Dai Nindo Aram Kun Saen Iyan Magigin Mapanggana!

“Pagkaaga isabwag mo an saimong banhi asin sagkod sa banggi dai mo pagpahingaloan an saimong kamot; huli ta dai mo aram kun saen ini magigin mapanggana.”—ECL. 11:6.

1. Taano ta makangangalas sagkod nakakapakumbaba na maheling an proseso nin pagtalubo nin tinanom?

AN SARONG paraoma kaipuhan na magin mapasensia. (Sant. 5:7) Pagkasabwag kan banhi, kaipuhan niang halaton iyan na magsupang asin magtalubo. Kun paborable an mga kamugtakan, luway-luway na naglalataw an mga supang, na minaluwas sa ibabaw kan daga. Dangan iyan nagtatalubo tanganing magin mga pananom na nagkakaigwa nin mga ohoy. Sa katapustapusi, puede nang anihon iyan kan paraoma. Makangangalas nanggad na maheling an milagrong iyan nin pagtalubo! Nakakapakumbaba man na maaraman kun siisay an nagpapangyari kan pagtalubong ini. Puede niatong atamanon an banhi. Puede kitang tumabang sa pagbaribi kaiyan. Alagad an Dios sana an makakapatalubo kaiyan.—Ikomparar an 1 Corinto 3:6.

2. Anong mga punto manongod sa espirituwal na pagtalubo an itinokdo ni Jesus sa mga ilustrasyon na pinag-olayan sa naenot na artikulo?

² Siring kan sinambit sa naenot na artikulo, an paghuhulit kan Kahadean inagid ni Jesus sa pagsabwag nin banhi nin sarong paraoma. Sa ilustrasyon dapit sa laen-laen na klase nin daga, idinoon ni Jesus na minsan ngani marahay na banhi an isinabwag kan paraoma, an kamugtakan kan puso nin tawo an nagdedeterminar kun baga an banhing iyan matalubo pasiring sa pagkamaygurang o dai. (Mar. 4:3-9) Sa ilustrasyon dapit sa parasabwag na nagtotorog, itinampok ni Jesus na dai lubos na nasasabotan kan paraoma an proseso nin pagtalubo. Ini huli ta an pagtalubo nangyayari paagi sa kapangyarihan nin Dios, bakong paagi sa mga paghihingoa nin tawo. (Mar. 4:26-29) Pag-olayan niato ngonyan an tolo pang ilustrasyon ni Jesus—an pisog nin mustasa, an lebadura, asin an hikot. *

An Ilustrasyon Dapit sa Pisog nin Mustasa

3, 4. Anong mga aspekto mapadapit sa mensahe kan Kahadean an itinatampok kan ilustrasyon dapit sa pisog nin mustasa?

³ An ilustrasyon dapit sa pisog nin mustasa, na nakasurat man sa Marcos kapitulo 4, nagtatampok nin duwang bagay: enot, an makangangalas na pagtalubo kan mensahe kan Kahadean; ikaduwa, an proteksion na itinatao sa mga nag-aako kan mensaheng iyan. Si Jesus nagsabi: “Sa ano niato iaagid an kahadean nin Dios, o sa anong ilustrasyon niato iyan iaatubang? Siring sa sarong pisog nin mustasa, na kan panahon na iyan isabwag sa daga iyo iyan an pinakasadit sa gabos na banhi na nasa daga—alagad kun iyan ikinasabwag na, iyan minatalubo asin nagigin mas dakula kisa sa gabos na iba pang gugulayon patin nagkakaigwa nin darakulang sanga, kaya an mga gamgam sa langit nakakanompong nin matotogdonan sa limpoy kaiyan.”—Mar. 4:30-32.

⁴ Maheheling niato digdi na ilinadawan an pagtalubo kan “kahadean nin Dios” siring kan pinapatunayan kan paglakop kan mensahe kan Kahadean asin kan pagtalubo kan Kristianong kongregasyon poon kan Pentecostes 33 C.E. An  pisog nin mustasa saditon, na puedeng magrepresentar sa sarong bagay na saditon. (Ikomparar an Lucas 17:6.) Pero, sa katapustapusi, an tanom na mustasa puedeng lumangkaw nin 3 sagkod 5 metros asin magkaigwa nin masarig na mga sanga, sa siring iyan haros nagigin sarong kahoy.—Mat. 13:31, 32.

5. Anong pagtalubo an naeksperyensiahan kan Kristianong kongregasyon kan enot na siglo?

⁵ An pagtalubo kan Kristianong kongregasyon nagpoon sa sadit na paagi kaidtong 33 C.E. kan linahidan nin banal na espiritu an mga 120 disipulo. Sa laog nin medyo halipot na panahon, an sadit na kongregasyon na ini nin mga disipulo nadugangan nin rinibong nagturubod. (Basahon an Gibo 2:41; 4:4; 5:28; 6:7; 12:24; 19:20.) Sa laog nin tolong dekada, an bilang nin mga paraani duminakol nanggad kaya nasabi ni apostol Pablo sa kongregasyon sa Colosas na an maogmang bareta ‘ikinahulit na sa gabos na linalang sa sirong nin langit.’ (Col. 1:23) Pambihira nanggad na pagtalubo iyan!

6, 7. (a) Anong pagdakol an nangyayari poon kan 1914? (b) Ano pang orog na pagtalubo an mangyayari?

⁶ Poon kan maestablisar an Kahadean nin Dios sa langit kan 1914, an mga sanga kan “kahoy” na mustasa duminakol nin labi pa sa inaasahan. Naheling kan banwaan nin Dios an literal na kaotoban kan hula na isinurat ni Isaias: “An sadit mismo magigin sangribo, asin an sadangoton magigin makosog na nasyon.” (Isa. 60:22) An sadit na grupo nin mga linahidan na nagpartisipar sa gibohon na pang-Kahadean kan enot na mga taon kan ika-20 siglo dai naghona na pag-abot kan taon 2008, mga pitong milyon na Saksi an mapartisipar sa gibohon na ini sa labing 230 kadagaan. Totoo nanggad na makangangalas an pagtalubong iyan, na ikakakomparar sa pagtalubo kan pisog nin mustasa sa ilustrasyon ni Jesus!

⁷ Alagad dian daw natatapos an pagtalubong iyan? Dai. Pag-abot nin panahon, an gabos na tawo digdi sa daga magigin sakop kan Kahadean nin Dios. Nahale na an gabos na nagtutumang. Mangyayari ini bakong huli sa mga paghihingoa nin tawo kundi huli sa pag-interbenir kan Soberanong Kagurangnan na Jehova sa mga gibo-gibo digdi sa daga. (Basahon an Daniel 2:34, 35.) Sa panahon na iyan maheheling niato an ultimong kaotoban nin saro pang hula na isinurat ni Isaias: “An daga mapapano nanggad kan kaaraman dapit ki Jehova kun paanong an tubig nakakatahob sa mismong kadagatan.”—Isa. 11:9.

8. (a) Kiisay nagrerepresentar an mga gamgam sa ilustrasyon ni Jesus? (b) Sa ano kita napoprotehiran dawa ngonyan?

⁸ Sinabi ni Jesus na an mga gamgam sa langit nakakanompong nin matotogdonan sa limpoy kan Kahadean na ini. An mga gamgam na ini dai nagrerepresentar sa mga kaiwal kan Kahadean na nagpoprobar na tukaon an marahay na mga banhi, siring kan nagin totoo sa mga gamgam sa ilustrasyon dapit sa sarong tawo na nagsabwag nin banhi sa laen-laen na klase nin daga. (Mar. 4:4) Imbes, sa ilustrasyon na ini an mga gamgam nagrerepresentar sa mga tama an kamugtakan nin puso na naghahanap nin proteksion sa laog kan Kristianong kongregasyon. Dawa ngonyan, an mga ini napoprotehiran tumang sa maating mga gibo kan maraot na kinaban na ini asin sa mga ugale kaiyan na nakakaramog sa espirituwal.  (Ikomparar an Isaias 32:1, 2.) Siring man, inagid ni Jehova an Mesiyanikong Kahadean sa sarong kahoy asin sia naghula: “Sa halangkaw na bukid nin Israel itatanom ko iyan, asin iyan magsasanga asin magbubunga patin magigin halangkawon na sedro. Asin sa sirong kaiyan mag-eerok an gabos na gamgam; sinda mag-oontok sa limpoy kan mga sanga kaiyan.”—Ezeq. 17:23.

An Ilustrasyon Dapit sa Lebadura

9, 10. (a) Anong punto an idinoon ni Jesus sa ilustrasyon dapit sa lebadura? (b) Sa Biblia, sa ano parateng nagrerepresentar an lebadura, asin anong hapot manongod sa pagkasambit ni Jesus sa lebadura an pag-oolayan niato?

⁹ An pagtalubo dai pirmeng naheheling nin mga mata nin tawo. Sa sunod na ilustrasyon ni Jesus, idinoon nia an puntong ini. Sia nagsabi: “An kahadean kan kalangitan siring sa lebadura, na kinua nin sarong babae asin itinago sa tolong darakulang takad nin harina, sagkod na nag-usbog an bilog na masa.” (Mat. 13:33) Sa ano nagrerepresentar an lebadurang ini, asin paano iyan konektado sa pagtalubo kan Kahadean?

¹⁰ Sa Biblia, an lebadura parateng ginagamit tanganing magrepresentar sa kasalan. Sa siring kaining paagi sinambit ni apostol Pablo an lebadura kan sia magtaram dapit sa nakakaraot na impluwensia nin sarong nagkasala sa kongregasyon sa suanoy na Corinto. (1 Cor. 5:6-8) Ginagamit daw ngonyan ni Jesus an lebadura tanganing magrepresentar sa pagtalubo nin sarong bagay na negatibo?

11. Paano ginagamit an lebadura sa suanoy na Israel?

¹¹ Bago niato simbagon an hapot na iyan, kaipuhan niatong tawan nin atension an tolong pundamental na katotoohan. Enot, minsan ngani dai itinotogot ni Jehova an lebadura durante kan panahon kan kapiestahan nin Paskua, may beses na talagang inaako nia an mga atang na may lebadura. An lebadura ginagamit may koneksion sa pagpasalamat paagi sa mga dolot para sa pakikikabtang, na dian an saro gikan sa boot na nagdodolot tanganing magpasalamat huli sa dakol na bendisyon ni Jehova. An pagkakan na ini nagtatao nin kagayagayahan.—Lev. 7:11-15.

12. Ano an manonodan niato sa paggamit kan Biblia nin mga ilustrasyon?

¹² Ikaduwa, minsan ngani an sarong simbolo sa sarong okasyon igwa nin negatibong kahulogan sa Kasuratan, sa ibang okasyon an simbolong iyan puedeng gamiton tanganing magrepresentar sa sarong bagay na positibo. Halimbawa, sa 1 Pedro 5:8, si Satanas inagid sa sarong leon, na naglaladawan kan saiyang peligroso asin maringis na ugale. Alagad sa Kapahayagan 5:5, si Jesus inagid man sa sarong leon—“an Leon na gikan sa tribo ni Juda.” Sa ikaduwang kamugtakan, an leon ginamit bilang simbolo nin mapusong hustisya.

13. An ilustrasyon ni Jesus dapit sa lebadura nagpapaheling nin ano manongod sa espirituwal na pagtalubo?

¹³ Ikatolo, sa ilustrasyon ni Jesus, dai nia sinabi na naraot kan lebadura an bilog na masa nin harina, kaya dai na iyan puedeng gamiton. Sinambit sana nia an normal na proseso nin paggibo nin tinapay. Tinuyo kan babae na idagdag an lebadura, asin positibo an mga resulta. An lebadura natatago sa masa nin harina. Sa siring, an proseso nin pag-usbog kaiyan dai naheheling kan babae. Ipinapagirumdom kaini sa sato an dapit sa sarong tawo na nagsabwag nin banhi asin nagtorog sa banggi. Sinabi ni Jesus na ‘an banhi nagtubo asin luminangkaw, na dai aram kan tawo kun paano.’ (Mar. 4:27) Iyan simple nanggad na paagi na ikailustrar an dai naheheling na proseso nin espirituwal na pagtalubo! Tibaad dai niato naheheling an pagtalubo sa primero, alagad pag-abot nin panahon nagigin risang-risa an mga resulta kaiyan.

14. Anong aspekto kan paghuhulit an iniilustrar kan katunayan na pinausbog kan lebadura an bilog na masa?

 ¹⁴ Bako sanang dai naheheling kan mga mata nin tawo an pagtalubong ini kundi iyan man nangyayari sa bilog na daga. Ini saro pang aspekto na idinoon sa ilustrasyon dapit sa lebadura. Pinausbog kan lebadura an bilog na masa, an bilog na “tolong darakulang takad nin harina.” (Luc. 13:21) Siring sa lebadura, an paghuhulit kan Kahadean na nagin dahelan kan espirituwal na pagtalubong ini huminiwas kaya an Kahadean ihinuhulit na ngonyan “sagkod sa kaporoporohi kan daga.” (Gibo 1:8; Mat. 24:14) Marahayon nanggad na pribilehio na magin kabtang kan makangangalas na paghiwas na ini kan gibohon na pang-Kahadean!

An Hikot

15, 16. (a) Sumaryohon an ilustrasyon dapit sa hikot. (b) Sa ano nagrerepresentar an hikot, asin anong aspekto nin pagtalubo kan Kahadean an pinapanongdan kan ilustrasyon na ini?

¹⁵ An mas mahalaga kisa sa bilang kan naghihingakong mga disipulo ni Jesu-Cristo iyo an kualidad kan mga disipulong iyan. An aspektong ini nin pagtalubo kan Kahadean an pinapanongdan ni Jesus kan sia magtao nin saro pang ilustrasyon, an manongod sa hikot. Sia nagsabi: “Sa giraray an kahadean kan kalangitan nakakaagid sa sarong hikot na itinaktak sa dagat asin nagtitipon nin gabos na klaseng sira.”—Mat. 13:47.

¹⁶ An hikot, na nagrerepresentar sa paghuhulit kan Kahadean, nagtitipon nin gabos na klaseng sira. Si Jesus nagsabi pa: “Kan mapano [an hikot] binutong ninda ini sa baybayon asin, pakatukaw, tinipon ninda an mga marahay sa mga lalagan, alagad iinapon ninda an mga dai maninigo. Siring an mangyayari sa pagtatapos kan sistema nin mga bagay: an mga anghel maruluwas asin ibubulag an mga maraot sa mga matanos asin itatapok sinda sa nagkakalayong horno. Duman mangyayari an saindang pagtangis asin an pagragot kan saindang mga ngipon.”—Mat. 13:48-50.

17. Sa anong peryodo nin panahon nanonongod an pagbubulagbulag na sinambit sa ilustrasyon dapit sa hikot?

¹⁷ An pagbubulagbulag daw na ini nanonongod sa pangultimong paghokom sa mga karnero asin kanding na sinabi ni Jesus na mangyayari kun dumatong na sia na igwa nin kamurawayan? (Mat. 25:31-33) Dai. An pangultimong paghokom na iyan mangyayari sa pagdatong ni Jesus durante kan dakulang kahorasaan. Sa kabaliktaran, an pagbubulagbulag na sinambit sa ilustrasyon dapit sa hikot mangyayari durante kan “pagtatapos kan sistema nin mga bagay.” * Ini an panahon na kinabubuhayan na niato ngonyan—an mga aldaw na masagkod sa dakulang kahorasaan. Kaya paano nangyayari ngonyan an pagbubulagbulag na ini?

18, 19. (a) Paano nangyayari an pagbubulagbulag ngonyan? (b) Anong lakdang an dapat na gibohon kan mga sadiosan an puso? (Helingon man an nota sa ibaba sa pahina 21.)

¹⁸ Sa literal, minilyon na simbolikong sira hale sa dagat nin katawohan an naakit sa kongregasyon ni Jehova sa modernong mga panahon. An nagkapira nag-aatender sa Memorial, an iba nag-aatender  sa satong mga pagtiripon, asin an iba pa naoogma na mag-adal kan Biblia. Alagad an gabos daw na ini nagigin tunay na mga Kristiano? Sinda tibaad ‘binutong pasiring sa baybayon,’ alagad sinasabi sa sato ni Jesus na “an mga marahay” sana an tinipon sa mga lalagan, na nagrerepresentar sa Kristianong mga kongregasyon. An mga dai maninigo inapon, na pag-abot nin panahon itatapok sa simbolikong nagkakalayong horno, na nangangahulogan nin kalaglagan sa ngapit.

¹⁹ Siring kan mga sira na dai maninigo, an dakol na dating nakipag-adal sa Biblia sa banwaan ni Jehova nagpondo na sa pag-adal. May mga namundag sa Kristianong mga magurang an nungka talagang nagmawot na magin parasunod sa lakad ni Jesus. Habo nindang magdesisyon na paglingkodan si Jehova o pagkatapos na maglingkod nin halipot na panahon sinda nagpondo. * (Ezeq. 33:32, 33) Pero, talagang kaipuhan na magin andam an gabos na sadiosan an puso na ilaog sa arog-lalagan na mga kongregasyon bago an pangultimong aldaw nin paghokom asin magdanay sa ligtas na lugar.

20, 21. (a) Ano an nanodan niato sa pagrepaso sa mga ilustrasyon ni Jesus mapadapit sa pagtalubo? (b) Ano an determinado mong gibohon?

²⁰ Kaya, ano an satong nanodan sa halipot na pagrepaso niato kan mga ilustrasyon ni Jesus mapadapit sa pagtalubo? Enot, arog kan pagtalubo kan pisog nin mustasa, an intereses kan Kahadean nagkaigwa nin dakulaon na pag-oswag digdi sa daga. Mayo nin makakapugol sa paglakop kan gibohon ni Jehova! (Isa. 54:17) Saro pa, nagkakaigwa nin espirituwal na proteksion an mga nagdagos o ‘nagtogdon sa limpoy kan kahoy na iyan.’ Ikaduwa, an Dios an nagpapatalubo kaiyan. Kun paanong an natatagong lebadura minalakop sa bilog na masa, an pagtalubong ini sa parate dai tolos naririsa o nasasabotan, alagad nangyayari iyan! Ikatolo, bakong gabos sa mga naghimate an nagpatunay na sinda maninigo. An nagkapira nagin arog kan dai maninigong mga sira sa ilustrasyon ni Jesus.

²¹ Pero, nakakaparigon nanggad sa boot na maheling an kadakol na maninigo na dinadagka ni Jehova! (Juan 6:44) Nagbunga ini nin pambihirang pag-oswag sa dakol na nasyon. Para ki Jehova Dios an gabos na kamurawayan huli sa pagtalubong ini. Mantang naheheling niato an pagtalubong ini, an lambang saro sa sato maninigong mamotibar na kuyogon an konseho na isinurat dakol na siglo na an nakaagi: “Pagkaaga isabwag mo an saimong banhi . . . , huli ta dai mo aram kun saen ini magigin mapanggana, kun baga digdi o duman, o kun baga sindang duwa pareho magigin marahay.”—Ecl. 11:6.

[Mga Nota sa Ibaba]

Ano an Isisimbag Nindo?

• An ilustrasyon ni Jesus dapit sa pisog nin mustasa nagtotokdo sa sato nin ano manongod sa pagtalubo kan Kahadean asin sa espirituwal na proteksion?

• Sa ano nagrerepresentar an lebadura sa ilustrasyon ni Jesus, asin anong katotoohan manongod sa pagtalubo kan Kahadean an idinoon ni Jesus?

• Anong aspekto kan pagtalubo kan Kahadean an pinapanongdan kan ilustrasyon dapit sa hikot?

• Paano niato masisierto na kita nagdadanay na kabilang sa mga ‘tinipon sa mga lalagan’?

[Mga Hapot Para sa Pag-adal]

[Mga Ritrato sa pahina 18]

An ilustrasyon dapit sa pisog nin mustasa nagtotokdo sa sato nin ano manongod sa pang-Kahadean na pag-oswag?

[Ritrato sa pahina 19]

Ano an manonodan niato sa ilustrasyon dapit sa lebadura?

[Ritrato sa pahina 21]

Ano an ilinaladawan kan pagbubulagbulag sa marahay na mga sira asin bakong maninigong mga sira?