Sarong Solusyon na Mapamaagi

MAY tolong hoben na lalaki sa Aprika Sentral na gustong umatender sa pandistritong kombension sa saindang lugar. Paano daw sinda makakaabot duman? Idto haros 90 kilometros an rayo na lubak-lubak, maalpog an tinampo, asin mayo pa sinda nin malulunadan. Nagdesisyon sindang magsubli nin tolong bisikleta alagad ta mayo sindang nakukua na puede sa biaheng idto.

Naheling kan sarong magurang sa lokal na kongregasyon kun ano an saindang problema asin iinalok an saiyang sadiring bisikleta​—luma na pero nagagamit pa. Ipinaliwanag nia kun ano an ginigibo ninda kaidto tanganing makaabot sa kombension. Irinekomendar kan magurang na magpasurusubli sindang tolo sa sarong bisikleta. Ini sarong simple alagad masakit na solusyon. Paano daw ini magigin posible?

Tanganing dai maabotan nin init sa pagbiahe, nagtaragboan nin amay na aga an hoben na mga tugang asin ikinarga sa bisikleta an saindang bagahe. An enot na mabisikleta luminarga na, asin suminunod an duwa na marikas na naglalakaw. Pakadalagan kan nagbibisikleta nin mga 500 metros, puminondo sia asin pinasandig nia sa kahoy an kargadong bisikleta. Siempre, sinegurado nia na natatanaw an bisikleta kan kairiba nia tanganing dai iyan “masubli” nin ibang tawo. Dangan nagbaklay na an naenot na nagbisikleta.

Kan an duwa makaabot na sa bisikleta, naglunad na an saro asin an saro man nagpadagos sa paglakaw nin mga 500 metros pa bago sia naman an may turno. Kaya paagi sa marahay na pagplano asin determinasyon, napahalipot kan tolo an saindang pagbaklay na magin mga 60 kilometros imbes na 90 kilometros. Bawi nanggad an pagmamaigot ninda. Nakipagtipon sinda sa saindang Kristianong mga tugang sa kombension asin naggayagaya sa espirituwal na bangkete. (Deut. 31:12) Ngonyan na taon, gigibohon daw nindo an bilog nindong makakaya tanganing makaatender sa pandistritong kombension sa saindong lugar?