Papagdanayon “an Saimong Pagkamoot kan Enot”

“Padagos mong pangaptan nin higot an yaon sa saimo.”​—KAP. 3:11.

1, 2. Ano an nagin pagmate mo kan makombensir ka na an pinag-aadalan mo manongod ki Jehova iyo an katotoohan?

NAGIGIRUMDOMAN mo daw kan enot mong manodan an manongod sa makangangalas na paglaom na itinatao ni Jehova sa makinuyog na katawohan? Kun ika dating miembro nin ibang relihion, ano an nagin pagmate mo kan ipinaliwanag sa saimo an mga katuyohan nin Dios paagi sa Kasuratan o kan lininaw an mga katokdoan na kan enot depisil masabotan? Tibaad napag-isip-isip mo na ikinalagalag ka. Alagad naggagayagaya ka nanggad ngonyan na ika naliwanagan na! Kun ika pinadakula nin Kristianong mga magurang, nagigirumdoman mo daw an nagin pagmate mo kan makombensir ka na an pinag-aadalan mo manongod ki Jehova iyo an katotoohan asin kan magdesisyon kang mamuhay kaoyon kaiyan?​—Roma 12:2.

² An dakol sa saimong espirituwal na mga tugang magsasabi sa saimo na sinda ogmahon, nagin dayupot ki Jehova, asin nagpapasalamat na dinagka nia sinda. (Juan 6:44) An saindang kaogmahan nagpahiro sa sainda na magpartisipar sa Kristianong mga aktibidad. Nagin lubos na marhay an kagayagayahan ninda kaya gusto nindang sabihon sa gabos an saindang nagin pagmate. Kapareho man daw kaiyan an naeksperyensiahan mo?

3. Ano an situwasyon kan kongregasyon sa Efeso kan magpadara si Jesus sa sainda nin mensahe?

 ³ Kan kinakaolay an Kristianong kongregasyon sa Efeso kan enot na siglo, si Jesus nagtaram dapit sa “saimong pagkamoot kan enot.” An mga taga Efeso igwa nin dakol na marahay na kualidad, pero nagluya an pagkamoot na ipinapaheling ninda kaidto ki Jehova. Huli kaini, sinabihan sinda ni Jesus: “Aram ko an saimong mga gibo, asin an saimong pagpapagal saka pakatagal, asin na dai mo natitios an maraot na mga tawo, asin na binabalo mo an mga nagsasabing sinda mga apostol, alagad bako man, asin nakua mo sindang mga putikon. Nagpapaheling ka man nin pakatagal, asin nagtios ka huli sa sakong ngaran asin dai nakapoy. Minsan siring, igwa ako nin laban sa saimo, na binayaan mo an saimong pagkamoot kan enot.”​—Kap. 2:2-4.

4. Taano ta angay ngonyan an mensahe ni Jesus sa mga taga Efeso?

⁴ Nagin angay an hatol ni Jesus sa mga taga Efeso asin sa iba pang kongregasyon na pinapanongdan nia sa libro nin Kapahayagan huli sa nagin mga kamugtakan kan linahidan na mga Kristiano sa sarong peryodo nin panahon poon kan 1914 padagos. (Kap. 1:10) Pero, dawa ngonyan tibaad may posibilidad na mawara nin nagkapirang Kristiano an ‘saindang pagkamoot kan enot’ ki Jehova asin sa Kristianong katotoohan. Isinasaisip iyan, siyasaton niato kun paano makakatabang sa saimo an paggirumdom asin paghorophorop kan saimo mismong mga eksperyensia tanganing papagdanayon, ikabalik, asin pakosogon mo an namatean mong enot na pagkamoot saka kaigotan para sa Dios patin sa katotoohan.

Ano an Nakakombensir sa Saimo sa Katotoohan?

5, 6. (a) Sa ano dapat makombensir an lambang Kristiano? (b) Ano an nakakombensir sa saimo na itinotokdo kan Mga Saksi ni Jehova an katotoohan? (c) Ano an makakatabang sa saro na ikabalik an saiyang pagkamoot kan enot?

⁵ An lambang saro na naggigibo nin pagdusay ki Jehova dapat na ‘patunayan’ nguna sa saiyang sadiri kun ano an “marahay asin inaako patin sangkap na kabotan nin Dios.” (Roma 12:1, 2) Sa sarong kabtang, kaiba dian an pag-adal kan katotoohan sa Biblia. An nakakombensir sa saro na itinotokdo kan Mga Saksi ni Jehova an katotoohan tibaad laen sa nakakombensir sa iba. Nagigirumdoman nin nagkapira na nabago an saindang kaisipan kan mabasa ninda sa Biblia an banal na ngaran o kan masabotan ninda an tunay na kamugtakan kan mga gadan. (Sal. 83:18; Ecl. 9:5, 10) An nakapahanga sa iba iyo an pagkamoot na yaon sa banwaan ni Jehova. (Juan 13:34, 35) An iba pa napahanga dapit sa boot sabihon nin pagigin bakong kabtang kan kinaban. Nagkongklusyon sinda na an tunay na mga Kristiano dai puedeng magpartisipar sa politikal na mga kontrobersia o guerra nin arin man na nasyon.​—Isa. 2:4; Juan 6:15; 17:14-16.

⁶ Para sa dakol, an mga dahelan na ini asin iba pa iyo an nakapukaw kan saindang enot na pagkamoot sa Dios. Magtao nin panahon na girumdomon kun ano an nakakombensir sa saimo sa katotoohan. Ika sarong indibiduwal na may daing kaparehong mga kamugtakan asin ugale, kaya an  saimong pundamental na mga dahelan na mamotan si Jehova asin magtubod sa saiyang mga panuga posibleng marhay na laen kisa sa iba. Posibleng marhay na an mga dahelan na ini totoo pa sa saimo ngonyan kun paanong iyan totoo man sa saimo kan enot mong manodan iyan. An katotoohan dai nagbabago. Huli kaini, an paggirumdom sa mga kaisipan asin pagmateng iyan, sa sarong paagi, puedeng pakosogon giraray asin ikabalik an saimong enot na pagkamoot sa katotoohan.​—Basahon an Salmo 119:151, 152; 143:5.

Pakosogon an Saindong Pundasyon na Iyo an Pagkamoot kan Enot

7. Taano ta kaipuhan niatong pakosogon an satong enot na pagkamoot sa katotoohan, asin paano niato iyan magigibo?

⁷ Tibaad dakol na an nabago sa saindong buhay poon kan magdusay kamo ki Jehova. Mahalaga an saindong enot na pagkamoot sa katotoohan, alagad sa paglihis nin panahon, kaipuhan nindo nin mas hararom na pagkamoot tanganing maatubang an bagong mga kadepisilan na nakabalo kan saindong pagtubod. Minsan siring, tinabangan kamo ni Jehova. (1 Cor. 10:13) Huli kaini, mahalagang marhay man sa saindo an saindong mga eksperyensia sa nakalihis na mga taon. Nakatabang iyan sa saindo na pakosogon an saindong pagkamoot kan enot, asin iyan saro pang paagi na mapatunayan nindo sa saindo mismong sadiri an marahay asin inaakong kabotan nin Dios.​—Jos. 23:14; Sal. 34:8.

8. Paano nagpamidbid si Jehova ki Moises, asin paano mas dayupot pang namidbid kan mga Israelita an Dios?

⁸ Sa pag-ilustrar, isip-isipa an nagin situwasyon kan mga Israelita kan sabihon ni Jehova an saiyang katuyohan na kaldahon sinda sa kaoripnan sa Egipto. An Dios nagpamidbid ki Moises, na nagsasabi: “Ako magigin ano man na gusto kong ako magin.” (Ex. 3:7, 8, 13, 14) Garo man sana sinasabi ni Jehova na sia magigin an ano man na kaipuhan tanganing mapatalingkas an saiyang banwaan. Sa suminunod na mga pangyayari asin mantang kaipuhan huli sa mga kamugtakan, naheling kan mga Israelita na ihinayag ni Jehova an manlaenlaen na aspekto kan saiyang personalidad​—bilang an Makakamhan sa Gabos, Hokom, Poon, Paraligtas, Parapakilaban, asin Paratao.​—Ex. 12:12; 13:21; 14:24-31; 16:4; Neh. 9:9-15.

9, 10. Anong klaseng situwasyon an makakatabang sa saro na mamidbid an Dios, asin taano ta marahay na girumdomon an siring na mga eksperyensia?

⁹ An saindong situwasyon laen kisa sa suanoy na mga Israelita. Dawa siring, posibleng marhay na nagkaigwa na kamo nin mga eksperyensia na nakakombensir sa saindo na an Dios personal na interesado sa saindo, na nagpakosog sa pagtubod nindo. Tibaad sa paano man si Jehova mismo nagin Paratao, Pararanga, o Paratokdo. (Basahon an Isaias 30:20b, 21.) O tibaad naeksperyensiahan nindo an sarong malinaw na simbag sa sarong pamibi. Tibaad napaatubang kamo sa sarong kadepisilan, dangan may sarong kapwa Kristiano na nagtabang sa saindo. O tibaad paagi sa personal na pag-adal nindo may narisa kamong angay na mga teksto para sa saindo.

¹⁰ Kun isasaysay nindo sa iba an siring na mga eksperyensia, an nagkapira tibaad dai man gayong maghanga dian. Sa katunayan, an mga pangyayaring iyan bako man milagro. Alagad para sa saindo iyan makahulogan na marhay. Iyo, si Jehova nagin nanggad kun ano an kaipuhan niang magin para sa saindo. Isip-isipa an mga taon poon kan kamo nasa katotoohan na. May nagigirumdoman daw kamo na labi sa sarong pangyayari na namatean nindo an personal na pagmakolog ni Jehova sa saindong buhay? Kun iyo, an paggirumdom sa mga pangyayaring iyan asin sa nagin pagmate nindo huli kaiyan puedeng pukawon sa saindong puso an kaparehong pakamate nin pagkamoot ki Jehova na namatean nindo kaidto. Pahalagahan nindong marhay an mga eksperyensiang iyan. Horophoropon iyan. Prueba iyan na si Jehova personal na interesado sa saindo, asin mayo nin makakahale sa saindo kan makosog na pagtubod na iyan.

Siyasaton an Saimong Sadiri

11, 12. Kun nagluya an pagkamoot nin sarong Kristiano sa katotoohan, ano an tibaad dahelan kaiyan, asin anong hatol an itinao ni Jesus?

¹¹ Kun an pagkamoot mo ngonyan sa Dios asin sa katotoohan bako nang arog kan dati, ini bakong huli ta igwa nin ano man na nagbago sa saiya. Si Jehova nungkang nagbabago. (Mal. 3:6; Sant. 1:17) Interesado sia sa saimo kaidto, asin interesado man sia sa saimo ngonyan siring kaidto. Kaya, paano kun igwa nin ano man na tibaad nagbago sa saimong relasyon ki Jehova? Posible daw na an pagmate  mo mas natetension asin mas sibot ka huli sa mga kahaditan? Tibaad kan nakaagi ika namimibi nin mas odok, nag-aadal nin mas maigot, asin naghohorophorop nin mas parate. Ika daw mas maigot kaidto sa ministeryo asin regular sa mga pagtiripon kan kongregasyon kisa ngonyan?​—2 Cor. 13:5.

¹² Tibaad dai mo man naririsa sa saimong sadiri an arin man sa siring na mga tendensia, alagad kun iyo, ano an dahelan kaiyan? Posible daw na nagluya an saimong pakamate nin pagkaapurado dapit sa kaharanihan kan aldaw ni Jehova huli sa rasonableng mga dahelan, siring baga kan paghihingoa na ikatao nin igo an mga pangangaipo kan saimong pamilya, pag-asikaso sa saimong salud, o mga kaagid kaiyan? Sinabihan ni Jesus an saiyang mga apostol: “Tawan nin atension an saindong sadiri na an saindong puso dai noarin man mapagabatan nin sobrang pagkakan asin makosog na pag-inom patin mga kahaditan sa buhay, asin sa panale an aldaw na iyan mag-abot sa saindo na siring sa sarong siod. Huli ta madatong iyan sa gabos na nag-eerok sa ibabaw kan bilog na daga. Magpuka kamo, kun siring, na sa gabos na panahon nagngangayongayo na magin kamong mapanggana sa pagdulag sa gabos na bagay na ini na nakatalagang mangyari.”​—Luc. 21:34-36.

13. Sa ano inagid ni Santiago an Tataramon nin Dios?

¹³ An pinasabngan na kagsurat sa Biblia na si Santiago sinadol an mga kapagtubod na siyasaton nin sadiosan an saindang sadiri paagi sa Tataramon nin Dios. Si Santiago nagsurat: “Magin kamong mga paraotob kan tataramon, asin bakong mga paradangog sana, na dinadaya an saindong sadiri nin putik na pangangatanosan. Huli ta kun an siisay man paradangog kan tataramon, asin bakong paraotob, an sarong ini nakakaagid sa tawo na nagheheling sa saiyang natural na lalawgon sa salming. Huli ta hineheling nia an saiyang sadiri, asin sia minahale asin nalilingawan tolos kun anong klase siang tawo. Alagad an nag-aaninaw sa sangkap na ley para sa katalingkasan asin nagdadanay dian, an tawong ini, huli ta sia nagin, bakong malilingawon na paradangog, kundi paraotob kan gibohon, maoogma sa paggibo nia kaiyan.”​—Sant. 1:22-25.

14, 15. (a) Paano puedeng makatabang sa saimo an Biblia na mapaoswag an saimong espirituwal na kamugtakan? (b) Anong mga hapot an puede mong pensaron?

¹⁴ An saro puedeng gumamit nin salming tanganing masierto na sia presentable. Halimbawa, kun maheling nin sarong lalaki na biribid an saiyang kurbata, puede niang pakarhayon iyan. Kun maheling nin sarong babae na bakong husay an saiyang buhok, puede niang husayon iyan. Kaagid kaiyan, tinatabangan kita kan Kasuratan na siyasaton kun ano kita. Kun ikinokomparar niato an satong sadiri sa kun ano an maninigo na magin pagkatawo niato segun sa Biblia, kun siring, ginagamit niato iyan arog sa salming. Alagad ano an pakinabang nin pagheling sa salming kun mayo kita nin ginibo tanganing itanos an sarong depekto na naheling niato? Madonong kita kun naghihiro kita oyon sa naheheling niato sa “sangkap na ley” nin Dios, na nagigin “mga paraotob” kaiyan. Huli kaini, an siisay man na nakakarisa na nagluya na an saindang enot na pagkamoot ki Jehova asin sa katotoohan marahay na isip-isipon an mga hapot na ini: ‘Anong mga panggigipit an inaatubang ko sa buhay, asin ano an sakong reaksion sa mga iyan? Ano an nagin reaksion ko kan nakaagi? Igwa daw nin nagbago?’ Kun ihayag kan siring na pagsiyasat sa sadiri an ano man na mga pagkukulang, dai pagbaliwalaon iyan. Kun kaipuhan an mga pagliliwat, gibohon nanggad iyan na daing pag-atraso.​—Heb. 12:12, 13.

¹⁵ An siring na paghorophorop makakatabang man sa saimo na magbugtak nin rasonableng mga  pasohan para sa espirituwal na pag-oswag. Si apostol Pablo nagtao nin ipinasabong na hatol sa saiyang kapwa trabahador na si Timoteo para sa pagpaoswag kan ministeryo kaini. Sinadol ni Pablo an mas hoben na lalaking ini: “Pensaron mo an mga bagay na ini; ipanongod mo dian an bilog mong buhay, tanganing an saimong pag-oswag mahayag sa gabos na tawo.” Marahay man na pensaron niato, paagi sa Tataramon nin Dios, kun anong pag-oswag an puede niatong gibohon.​—1 Tim. 4:15.

16. Sa anong peligro kaipuhan kang magin alisto kun sinisiyasat mo an saimong sadiri paagi sa Kasuratan?

¹⁶ An ano man na sadiosan na pagsiyasat sa sadiri posibleng marhay na maghayag nin nagkapirang kaluyahan. Puede kaiyan na paluyahon an boot nin saro, alagad dai pagtogotan na mangyari iyan sa saindo. An totoo, an katuyohan kan pagsiyasat sa sadiri iyo na maaraman kun ano an puedeng paoswagon. Siempre, gusto ni Satanas na an sarong Kristiano makamate nin pagigin daing halaga huli sa saiyang mga pagkukulang. Sa katunayan, may naghihingako na hinahamak nin Dios an gabos na paghihingoa nin saro na maglingkod sa Saiya. (Job 15:15, 16; 22:3) Iyan sarong kaputikan na mapuersang pinahimutikan ni Jesus, huli ta an lambang saro sa sato ibinibilang nin Dios na mahalagang marhay. (Basahon an Mateo 10:29-31.) Kun siring, an pakaaram sa saimong mga pagkukulang maninigo na makatabang sa saimo na magkaigwa nin kapakumbabaan asin determinasyon na umoswag, paagi sa tabang ni Jehova. (2 Cor. 12:7-10) Kun limitado na an kaya mong gibohon huli sa helang o edad, kun siring magbugtak nin rasonableng mga pasohan, alagad dai sumuko o togotan na lumuya an saimong pagkamoot.

Dakol an Dahelan na Magin Mapagpasalamat

17, 18. Ano an mga pakinabang kun papakosogon nindo an saindong pagkamoot kan enot?

¹⁷ Dakulang mga pakinabang an makakamtan kun padagos na papakosogon an pundasyon na iyo an saindong pagkamoot kan enot. Mapapararom nindo an saindong kaaraman sa Dios asin an saindong pag-apresyar sa saiyang mamomoton na paggiya. (Basahon an Talinhaga 2:1-9; 3:5, 6.) “Sa pag-otob [kan hudisyal na mga desisyon ni Jehova] may dakulang balos,” an sabi kan salmista. “An pagirumdom ni Jehova mapagtitiwalaan, na nagpapadonong sa daing eksperyensia.” Dugang pa, “maogma an mga daing sala sa saindang dalan, an mga naglalakaw sa ley ni Jehova.”​—Sal. 19:7, 11; 119:1.

¹⁸ Siertong maoyon kamo na igwa kamo nin dakol na marahay na bagay na dapat pasalamatan. Nasasabotan nindo an mga dahelan kan nangyayari sa kinaban ngonyan. Nakikinabang kamo sa espirituwal na pag-asikaso asin atension na itinatao nin Dios sa saiyang banwaan ngonyan. Daing duda na nagpapasalamat man kamo, na dinagka kamo ni Jehova sa saiyang pambilog na kinaban na kongregasyon asin tinawan nia kamo kan pribilehio na magin saro sa saiyang mga Saksi. Pasalamatan nindo an inaako nindong mga bendisyon! Kun ililista nindo iyan, posibleng marhay na magigin halaba iyan. An parate nanggad na paggibo kaiyan daing duda na matabang sa saindo na iaplikar an konseho na: “Padagos mong pangaptan nin higot an yaon sa saimo.”​—Kap. 3:11.

19. Apuera sa paghorophorop sa saindong relasyon sa Dios, ano pang mahalagang bagay an makakatabang na mapagdanay an saindong marahay na espirituwal na salud?

¹⁹ An paghorophorop kun paano nagtalubo an saindong pagtubod sa paglihis nin panahon saro sanang lakdang na makakatabang sa saindo na pangaptan nin higot an yaon sa saindo. Paorootrong dinadara kan magasin na ini an satong atension sa iba pang mahalagang mga bagay na makakatabang sa sato na mapagdanay an marahay na espirituwal na salud. Kabilang sa mga iyan an pamimibi, pag-atender saka pagpartisipar sa Kristianong mga pagtiripon, asin pagigin maigot sa paghuhulit. An mga bagay na ini makakatabang sa saindo na padagos na pakosogon giraray, ikabalik, asin parigonon an saindong pagkamoot kan enot.​—Efe. 5:10; 1 Ped. 3:15; Jud. 20, 21.

Ano an Isisimbag Nindo?

• Paano an saindong mga dahelan na namotan nindo si Jehova magigin gikanan nin pagparigon sa boot nindo ngonyan?

• Sa ano kamo makokombensir kan paghorophorop sa sadiri nindong mga eksperyensia kan nakalihis na mga taon?

• Taano ta maninigo nindong siyasaton an saindong pagkamoot sa Dios?

[Mga Hapot Para sa Pag-adal]

[Ritrato sa pahina 23]

Anong bagay manongod sa katotoohan an nakaakit asin nakakombensir sa saimo?

[Ritrato sa pahina 25]

May naheheling ka daw sa saimong sadiri na kaipuhan na liwaton?