Magkaigwa nin Rasonableng mga Linalaoman, Asin Magin Magayagaya

“NAGKULANG na naman ako!” Pirang beses na daw nindong nasabi an kaagid na mga tataramon huli ta dai nindo nagibo an saindong mga plinano? Tibaad ipahayag an siring na saboot nin sarong Kristianang hoben na ina huli ta nagagabatan sia sa daing katapusan na pag-aling sa bagong mamundag niang aki asin desganado sia na dai sia makatao nin orog na atension sa espirituwal na mga bagay. An saro man na Kristiano tibaad makamate na limitado sia huli kan klase nin pagpadakula sa saiya asin iniisip nia na nungka na nakagibo sia nin igo sa kongregasyon. An sarong may edad nang Saksi tibaad pinapanluyahan nin boot huli ta dai sia biyong nakakapakikabtang sa Kristianong mga aktibidad na ikinakaogma nia kan sia mas makosog asin mabagsik pa. “An sarong pahayag na nag-eenkaminar nin pagpapayunir kun beses igo nang makapahibi sa sako,” an komento ni Christiane, na huli kan kamugtakan kan saiyang pamilya naoolang na gibohon an talagang gusto niang magibo sa paglilingkod ki Jehova.

Paano daw niato aatubangon an siring kaiyan na mga saboot? Paano daw nakultibar nin nagkapirang Kristiano an realistikong pagmansay sa saindang mga kamugtakan? Ano an mga pakinabang sa pagkaigwa nin timbang na mga linalaoman?

Magin Rasonable

Itinao sa sato ni apostol Pablo an sarong paagi tanganing mapagdanay an satong kagayagayahan kan sia magsabi: “Danay kamong maggayagaya dian sa Kagurangnan. Sa giraray sasabihon ko, Maggayagaya kamo! Ipaaram nindo sa gabos na tawo an saindong pagkarasonable.” (Fil. 4:4, 5) Tanganing maeksperyensiahan niato an kagayagayahan asin satispaksion sa paglilingkod sa Dios, kaipuhan kitang magkaigwa nin rasonableng mga linalaoman kaoyon kan satong mga abilidad asin kamugtakan. Kun satong pinagmamaigotan na aboton an bakong rasonableng mga pasohan gurano man an sakripisyong kaipuhan, tinatawan sana niato an satong sadiri nin dai kinakaipuhan na tension. Sa ibong na lado, kaipuhan man niatong magmaan na dai kita magin sobra kaboot sa satong sadiri, na ginagamit an satong hinohonang mga limitasyon bilang sarahotan tanganing magluwayluway sa Kristianong ministeryo nin labi kisa sa kaipuhan.

Ano man an satong mga kamugtakan, kahagadan ni Jehova na itao niato sa saiya an satong pinakamakakaya—an satong bilog na kalag asin bilog na pusong paglilingkod. (Col. 3:23, 24) Kun dai niato itinatao ki Jehova an pinakamakakaya niato, dai kita nakakaotob sa satong pagdusay sa saiya. (Roma 12:1) Dugang pa, maoolang niato an satong sadiri na magkamit nin hararom na satispaksion, tunay na kagayagayahan, asin iba pang nagsosopay na bendisyon na bunga nin bilog na kalag na paglilingkod.—Tal. 10:22.

An termino na trinadusir sa Biblia na “rasonable” igwang ideya nin pagigin makonsiderasyon. Iyan sa literal nangangahulogan na “mapagpahunod.” (Sant. 3:17, nota sa ibaba) An terminong iyan igwa man kan kahulogan nin pagigin bakong sobra kaestrikto. Kaya, kun kita rasonable, magkakaigwa kita nin timbang na pagmansay sa satong mga kamugtakan. Depisil daw iyan na gibohon? Para sa nagkapira ini depisil, dawa ngani tibaad kaya nindang magin makonsiderasyon sa iba. Halimbawa, kun naririsa niato an labi-labing kapagalan kan saro niatong dayupot na katood huli sa sobrang trabaho, dai daw niato pagmamaigotan na tabangan siang masabotan na madonong an paggibo nin nagkapirang pagliliwat sa saiyang buhay? Sa kaparehong paagi, kaipuhan man kitang makanood na marisa an senyales na tibaad nagsasabi sa sato na minalihis na kita sa satong mga limitasyon.—Tal. 11:17.

An pagkaigwa nin rasonableng pagmansay sa satong mga limitasyon puedeng orog na magin masakit kun pinadakula kita nin mga magurang na depisilon mapanigoan. An pagmate kan nagkapira kan sinda aki pa kaipuhan ninda pirme na dagdagan an saindang nagigibo o umoswag pa tanganing mamotan sinda kan saindang mga magurang. Kun iyan an nangyari sa sato, tibaad igwa kita nin salang ideya mapadapit sa pagmansay ni Jehova sa sato. Namomotan kita ni Jehova huli ta bilog na puso an satong paglilingkod sa saiya. Sinisierto sa sato kan Tataramon nin Dios na si Jehova “nakakaaram na gayo kan pagkaporma sa sato, na ginigirumdom na kita kabokabo.” (Sal. 103:14) Aram nia an satong mga limitasyon asin namomotan nia kita kun sia maigot niatong pinaglilingkodan sa ibong kan mga iyan. An paggirumdom niato na an satong Dios bakong sarong estriktong kapatas matabang sa sato na magin kasiahan sana sa mga linalaoman niato sa satong sadiri, na rinerekonoser an satong mga limitasyon.—Miq. 6:8.

Sa ibong kaiyan, nadedepisilan pa man giraray an nagkapira na kultibaron an siring na timbang na aktitud. Kun totoo iyan sa saindo, taano ta dai patabang sa sarong eksperyensiadong Kristiano na midbid kamong marhay? (Tal. 27:9) Halimbawa, gusto daw nindong maglingkod bilang regular payunir? Marahayon na pasohan iyan! Nasasakitan daw kamong maotob iyan? Tibaad kaipuhan nindo nin tabang na pasimplehon an saindong buhay. O tibaad ipakipag-olay sa saindo kan pinagtitiwalaan nindong Kristianong katood kun baga praktikal na pasohan sa panahon na ini an pagigin regular payunir huli sa kadakol nindong responsabilidad sa pamilya. Makakatabang sia na saindong matimbang kun baga makakaya nindo an dagdag na mga aktibidad na gusto nindong pangakoan o kun anong mga pagliliwat an kaipuhan tanganing madagdagan an nagigibo nindo. Nasa marahay man na kamugtakan an sarong agom na lalaki na tabangan an saiyang agom na manodan kun anong rikas an bagay sa kakayahan kaini. Halimbawa, puedeng isuherir kan agom na lalaki na magpahingalo nguna an agom na babae bago nia ponan an bulan nin dinugangan na mga aktibidad. Tibaad madagdagan kaini an saiyang kosog asin tabangan sia na mapagdanay an saiyang kagayagayahan sa ministeryo.

Hanapon an mga Bagay na Kaya Nindong Gibohon

An pagkakaedad o nagluluyang salud puedeng nakakalimitar sa kaya niatong gibohon sa paglilingkod ki Jehova. Kun kamo sarong magurang, tibaad naghohona kamo na daing gayo kamo nakikinabang sa personal na pag-adal o Kristianong mga pagtiripon huling an kadaklan kan saindong oras asin kosog nauubos sa saindong saradit na aki. Minsan siring, posible daw na huli sa pagkonsentrar sa saindong mga limitasyon, kun beses dai na nindo naheheling kun ano an mga kaya pa nindong gibohon?

Rinibong mga taon na an nakaagi, may sarong Levita na nagpahayag nin pagmawot na imposible niang panigoan. Igwa siang pribilehio na maglingkod sa templo nin duwang semana kada taon. Minsan siring, nagpahayag sia nin pambihirang pagmawot na permanente nang mag-erok harani sa altar. (Sal. 84:1-3) Ano an nakatabang sa maimbod na tawong ini na magkaigwa nin pagkakontento? Narealisar nia na saro nang daing kaagid na pribilehio an dawa saro sanang aldaw sa patyo kan templo. (Sal. 84:4, 5, 10) Kaagid kaiyan, imbes na magkonsentrar sa satong mga limitasyon, pagmaigotan niatong aramon asin apresyaron kun ano an mga kaya niatong gibohon.

Gamiton niatong halimbawa si Nerlande, sarong tugang na Kristiana sa Canada. Sia nakasilyang de rueda asin nakamate na limitadong marhay an magigibo nia sa ministeryo. Minsan siring, binago nia an saiyang punto de vista. Ibinilang niang personal na teritoryo sa paghuhulit an kaharaning shopping mall. Ipinaliwanag nia: “Nagtutukaw ako sa sakong silyang de rueda harani sa sarong tukawan sa laog kan mall. Nakakamate ako nin kagayagayahan sa pagpatotoo sa mga tawo na minatukaw tanganing magpahingalo nin kadikit.” An pakikikabtang sa mahalagang paaging ini nin ministeryo nagtatao ki Nerlande nin dakulang satispaksion.

Gumibo nin mga Pagliliwat kun Kinakaipuhan

Tibaad kaskas na naglalayag an sarong baroto ta itinutulod kan doros an layag kaiyan. Minsan siring, kun an may kapot kan timon makasabat nin makosog na bagyo, mapipiritan siang liwaton an posisyon kan layag. Dai nia kontrolado an bagyo, alagad paagi sa paggibo nin mga pagliliwat, tibaad magdanay na kontrolado nia an saiyang baroto. Sa kaagid na paagi, parate man kitang mayong kontrol sa garo bagyong mga kamugtakan na inaatubang niato sa buhay. Pero puede niatong mapagdanay na kontrolado niato an satong buhay sagkod sa mapupuede paagi sa tamang paggamit kan satong pisikal, mental, asin emosyonal na mga kakayahan. Kun kinokonsiderar niato an satong bagong mga kamugtakan, tatabangan kita kaini na mapagdanay an satong satispaksion asin kagayagayahan sa paglilingkod sa Dios.—Tal. 11:2.

Estudyaran niato an nagkapirang halimbawa. Kun limitado an satong kosog, tibaad angay sana na likayan niato an biyong nakakapagal na mga aktibidad sa aldaw na iyan tanganing pagkabanggi may kosog pa kitang umatender sa Kristianong pagtiripon. Matogot ini sa sato na lubos na maaprobetsaran an satong pakikiasosyar sa mga kapwa niato Kristiano. O kun an sarong ina dai makakaiba sa ministeryo sa harong-harong huli ta may helang an saiyang aki, tibaad praktikal para sa saiya na imbitaran an sarong Kristianang tugang sa saiyang harong kaiba an inaadalan kaini sa Biblia tanganing makapakikabtang sia sa pag-adal mantang torog an aki.

Paano man kun dai itinotogot kan saindong kamugtakan na pag-adalan antes pa an gabos na pag-oolayan sa pagtiripon kan kongregasyon? Puede nindong determinaran kun ano an kaya nindong pag-adalan asin gibohon iyan sagkod sa pinakamakakaya nindo. Paagi sa pagliwat kan satong mga pasohan sa presente, puede kitang magdanay na aktibo asin maogma.

An pagliwat kan satong mga pasohan tibaad mangaipo nin determinasyon asin paghihingoa. Si Serge asin Agnes, mag-agom sa Pransia, kinaipuhan na gumibo nin dakulang pagliliwat sa saindang mga plano. “Kan maaraman niamong bados na si Agnes, an samong pangarap na magin mga misyonero nawara,” an sabi ni Serge. Ngonyan ama na nin duwang bibong aking babae, ipinaliwanag ni Serge kun paano sinda nagkaigwa nin bagong pasohan bilang mag-agom. Sia nagsabi: “Mantang dai kami nakapaglingkod sa ibang nasyon, nagdesisyon kami na magin mga ‘misyonero’ sa samong sadiring nasyon. Nag-asosyar kami sa sarong grupo na iba an lenguahe.” Nakinabang daw sinda sa pagkaigwa kan bagong pasohan na ini? Si Serge nagsabi: “Namamatean niamo na kami kapakipakinabang na marhay sa kongregasyon.”

Si Odile, sarong Kristianang tugang sa Pransia na labi nang 70 asin igwa nin osteoartritis sa tuhod, dai nakakatindog nin haloy. Nanluya an boot nia huling dai sia nakakapakikabtang sa ministeryo sa harong-harong dara kan saiyang helang. Minsan siring, dai sia suminuko. Liniwat nia an saiyang mga aktibidad paagi sa pakikikabtang sa paghuhulit gamit an telepono. Sia nagsabi: “Ini mas pasil asin nakakagayagaya kisa sa paghona ko!” Ibinalik kan paaging ini nin paghuhulit an saiyang motibasyon sa ministeryo.

An Rasonableng mga Linalaoman Nagtatao nin mga Bendisyon

An pagkultibar nin rasonableng pagmansay sa kaya niatong gibohon ililikay kita sa dakol na pagkadesganar. Paagi sa pagkaigwa nin timbang na mga pasohan, igwa kitang pakamate na may nagibo kita sa ibong kan satong mga limitasyon. Sa siring, makakapag-ogma kita sa kaya niatong gibohon, maski ngani iyan kadikit.—Gal. 6:4.

Mantang kinukultibar niato an pagkatimbang sa satong linalaoman sa sadiri, mas orog kitang magigin makonsiderasyon sa kapwa niato mga Kristiano. Huling aram an saindang mga limitasyon, pirme kitang magigin mapagpasalamat sa ginigibo ninda para sa sato. Paagi sa pag-apresyar sa ano man na itinataong tabang, nakakakontribwir kita sa espiritu nin kooperasyon asin pagkasinarabotan. (1 Ped. 3:8) Girumdoma, bilang mamomoton na Ama, si Jehova nungkang naghahagad sa sato nin labi sa kaya niatong itao. Asin kun kita igwa nin timbang na mga linalaoman asin mga pasohan na kayang aboton, an satong espirituwal na mga aktibidad matao sa sato nin orog na pagkakontento asin kagayagayahan.

[Blurb sa pahina 29]

Tanganing maeksperyensiahan niato an kagayagayahan asin satispaksion sa paglilingkod sa Dios, kaipuhan kitang magkaigwa nin rasonableng mga linalaoman kaoyon kan satong mga abilidad asin kamugtakan

 [Ritrato sa pahina 30]

Nakakamate si Nerlande nin kagayagayahan sa paggibo kan makakaya nia sa ministeryo

 [Ritrato sa pahina 31]

Makanood na “liwaton an posisyon kan layag”

[Credit Line]

© Wave Royalty Free/age fotostock

 [Ritrato sa pahina 32]

Nakinabang si Serge asin Agnes sa pagkaigwa nin bagong mga pasohan