Pag-atubang sa mga Kadepisilan kan Ministeryo sa Harong-Harong
Pag-atubang sa mga Kadepisilan kan Ministeryo sa Harong-Harong
“Kami nagpakapusoan paagi sa samong Dios na magtaram sa saindo kan maogmang bareta nin Dios na may dakulang paglapigot.”—1 TES. 2:2.
1. Anong mga kadepisilan an inatubang ni Jeremias, asin paano nia iyan napangganahan?
SI Jeremias sarong tawo na may mga pagmate na kapareho niato. Kan impormaran sia ni Jehova dapit sa sugo sa saiya na magin “propeta sa mga nasyon,” sia nagkagsing: “Ah, O Soberanong Kagurangnan na Jehova! Uya dai talaga ako tataong magtaram, huli ta aki pa ako.” Minsan siring, huling nagtitiwala ki Jehova, inako nia an asignasyon na iyan. (Jer. 1:4-10) Sa laog nin labing 40 taon, napangganahan ni Jeremias an pagkaindiperente, pagsayuma, pag-olog-olog, asin pati an pisikal na kadahasan. (Jer. 20:1, 2) Kun beses, an pagmate nia garo gusto na niang sumuko. Pero, nagmaigot siang ipahayag an ikinakauyam na mensahe sa kadaklan na habong maghinanyog. Huli sa kosog nin Dios, nagibo ni Jeremias an nungka kutanang nagibo nia kun sia sana.—Basahon an Jeremias 20:7-9.
2, 3. Paano an mga lingkod nin Dios ngonyan napapaatubang sa kaparehong mga kadepisilan na inatubang ni Jeremias?
2 Maiintindihan kan dakol sa mga lingkod nin Dios ngonyan an mga pagmate ni Jeremias. Kan hinohorophorop an oportunidad na maghulit sa harong-harong, an nagkapira sa sato naghona kaidto na ‘Nungka kong magigibo iyan.’ Pero, kan marealisar niato na kabotan ni Jehova na ibalangibog niato an maogmang bareta, napangganahan niato an satong pagkahandal asin nagin sibot kita sa paghuhulit. Dawa siring, dakol sa sato an napaatubang sa mga kamugtakan sa satong buhay na huli kaiyan nagin depisil, kisiera sa laog nin kadikit na panahon, na padagos na maghulit. Totoo, depisil na magpoon sa paghuhulit sa harong-harong asin na padagos na maghulit sagkod sa katapusan.—Mat. 24:13.
3 Paano kun haloy-haloy ka nang nakikipag-adal sa Biblia sa mga Saksi ni Jehova asin nag-aatender sa mga pagtiripon kan kongregasyon alagad nagduduwaduwa na magpoon sa paghuhulit sa harong-harong? O paano kun ika sarong bautisadong Saksi na nadedepisilan na makikabtang sa pagharongharong, minsan ngani kaya kan saimong hawak na gibohon iyan? Makakasierto kamo na an mga tawo hale sa gabos na kamugtakan sa buhay nakakapanggana sa mga kadepisilan kan ministeryo sa harong-harong. Paagi sa tabang ni Jehova, mapapangganahan man nindo iyan.
Magpakapusoan Kamo
4. Ano an nagpangyari ki apostol Pablo na may pagkapusoan na magtaram kan maogmang bareta?
4 Daing duwa-duwa na naririsa nindo na an lakop sa kinaban na paghuhulit nagigibo, bakong paagi sa kapangyarihan o kadonongan nin tawo, kundi paagi sa espiritu nin Dios. (Zac. 4:6) Totoo man iyan manongod sa ministeryo nin indibiduwal na mga Kristiano. (2 Cor. 4:7) Isip-isipa si apostol Pablo. Ginigirumdom an panahon kan sia asin an kaiba nia sa pagmimisyonero minaltrato kan mga paratumang, sia nagsurat: “Pakatapos na kami magdusa nguna asin trataron nin daing galang . . . sa Filipos, kami nagpakapusoan paagi sa samong Dios na magtaram sa saindo kan maogmang bareta nin Dios na may dakulang paglapigot.” (1 Tes. 2:2; Gibo 16:22-24) Tibaad depisil para sa sato na isipon na an sarong maigot na parahulit arog ni Pablo may mga panahon na kinaipuhan na maglapigot tanganing makapaghulit. Pero, kapareho niato gabos, kinaipuhan ni Pablo na magtiwala ki Jehova tanganing may pagkapusoan na magtaram kan maogmang bareta. (Basahon an Efeso 6:18-20.) Paano niato maaarog an halimbawa ni Pablo?
5. Ano an sarong paagi na kita puedeng magin pusoan sa paghuhulit?
5 An sarong paagi na kita magin pusoan sa paghuhulit iyo an pamimibi. An sarong payunir nagsabi: “Namimibi ako na logod makapagtaram ako na may kompiansa, na logod aboton ko an puso kan mga tawo, asin na logod maeksperyensiahan ko an kagayagayahan sa ministeryo. Total, ini bakong gibohon niato, kundi ki Jehova, kaya mayo kitang magigibo kun mayo kan tabang nia.” (1 Tes. 5:17) Kita gabos kaipuhan na pirmeng mamibi na logod tabangan kita kan banal na espiritu nin Dios tanganing makapaghulit na may pagkapusoan.—Luc. 11:9-13.
6, 7. (a) Anong bisyon an inako ni Ezequiel, asin ano an kahulogan kaiyan? (b) Anong leksion para sa mga lingkod nin Dios ngonyan an itinatao kan bisyon ni Ezequiel?
6 An libro nin Ezequiel may iba pang ihinahayag na makakatabang sa sato na magtaram na may pagkapusoan. Sa sarong bisyon, tinawan ni Jehova si Ezequiel nin sarong rolyo na sa ibabaw asin sa likod kaiyan may nakasurat na “mga panambitan asin mga hinanakit patin mga inagrangay” saka sinabihan sia na kakanon iyan, na nagsasabi: “Aki nin tawo, maninigo mong papangyarihon na kumakan an saimong tulak, tanganing basogon mo an saimong bituka kan rolyo na ini na itinatao ko sa saimo.” Ano an kahulogan kan bisyon na ini? Kaipuhan na lubos na masabotan ni Ezequiel an mensahe na itatao nia. Kaipuhan na iyan magin kabtang nia, na garo baga iyan nakakaapektar sa kalaoglaoging mga pagmate nia. An propeta padagos na nagsasaysay: “Pinonan kong kakanon iyan, asin sa sakuyang ngoso iyan nagin garo tangguli sa hamis.” Para ki Ezequiel, an pagpahayag sa publiko kan mensahe nin Dios nakakaogmang marhay—siring sa pagnamit nin tangguli. An pagmate nia, labi-labing pribilehio an pagrepresentar ki Jehova asin an pag-otob kan itinao nin Dios na asignasyon na ini, minsan ngani nangahulogan iyan nin pagtao nin mapuersang mensahe sa mga tawo na habong mag-ako.—Basahon an Ezequiel 2:8–3:4, 7-9.
7 An bisyon na ini may mahalagang leksion para sa mga lingkod nin Dios ngonyan. Igwa man kita nin mapuersang mensahe na kaipuhan na itao sa mga tawo na bako pirmeng mapag-apresyar sa mga paghihingoa niato. Tanganing makapagpadagos kita na mansayon an Kristianong ministeryo bilang sarong pribilehio na itinao nin Dios, dapat na kita igong nagkakakan sa espirituwal. An paramas sana o bakong regular na ugale sa pag-adal dai magigin igo tanganing lubos niatong masabotan an Tataramon nin Dios. Mapapaoswag daw nindo an kualidad o an pagigin regular kan saindong personal na pagbasa asin pag-adal sa Biblia? Puede daw na mas parate nindong horophoropon an manongod sa saindong binasa?—Sal. 1:2, 3.
Pagpoon nin mga Pakikipag-olay Basado sa Biblia
8. Anong pamamaagi an nakakatabang sa nagkapirang parahayag kan Kahadean na makapoon nin mga pakikipag-olay basado sa Biblia sa ministeryo sa harong-harong?
8 Para sa dakol na parahayag, an pinakadepisil na kabtang kan ministeryo sa harong-harong iyo an enot na pakikipag-olay sa kagharong. Totoo, sa nagkapirang teritoryo depisil na magpoon nin mga pakikipag-olay. Kun nakikipag-olay sa mga tawo an nagkapirang parahayag, mas pamugtak an boot ninda kun pinoponan ninda an saindang presentasyon paagi sa halipot asin piniling marhay na mga tataramon dangan tinatawan nin pulyeto an kagharong, siring kan ipinapaheling sa kaibanan na kahon. An titulo kan pulyeto o an makolor na ilustrasyon kaiyan puedeng makaakit sa atension kan kagharong, na nagigin posible na sambiton niato nin halipot sana an katuyohan kan satong pagdalaw asin na kita makapaghapot. An saro pang paagi iyo an pagpaheling sa kagharong nin tolo o apat na laen-laen na pulyeto asin papilion sia nin sarong pulyeto na interesante para sa saiya. Siempre, an pasohan niato bako sanang makapasakamot nin mga pulyeto o magamit iyan sa lambang harong kundi makapoon nin mga pakikipag-olay basado sa Biblia na nagbubunga nin mga pag-adal sa Biblia.
9. Taano ta mahalaga an marahay na pag-andam?
9 Ano man na pamamaagi an ginagamit nindo, an marahay na pag-andam matabang sa saindo na magkaigwa nin kompiansa asin entusiasmo sa ministeryo sa harong-harong. An sarong payunir nagsabi: “May orog akong kagayagayahan kun ako andam na marhay. Huli kaiyan, gustohon kong ipakipag-olay an presentasyon na inandam ko.” An saro pang payunir nagsabi, “Kun pamilyar ako sa mga laog kan publikasyon na iaalok ko, nagigin entusiastiko ako na gamiton iyan.” Minsan ngani igwa nin pakinabang an silensiong pagrepaso sa saindong sasabihon, napatunayan nin dakol na mas nakakatabang an makosog an boses na pag-ensayo kan saindang presentasyon. An paggibo kaiyan nakakatabang sa sainda na itao ki Jehova an pinakamakakaya ninda.—Col. 3:23; 2 Tim. 2:15.
10. Ano daw an magigibo tanganing magin praktikal asin kapakipakinabang an mga pagtiripon bago maglingkod sa langtad?
10 An praktikal na mga pagtiripon bago maglingkod sa langtad nakakakontribwir sa satong pagigin epektibo asin kagayagayahan sa ministeryo sa harong-harong. Kun an pangaroaldaw na teksto direktamenteng nagtotokar dapit sa paghuhulit, iyan puedeng basahon asin pag-olayan nin halipot sana. Minsan siring, an tugang na lalaki na namamayo sa pagtiripon bago maglingkod sa langtad maninigong magtao nin igong panahon na ipakipag-olay o idemonstrar an sarong simpleng presentasyon na tamang-tama sa teritoryo o na ipakipag-olay an iba pang praktikal na impormasyon na magagamit sa ministeryo sa aldaw na iyan. Orog kaining masasangkapan an mga presente na makapagpatotoo nin epektibo. Paagi sa marahay asin patienot na pag-andam, magigibo ini kan kamagurangan asin kan iba pa na namamayo sa mga pagtiripon na ini asin matatapos pa ninda an pagtiripon sa laog kan itinalaan na oras.—Roma 12:8.
An Puersa nin Paghinanyog
11, 12. Paano an may pagmalasakit na paghinanyog nakakatabang sa sato na aboton kan maogmang bareta an puso kan mga tawo? Magtao nin mga halimbawa.
11 Bako sanang marahay na pag-andam kundi hararom na personal na interes sa iba an nakakatabang sa sato na makapoon nin mga pakikipag-olay basado sa Biblia asin aboton an puso kan mga tawo sa ministeryo. An sarong paagi na ipinapaheling niato an siring na interes iyo an kun paano kita naghihinanyog. An sarong nagbibiaheng paraataman nagsabi: “An pagigin mapasensia asin an pagpaheling nin pagigin andam na maghinanyog sa mga tawo igwa nin makangangalas na puersa na nakakaakit saka saro iyan na marahayon na kapahayagan nin mainit na personal na interes.” An mapagmalasakit na paghinanyog puedeng magpahiro sa kagharong na mas maghinanyog, siring kan ipinapaheling kan sunod na eksperyensia.
12 Sa sarong surat para sa publiko na ipinublikar sa diaryong Le Progrès, kan Saint-Étienne, Pransia, ilinadawan nin sarong babae an pagdalaw nin duwang tawo na nagtuktok sa saiyang pinto dai nahaloy pagkatapos na maeksperyensiahan nia an makamomondong pagkagadan kan saiyang tolong bulan na omboy na babae. “Tolos-tolos na namidbid ko sinda bilang mga Saksi ni Jehova,” an isinurat nia. “Papahaleon ko na kutana sinda sa magalang na paagi, alagad ta nariparo ko an brosyur na iinaalok ninda. Manongod iyan sa kun taano ta tinotogotan nin Dios an pagsakit. Kaya nagdesisyon ako na padagoson sinda na may intension na patunayan na biyong sala an saindang mga argumento. . . . Nagdanay an mga Saksi nin labi-labi sa sarong oras. Naghinanyog sinda sa sako na may dakulang pagmalasakit, asin kan sinda pahale na, mas marahay na nanggad an pagmate ko kaya nag-oyon ako sa saro pang pagdalaw.” (Roma 12:15) Pag-abot nin panahon, an babaeng ini nag-ako nin pag-adal sa Biblia. Ihinahayag kaiyan na an nagigirumdoman nia sa enot na pagdalaw na iyan, bakong an sinabi kan mga Saksi, kundi kun paano sinda naghinanyog.
13. Paano niato puedeng ibagay sa mga indibiduwal na nakakaolay niato an satong presentasyon kan maogmang bareta?
13 Kun naghihinanyog kita na may pagmalasakit, an totoo tinotogotan niato an mga tawo na sabihon sa sato kun taano ta kaipuhan ninda an Kahadean. Huli kaini, kita nasa kamugtakan nanggad na sabihon sa sainda an maogmang bareta. Posibleng marhay na naobserbaran nindo na an epektibong mga ebanghelisador sa parate matibay maghinanyog. (Tal. 20:5) Nagpapaheling sinda nin tunay na interes sa mga tawo na nakakaolay ninda sa ministeryo. Isinusurat ninda bako sanang an ngaran asin adres kan mga tawo kundi siring man an mga pinagkakainteresan asin pangangaipo kaini. Kun may saro na nagsasabi nin espesipikong kapurisawan, sinda nagsisiyasat asin minabalik tolos tanganing sabihon an impormasyon na nakua ninda. Arog ni apostol Pablo, ibinabagay ninda sa mga indibiduwal na nakakaolay ninda an saindang presentasyon kan mensahe kan Kahadean. (Basahon an 1 Corinto 9:19-23.) An siring na sinserong interes nakakaakit sa mga tawo sa maogmang bareta asin makangangalas na nagpapabanaag kan “mamomoton na pagmalasakit kan satong Dios.”—Luc. 1:78.
Papagdanayon an Positibong Saboot
14. Mantang ginigibo niato an satong ministeryo, paano niato ikakapabanaag an mga kualidad ni Jehova?
14 Tinawan kita ni Jehova nin dignidad paagi sa pagtao sa sato nin libreng kabotan. Minsan ngani sia Makakamhan sa Gabos na Dios, dai nia pinipirit an siisay man na maglingkod sa saiya kundi pinapakiolayan nia an mga tawo basado sa pagkamoot, na binebendisyonan an mga mapag-apresyar na naghihimate sa saiyang makangangalas na mga probisyon. (Roma 2:4) Bilang saiyang mga ministro, maninigo na magin andam kitang ipresentar an maogmang bareta, sa kada pagpatotoo niato, sa paagi na angay sa satong maheherakon na Dios. (2 Cor. 5:20, 21; 6:3-6) Sa katuyohan na iyan, kaipuhan niatong papagdanayon an positibong saboot sa mga tawo sa satong teritoryo. Ano an makakatabang sa sato na mapangganahan an kadepisilan na ini?
15. (a) Anong instruksion an itinao ni Jesus sa saiyang mga apostol na dapat nindang gibohon kun haboan kan mga tawo an mensahe? (b) Ano an makakatabang sa sato na magkonsentrar sa paghanap kan mga maninigo?
15 Pinagbotan ni Jesus an saiyang mga parasunod na dai maghadit nin labi-labi kun hinahaboan nin nagkapira an mensahe, kundi, imbes magkonsentrar sa paghanap kan mga maninigo. (Basahon an Mateo 10:11-15.) An pagbugtak nin simple asin kayang aboton na mga pasohan makakatabang sa sato na magibo ini. Sarong tugang na lalaki an ikinomparar an saiyang sadiri sa sarong prospector nin bulawan. An saiyang sarabihon iyo an, “Inaantisipar ko na makakakua ako nin bulawan ano man na oras ngonyan.” An saro pang tugang na lalaki igwa nin pasohan na “may makaolay na interesado kada semana asin magbalik liwat pakalihis nin nagkapirang aldaw tanganing pataluboon an interes.” Hinihingoa nin nagkapirang parahayag na kun posible magbasa nin kisiera sarong teksto sa kada kagharong. Anong realistikong pasohan an puede mong ibugtak para sa sadiri mo?
16. Ano an mga dahelan niato na padagos na maghulit?
16 An kapangganahan kan ministeryo sa harong-harong dai nakadepende sana sa reaksion kan mga tawo sa teritoryo. Totoo, an paghuhulit may mahalagang marhay na papel sa kaligtasan kan mga sadiosan an puso, alagad igwa man iyan nin iba pang mahalagang mga katuyohan. An Kristianong ministeryo nagtatao sa sato nin oportunidad na patunayan an satong pagkamoot ki Jehova. (1 Juan 5:3) Pinapangyayari kaiyan na malikayan niato an kasalan sa dugo. (Gibo 20:26, 27) Nagpapatanid iyan sa mga bakong diosnon na ‘nag-abot na an oras kan paghokom nin Dios.’ (Kap. 14:6, 7) Orog sa gabos, paagi sa paghuhulit kan maogmang bareta, inoomaw an ngaran ni Jehova sa bilog na daga. (Sal. 113:3) Huli kaini, baga man an mga tawo naghihinanyog o dai, dapat na padagos niatong ibalangibog an mensahe kan Kahadean. Sa katunayan, an gabos na paghihingoa niato na ibalangibog an maogmang bareta magayon sa pagheling ni Jehova.—Roma 10:13-15.
17. Ano an mapipiritan na admitiron kan mga tawo sa dai na mahahaloy?
17 Minsan ngani dakol ngonyan an dai nag-iintindi sa satong paghuhulit, sa dai mahahaloy magigin laen na an pagmansay ninda dian. (Mat. 24:37-39) Inasegurar ni Jehova si Ezequiel na kun magin totoo na an mga paghokom na ibinalangibog nia, an rebeldeng kamag-anakan nin Israel ‘siertong makakaaram man na an sarong propeta mismo namugtak sa tahaw ninda.’ (Ezeq. 2:5) Siring man, kun gibohon na nin Dios an saiyang mga paghokom sa presenteng sistema nin mga bagay, mapipiritan an mga tawo na admitiron na an mensahe kan Mga Saksi ni Jehova na ihinuhulit sa pampublikong mga lugar asin sa harong-harong sa katunayan naggikan sa sarong tunay na Dios, si Jehova, asin na an mga Saksi talagang nagserbing mga representante nia. Kanigoan na pribilehio niato na darahon an saiyang ngaran asin ipahayag an saiyang mensahe sa mahalagang mga panahon na ini! Paagi sa tabang nia, logod na padagos niatong mapangganahan an mga kadepisilan sa ministeryo sa harong-harong.
Ano an Isisimbag Nindo?
• Paano kita puedeng magin pusoan sa paghuhulit?
• Ano an makakatabang sa sato na makapoon nin mga pakikipag-olay basado sa Biblia sa ministeryo sa harong-harong?
• Paano niato ikakapaheling an sinserong interes sa iba?
• Ano an makakatabang sa sato na papagdanayon an positibong saboot sa mga tawo sa satong teritoryo?
[Mga Hapot Para sa Pag-adal]
[Kahon/Ritrato sa pahina 9]
Sarong Paagi na Makapoon nin mga Pakikipag-olay Basado sa Biblia
Bilang pagpoon:
▪ Pagkatapos na taratarahon nindo an kagharong, puede nindo siang tawan nin pulyeto asin magsabi, “An katuyohan ko sa pagdalaw ngonyan iyo na ipaabot an nakakaparigon sa boot na punto de vista manongod sa mahalagang temang ini.”
▪ O puede kamong mag-alok nin pulyeto asin magsabi, “Ako nagdadalaw nin madali sana ngonyan huling interesado ako na maaraman kun ano an saboot nindo manongod sa temang ini.”
Kun nag-ako nin pulyeto:
▪ Dai minapondo nin haloy, magpalataw nin simpleng hapot sa kagharong, basado sa titulo kan pulyeto, tanganing maaraman an saiyang punto de vista.
▪ Maingat na maghinanyog, na hinihingoang masabotan an mga punto de vista kan kagharong. Maboot na pasalamatan sia sa saiyang komento.
Bilang pagpadagos nin pakikipag-olay:
▪ Basahon asin tokaron an saro o labi pang teksto, na ibinabagay an saindong presentasyon sa pinagkakainteresan asin pangangaipo kan kagharong.
▪ Kun nagpaheling nin interes, mag-alok nin babasahon asin kun posible idemonstrar an pag-adal sa Biblia. Iareglo an pagdalaw liwat.