Mga Hapot Hale sa mga Parabasa

Sinabi ni apostol Pablo na “maliligtas an bilog na Israel.” (Roma 11:26) An boot daw niang sabihon iyo na sa sarong panahon, an gabos na Judio makokombertir sa Kristianismo?

Bako nanggad iyan an boot sabihon ni Pablo. Bilang sarong nasyon, an mga henerasyon na gikan ki Abraham isinikwal si Jesus bilang an Mesiyas. Asin sa mga taon pagkagadan ni Jesus, nagin malinaw na dai magkakaigwa nin lagdoan na pagkakombertir nin mga Judio sa Kristianismo. Pero, totoo an sinabi ni Pablo na “maliligtas an bilog na Israel.” Sa anong paagi?

Sinabi ni Jesus sa Judiong mga namomoon sa relihion kan panahon nia: “An kahadean nin Dios hahaleon sa saindo asin itatao sa sarong nasyon na nagluluwas nin mga bunga kaiyan.” (Mat. 21:43) Huling sa kabilogan isinikwal si Jesus kan nasyon nin Israel, itatao na ni Jehova an saiyang atension sa sarong bagong nasyon, sarong espirituwal na nasyon. Inapod ni Pablo an nasyon na ini na “Israel nin Dios.”​—Gal. 6:16.

An iba pang teksto sa Kristianong Griegong Kasuratan nagpapatunay na an “Israel nin Dios” kompuesto nin 144,000 na Kristianong linahidan nin espiritu. (Roma 8:15-17; Kap. 7:4) Pinapatunayan kan Kapahayagan 5:9, 10 na kaiba sa grupong ini an mga bakong Judio, na sa tekstong iyan sinasabi na an linahidan na mga Kristiano “hale sa lambang tribo asin lenguahe asin banwaan patin nasyon.” An mga miembro nin espirituwal na Israel espesyalmenteng pinili na magin “sarong kahadean asin mga saserdote . . . , asin sinda mamamahala bilang mga hade sa daga.” Minsan ngani isinikwal ni Jehova an Israel bilang sarong piniling nasyon, an mga indibiduwal puedeng makipag-ulian sa saiya. Iyan an kamugtakan kan mga apostol asin kan dakol na iba pang enot na Kristiano. Siempre, an siring na mga Judio, arog nin gabos na iba pang tawo, kaipuhan na bakalon paagi sa dugo ni Jesu-Cristo.​—1 Tim. 2:5, 6; Heb. 2:9; 1 Ped. 1:17-19.

Dai nakaolang sa katuyohan nin Dios an katunayan na nawara kan mayoriya sa mga Judio sa laman kan enot na siglo an oportunidad na magin kairiba ni Jesus bilang mga namamahala. Dai kaini noarin man maoolang an katuyohan nin Dios, huli ta sinabi ni Jehova paagi sa saiyang propeta: “Magigin siring man an sakong tataramon na magluwas sa sakong ngoso. Dai iyan mabalik sa sako na mayong nahaman, kundi gigibohon nanggad kaiyan an ikinakaogma kong marhay, asin iyan siertong magigin mapanggana sa sakuyang sinobolan kaiyan.”​—Isa. 55:11.

Totoo iyan mapadapit sa katuyohan nin Dios na magkaigwa nin 144,000 na mamamahala sa langit kaiba kan saiyang Aki. Linilinaw kan Biblia na lalahidan nin Dios an kompletong bilang na 144,000. Dai iyan makukulangan ni saro!​—Kap. 14:1-5.

Sa siring, kan magsurat si Pablo na “maliligtas an bilog na Israel,” dai nia ihinuhula an lagdoan na pagkakombertir nin mga Judio sa Kristianismo. Imbes, an boot niang sabihon iyo na maootob an katuyohan nin Dios na magkaigwa nin 144,000 na espirituwal na Israelitang mamamahala sa langit kaiba kan Saiyang Aki, si Jesu-Cristo. Sa itinalaan na panahon nin Dios, an kompletong bilang​—“an bilog na Israel”—​maliligtas, na pag-abot nin panahon mamamahala bilang mga hade asin saserdote sa Mesiyanikong Kahadean.​—Efe. 2:8.

[Mga Ritrato sa pahina 28]

An mga linahidan “hale sa lambang tribo asin lenguahe asin banwaan patin nasyon”