‘An Dios an Nagpapatubo Kaiyan’!
‘An Dios an Nagpapatubo Kaiyan’!
“Ni an nagtatanom daing halaga ni an nagbabaribi, kundi an Dios na nagpapatubo kaiyan.”—1 COR. 3:7.
1. Sa anong paagi na kita “mga kapwa trabahador nin Dios”?
“MGA kapwa trabahador nin Dios.” Arog kaiyan an pagkaladawan ni apostol Pablo sa pribilehio na puedeng makamtan niato gabos. (Basahon an 1 Corinto 3:5-9.) An gibohon na sinambit ni Pablo iyo an paggibo nin disipulo. Iinagid nia iyan sa pagsabwag asin pagbaribi nin banhi. Kun gusto niatong magin mapanggana sa mahalagang marhay na gibohon na iyan, kaipuhan niato an tabang ni Jehova. Ipinapagirumdom sa sato ni Pablo na ‘an Dios an nagpapatubo kaiyan.’
2. Taano an katunayan na ‘an Dios an nagpapatubo’ ta nakakatabang sa sato na magkaigwa nin tamang pagmansay sa satong ministeryo?
2 An nakakapakumbabang katunayan na iyan nakakatabang sa sato na magkaigwa nin tamang pagmansay sa satong ministeryo. Tibaad mahigos kita sa paghuhulit asin pagtotokdo, alagad sa katapustapusi para ki Jehova an gabos na kaomawan huli sa ano man na pagtalubo na puedeng magin resulta kaiyan. Taano? Huli ta dawa kun nagmamaigot kita, mayo sa sato an lubos na makakasabot sa proseso nin pagtalubo, kaya malinaw na mayo kita nin kakayahan na kontrolon iyan. An situwasyon na iyan tamang ipinahayag ni Hadeng Salomon kan sia magsurat: “Dai mo aram an gibo kan tunay na Dios, na iyo an naggigibo kan gabos na bagay.”—Ecl. 11:5.
3. Ano an pagkakaagid kan pagsabwag nin literal na banhi asin kan paggibo nin mga disipulo?
3 Nakakapanluya daw sa boot an gibohon niato huli sa kawaran niato nin kakayahan na masabotan an proseso nin pagtalubo? Dai. Imbes, huli kaiyan nagigin nakakaogma asin nakakapukaw nin interes iyan. Si Hadeng Salomon nagsabi: “Pagkaaga isabwag mo an saimong banhi asin sagkod sa banggi dai mo pagpahingaloan an saimong kamot; huli ta dai mo aram kun saen ini magigin mapanggana, kun baga digdi o duman, o kun baga sindang duwa pareho magigin marahay.” (Ecl. 11:6) Totoo nanggad, kun mapadapit sa pagtanom nin literal na banhi, dai niato aram kun saen iyan matubo o kun matubo iyan. Dakol na bagay an dai niato kontrolado. Masasabi man an arog kaiyan manongod sa paggibo nin disipulo. Idinoon ni Jesus an katunayan na ini sa duwang ilustrasyon na isinurat para sa sato sa ika-4 na kapitulo kan Ebanghelyo ni Marcos. Helingon niato kun ano an satong manonodan sa duwang ilustrasyon na ini.
Laen-Laen na Klase nin Daga
4, 5. Sumaryohon an ilustrasyon ni Jesus manongod sa parasabwag na nagsasabwag nin banhi.
4 Siring kan nakasurat sa Marcos 4:1-9, ilinaladawan ni Jesus an sarong parasabwag na an banhing isinasabwag napapaduman sa manlaenlaen na daga: “Maghinanyog kamo. Uya! An parasabwag nagluwas tanganing magsabwag. Asin mantang sia nagsasabwag, an nagkapirang banhi nahulog sa gilid kan dalan, asin nagdatong an mga gamgam asin tinuka an mga iyan. Asin an ibang banhi nahulog sa magapo na dian, siempre, kakadikit kan daga, asin tolos-tolos na nagtubo an mga iyan huli ta bakong hararom an daga. Alagad kan magsirang an saldang, an mga iyan natutong, asin huli ta mayo nin gamot an mga iyan naluyos. Asin an ibang banhi nahulog sa matunok, asin nagtubo an mga tunok asin pinuot an mga iyan, asin dai iyan namunga. Alagad an iba nahulog sa marahay na daga, asin, kan magtubo asin magdakol, iyan nagpoon na magbunga, asin iyan nagbubunga nin manolong polo, asin manganom na polo asin mananggatos.”
5 Kan mga panahon kan Biblia, sa pangkagabsan an banhi ibinubugtak kan parasabwag sa katiklopan kan saiyang gubing o sa sarong lalagan asin isinasabwag iyan. Kaya sa ilustrasyon na ini, dai tinutuyo kan parasabwag na isabwag an banhi sa laen-laen na klase nin daga. Imbes, an isinabwag na banhi napapaduman sa manlaenlaen na daga.
6. Paano ipinaliwanag ni Jesus an ilustrasyon manongod sa parasabwag?
6 Dai niato kaipuhan na tuodan an kahulogan kan ilustrasyon na ini. Ipinaliwanag iyan ni Jesus, na nakasurat sa Marcos 4:14-20: “An parasabwag nagsasabwag kan tataramon. Kun siring, an mga ini iyo an nasa gilid kan dalan na nasabwagan kan tataramon; alagad pakadangog tolos ninda kaiyan si Satanas minaabot asin kinukua an tataramon na nakasabwag sa sainda. Asin iyo man ini an mga nakasabwag sa mga lugar na magapo: pakadangog tolos ninda kan tataramon, inako ninda iyan na may kagayagayahan. Alagad mayo sinda nin gamot, kundi nagpadagos sinda sa halipot na panahon; dangan paglataw tolos nin kasakitan o persekusyon huli kan tataramon, sinda nasisingkog. May iba pa na nakasabwag sa matunok; ini an mga nakadangog kan tataramon, alagad an mga kahaditan sa sistemang ini nin mga bagay asin an mapandayang kapangyarihan nin kayamanan patin an mga pagmawot sa iba pang bagay minalaog asin pinupuot an tataramon, asin iyan dai nagbubunga. Ultimo, an mga ikinasabwag sa marahay na daga iyo an mga naghihinanyog sa tataramon asin paborableng nag-aako kaiyan saka namumunga nin manolong polo asin manganom na polo asin mananggatos.”
7. Sa ano nagrerepresentar an banhi asin an laen-laen na klase nin daga?
7 Mangnohon na dai sinasabi ni Jesus na laen-laen na klase nin banhi an ginagamit. Imbes, nagtataram sia manongod sa sarong klase nin banhi na napapaduman sa laen-laen na klase nin daga, na an lambang saro kaiyan nagbubunga nin laen-laen. An enot na klase nin daga matagas, o dusok; an ikaduwa hababaw; an ikatolo matunok; asin an ikaapat marahay na daga na namumungang marhay. (Luc. 8:8) Ano an banhi? Iyan an mensahe kan Kahadean na yaon sa Tataramon nin Dios. (Mat. 13:19) Sa ano nagrerepresentar an laen-laen na klase nin daga? Sa mga tawo na laen-laen an kamugtakan nin puso.—Basahon an Lucas 8:12, 15.
8. (a) Kiisay nagrerepresentar an parasabwag? (b) Taano ta laen-laen an reaksion sa paghuhulit kan Kahadean?
8 Kiisay nagrerepresentar an parasabwag? Nagrerepresentar sia sa mga kapwa trabahador nin Dios, an mga nagbabalangibog kan maogmang bareta kan Kahadean. Arog ni Pablo asin Apolos, sinda nagtatanom asin nagbabaribi. Alagad minsan ngani sinda mahigos na nagtatrabaho, laen-laen an resulta. Taano? Huli sa laen-laen na kamugtakan nin puso kan mga nagdadangog kan mensahe. Sa ilustrasyon, dai kontrolado kan parasabwag an mga resultang ini. Nakakaranga nanggad ini, nangorogna para sa maimbod na mga tugang niato na naglilingkod sa laog nin dakol nang taon, sa nagkapirang kamugtakan sa laog nin mga dekada, na garo baga kakadikit an naheheling na resulta! * Taano man?
9. Anong nakakarangang katotoohan an idinoon ni apostol Pablo sagkod ni Jesus?
9 An kaimbodan kan parasabwag dai sinosokol paagi sa mga resulta kan saiyang gibohon. Ipinarisa iyan ni Pablo kan sia magsabi: “An lambang saro maako kan saiyang balos segun sa saiyang pagpapagal.” (1 Cor. 3:8) An balos segun sa pagpapagal, bakong segun sa mga resulta kan pagpapagal na iyan. Idinoon man ni Jesus an puntong ini kan magbuelta an saiyang mga disipulo hale sa paghuhulit. Labi-labi an kaogmahan ninda huli ta an mga demonyo nasakop ninda paagi sa paggamit kan ngaran ni Jesus. Minsan ngani puedeng nakakaogma iyan, si Jesus nagsabi sa sainda: “Dai kamo maggayagaya dapit kaini, na an mga espiritu nasasakop nindo, kundi maggayagaya kamo huli ta an saindong ngaran isinurat na sa kalangitan.” (Luc. 10:17-20) Dawa kun an parasabwag tibaad mayong naheheling na dakol na pag-oswag bilang resulta kan saiyang gibohon, dai iyan nangangahulogan na bako siang gayong mahigos o maimbod kisa sa iba. Sa dakulang kabtang, an mga resulta depende sa kamugtakan nin puso kan nagdadangog. Alagad sa katapustapusi, an Dios an nagpapatalubo kaiyan!
An Paninimbagan kan mga Nagdadangog kan Tataramon
10. Ano an nagdedeterminar kun baga magigin siring sa marahay na daga o bako an indibiduwal na nagdadangog kan tataramon?
10 Kumusta man an mga nagdadangog kan tataramon? An reaksion daw ninda dineterminaran na antes pa? Dai. Depende na sa sainda kun baga sinda magigin siring sa marahay na daga o bako. Sa katunayan, an kamugtakan nin puso nin saro puedeng magbago para sa ikakarahay o ikakaraot. (Roma 6:17) Sa ilustrasyon ni Jesus, sinabi nia na ‘kan madangog tolos’ kan nagkapira an tataramon, si Satanas nag-abot asin kinua iyan. Alagad ini dai kaipuhan na mangyari. Sa Santiago 4:7, dinadagka an mga Kristiano na ‘tumangon an Diablo,’ dangan sia madulag sa sainda. Ilinaladawan ni Jesus an iba na sa primero magayagayang nag-aako kan tataramon dangan nasisingkog huli ta “mayo sinda nin gamot.” Alagad sinasadol an mga lingkod nin Dios na dapat sindang “makagamot asin mapatindog sa pundasyon” tanganing masabotan kan saindang isip “kun ano an lakbang asin laba asin langkaw patin rarom, asin maaraman an pagkamoot kan Cristo na nakakalabi sa kaaraman.”—Efe. 3:17-19; Col. 2:6, 7.
11. Paano malilikayan nin saro na togotan na makapuot sa tataramon an mga kahaditan asin kayamanan?
11 An ibang nagdangog kan tataramon ilinaladawan na tinotogotan na makalaog asin makapuot sa tataramon “an mga kahaditan sa sistemang ini nin mga bagay asin an mapandayang kapangyarihan nin kayamanan.” (1 Tim. 6:9, 10) Paano ninda malilikayan ini? Si apostol Pablo minasimbag: “An saindo logod na pamumuhay dai apektado nin pagkamoot sa kuarta, mantang kamo naninigoan na sa presenteng mga bagay. Huli ta sia nagsabi: ‘Dai taka nanggad babayaan ni sa ano man na paagi papabayaan taka.’”—Heb. 13:5.
12. Taano an mga irinerepresentar kan marahay na daga ta laen-laen an kadakolan kan bunga?
12 Ultimo, sinasabi ni Jesus na an mga ikinasabwag sa marahay na daga “namumunga nin manolong polo asin manganom na polo asin mananggatos.” Minsan ngani an nagkapira na naghihimate sa tataramon igwa nin marahay na kamugtakan nin puso asin namumunga, an nagigibo ninda sa pagbalangibog kan maogmang bareta nagkakalaenlaen segun sa saindang mga kamugtakan. Halimbawa, an pagigin may edad na o an nakakapanluyang helang puedeng makalimitar sa nagkapira sa saindang pakikikabtang sa paghuhulit. (Ikomparar an Marcos 12:43, 44.) Sa giraray, ini tibaad medyo kontrolado o dai kontrolado kan parasabwag, alagad sia naggagayagaya kun naheheling nia na pinapatalubo iyan ni Jehova.—Basahon an Salmo 126:5, 6.
An Parasabwag na Nagtotorog
13, 14. (a) Sumaryohon an ilustrasyon ni Jesus manongod sa lalaki na nagsasabwag nin banhi. (b) Siisay an irinerepresentar kan parasabwag, asin ano an banhi?
13 Sa Marcos 4:26-29, mababasa niato an saro pang ilustrasyon mapadapit sa sarong parasabwag: “Sa paaging ini an kahadean nin Dios siring sa kun an sarong tawo magsabwag kan banhi sa daga, asin sia nagtotorog kun banggi asin minabangon pagkaaga, asin an banhi nagtubo asin luminangkaw, na dai nia aram kun paano. An daga luway-luway na nagsasadiring mamunga, an dahon nguna, dangan an ohoy, sa katapustapusi an matimgas na tipasi sa ohoy. Alagad kun itogot na kan bunga, itinitigpas nia an kagot, ta nag-abot na an tig-anihan.”
14 Siisay an parasabwag na ini? Naniniwala an nagkapira sa Kakristianohan na nanonongod ini ki Jesus mismo. Alagad paano masasabi na si Jesus nagtotorog asin dai aram kun paano nagtubo an banhi? Siertong aram ni Jesus an proseso nin pagtalubo! Imbes, an parasabwag na ini, siring kan nasambitan sa enotan, nagrerepresentar sa indibiduwal na mga parabalangibog kan Kahadean, an mga nagsasabwag kan banhi kan Kahadean paagi sa saindang maigot na paghuhulit. An banhi na isinabwag sa daga iyo an tataramon na ihinuhulit ninda. *
15, 16. Anong katotoohan manongod sa literal asin espirituwal na pagtalubo an pinalataw ni Jesus sa saiyang ilustrasyon manongod sa parasabwag?
15 Sinabi ni Jesus na an parasabwag “nagtotorog kun banggi asin minabangon pagkaaga.” Bako ining kapabayaan kan parasabwag. Ilinaladawan sana kaiyan an normal na rutina nin buhay na sinusunod kan kadaklan na tawo. An pananaram na ginamit sa bersikulong ini nagpaparisa nin nagpapadagos na proseso nin pagtrabaho sa aldaw asin pagtorog sa banggi sa laog nin sarong peryodo nin panahon. Ipinaliwanag ni Jesus kun ano an nangyari durante kan panahon na iyan. “An banhi nagtubo asin luminangkaw,” an sabi nia. Dangan sinabi pa ni Jesus: “Na dai nia aram kun paano.” An pagdodoon yaon sa katunayan na ‘nagsasadiri’ an pagtalubo. *
16 Anong punto an pinapalataw digdi ni Jesus? Mangnohon na an pagdodoon yaon sa pagtalubo asin sa luway-luway na paagi na nangyari iyan. “An daga luway-luway na nagsasadiring mamunga, an dahon nguna, dangan an ohoy, sa katapustapusi an matimgas na tipasi sa ohoy.” (Mar. 4:28) An pagtalubong ini nangyayari nin luway-luway asin tangga-tangga. Dai iyan puedeng piriton o parikason. Totoo man iyan manongod sa espirituwal na pagtalubo. Nangyayari ini nin tangga-tangga mientras na tinotogotan ni Jehova na an katotoohan tumalubo sa puso nin saro na may tamang inklinasyon.—Gibo 13:48; Heb. 6:1.
17. Siisay an nakikigayagaya kun magbunga na an banhi nin katotoohan?
17 Paano nakikikabtang sa pag-ani an parasabwag “kun itogot na kan bunga”? Kun an katotoohan dapit sa Kahadean pinapatalubo ni Jehova sa puso kan bagong mga disipulo, sa kahurihurihi sinda minaoswag nin igo kaya namomotibar sinda kan saindang pagkamoot sa Dios na idusay sa saiya an saindang buhay. Sinisimbolisaran ninda an saindang pagdusay paagi sa bautismo sa tubig. An mga tugang na lalaki na padagos na nag-ooswag pasiring sa pagkamaygurang luway-luway na nagkakaigwa nin mas dakol na paninimbagan sa kongregasyon. An bunga kan Kahadean inaani kan orihinal na parasabwag saka kan iba pang parabalangibog kan Kahadean na tibaad dai man personalmenteng nagin kalabot sa pagsabwag kan banhi na an bunga iyo an partikular na disipulong iyan. (Basahon an Juan 4:36-38.) Tunay nanggad, ‘an parasabwag asin an paraani naggagayagayang magkaibanan.’
Mga Leksion Para sa Sato Ngonyan
18, 19. (a) Paano an pagrepasong ini sa mga ilustrasyon ni Jesus personal na nakadagka sa saimo? (b) Ano an pag-oolayan sa sunod na artikulo?
18 Ano an nanodan niato sa satong pagrepaso sa duwang ilustrasyon na ini na nakasurat sa Marcos kapitulo 4? Malinaw nanggad na manonodan niato na igwa kitang dapat na gibohon—an pagsabwag. Maninigo na nungka niatong togotan na makapapondo sa sato sa gibohon na ini an mga sarahotan asin potensial na mga problema saka kadepisilan. (Ecl. 11:4) Pero, kadungan kaiyan, aram niato an satong makangangalas na pribilehio na ibilang na mga kapwa trabahador nin Dios. Si Jehova iyo an nagpapangyari nin espirituwal na pagtalubo, na binebendisyonan an satong mga paghihingoa asin an mga paghihingoa kan mga nag-aako kan mensahe. Narerealisar niato na dai niato mapipirit na magin disipulo an siisay man. Dai man kita kaipuhan na madesganar o manluya an boot kun maluway o kulang an pagtalubo. Nakakaranga nanggad na maaraman na an satong kapangganahan nasosokol paagi sa satong kaimbodan ki Jehova asin sa pribilehio na itinao nia sa sato na maghulit kan ‘maogmang bareta kan kahadean para sa pagpatotoo sa gabos na nasyon.’—Mat. 24:14.
19 Ano pa an itinokdo sa sato ni Jesus manongod sa pagtalubo kan bagong mga disipulo asin sa gibohon na pang-Kahadean? An simbag sa hapot na iyan mababasa sa iba pang mga ilustrasyon na nakasurat sa mga pagkasaysay kan Ebanghelyo. Aanalisaron niato sa sunod na artikulo an nagkapira sa mga ilustrasyon na ini.
[Mga Nota sa Ibaba]
^ par. 8 Estudyare an halimbawa kan ministeryo ni Tugang na Georg Fjölnir Lindal sa Iceland, na ibinareta sa 2005 Yearbook of Jehovah’s Witnesses, pahina 210-211, asin an mga eksperyensia kan maimbod na mga lingkod na maigot na naglingkod sa Ireland sa laog nin dakol na taon na mayo nin tolos-tolos na mga resulta, na yaon sa 1988 Yearbook of Jehovah’s Witnesses, pahina 82-99.
^ par. 14 Dati ipinaliwanag sa magasin na ini na an banhi nagrerepresentar sa personal na mga kualidad na kaipuhan na magtalubo pasiring sa pagkamaygurang, na naiimpluwensiahan kan mga bagay na nasa palibot. Minsan siring, maninigong mangnohon na sa ilustrasyon ni Jesus an banhi dai nagigin maraot na banhi o lapang bunga. Nagtatalubo sana iyan pasiring sa pagkamaygurang.—Helingon an The Watchtower na Hunyo 15, 1980, pahina 17-19.
^ par. 15 An solamenteng iba pang gamit kan pananaram na ini mababasa sa Gibo 12:10, na dian sinasambit na an batbat na tata ‘nagsasadiring’ magbukas.
Nagigirumdoman daw Nindo?
• Ano an nagkapirang pagkakaagid kan pagsabwag nin literal na banhi asin kan paghuhulit kan mensahe kan Kahadean?
• Paano sinosokol ni Jehova an kaimbodan nin parahulit kan Kahadean?
• Anong pagkakaagid an idinoon ni Jesus sa literal asin espirituwal na pagtalubo?
• Paano an ‘parasabwag asin an paraani naggagayagayang magkaibanan’?
[Mga Hapot Para sa Pag-adal]
[Mga Ritrato sa pahina 13]
Taano an parahulit kan Kahadean nin Dios ta iinagid ni Jesus sa sarong parasabwag nin banhi?
[Mga Ritrato sa pahina 15]
An mga irinerepresentar kan marahay na daga bilog na pusong nakikikabtang sa paghuhulit kan Kahadean segun sa saindang mga kamugtakan
[Mga Ritrato sa pahina 16]
An Dios an padagos na nagpapatubo kaiyan