Mga Kualidad na Dapat Niatong Pagmaigotan na Isagibo
Mga Kualidad na Dapat Niatong Pagmaigotan na Isagibo
“Pagmaigotan mong isagibo an katanosan, diosnon na debosyon, pagtubod, pagkamoot, pakatagal, [asin] kahoyoan nin boot.”—1 TIM. 6:11.
1. Ano an mga pinagmamaigotan na gibohon nin mga tawo sa saindang buhay?
SA KINABAN ngonyan, ano an mga pinagmamaigotan na gibohon nin mga tawo sa saindang buhay? Siring kan ipinapaheling kan Biblia, dakol an nagmamaigot na aboton an bakong mahalagang mga pasohan. May mga “nagmamaigot na magkaigwa nin daing kamanungdanan na mga bagay,” na naniniwala na nagbubunga nin kaogmahan an materyal na mga rogaring. (Tal. 28:19) An nagkapira “gustong-gustong gumibo nin malaswang paggawe,” na ginigibong pangenot sa saindang buhay an kasingawan asin pag-aling-aling. (Sal. 119:150) Minsan ngani tibaad naghihingoang marhay an mga tawo para sa mga bagay na iyan, sa katunayan sinda ‘naglalapag sa doros.’—Ecl. 1:14.
2. (a) Inimbitaran nin Dios an nagkapirang Kristiano na pagmaigotan na aboton an anong premyo? (b) Anong paglaom an inaalok ni Jehova sa kadaklan na Kristiano ngonyan?
2 Kabaliktaran kaiyan, ipinarisa ni apostol Pablo an sarong kapakipakinabang na pasohan na dapat pagmaigotan na aboton nin mga Kristiano, kan sia magsurat: “Pinagmamaigotan kong makaabot sa pasohan para sa premyong langitnon na pag-apod nin Dios paagi ki Cristo Jesus.” (Fil. 3:14) Ipinapaheling kan Biblia na may total na 144,000 na linahidan na Kristiano, kaiba na si Pablo, an nag-aako kan premyong langitnon na buhay. Sinda maghahade kaiba ni Jesu-Cristo sa saiyang Milenyal na Paghade sa daga. Inimbitaran sinda nin Dios na pagmaigotan na aboton an makangangalas nanggad na pasohan na iyan! Minsan siring, an dakulang mayoriya kan tunay na mga Kristiano ngonyan igwa nin laen na paglaom, o pasohan. May pagkamoot na inaalok sa sainda ni Jehova an nawara ni Adan asin Eva, na iyo an paglaom na buhay na daing katapusan na may sangkap na salud sa sarong paraisong daga.—Kap. 7:4, 9; 21:1-4.
3. Paano niato ikakapaheling an pag-apresyar sa dai na kutana maninigong kabootan nin Dios?
3 An makasalan na mga tawo dai magkakaigwa nin buhay na daing katapusan paagi sa saindang bakong sangkap na mga paghihingoa na gibohon an tama. (Isa. 64:6) An pagkaigwa nin buhay na daing katapusan posible sana paagi sa pagtubod sa mamomoton na probisyon nin Dios na kaligtasan paagi ki Jesu-Cristo. Ano an magigibo niato tanganing ipaheling an satong pag-apresyar sa dai na kutana maninigong kabootan na iyan nin Dios? An saro iyo an pagkuyog sa pagboot na ini: “Pagmaigotan mong isagibo an katanosan, diosnon na debosyon, pagtubod, pagkamoot, pakatagal, [asin] kahoyoan nin boot.” (1 Tim. 6:11) An pag-estudyar sa mga kualidad na ini puedeng makatabang sa lambang saro sa sato na magin mas determinado na padagos na pagmaigotan na isagibo iyan nin “mas lubos pa.”—1 Tes. 4:1.
‘Pagmaigotan na Isagibo an Katanosan’
4. Taano ta makakasierto kita na mahalaga an pagmamaigot na isagibo an “katanosan,” asin anong enot na mga lakdang an kaipuhan na gibohon nin saro?
4 Sa duwang surat ni apostol Pablo ki Timoteo, ilinista nia an mga kualidad na dapat pagmaigotan na isagibo, asin sa kada saro kaiyan, an enot niang sinasambit iyo an “katanosan.” (1 Tim. 6:11; 2 Tim. 2:22) Dugang pa, paorootro kitang dinadagka nin ibang mga teksto sa Biblia na pagmaigotan na isagibo an katanosan. (Tal. 15:9; 21:21; Isa. 51:1) An sarong paagi tanganing magibo iyan iyo an ‘paglaog sa isip nin kaaraman dapit sa iyo sanang tunay na Dios, asin dapit sa saro na saiyang sinugo, si Jesu-Cristo.’ (Juan 17:3) An pagmamaigot na isagibo an katanosan mamotibar sa saro na humiro—na magsolsol sa nakaaging mga kasalan asin “magbakle” tanganing magibo an kabotan nin Dios.—Gibo 3:19.
5. Ano an dapat niatong gibohon tanganing magkaigwa nin matanos na kamugtakan sa atubangan nin Dios asin mapagdanay iyan?
5 An minilyon na tawo na tunay na nagmamaigot na isagibo an katanosan idinusay an saindang buhay ki Jehova asin sinimbolisaran an siring na pagdusay paagi sa bautismo sa tubig. Kun kamo bautisado nang Kristiano ngonyan, naisip na daw nindo an bagay na an saindong pamumuhay maninigo, asin posibleng marhay, na naghahayag kan saindong padagos na pagmamaigot na isagibo an katanosan? An sarong aspekto kaiyan iyo an saindong pakabatid paagi sa Biblia kun ano “an tama sagkod an sala” kun napapaatubang sa mga desisyon sa buhay. (Basahon an Hebreo 5:14.) Halimbawa, kun kamo daing agom na Kristiano na nasa edad na tanganing mag-agom, kamo daw lubos na determinado na likayan na magkaigwa nin ano man na romantikong pagkagusto sa saro na bakong bautisadong Kristiano? Iyo, kun kamo lubos na determinadong nagmamaigot na isagibo an katanosan.—1 Cor. 7:39.
6. Ano an kalabot sa totoong pagmamaigot na isagibo an katanosan?
6 An pagigin matanos laen sa pagpapakangmatanos o pagigin “labi-labi kamatanos.” (Ecl. 7:16) Si Jesus nagpatanid tumang sa pagpasikat sa siring na klase nin katanosan tanganing magin garo baga mas marahay kisa sa iba. (Mat. 6:1) An totoong pagmamaigot na isagibo an katanosan kalabot an puso—an pagtanos sa salang mga kaisipan, saboot, motibo, asin kamawotan. Kun padagos kitang naghihingoa na gibohon ini, harayo an posibilidad na makagibo kita nin magabat na mga kasalan. (Basahon an Talinhaga 4:23; ikomparar an Santiago 1:14, 15.) Apuera kaini, bebendisyonan kita ni Jehova asin tatabangan nia kita sa pagmamaigot niato na isagibo an iba pang mahahalagang Kristianong kualidad.
‘Pagmaigotan na Isagibo an Diosnon na Debosyon’
7. Ano an “diosnon na debosyon”?
7 Kalabot sa debosyon an pagigin odok na nagdusay asin maimbod. An sarong diksionaryo sa Biblia nagkomento na an Griegong termino na trinadusir na “diosnon na debosyon” naglaladawan kan “marahay asin maingat na pagpahalaga sa pagkatakot sa Dios.” Sa parate, an mga Israelita dai nagin mapanggana sa pagpaheling kan siring na debosyon, na maheheling sa saindang sumbikalan na mga gibo dawa pakatapos na patalingkason sinda nin Dios sa Egipto.
8. (a) Anong hapot an ibinangon kan magkasala si Adan? (b) Paano ihinayag an simbag sa “sagradong hilom” na ini?
8 Sa laog nin rinibong taon pakatapos na magkasala an sangkap na tawong si Adan, puedeng ibangon an hapot na, “Makakapaheling daw nin sangkap na diosnon na debosyon an siisay man na tawo?” Sa nakaaging mga siglo, mayong makasalan na tawo an nakapamuhay na may sangkap na diosnon na debosyon. Alagad sa mismong itinalaan na panahon ni Jehova, ihinayag nia an simbag sa “sagradong hilom” na ini. Ibinalyo nia sa matris ni Maria an buhay kan saiyang bugtong na langitnon na Aki tanganing mamundag ini bilang sangkap na tawo. Sa bilog na buhay ni Jesus digdi sa daga asin pati sa saiyang makasusupog na pagkagadan, ipinaheling nia kun ano an boot sabihon kan pagigin odok na nagdusay saka lubos na maimbod sa tunay na Dios. Ihinayag kan saiyang mga pamibi na sia nagsasamba sa saiyang mamomoton na langitnon na Ama. (Mat. 11:25; Juan 12:27, 28) Huli kaini, pinasabngan ni Jehova si Pablo na magtaram manongod sa “diosnon na debosyon” tanganing iladawan an arogan na pamumuhay ni Jesus.—Basahon an 1 Timoteo 3:16.
9. Paano niato mapagmamaigotan na isagibo an diosnon na debosyon?
9 Huli sa satong makasalan na kamugtakan, dai niato ikakapaheling nin malinaw an sangkap na diosnon na debosyon. Alagad mapagmamaigotan niatong isagibo iyan. Hinahagad kaini sa sato na sunodon sa estriktong paagi na magigibo niato an modelong itinao ni Cristo. (1 Ped. 2:21) Sa siring, dai kita magigin arog kan mga parasaginsagin na “may porma nin diosnon na debosyon alagad nagpapainda sa kapangyarihan kaiyan.” (2 Tim. 3:5) Ini dai nangangahulogan na an tunay na diosnon na debosyon mayo nin koneksion sa panluwas na itsura. Igwa nanggad iyan nin koneksion. Halimbawa, baga man kita nagpipili nin trahe de boda o nagdedesisyon kun ano an isusulot niato kun ma-shopping, an satong itsura maninigo na pirmeng kaoyon kan sinasabi niato na kita nagsasamba sa Dios. (1 Tim. 2:9, 10) Iyo, an pagmamaigot na isagibo an diosnon na debosyon nagkakaipo na konsideraron niato sa satong pangaroaldaw na buhay an matanos na mga pamantayan nin Dios.
‘Pagmaigotan na Isagibo an Pagtubod’
10. Ano an dapat niatong gibohon tanganing mapagdanay na makosog an satong pagtubod?
10 Basahon an Roma 10:17. Tanganing magkaigwa nin makosog na pagtubod asin mapagdanay iyan, dapat na an sarong Kristiano padagos na naghohorophorop manongod sa mahalagang marhay na mga katotoohan na yaon sa Tataramon nin Dios. Nagtatao “an maimbod asin mapagmansay na oripon” nin dakol na marahayon na publikasyon. An tolong pambihirang libro iyo an The Greatest Man Who Ever Lived, Makanood sa Dakulang Paratokdo, asin “Madia Magin Parasunod Taka,” na dinisenyo tanganing matabangan kita na orog na mamidbid si Cristo asin sa siring mas maarog niato sia. (Mat. 24:45-47) An grupong oripon nag-aareglo man nin mga pagtiripon, asamblea, asin kombension, na an kadaklan kaiyan nagdodoon kan “tataramon manongod ki Cristo.” May naiisip pa daw kamong ibang mga paagi na puede nindong orog na aprobetsaran an mga ini mantang kamo nagtatao nin “orog kisa sa dating atension” sa kun ano an itinatao nin Dios?—Heb. 2:1.
11. Ano an papel kan pamibi asin pagkuyog sa pagmamaigot niato na isagibo an pagtubod?
11 An pamibi saro pang pantabang sa pagpatalubo nin makosog na pagtubod. An mga parasunod ni Jesus nakimaherak sa saiya kaidto: “Tawe kami nin orog pang pagtubod.” Puede man kitang mapakumbabang makimaherak sa Dios na itao man iyan sa sato. (Luc. 17:5) Sa katuyohan na iyan, maninigo kitang mamibi na logod tabangan kita kan banal na espiritu nin Dios; an pagtubod sarong aspekto kan “mga bunga kan espiritu.” (Gal. 5:22) Dugang pa, an pagkuyog sa mga pagboot nin Dios nakakapakosog sa satong pagtubod. Halimbawa, puede kitang magmaigot na orog na makikabtang sa paghuhulit. Posibleng marhay na iyan magbubunga nin dakulang kaogmahan niato. Asin mantang hinohorophorop niato an mga bendisyon na resulta kan ‘paghanap nguna kan kahadean asin kan katanosan nin Dios,’ matalubo an satong pagtubod.—Mat. 6:33.
‘Pagmaigotan na Isagibo an Pagkamoot’
12, 13. (a) Ano an bagong togon ni Jesus? (b) Sa anong mahalagang mga paagi dapat niatong pagmaigotan na isagibo an arog-Cristong pagkamoot?
12 Basahon an 1 Timoteo 5:1, 2. Nagtao si Pablo nin praktikal na hatol kun paano ikakapaheling nin mga Kristiano an pagkaminorootmootan. Dapat na kaiba sa satong diosnon na debosyon an pagkuyog sa bagong togon ni Jesus na “magkaminorootmootan” siring kan pagkamoot nia sa sato. (Juan 13:34) Sinabi ni apostol Juan: “An siisay man na igwa nin pangsustento sa buhay kan kinaban na ini asin naheheling an saiyang tugang na nangangaipo alagad ta minapinto kan saiyang mamomoton na pagmalasakit sa saiya, paanong magdadanay sa saiya an pagkamoot nin Dios?” (1 Juan 3:17) May maiisip daw kamong mga pangyayari na ipinaheling nindo sa praktikal na paagi an pagkamoot?
13 An saro pang paagi na pinagmamaigotan niato na isagibo an pagkamoot iyo an pagigin mapagpatawad, na dai nagpaparahinanakit sa satong mga tugang. (Basahon an 1 Juan 4:20.) Imbes, gusto niatong sunodon an ipinasabong na hatol na ini: “Padagos kamong magpatiriostios asin lubos na magpatarawadtawadan kun an siisay man igwa nin dahelan na magreklamo tumang sa saro. Kun paanong kamo lubos na pinatawad ni Jehova, siring man an gibohon nindo.” (Col. 3:13) Puede daw nindong iaplikar an hatol na ini kun dapit sa sarong tugang sa kongregasyon? Papatawadon daw nindo sia?
‘Pagmaigotan na Isagibo an Pakatagal’
14. Ano an manonodan niato sa kongregasyon sa Filadelfia?
14 Madali sana na gibohon an satong pinakamakakaya tanganing makamit an sarong pasohan na pangmadalian, pero iba nang orolay kun an pasohan depisil na aboton o nangangaipo nin mas halawig na panahon kisa sa inaasahan niato. Malinaw nanggad, nangangaipo nin pakatagal an pagmamaigot na aboton an pasohan na buhay na daing katapusan. “Huli ta iningatan mo an sinabi ko manongod sa pakatagal, iingatan taka man sa oras nin pagbalo,” an sabi kan Kagurangnan na Jesus sa kongregasyon sa Filadelfia. (Kap. 3:10; nota sa ibaba) Tunay nanggad, itinokdo ni Jesus an manongod sa pangangaipo na magtagal—sarong kualidad na nakakatabang sa sato na dai sumuko kun napapaatubang sa mga pagbalo asin sugot. An mga tugang sa enot na siglong kongregasyon sa Filadelfia siertong nagpaheling nin pambihirang pakatagal sa dakol na pagbalo sa pagtubod. Huli kaini, sinierto ni Jesus sa sainda na maako sinda nin dugang pang tabang durante kan maabot na mas dakulang pagbalo.—Luc. 16:10.
15. Ano an itinokdo ni Jesus manongod sa pakatagal?
15 Aram ni Jesus na an saiyang mga parasunod mapapaatubang sa pagkaongis kan daing pagtubod na mga paryente asin kan kinaban sa pangkagabsan, kaya sa kisiera duwang pangyayari, dinagka nia sinda sa paaging ini: “An makatagal sagkod sa katapusan iyo an maliligtas.” (Mat. 10:22; 24:13) Ipinaheling man ni Jesus kun paano makukua kan saiyang mga disipulo kan panahon na idto an kaipuhan na kosog tanganing makatagal. Sa sarong ilustrasyon, inagid nia an magapong daga sa mga indibiduwal na “inaako an tataramon [nin Dios] na may kagayagayahan” alagad minasuhay kun napapaatubang sa mga pagbalo dapit sa pagtubod. Minsan siring, inagid nia an saiyang maimbod na mga parasunod sa marahay na daga huli ta “rinirimpos” ninda an tataramon nin Dios asin “nagbubunga na may pakatagal.”—Luc. 8:13, 15.
16. Anong mamomoton na probisyon an nakakatabang sa minilyon na makatagal?
16 Narisa daw nindo an sekreto tanganing makatagal? Dapat na ‘rimposon’ niato an tataramon nin Dios, na pinapagdadanay iyan na buhay sa satong puso asin isip. Kombenyente asin posible na gibohon iyan huling makukua na sa padakol nang padakol na lenguahe an New World Translation of the Holy Scriptures—sarong eksakto asin pasil na basahon na traduksion kan Biblia. An paghorophorop niato sa sarong kabtang kan Tataramon nin Dios aroaldaw matabang sa sato na magkaigwa kan kaipuhan na kosog tanganing padagos na mamunga na “may pakatagal.”—Sal. 1:1, 2.
‘Pagmaigotan na Isagibo an Kahoyoan nin Boot’ Asin Katoninongan
17. (a) Taano ta mahalagang marhay an “kahoyoan nin boot”? (b) Paano ipinaheling ni Jesus na sia mahoyo?
17 Mayo nin naoogma kun sia sinasahotan nin sarong bagay na dai nia sinabi o ginibo. An anggot na pagnegar ordinaryo nang reaksion nin mga tawo sa bakong makatanosan na pagkritika. Orog karahay nanggad na magpaheling nin “kahoyoan nin boot”! (Basahon an Talinhaga 15:1.) Kaipuhan nin dakol na kosog tanganing magin mahoyo kun napapaatubang sa bakong makatanosan na pagkritika. Nagtao si Jesu-Cristo nin sangkap na halimbawa sa bagay na ini. “Kan sia pinagtataraman nin maraot, dai sia nagbalos na magtaram nin maraot. Kan sia nagsasakit, dai sia nanghuma, kundi padagos na ipinagkatiwala an saiyang sadiri sa saro na naghohokom nin matanos.” (1 Ped. 2:23) Dai niato maaasahan na magigibo niato an bagay na ini nin siring karahay kan ginibo ni Jesus, alagad puede daw kitang maghingoa na ipaheling nin mas lubos pa an kahoyoan nin boot?
18. (a) Anong karahayan an nagigibo kan kahoyoan nin boot? (b) Ano pang ibang kualidad an isinasadol sa sato na pagmaigotan na isagibo?
18 Bilang pag-arog ki Jesus, logod na kita “pirmeng [magin] andam na gumibo nin pagdepensa” sa satong mga tinutubod, na “ginigibo iyan na may mahoyong boot asin hararom na paggalang.” (1 Ped. 3:15) Iyo, an pagkaigwa niato nin kahoyoan nin boot makakaolang na magin mainit na mga argumento an mga pagkakalaen nin opinyon, sa mga tawong nanonompongan niato sa satong ministeryo sagkod sa satong mga kapagtubod. (2 Tim. 2:24, 25) An kahoyoan nakakatabang sa sato na magkaigwa nin katoninongan. Tibaad iyan an dahelan kun taano ta sa ikaduwang surat ni Pablo ki Timoteo, an “katoninongan” ilinista nia na kabilang sa mga kualidad na dapat na pagmaigotan na isagibo. (2 Tim. 2:22; ikomparar an 1 Timoteo 6:11.) Iyo, an “katoninongan” saro pang kualidad na dinadagka kan Kasuratan na pagmaigotan niatong isagibo.—Sal. 34:14; Heb. 12:14.
19. Pakatapos na pag-olayan an pitong Kristianong kualidad, ano an determinado nindong pagmaigotan na isagibo, asin taano?
19 Pinag-olayan niato sa halipot an pitong Kristianong kualidad na dinadagka kita na pagmaigotan na isagibo—an katanosan, diosnon na debosyon, pagtubod, pagkamoot, pakatagal, kahoyoan nin boot, asin katoninongan. Sarong bendisyon nanggad sa lambang kongregasyon kun hinihingoa kan mga tugang na ipaheling nin mas lubos pa ngani an mahalagang marhay na mga kualidad na ini! Ini mataong onra ki Jehova asin totogotan sia kaini na moldehon an lambang saro sa sato para sa kaomawan nia.
Mga Puntong Mapaghohorophorop
• Ano an kalabot sa pagmamaigot na isagibo an katanosan asin diosnon na debosyon?
• Ano an matabang sa sato na magmaigot na isagibo an pagtubod asin pakatagal?
• Ano an maninigong magin epekto kan pagkamoot sa pagtratar niato sa lambang saro?
• Taano ta kaipuhan niatong pagmaigotan na isagibo an kahoyoan asin katoninongan?
[Mga Hapot Para sa Pag-adal]
[Ritrato sa pahina 12]
Si Jesus nagpatanid tumang sa pagpasikat kan katanosan tanganing pahangaon an mga tawo
[Ritrato sa pahina 13]
Mapagmamaigotan niato na isagibo an pagtubod paagi sa paghorophorop sa mga katotoohan na nasa Tataramon nin Dios
[Ritrato sa pahina 15]
Mapagmamaigotan niato na isagibo an pagkamoot asin kahoyoan nin boot