An Tataramon ni Jehova Buhay

Tampok na mga Kabtang sa Surat sa mga Taga Roma

KAN mga 56 C.E., mantang si apostol Pablo nasa ikatolong pagbiahe nia sa pagmimisyonero, nag-abot sia sa siudad nin Corinto. Naaraman nia an mga pagkakalaen sa punto de vista nin Judio asin Hentil na mga Kristiano sa Roma. Huling nagmamawot si Pablo na biyong pagkasararoon sinda sa Cristo, nagsadiring boot sia na suratan sinda.

Sa surat na iyan sa mga taga Roma, ipinaliwanag ni Pablo kun paano ipinapahayag na matanos an mga tawo asin kun paano maninigong mamuhay an siring na mga indibiduwal. An surat na iyan nagpapaoswag kan satong kaaraman dapit sa Dios asin sa saiyang Tataramon, nagdodoon kan dai na kutana maninigong kabootan nin Dios, asin nagpapamuraway kan papel ni Cristo sa kaligtasan niato.​—Heb. 4:12.

IPINAHAYAG NA MATANOS​—PAANO?

(Roma 1:1–11:36)

“An gabos nagkasala asin nagkulang sa kamurawayan nin Dios,” nagsurat si Pablo. ‘Iyan bilang daing bayad na regalo na sinda ipinapahayag na matanos paagi sa dai na kutana maninigong kabootan nin Dios paagi sa pagkabutas huli sa pantubos na ibinayad ni Cristo Jesus.’ Sinabi man ni Pablo: “An tawo ipinapahayag na matanos paagi sa pagtubod na siblag sa mga gibo kan ley.” (Roma 3:23, 24, 28) Paagi sa pagtubod sa “sarong gibo nin pagtataong katanosan,” an linahidan na mga Kristiano sagkod an mga miembro kan “dakulang kadaklan” nin “ibang mga karnero” puedeng ‘ipahayag na matanos’​—an naenot (linahidan na mga Kristiano) para sa buhay sa langit bilang kairibang paramana ni Cristo asin an huri (dakulang kadaklan) bilang mga katood nin Dios, na may paglaom na makaligtas sa “dakulang kahorasaan.”​—Roma 5:18; Kap. 7:9, 14; Juan 10:16; Sant. 2:21-24; Mat. 25:46.

“Makomiter daw kita nin kasalan huli ta bako kitang sakop nin ley kundi sakop nin dai na kutana maninigong kabootan?” naghapot si Pablo. “Nungka logod na mangyari iyan!” an simbag nia. “Kamo mga oripon . . . , magsalang nin kasalan na kagadanan an kaaabtan o nin pagkamakinuyog na katanosan an kaaabtan,” nagpaliwanag si Pablo. (Roma 6:15, 16) “Kun gadanon nindo an mga gibo nin hawak paagi sa espiritu, kamo mabubuhay,” an sabi nia.​—Roma 8:13.

Mga Hapot sa Kasuratan na Sinimbag:

1:24-32​—An imoral daw na paggawe na ilinadawan digdi nanonongod sa mga Judio o sa mga Hentil? Minsan ngani an paglaladawan puedeng angay sa arin man sa duwang grupong iyan, an espesipikong pinapanongdan ni Pablo iyo an apostatang mga Israelita kan suanoy. Minsan ngani aram ninda an matanos na pagboot nin Dios, “sinda dai nag-oyon na akoon an Dios oyon sa tamang kaaraman.” Sa siring, sinda maninigong kondenaron.

3:24, 25​—Paano mababayadan kan “pantubos na ibinayad ni Cristo Jesus” “an mga kasalan na nangyari kan nakaagi” bago iyan ibinayad? An enot na Mesiyanikong hula, na nakasurat sa Genesis 3:15, naotob kan 33 C.E. kan si Jesus gadanon sa hariging pasakitan. (Gal. 3:13, 16) Minsan siring, kan sabihon ni Jehova an hulang iyan, sa pagmansay nia an halagang pantubos garo man sana ibinayad na, huli ta mayo nin makakaolang sa Dios sa pag-otob nia kan saiyang katuyohan. Kaya basado sa atang ni Jesu-Cristo sa ngapit, mapapatawad ni Jehova an mga kasalan nin mga naggikan ki Adan na nagturubod sa panugang iyan. Pinapagin posible man kan pantubos an pagkabuhay liwat nin mga tawong nabuhay kan mga panahon bago kan mga Kristiano.​—Gibo 24:15.

6:3-5​—Ano an boot sabihon kan bautismohan dian ki Cristo Jesus asin bautismohan dian sa saiyang kagadanan? Kun linalahidan ni Jehova nin banal na espiritu an mga parasunod ni Cristo, sinda nagigin kasaro ni Jesus asin nagigin miembro kan kongregasyon na iyo an hawak ni Cristo, na sia an Payo. (1 Cor. 12:12, 13, 27; Col. 1:18) Ini an saindang bautismo dian ki Cristo Jesus. An linahidan na mga Kristiano ‘binabautismohan man dian sa kagadanan ni Cristo’ huli ta sinda namumuhay na may pagsakripisyo asin binayaan na ninda an ano man na paglaom na buhay na daing katapusan sa daga.  Kun siring, an saindang kagadanan sarong sakripisyo, arog kan kagadanan ni Jesus, minsan ngani an saindang kagadanan mayo nin nakakatubos na halaga. An bautismo na ini dian sa kagadanan ni Cristo natatapos pagkagadan ninda asin pagkabuhaya liwat sa sainda pasiring sa buhay sa langit.

7:8-11​—Paano an kasalan ‘naagyat huli sa togon’? Tinabangan kan Ley an mga tawo na masabotan an gabos na kaiba sa kasalan, na mas ipinapamate sa sainda na sinda makasalan. Bilang resulta, narealisar ninda na sinda makasalan sa dakol na paagi, asin dakol na tawo an nahayag bilang mga makasalan. Sa siring masasabi na an kasalan naagyat huli sa Ley.

Mga Leksion Para sa Sato:

1:14, 15. Dakol an dahelan niato na ipahayag nin may kaigotan an maogmang bareta. An saro sa mga iyan iyo na kita may utang sa mga tawong binakal paagi sa dugo ni Jesus asin obligado kitang tabangan sinda sa espirituwal.

1:18-20. An mga tawong bakong diosnon asin bakong matanos ‘mayo nin sarahotan,’ huli ta risang-risa sa mga linalang an dai naheheling na mga kualidad nin Dios.

2:28; 3:1, 2; 7:6, 7. Pakatapos na sabihon ni Pablo an mga bagay na garo baga mapanraot sa mga Judio, nagsambit sia nin mga komentong nagpagian sa epekto kan enot niang sinabi. Nagtatao ini sa sato nin halimbawa kun paano niato totokaron nin mataktika asin eksperto an sensitibong mga tema.

3:4. Kun an sinasabi nin tawo kontra sa sinasabi nin Dios na nasa Tataramon nia, tinotogotan niato na ‘manompongan na an Dios totoo’ paagi sa satong pagtitiwala sa mensahe kan Biblia asin paggawe kaoyon kan kabotan nin Dios. Paagi sa maigot na pakikikabtang sa paghuhulit kan Kahadean asin paggibo nin disipulo, matatabangan niato an iba na manompongan na an Dios totoo.

4:9-12. An pagtubod ni Abraham ibinilang sa saiya na katanosan haloy pa bago sia tinuri sa edad na 99. (Gen. 12:4; 15:6; 16:3; 17:1, 9, 10) Sa makapangyarihan na paaging iyan, ipinaheling nin Dios kun ano an nagpapagin posible na magkaigwa nin sarong matanos na kamugtakan sa atubangan nia.

4:18. An paglaom sarong mahalagang marhay na kabtang nin pagtubod. An satong pagtubod basado sa paglaom.​—Heb. 11:1.

5:18, 19. Paagi sa lohikong pagpaheling kun paano nakakapareho ni Jesus si Adan, ipinaliwanag ni Pablo nin halipot asin malinaw kun paano an sarong tawo puedeng “itao an saiyang kalag bilang pantubos na karibay nin dakol.” (Mat. 20:28) An lohikong pangangatanosan asin pagigin halipot marahayon na mga paagi nin pagtotokdo na maninigong arogon.​—1 Cor. 4:17.

7:23. An mga kabtang nin hawak siring kan satong mga kamot, mga tabay, asin dila ‘puede kitang darahon na bihag kan ley nin kasalan,’ kaya maninigo kitang magmaan sa salang paggamit kaiyan.

8:26, 27. Kun napapaatubang kita sa mga situwasyon na nakakaribaraw na gayo na huli kaiyan dai na niato aram kun ano an dapat na ipamibi niato, “an espiritu mismo an nakikimaherak para sa sato.” Dangan inaako ni Jehova, an “Paradangog nin pamibi,” na garo man sana hale sa sato an angay na mga pamibi na nakasurat sa saiyang Tataramon.​—Sal. 65:2.

8:38, 39. An mga kalamidad, maraot na espiritung mga linalang, asin mga gobyerno nin tawo dai makakapapondo ki Jehova na mamoot sa sato; ni maninigo man iyan na makapapondo sa sato na mamoot sa saiya.

9:22-28; 11:1, 5, 17-26. An dakol na hula mapadapit sa pagbabalik kan Israel naotob kan kongregasyon nin linahidan na mga Kristiano, na an mga miembro kaiyan “inapod bako sanang gikan sa mga Judio kundi gikan man sa mga nasyon.”

10:10, 13, 14. Kaiba kan pagkamoot sa Dios asin sa satong kapwa, an makosog na pagtubod ki Jehova asin sa saiyang mga panuga makakamotibar sa sato na makikabtang nin maigot sa Kristianong ministeryo.

11:16-24, 33. Magayon nanggad an pagigin timbang kan “kabootan asin pagkaestrikto nin Dios”! Iyo, “an Gapo, sangkap an saiyang gibo, huli ta an gabos niang dalan hustisya.”​—Deut. 32:4.

PAMUMUHAY NA KAOYON KAN PAGIGIN IPINAHAYAG NA MATANOS

(Roma 12:1–16:27)

“Bilang resulta ako nakikimaherak sa saindo huli sa mga pagmalasakit nin Dios, mga tugang,” an sabi ni Pablo, “na idolot nindo an saindong hawak bilang sarong atang na buhay, banal, inaako nin Dios.” (Roma 12:1) “Bilang resulta,” o huli sa bagay  na an mga Kristiano ipinapahayag na matanos huli sa saindang pagtubod, an sunod na sinabi ni Pablo maninigong magkaigwa nin epekto sa saboot ninda manongod sa saindang sadiri, sa iba, asin sa mga autoridad sa gobyerno.

“Sinasabihan ko an lambang saro dian sa saindo na dai mag-isip dapit sa saiyang sadiri nin orog kisa sa maninigong isipon,” nagsurat si Pablo. “An saindo logod na pagkamoot mayo nin pagsaginsagin,” an sadol nia. (Roma 12:3, 9) “An lambang kalag magpasakop sa superyor na mga autoridad.” (Roma 13:1) Sa mga bagay na madedesisyonan sana oyon sa konsensia, dinagka nia an mga Kristiano na ‘dai magpahorokomhokoman.’​—Roma 14:13.

Mga Hapot sa Kasuratan na Sinimbag:

12:20​—Paano kita ‘nagtatambak nin baga’ sa payo nin sarong kaiwal? Kan mga panahon kan Biblia, an metal ibinubugtak sa sarong horno na may suon nin mga baga na ibinubugtak sa ibabaw saka sa irarom. An dagdag na init sa ibabaw nakakatabang na matunaw an metal asin masuhay iyan sa mga ati. Sa siring man na paagi, kita garo nagbubugtak nin mga baga sa payo nin sarong kaiwal paagi sa paggibo nin kabootan sa saiya tanganing matunaw an saiyang katagasan asin magpaheling sia nin marahay na mga kualidad.

12:21​—Paano niato ‘padagos na dinadaog nin karahayan an karatan’? An sarong paagi na ginigibo niato ini iyo an daing takot na determinasyon na otobon an gibohon na itinao nin Dios sa sato na paghuhulit kan maogmang bareta kan Kahadean sagkod na kontento na si Jehova sa pagkagibo kaiyan.​—Mar. 13:10.

13:1​—Sa anong paagi na an superyor na mga autoridad ‘yaon sa saindang relatibong mga kamugtakan na itinogot nin Dios’? An sekular na mga autoridad “nagtitirindog sa saindang relatibong mga kamugtakan na itinogot nin Dios” huli ta namamahala sinda paagi sa pagtogot nin Dios, asin sa nagkapirang kamugtakan an saindang pamamahala naheling na nin Dios antes pa. Maririsa ini sa ihinula kan Biblia manongod sa dakol na namamahala.

Mga Leksion Para sa Sato:

12:17, 19. An pagbalos sa maraot nangangahulogan na kita mismo an naggigibo kan dapat na ipabaya ki Jehova. Kapangahasan nanggad na kita “magbalos nin maraot sa maraot”!

14:14, 15. Dai kita maninigong makapamondo sa satong tugang o makapasingkog sa saiya huli sa kakanon o inomon na inaalok niato sa saiya.

14:17. An pagkaigwa nin paborableng kamugtakan sa atubangan nin Dios sa pangenot dai nakadepende sa kinakakan o iniinom nin saro o sa linilikayan niang kakanon o inomon. Imbes, iyan konektado sa katanosan, katoninongan, asin kagayagayahan.

15:7. Maninigo na daing pagpaorog na akoon niato sa kongregasyon an gabos na sinserong naghahanap nin katotoohan asin na ibalangibog an mensahe kan Kahadean sa gabos na nanonompongan niato.

[Mga Ritrato sa pahina 31]

An pantubos daw magagamit sa mga kasalan na nagibo bago iyan ibinayad?