manongod sa Kahadean saka magtokdo nin “mga bagay mapadapit sa Kagurangnan na si Jesu-Cristo.”—Gibo 28:30, 31.
Mga Hapot sa Kasuratan na Sinimbag:
14:8-13—Taano ta an mga tawo sa Listra inapod si “Bernabe na Zeus, alagad si Pablo Hermes”? Si Zeus an namamahala sa mga dios sa mitolohiyang Griego, asin an saiyang aking si Hermes midbid huli sa tibay kaini sa pagtaram. Huling nangenot si Pablo sa pagtaram, inapod sia nin mga tawo sa Listra na Hermes asin inapod ninda si Bernabe na Zeus.
16:6, 7—Taano ta pinangaladan kan banal na espiritu si Pablo asin an saiyang kairiba na maghulit sa distrito nin Asia saka Bitinia? Dikit sana kaidto an mga naglilingkod. Huli kaini, giniyahan sinda kan banal na espiritu pasiring sa mas mabungang mga langtad.
18:12-17—Taano ta dai nakiaram si Proconsul Galeon kan magpoon an mga nagmamasid na bugbogon si Sostenes? Tibaad inisip ni Galeon na nakua kan tawong iyan, na garo baga iyo an namomoon sa pagsururog tumang ki Pablo, an maninigo sa saiya. Minsan siring, minalataw na nagkaigwa nin marahay na resulta an pangyayaring ini huli ta naggiya iyan sa pagkakombertir ni Sostenes sa Kristianismo. Kan huri, si Pablo nagtaram manongod ki Sostenes bilang “satong tugang.”—1 Cor. 1:1.
18:18—Anong kapanugaan an ginibo ni Pablo? Isinusuherir nin nagkapirang iskolar na naggibo si Pablo nin kapanugaan bilang Nazareo. (Bil. 6:1-21) Minsan siring, dai sinasabi kan Biblia kun ano an kapanugaan ni Pablo. Dugang pa, mayong sinasambit an Kasuratan kun baga an kapanugaan ginibo bago o pakatapos na makombertir si Pablo o kun pinoponan o tinatapos nia kaidto an kapanugaan. Ano man an kamugtakan, an paggibo nin siring na kapanugaan bakong kasalan.
Mga Leksion Para sa Sato:
12:5-11. Puede asin maninigo kitang mamibi para sa satong mga tugang.
12:21-23; 14:14-18. Tolos na inako ni Herodes an kamurawayan na maninigong itao sana sa Dios. Laen nanggad iyan sa ensegida asin may pagdodoon na paghabo ni Pablo saka Bernabe sa dai maninigong kaomawan patin onra! Dai niato maninigong mawoton an kamurawayan huli sa ano man na tibaad nagibo niato sa paglilingkod ki Jehova.
14:5-7. An paggamit nin marahay na paghusgar makakatabang sa sato na magdanay na aktibo sa paglilingkod.—Mat. 10:23.
14:22. Inaasahan nin mga Kristiano an mga kahorasaan. Dai ninda pinagmamaigotan na dulagan iyan paagi sa pagkompromiso kan saindang pagtubod.—2 Tim. 3:12.
16:1, 2. An Kristianong mga hoben maninigong magmaigot sa saindang paglilingkod asin maghingoang kamtan an tabang ni Jehova sa pagpatalubo nin marahay na reputasyon.
16:3. Maninigong gibohon niato an gabos na makakaya niato kaoyon kan Kasuratan tanganing magin akseptable sa iba an maogmang bareta.—1 Cor. 9:19-23.
20:20, 21. An paghuhulit sa harong-harong sarong mahalagang marhay na aspekto kan satong ministeryo.
20:24; 21:13. An pagpapadanay nin integridad sa Dios mas mahalaga kisa sa pagsalbar sa satong buhay.
21:21-26. Maninigo kitang magin andam asin entusiastiko na umako nin marahay na sadol.
25:8-12. Puede asin maninigo na gamiton nin mga Kristiano ngonyan an makukuang legal na mga paagi “sa pagdepensa asin legal na pagpatunay sa maogmang bareta.”—Fil. 1:7.
26:24, 25. Maninigo niatong ipahayag an “mga tataramon nin katotoohan asin nin toltol na isip” minsan ngani iyan kalolongan sa “pisikal na tawo.”—1 Cor. 2:14.
[Ritrato sa pahina 30]
Kasuarin ginamit ni Pedro an “mga liabe kan kahadean”?
[Ritrato sa pahina 31]
An pambilog na kinaban na paghuhulit dai magigibo kun mayo an tabang kan banal na espiritu