Umoswag sa Espirituwal Paagi sa Pagsunod sa Halimbawa ni Pablo

“Nakipaglaban ako kan marahay na pakilaban, natapos ko an paorumbasan, naotob ko an pagtubod.”​—2 TIM. 4:7.

1, 2. Anong mga pagbabago sa saiyang buhay an ginibo ni Saulo nin Tarso, asin anong mahalagang gibohon an tinawan nia nin atension?

SIA sarong lalaki na madonong asin desidido. Minsan siring, ‘namuhay sia oyon sa mga mawot kan saiyang laman.’ (Efe. 2:3) Kan huri, ilinadawan nia an saiyang sadiri bilang “paralanghad asin parapersegir patin tawong daing galang.” (1 Tim. 1:13) An lalaking iyan iyo si Saulo nin Tarso.

² Pag-abot nin panahon, ginibo ni Saulo an dakulang mga pagbabago sa saiyang buhay. Binayaan nia an dati niang pamumuhay asin nagmaigot sia na ‘dai hanapon an sadiri niang kapakanan kundi an sa dakol.’ (1 Cor. 10:33) Sia nagin maboot asin nagpaheling nin mamomoton na kapadangatan sa mga magigin biktima kutana kan saiyang grabeng kaanggotan. (Basahon an 1 Tesalonica 2:7, 8.) “Ako nagin sarong ministro,” an isinurat nia, na sinasabi pa: “Sa sako, tawong mas hababa kisa sa pinakahababa sa gabos na banal, itinao an dai na kutana maninigong kabootan na ini, na maninigo kong ipahayag sa mga nasyon an maogmang bareta manongod sa dai marorop na mga kayamanan kan Cristo.”​—Efe. 3:7, 8.

3. Sa anong paagi makakatabang sa sato an pag-adal sa mga surat ni Pablo asin sa rekord kan saiyang ministeryo?

³ Pambihira an nagin pag-oswag sa espirituwal ni Saulo, na midbid man bilang Pablo. (Gibo 13:9) An  sarong seguradong paagi na maparikas an satong personal na pag-oswag sa katotoohan iyo an pag-adal sa mga surat ni Pablo asin sa rekord kan saiyang ministeryo dangan pag-arog sa saiyang halimbawa nin pagtubod. (Basahon an 1 Corinto 11:1; Hebreo 13:7.) Helingon niato kun paanong an paggibo kaiyan mamotibar sa sato na pataluboon an marahay na kaugalean sa personal na pag-adal, pataluboon an tunay na pagkamoot sa mga tawo, asin magkaigwa nin tamang pagmansay sa satong sadiri.

An Kinaugalean ni Pablo sa Pag-adal

4, 5. Paano nakinabang si Pablo sa personal na pag-adal?

⁴ Bilang sarong Fariseo na natokdoan “sa pamitisan ni Gamaliel [asin] tinokdoan sono sa pagigin estrikto kan Ley nin mga apoon,” si Pablo minsan paano may kaaraman na manongod sa Kasuratan. (Gibo 22:1-3; Fil. 3:4-6) Pagkatapos tolos kan saiyang bautismo, ‘nagpasiring sia sa Arabia’​—magsalang sa Desierto nin Siria o posibleng sa sarong toninong na lugar sa Peninsula nin Arabia na nakakatabang sa paghorophorop. (Gal. 1:17) Minalataw na minawot ni Pablo na horophoropon an mga kabtang kan Kasuratan na nagpapatunay na si Jesus an Mesiyas. Dugang pa, minawot ni Pablo na mag-andam para sa gibohon nia sa ngapit. (Basahon an Gibo 9:15, 16, 20, 22.) Nagtao si Pablo nin panahon na horophoropon an espirituwal na mga bagay.

⁵ An sono sa Kasuratan na kaaraman asin pakarorop na nakua ni Pablo paagi sa personal na pag-adal nagpagin posible na ikatokdo nia nin epektibo an katotoohan. Halimbawa, sa sinagoga na nasa Antioquia sa Pisidia, naggamit si Pablo nin kisiera limang direktang pagkotar sa Hebreong Kasuratan tanganing patunayan na si Jesus an Mesiyas. Nagkapirang beses man na nagsitar si Pablo sa banal na mga kasuratan. An saiyang mga argumento na oyon sa Biblia nakakakombensir na marhay kaya “dakol sa mga Judio asin proselito na nagsasamba sa Dios an nagsunod ki Pablo asin Bernabe” tanganing makanood nin dakol pa. (Gibo 13:14-44) Pakalihis nin mga taon, kan an sarong grupo nin Romanong mga Judio magduman ki Pablo sa dinadagosan nia, ipinaliwanag nia sa sainda an mga bagay-bagay “paagi sa pagtao nin lubos na patotoo mapadapit sa kahadean nin Dios asin paagi sa pangongombensir sa sainda mapadapit ki Jesus basado sa ley ni Moises sagkod sa Mga Propeta.”​—Gibo 28:17, 22, 23.

6. Ano an nakatabang ki Pablo na magdanay na makosog sa espirituwal kun napapaatubang sa mga pagbalo?

⁶ Kan napapaatubang sa mga pagbalo, padagos na siniyasat ni Pablo an Kasuratan asin nakakua sia nin kosog sa ipinasabong na mensahe kaiyan. (Heb. 4:12) Mantang si Pablo nakabilanggo sa Roma bago sia gadanon, pinakiolayan nia si Timoteo na darahon sa saiya “an mga rolyo” asin “an mga pergamino.” (2 Tim. 4:13) An mga isinurat na idto posibleng marhay na mga kabtang kan Hebreong Kasuratan na ginamit ni Pablo sa saiyang lubos na pag-adal. An pagkua nin kaaraman sa Kasuratan paagi sa kinaugalean na pag-adal sa Biblia mahalagang marhay ki Pablo tanganing makapagdanay siang marigon.

7. Sambiton an mga pakinabang na makukua nindo sa regular na pag-adal sa Biblia.

⁷ An regular na pag-adal sa Biblia, kaiba an may katuyohan na paghorophorop, matabang sa sato na umoswag sa espirituwal. (Heb. 5:12-14) Mapadapit sa kahalagahan kan Tataramon nin Dios, an salmista nag-awit: “An ley kan saimong ngoso marahay para sa sako, orog pa kisa sa rinibong pidaso nin bulawan asin plata. An saimong pagboot ginigibo akong orog na madonong kisa sa sakong mga kaiwal, huli ta sakuya iyan sagkod sa panahon na daing talaan. Sa gabos na maraot na dana pinugolan ko an sakong mga bitis, sa katuyohan na maotob ko an saimong tataramon.” (Sal. 119:72, 98, 101) Igwa daw kamo nin kinaugalean nang personal na pag-adal sa Biblia? Kamo daw nag-aandam para sa maabot na mga asignasyon sa paglilingkod sa Dios paagi sa aroaldaw na pagbasa sa Biblia asin paghorophorop sa saindong binabasa?

Nanodan ni Saulo na Mamotan an mga Tawo

8. Paano trinatar ni Saulo an mga bakong miembro kan Judaismo?

⁸ Bago magin Kristiano, nagin maigot si Saulo para sa saiyang relihion, alagad mayo siang pakilabot sa mga tawo na bakong miembro kan Judaismo. (Gibo 26:4, 5) May pag-oyon siang nagheling mantang ginagapo si Esteban kan nagkapirang Judio. Siertong nagkosog an boot ni Saulo sa naheling nia, na tibaad minamansay an paggadan ki Esteban bilang maninigong padusa. (Gibo 6:8-14; 7:54–8:1) An ipinasabong na pagkasaysay nagsasabi: “Si Saulo nagpoon na trataron nin madahas an kongregasyon.  Sinasalakay an sunod-sunod na harong asin, ginugudgod paluwas an mga lalaki sagkod mga babae, dinadara nia sinda sa bilanggoan.” (Gibo 8:3) “Pinersegir pa ngani [nia] sinda pati sa mga siudad na nasa luwas.”​—Gibo 26:11.

9. Anong eksperyensia an nagin dahelan tanganing siyasaton giraray ni Saulo an pagtratar nia sa mga tawo?

⁹ Kan magpaheling an Kagurangnan na si Jesus ki Saulo, sia pasiring kaidto sa Damasco tanganing ribokon an mga disipulo ni Cristo duman. Huli sa lihis sa natural na liwanag kan Aki nin Dios, si Saulo nabuta asin nagsarig sa tabang nin iba. Kan gamiton ni Jehova si Ananias tanganing ibalik an pagheling ni Saulo, nagbago sagkod lamang an saboot ni Saulo sa mga tawo. (Gibo 9:1-30) Kan magin parasunod ni Cristo, pinagmaigotan niang pakiibanan an gabos na tawo siring kan ginibo ni Jesus. Nangahulogan ini na binayaan nia an kadahasan asin ‘nakipagkatoninongan sia sa gabos na tawo.’​—Basahon an Roma 12:17-21.

10, 11. Paano si Pablo nagpaheling nin tunay na pagkamoot sa mga tawo?

¹⁰ Si Pablo dai nakontento sa pagkaigwa sana nin matoninong na relasyon sa iba. Gusto niang ipaheling sa sainda an tunay na pagkamoot, asin nagkaigwa sia kan oportunidad na iyan paagi sa Kristianong ministeryo. Sa enot niang pagbiahe sa pagmimisyonero, ihinulit nia an maogmang bareta sa Asia Minor. Sa ibong nin maringis na pagtumang, si Pablo asin an saiyang mga kaiba nagkonsentrar sa pagtabang sa mga mahoyo na akoon an Kristianismo. Binisita giraray ninda an Listra asin Iconio, dawa ngani prinobaran kan mga nagtutumang na nasa mga siudad na iyan na gadanon si Pablo.​—Gibo 13:1-3; 14:1-7, 19-23.

¹¹ Kan huri, hinanap ni Pablo asin kan grupo nia an mga tawo sa siudad nin Filipos sa Macedonia na gustong sumamba sa Dios. An proselitong Judia na an ngaran Lidia naghinanyog sa maogmang bareta asin nagin Kristiano. Hinampak nin mga samulig si Pablo asin Silas saka ipinabilanggo sinda kan mga autoridad sibil. Minsan siring, naghulit si Pablo sa bantay sa bilanggoan, na an resulta iyo na an bantay na iyan asin an saiyang pamilya nabautismohan bilang mga parasamba ki Jehova.​—Gibo 16:11-34.

12. Ano an nagmotibar sa daing galang na si Saulo na magin sarong mamomoton na apostol ni Jesu-Cristo?

¹² Taano ta inako kan dating persegidor na si Saulo an pagtubod kan saiyang mga biktima? Ano an nagmotibar sa daing galang na tawong iyan na magin an maboot asin mamomoton na apostol, na andam na isapeligro an buhay nia tanganing an iba makanood kan katotoohan manongod sa Dios asin ki Cristo? Si Pablo mismo nagpaliwanag: “Pinagmarhay nin Dios, na . . . nag-apod sako paagi sa saiyang dai na kutana maninigong kabootan, na ihayag an saiyang Aki may koneksion sa sako.” (Gal. 1:15, 16) Si Pablo nagsurat ki Timoteo: “Ako naherakan . . . tanganing paagi sa sako bilang an nangongorog na halimbawa ikapahayag ni Cristo Jesus an gabos niang pakatios bilang arogan kaidtong matubod sa saiya manongod sa buhay na daing katapusan.” (1 Tim. 1:16) Pinatawad ni Jehova si Pablo, asin paagi sa pag-ako kan siring na dai na kutana maninigong kabootan asin pagkaherak, napahiro sia na ipaheling sa iba an pagkamoot paagi sa paghuhulit sa sainda kan maogmang bareta.

13. Ano an maninigong magpahiro sa sato na ipaheling sa iba an pagkamoot, asin paano niato magigibo iyan?

¹³ Pinapatawad man ni Jehova an satong mga kasalan asin sala. (Sal. 103:8-14) “Kun mga sala an saimong binabantayan, O Jah, O Jehova, siisay an makakatindog?” an hapot kan salmista. (Sal. 130:3) Kun mayo an pagkaherak nin Dios, mayo sa sato an magkakaigwa nin kagayagayahan sa sagradong paglilingkod, ni makakalaom man kita na mag-ako nin buhay na daing katapusan. Nagin pambihira an dai  na kutana maninigong kabootan nin Dios para sa sato gabos. Kun siring, arog ni Pablo, maninigo niatong mawoton na ipaheling sa iba an pagkamoot paagi sa paghuhulit asin pagtotokdo sa sainda kan katotoohan saka paagi sa pagpakosog sa satong mga kapagtubod.​—Basahon an Gibo 14:21-23.

14. Paano niato mapapahiwas an satong ministeryo?

¹⁴ Gusto ni Pablo na umoswag bilang ministro kan maogmang bareta, asin napahiro an saiyang puso kan halimbawa ni Jesus. Kabilang sa mga paagi na an Aki nin Dios nagpaheling nin daing kaparehong pagkamoot sa mga tawo iyo an saiyang pampublikong ministeryo. Si Jesus nagsabi: “An anihon mahiwas, alagad an mga paraani kakadikit. Kun siring, makimaherak kamo sa Kagurangnan kan anihon na magsobol nin mga paraani sa saiyang anihon.” (Mat. 9:35-38) Naghiro si Pablo kaoyon kan ano man na kahagadan para sa dakol pang paraani​—na tibaad hinagad nia—​paagi sa pagigin maigot na paraani. Kumusta man kamo? Mapapaoswag daw nindo an kualidad kan saindong ministeryo? O madudugangan daw nindo an saindong pakikikabtang sa paghuhulit kan Kahadean, na tibaad tinatawan pa ngani nin lugar sa saindong buhay an pagpapayunir? Logod na ipaheling niato sa iba an tunay na pagkamoot paagi sa pagtabang sa sainda na ‘marigon na mangapot sa tataramon nin buhay.’​—Fil. 2:16.

An Pagmansay ni Pablo sa Saiyang Sadiri

15. Paano minansay ni Pablo an saiyang sadiri kun ikokomparar sa mga kapwa nia Kristiano?

¹⁵ Bilang Kristianong ministro, si Pablo nagtao sa sato nin marahayon na halimbawa sa saro pang paagi. Minsan ngani nagkaigwa sia nin dakol na pribilehio sa Kristianong kongregasyon, aram na marhay ni Pablo na bakong huli sa saiyang mga kakayahan kaya sia nagkaigwa kan mga bendisyon na iyan asin na bakong tama na laoman nia iyan. Narealisar nia na an mga bendisyon na naeksperyensiahan nia mga kapahayagan kan dai na kutana maninigong kabootan nin Dios. Minidbid ni Pablo na an ibang Kristiano epektibo man na mga ministro kan maogmang bareta. Sa ibong kan saiyang paninimbagan sa tahaw kan banwaan nin Dios, nagdanay siang mapakumbaba.​—Basahon an 1 Corinto 15:9-11.

16. Paano si Pablo nagpaheling nin kapakumbabaan asin kababaan nin boot may koneksion sa isyu nin pagturi?

¹⁶ Estudyare kun paano inasikaso ni Pablo an sarong problema na naglataw sa siudad nin Siria sa Antioquia. An Kristianong kongregasyon duman nabanga huli sa isyu nin pagturi. (Gibo 14:26–15:2) Mantang ninombrahan si Pablo na mangenot sa paghuhulit sa bakong turing mga Hentil, tibaad ibinilang nia an saiyang sadiri na eksperto sa pagtratar sa mga bakong Judio asin kun siring kualipikado siang marhay na resolberan an problemang iyan. (Basahon an Galacia 2:8, 9.) Minsan siring, kan an saiyang mga paghihingoa garo baga dai nakaresolber sa isyu, may kapakumbabaan asin kababaan nin boot na nagsunod sia sa mga areglo na dumolok sa namamahalang grupo sa Jerusalem tanganing ipakipag-olay an bagay na iyan. Lubos siang nakikooperar sa mga miembro kaiyan kan hinanyogon ninda an bagay na iyan, makapagdesisyon sinda, asin asignaran sia na magin saro sa mga mensahero ninda. (Gibo 15:22-31) Sa siring, ‘nangenot si Pablo sa pagtao nin onra’ sa mga kapwa nia lingkod.​—Roma 12:10b.

17, 18. (a) Ano an nagin saboot ni Pablo sa mga nasa kongregasyon? (b) Ano an itinotokdo sa sato manongod ki Pablo kan nagin reaksion kan kamagurangan sa Efeso kan sia maghale?

¹⁷ An mapakumbabang si Pablo dai nagin harayo an boot sa mga tugang nia sa kongregasyon. Imbes, nagin dayupot sia sa sainda. Sa katapusan kan saiyang surat sa mga taga Roma, labing 20 katawo  an tinaratara nia paagi sa pagsambit kan saindang ngaran. An kadaklan sa sainda dai nasambitan sa iba pang libro sa Kasuratan, asin pira sana an nagkaigwa nin espesyal na mga pribilehio. Alagad sinda maimbod na mga lingkod ni Jehova, asin namotan sindang marhay ni Pablo.​—Roma 16:1-16.

¹⁸ An pagigin mapakumbaba asin makikatood ni Pablo nakapakosog sa mga kongregasyon. Pagkatapos kan ultimong pakipaghelingan nia sa kamagurangan sa Efeso, “kinugos ninda an liog ni Pablo saka mapagpadangat na hinadokan sia, huli ta ikinamondong gayo ninda an saiyang sinabi na dai na ninda maheheling an saiyang lalawgon.” Kun sia sarong orgolyoso asin daing malasakit na tawo, bako kutanang arog kaiyan an nagin reaksion ninda kan sia maghale.​—Gibo 20:37, 38.

19. Paano niato ikakapaheling an “kababaan nin isip” kun tinatratar niato an mga kapwa Kristiano?

¹⁹ An gabos na nagmamawot na umoswag sa espirituwal kaipuhan na magin mapakumbaba arog kan ginibo ni Pablo. Sinadol nia an mga kapwa Kristiano na ‘dai maggibo nin ano man huli sa pagpasuruhay o huli sa sobrang pagpaimportante sa sadiri, kundi sa kababaan nin isip na ibinibilang na an iba mas halangkaw kisa sa saindo.’ (Fil. 2:3) Paano niato masusunod an hatol na iyan? An sarong paagi iyo an pakikikooperar sa kamagurangan sa satong kongregasyon, na sinusunod an saindang pagdirehir asin sinusuportaran an saindang hudisyal na mga desisyon. (Basahon an Hebreo 13:17.) An saro pang paagi iyo an pagpahalagang marhay sa gabos niatong tugang sa pagtubod. An mga kongregasyon kan banwaan ni Jehova sa parate kompuesto nin mga indibiduwal na laen-laen an pinaghalean na nasyon, kultura, rasa, asin etniko. Pero, bako daw na maninigo niatong trataron sinda gabos na dai nin pagpaorog asin may kapadangatan, arog kan ginibo ni Pablo? (Gibo 17:26; Roma 12:10a) Dinadagka kita na ‘akoon an lambang saro, kun paanong inako man kita kan Cristo, para sa kamurawayan nin Dios.’​—Roma 15:7.

‘Dumalagan na May Pakatagal’ sa Paorumbasan Para sa Buhay

20, 21. Ano an makakatabang sa sato na mapangganang makadalagan sa paorumbasan para sa buhay?

²⁰ An buhay nin sarong Kristiano ikakaagid sa halawig na paorumbasan. Si Pablo nagsurat: “Natapos ko an paorumbasan, naotob ko an pagtubod. Poon ngonyan igwa na nin nakatagama para sa sako na korona nin katanosan, na itatao sa sako kan Kagurangnan, an matanos na hokom, bilang balos sa aldaw na iyan, pero bako sanang sa sako, kundi siring man sa gabos na namoot sa saiyang pagkahayag.”​—2 Tim. 4:7, 8.

²¹ An pagsunod sa halimbawa ni Pablo matabang sa sato na mapangganang makadalagan sa paorumbasan para sa buhay na daing sagkod. (Heb. 12:1) Tunay nanggad, padagos kitang umoswag sa espirituwal paagi sa pagpatalubo nin marahay na kaugalean sa personal na pag-adal, pagpatalubo nin hararom na pagkamoot sa mga tawo, asin pagpapadanay nin kapakumbabaan.

Ano an Isisimbag Nindo?

• Paano nakinabang si Pablo sa regular na personal na pag-adal sa Kasuratan?

• Taano ta mahalaga para sa tunay na mga Kristiano an hararom na pagkamoot sa mga tawo?

• Anong mga kualidad an makakatabang sa saindo na trataron an iba na dai nin pagpaorog?

• Paano makakatabang sa saindo an halimbawa ni Pablo na makikooperar sa kamagurangan sa saindong kongregasyon?

[Mga Hapot Para sa Pag-adal]

[Ritrato sa pahina 23]

Kumua nin kosog hale sa Kasuratan, siring kan ginibo ni Pablo

[Ritrato sa pahina 24]

Magpaheling nin pagkamoot paagi sa pagsabi sa iba kan maogmang bareta

[Ritrato sa pahina 25]

Aram daw nindo kun taano ta namotan na marhay si Pablo kan saiyang mga tugang?