Ika-124 Gradwasyon sa Gilead

An mga Misyonero Ikinokomparar sa mga Doron

KADA anom na bulan, an Paadalan sa Biblia kan Watchtower sa Gilead igwa nin programa sa gradwasyon na dian iniimbitaran an bilog na pamilyang Bethel sa Estados Unidos. Kan Marso 8, 2008, an mga bisitang hale sa labing 30 nasyon uminiba sa pamilyang Bethel para sa gradwasyon kan ika-124 klase kan Paadalan nin Gilead. An gabos na 6,411 nag-atender naggayagaya kaiba kan mga estudyante sa saindang espesyal na aldaw.

Pinonan kan tsirman, si Stephen Lett kan Namamahalang Grupo, an programa paagi sa sarong pahayag na may temang “Paduman Kamo Kaiba kan Piguratibong mga Doron ni Jehova.” An sadit na grupo nin linahidan na mga Kristiano, na nagin aktibo giraray sa espirituwal kan 1919, ikinokomparar kan Kapahayagan 9:1-4 sa kaburunyogan nin mga doron na bigla na sanang nagin aktibo. Ipinagirumdom sa mga estudyante na bilang mga miembro kan “ibang mga karnero,” sinda mismo uminiba sa piguratibong kaburonyogan na ini nin mga doron.​—Juan 10:16.

Si Lon Schilling, miembro kan Komite kan Sangang Opisina sa Estados Unidos, sunod na nagpahayag kan temang “Magin Kakomplemento.” Basado iyan sa halimbawa sa Biblia ni Aquila asin Priscila (o, Prisca), sarong mag-agom na Kristiano kan enot na siglo. (Roma 16:3, 4) An klaseng iyan sa Gilead kompuesto nin 28 mag-agom. Ipinagirumdom sa sainda na tanganing magin mapanggana bilang mga misyonero, kaipuhan nindang papagdanayon na makosog an bogkos kan saindang pag-agoman. Nungkang sinasambit kan Biblia si Aquila na dai sinasambit an saiyang agom, si Priscila. Huli kaini, minansay sinda ni apostol Pablo asin kan kongregasyon bilang magkapadis. Siring man, an mga mag-agom na misyonero ngonyan maninigong magkaibanan sa paglilingkod, magkaibanan sa pagsamba, asin magkaibanan sa pag-atubang sa napapalaen na mga problemang konektado sa paglilingkod sa ibang nasyon, na sa siring na paagi nagigin kakomplemento sinda kan lambang saro.​—Gen. 2:18.

An suminunod na pahayag, na may temang “Maghimate sa Karahayan ni Jehova,” itinao ni Guy Pierce kan Namamahalang Grupo. Ipinaliwanag ni Tugang na Pierce na an pagigin marahay labi pa sa paglikay sana sa paggibo nin maraot. An sarong marahay na tawo naggigibo nin mararahay na bagay tanganing makinabang an iba. Si Jehova Dios marahay sa pinakahalangkaw na sokol. (Zac. 9:16, 17) An karahayan asin pagkamoot nin Dios puedeng magin puersang nagmomotibar sa sato na gumibo nin mararahay na bagay para sa iba. Sa pagtao nin komendasyon sa mga estudyante, tinapos ni Tugang na Pierce an pahayag paagi sa pagsabi: “Marahay an saindong ginigibo. Nagtitiwala kami na padagos kamong mahimate sa karahayan nin Dios paagi sa paggibo nin marahay sa ano man na mga asignasyon sa ngapit na itatao sa saindo ni Jehova Dios.”

Sunod, iinatubang ni Michael Burnett, dating misyonero na inasignaran kasuarin pa sana na magtokdo sa Gilead, an pahayag na may temang “Isulot Iyan Bilang Banda sa Saindong Angog.” Dapat na girumdomon kan mga Israelita an milagrosong pagkalda sa Egipto na ginibo ni Jehova para sa sainda, na garo baga sinda may sulot na “banda” sa saindang angog. (Ex. 13:16) Sinadol an mga estudyante na girumdomon  an dakol na instruksion na inako sa Paadalan nin Gilead na garo baga sulot ninda iyan bilang banda sa saindang angog. Idinoon ni Tugang na Burnett an pangangaipo na magin mapakumbaba asin hababa an boot asin na iaplikar an mga prinsipyo sa Biblia kun rineresolberan an ano man na dai pagkasinabotan ninda sa mga kapwa misyonero asin sa iba pa.​—Mat. 5:23, 24.

Nagpahayag si Mark Noumair, haloy nang paratokdo sa Gilead, kan temang “Anong Awit an Aawiton Manongod sa Saindo?” Kan suanoy na mga panahon, napagkatodan nang iselebrar paagi sa awit an mga kapangganahan sa guerra. An saro sa siring na mga awit ibinubuyagyag an mga tribo ni Ruben, Dan, asin Aser bilang mga tribong dai naggigibo kan bilog nindang makakaya, mantang an tribo ni Zabulon inoomaw huli sa mapagsakripisyong espiritu kaiyan. (Hok. 5:16-18) Siring sa mga liriko nin sarong awit, an paggawe nin lambang Kristiano maaaraman nin iba pag-abot nin panahon. An kaigotan nin saro  para sa gibohon nin Dios asin an nagdadanay na kaimbodan nia sa teokratikong areglo gigirumdomon ni Jehova asin magseserbing marahay na halimbawa sa saiyang mga tugang. Mantang an iba sa kongregasyon naghihinanyog sa piguratibong awit na garo isinusurat kan satong paggawe, sinda napapahiro na arogon an marahay na halimbawang iyan.

Bilang kabtang kan saindang pagsasanay sa Gilead, an ika-124 klase naggamit nin pinagsararong total na mga 3,000 na oras sa paghuhulit. Sa temang “Sinusunod an Paggiya kan Banal na Espiritu,” isinaysay kan mga estudyante ki Sam Roberson kan Departamento sa Teokratikong mga Paadalan an nagkapirang eksperyensia sa paglilingkod sa langtad, na iinakto ninda an nagkapira sa mga iyan. Pakatapos kan nakakaparigon sa boot na mga eksperyensiang ini, pinamayohan ni Patrick LaFranca kan Komite kan Sangang Opisina sa Estados Unidos an interbio sa mga naggradwar sa Gilead na naglilingkod na ngonyan sa manlaenlaen na nasyon. Inapresyar kan mga estudyante an praktikal na sadol na inako ninda hale sa mga tugang na ini.

Itinao ni Anthony Morris kan Namamahalang Grupo an pangultimong pahayag na “Girumdomon, an mga Bagay na Naheheling Minaagi Sana.” Sinasadol kita kan Kasuratan na magkonsentrar sa mga bendisyon sa ngapit na hale ki Jehova imbes na sa ano man na temporaryong kahorasaan na tibaad naeeksperyensiahan niato sa presente. (2 Cor. 4:16-18) An grabeng kadukhaan, inhustisya, pang-aapi, helang, asin kagadanan mga katunayan na naheheling niato gabos ngonyan. Tibaad mapaatubang an mga misyonero sa nagkapira sa makaturotristeng mga kamugtakan na ini. Alagad an paggirumdom na an mga bagay na ini minaagi sana matabang sa sato na magdanay na timbang sa espirituwal asin pano nin paglaom.

Natapos an programa na an gabos na naggradwar yaon sa entablado mantang naghihinanyog sa pangultimong mga komento ni Tugang na Lett. Dinagka nia sinda na dai sumuko asin sinabi nia: “Kun kaiba niato si Jehova, dai kita maabot sa punto na dai na niato makakayang papagdanayon an satong integridad.” Sinadol nia an bagong mga misyonero na magin arog nin mga doron, na nagpapadagos sa paglilingkod ki Jehova asin nagdadanay na maigot, maimbod, asin makinuyog sagkod lamang.

[Kahon sa pahina 30]

ESTADISTIKA KAN KLASE

Bilang nin mga nasyon na irinepresentar: 7

Bilang nin mga nasyon na inasignaran: 16

Bilang nin mga estudyante: 56

Promedyong edad: 33.8

Promedyong taon sa katotoohan: 18.2

Promedyong taon sa bilog na panahon na ministeryo: 13.8

[ietrato sa pahina 31]

Ika-124 Naggradwar na Klase kan Paadalan sa Biblia kan Watchtower sa Gilead

Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala sagkod sa too sa kada raya.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Ritrato sa pahina 32]

An Paadalan nin Gilead yaon sa Sentro nin Edukasyon kan Watchtower