Tampok na mga Kabtang sa mga Surat sa mga Taga Corinto
An Tataramon ni Jehova Buhay
Tampok na mga Kabtang sa mga Surat sa mga Taga Corinto
NAHAHADIT na gayo si apostol Pablo manongod sa espirituwal na kapakanan kan kongregasyon sa Corinto. Nabaretaan nia na may mga dai pagkaoroyon sa tahaw kan mga tugang duman. Tinotogotan an imoralidad. Nagsurat man an kongregasyon ki Pablo, na naghahapot manongod sa nagkapirang bagay. Kaya kan mga 55 C.E., kan sia nasa Efeso durante kan saiyang ikatolong pagbiahe sa pagmimisyonero, isinurat ni Pablo an enot sa saiyang duwang surat sa mga taga Corinto.
An ikaduwang surat, na minalataw na ginibo pira sanang bulan pakatapos kan enot, kasumpay kan naenot na surat. Huling an mga kamugtakan sa laog sagkod luwas kan kongregasyon nin Corinto kan enot na siglo kapareho kan sa satong panahon sa dakol na paagi, an mensahe kan mga surat ni Pablo sa mga taga Corinto may dakulang halaga sa sato.—Heb. 4:12.
‘MAGPUKA KAMO, MANINDOGAN NA MARIGON, MAGIN MAKOSOG KAMO’
“Kamo gabos maninigong magtaram na may pagkaoroyon,” an sadol ni Pablo. (1 Cor. 1:10) ‘Mayo nin ano man na ibang pundasyon apuera ki Jesu-Cristo,’ na dian itinotogdok an Kristianong mga kualidad. (1 Cor. 3:11-13) Mapadapit sa sarong parapakisaro na nasa kongregasyon, si Pablo nagsabi: “Haleon nindo an maraot na tawo sa tahaw nindo.” (1 Cor. 5:13) “An hawak bakong para sa pakikisaro,” an sabi nia, “kundi para sa Kagurangnan.”—1 Cor. 6:13.
Bilang simbag sa “mga bagay na isinurat [ninda],” si Pablo nagtao nin marahay na hatol mapadapit sa pag-agom asin pagigin daing agom. (1 Cor. 7:1) Pakatapos na magkomento manongod sa Kristianong pagkapayo, sa pagigin areglado sa Kristianong mga pagtiripon, asin sa pagigin sierto kan pagkabuhay liwat, itinao ni Pablo an sadol na: “Magpuka kamo, manindogan na marigon sa pagtubod, magpakalalaki kamo, magin makosog kamo.”—1 Cor. 16:13.
Mga Hapot sa Kasuratan na Sinimbag:
1:21—Talaga daw na ginagamit ni Jehova an “kalolongan” tanganing iligtas an mga minatubod? Dai nanggad. Minsan siring, huling “an kinaban paagi sa kadonongan kaiyan dai nakamidbid sa Dios,” an ginagamit nia tanganing iligtas an mga tawo garo baga kalolongan para sa kinaban.—Juan 17:25.
5:5—Ano an boot sabihon na ‘itao an maraot na tawo ki Satanas para sa paglaglag kan laman, tanganing an espiritu makaligtas’? Kun natiwalag sa kongregasyon an habong magsolsol na paragibo nin magabat na kasalan, sia nagigin kabtang giraray kan maraot na kinaban ni Satanas. (1 Juan 5:19) Huli kaini, sinasabing sia itinatao ki Satanas. An pagtiwalag sa tawong iyan minaresulta sa paglaglag, o paghale, kan nakakadigtang elemento sa kongregasyon, asin sa pagpreserbar kan espiritu, o nangingibabaw na kaisipan kaiyan.—2 Tim. 4:22.
7:33, 34—Ano an boot sabihon kan “mga bagay kan kinaban” na ikinakapurisaw nin lalaki o babae na may agom? An pinapanongdan ni Pablo iyo an pangaroaldaw na mga bagay sa buhay na kaipuhan na ikahadit nin mga Kristianong may agom. Kaiba digdi an kakanon, gubing, asin istaran, alagad dai kaiba digdi an mararaot na bagay kan kinaban na ini, na rinarayoan nin mga Kristiano.—1 Juan 2:15-17.
11:26—Kan sambiton ni Pablo na “kada” girumdomon an kagadanan ni Jesus, gurano kaparate an kada paggirumdom, asin “sagkod” noarin? Sinasabi ni Pablo kaidto na kada makikabtang sa mga emblema sa Memorial an linahidan na mga Kristiano, sarong beses kada taon, sa Nisan 14, sinda ‘nagbabalangibog kan kagadanan kan Kagurangnan.’ Ginigibo ninda ini “sagkod na sia dumatong,” an boot sabihon, sagkod na akoon nia sinda sa kalangitan paagi sa pagkabuhay liwat.—1 Tes. 4:14-17.
13:13—Sa anong paagi na an pagkamoot nakakalabi sa pagtubod asin paglaom? Kun an “mga bagay na linalaoman” nagin nang totoo asin “an siertong paghalat” dian nangyari na, may mga aspekto an pagtubod asin paglaom na natatapos na. (Heb. 11:1) An pagkamoot nakakalabi sa pagtubod asin paglaom huli ta iyan nagdadanay sagkod lamang.
15:29—Ano an boot sabihon na ‘mabautismohan sa katuyohan na magin mga gadan’? Dai isinusuherir ni Pablo na an mga buhay mabautismohan para sa mga nagadan na dai nabautismohan. Si Pablo nagtataram digdi manongod sa paglaog nin mga Kristianong linahidan nin espiritu, sa sarong pamumuhay na pinagdadanay ninda an saindang integridad sagkod na sinda magadan asin pakatapos kaiyan buhayon na liwat pasiring sa espiritung buhay.
Mga Leksion Para sa Sato:
1:26-31; 3:3-9; 4:7. Kun mapakumbaba niatong ipinaghahambog si Jehova, bakong an satong sadiri, napapaoswag an pagkasararo sa kongregasyon.
2:3-5. Mantang nagpapatotoo sa Corinto, na sentro nin pilosopiya asin kaaraman na Griego, tibaad nahadit si Pablo kun baga makokombensir nia an mga naghihinanyog sa saiya. Minsan siring, dai nia tinogotan an ano man na kaluyahan o pagkatakot na tibaad yaon sa saiya na makaolang sa paggibo kan ministeryo na itinao sa saiya nin Dios. Siring man, maninigo na dai niato pagtogotan an dai kinatodan na mga kamugtakan na pugolan kita sa pagpahayag kan maogmang bareta kan Kahadean nin Dios. May kompiansa kitang makakalaom ki Jehova para sa tabang siring kan ginibo ni Pablo.
2:16. An pagkaigwa kan “isip ni Cristo” nangangahulogan nin pag-aram sa dalagan kan saiyang kaisipan, pag-isip nin siring sa saiya, lubos na pakasabot sa saiyang personalidad, asin pag-arog sa saiyang halimbawa. (1 Ped. 2:21; 4:1) Mahalaga nanggad na maingat niatong pag-adalan an buhay asin ministeryo ni Jesus!
3:10-15; 4:17. Maninigo niatong siyasaton asin paoswagon an satong abilidad na magtokdo asin gumibo nin mga disipulo. (Mat. 28:19, 20) Kun bakong marahay an paagi kan satong pagtotokdo, tibaad an satong inaadalan sa Biblia dai makatagal sa mga pagbalo sa pagtubod, asin tibaad makolgan kitang gayo na dai sia nakatagal kaya an satong kaligtasan magigin “garo nag-agi sa kalayo.”
6:18. An ‘pagdulag sa pakikisaro’ nangangahulogan nin paglikay bako sanang sa mga gibo na por·neiʹa kundi patin sa pornograpiya, pagkamaati sa moral, pag-imahinar nin seksuwal na mga bagay, pakigitilan—ano man na puedeng magresulta sa pakikisaro.—Mat. 5:28; Sant. 3:17.
7:29. An mga mag-agom dapat na mag-ingat na dai maubos sa lambang saro an atension ninda na huli kaiyan an intereses kan Kahadean nagigin ikaduwang bagay na sana sa saindang buhay.
10:8-11. Nakolgan na gayo an boot ni Jehova kan maggumodgumod an Israel tumang ki Moises asin Aaron. Madonong kita kun nagmamaan kita na dai mapatalubo an ugale na paggumodgumod.
16:2. An pinansial na pagtao niato para sa pag-oswag kan intereses kan Kahadean magigin daing liwat-liwat kun iyan pinaplano antes pa asin ginigibo sa sistematikong paagi.
‘PADAGOS KAMONG MAPAKARHAY GIRARAY’
Sinabihan ni Pablo an mga taga Corinto na maninigo nindang “maboot na patawadon asin rangahon” an sarong nagsosolsol na nagkasala na sinaway. Minsan ngani napamondo sinda kan enot na surat ni Pablo, nagpahayag sia nin kagayagayahan huli ta sinda “napamondo sagkod sa pagsolsol.”—2 Cor. 2:6, 7; 7:8, 9.
‘Kun paanong sinda abunda sa gabos na bagay,’ dinadagka ni Pablo an mga taga Corinto na ‘magin abunda sa pagtao.’ Pakatapos na simbagon an mga paratumang, nagtao sia nin pangultimong sadol sa gabos: “Padagos kamong maggayagaya, mapakarhay giraray, maranga, mag-isip na may pagkaoroyon, mamuhay na matoninong.”—2 Cor. 8:7; 13:11.
Mga Hapot sa Kasuratan na Sinimbag:
2:15, 16—Sa anong paagi na kita “mahamot na parong ni Cristo”? Ini huling sinusunod niato an Biblia asin nakikikabtang kita sa paghuhulit kan mensahe kaiyan. Minsan ngani an siring na “hamot” tibaad makababalde sa bakong matanos na mga indibiduwal, iyan mahamot para ki Jehova asin sa mga sadiosan an puso.
5:16—Sa anong paagi na an linahidan na mga Kristiano ‘dai minimidbid an siisay man segun sa laman’? Dai ninda minamansay an mga tawo sa makalaman na paagi, an boot sabihon, nagpapaheling nin paboritismo basado sa kayamanan, rasa, o ginikanan na etniko o nasyon. An mahalaga sa sainda iyo an saindang espirituwal na relasyon sa mga kapagtubod.
11:1, 16; 12:11—Si Pablo daw nagigin bakong rasonable kaidto sa mga taga Corinto? Dai nanggad. Minsan siring, tibaad para sa iba, sia garo hambogon asin bakong rasonable huli sa napiritan niang sabihon bilang pagdepensa sa saiyang pagkaapostol.
12:1-4—Siisay an “inagaw pasiring sa paraiso”? Huling an Biblia mayong sinasabi manongod sa siisay man na tawong nagkaigwa nin siring na bisyon asin an tekstong iyan kasunod kan pagdepensa ni Pablo sa saiyang pagkaapostol, posibleng marhay na isinasaysay nia an saiya mismong eksperyensia. An naheling kan apostol sa bisyon posibleng marhay na iyo an espirituwal na paraisong naeeksperyensiahan kan Kristianong kongregasyon sa “panahon kan katapusan.”—Dan. 12:4.
Mga Leksion Para sa Sato:
3:5. Sa pundamental, sinasabi sa sato kan bersikulong ini na pinapangyayari ni Jehova na magin biyong kualipikado an mga Kristiano para sa ministeryo paagi sa saiyang Tataramon, sa saiyang banal na espiritu, asin sa daganon na kabtang kan saiyang organisasyon. (Juan 16:7; 2 Tim. 3:16, 17) Maninigo na kita mahigos na mag-adal sa Biblia asin sa mga publikasyon na basado sa Biblia, determinadong mamibi para sa banal na espiritu, asin regular na mag-atender asin makikabtang sa Kristianong mga pagtiripon.—Sal. 1:1-3; Luc. 11:10-13; Heb. 10:24, 25.
4:16. Huling binabago ni Jehova ‘an satong pagkatawo sa laog aroaldaw,’ maninigo niatong regular na aprobetsaran an mga probisyon ni Jehova, na dai pinapalihis an sarong aldaw na dai kinokonsiderar an espirituwal na mga bagay.
4:17, 18. An paggirumdom na “an kahorasaan minaagi sana asin magian” makakatabang sa sato na magdanay na maimbod ki Jehova sa panahon nin kasakitan.
5:1-5. Magayon nanggad an pagkapahayag ni Pablo kan mga saboot nin linahidan na mga Kristiano dapit sa saindang paglaom na langitnon na buhay!
10:13. Sa pangkagabsan, apuera sana kun may espesipikong mga areglong ginibo tanganing tumabang kita kun saen mas dakula an pangangaipo, maninigo na an hulitan sana niato iyo an teritoryong inasignar sa satong kongregasyon.
13:5. Tanganing ‘mabalo kun baga kita nasa pagtubod,’ kaipuhan niatong ioyon an satong paggawe sa nanonodan niato sa Biblia. Tanganing ‘mapatunayan kun ano man nanggad kita,’ kaipuhan niatong siyasaton an kamugtakan kan satong espirituwalidad, pati na an pagkaalisto kan satong “kakayahan sa pagrisa” asin kun sagkod saen niato ipinapaheling an satong mga gibo nin pagtubod. (Heb. 5:14; Sant. 1:22-25) Paagi sa pag-aplikar kan marahay na sadol ni Pablo, danay kitang makakalakaw sa dalan kan katotoohan.
[Ritrato sa pahina 26, 27]
Ano an kahulogan kan mga tataramon na “kada kumakan kamo kan tinapay na ini asin uminom kan kopang ini”?—1 Cor. 11:26