Nagigirumdoman daw Nindo?

Naapresyar daw nindo an pagbasa kan dai pa sana nahahaloy na mga isyu kan An Torrengbantayan asin The Watchtower? Helingon kun masisimbag nindo an minasunod na mga hapot:

• Anong seryosong problema an napaatubang sa nagkapirang Kristiano pakatapos na mag-agom, asin ano an maninigo nindang pagmaigotan na gibohon?

Tibaad marealisar nin nagkapirang Kristiano na bako palan sindang magkabagay kan saindang agom. Huling an bakong sono sa Kasuratan na pagdiborsio bakong akseptableng solusyon, kaipuhan nindang magmaigot na ingatan an saindang pag-agoman.​—4/15, pahina 17.

• Anong mga problema an tibaad mapaatubang sa sarong Kristiano na nasa klinika sa pag-ataman sa mga gurang?

Tibaad dai sia midbid kan kongregasyon na naghuhulit sa lugar kan klinika. An kadaklan na yaon sa klinika tibaad may laen na mga paniniwala asin tibaad magmaigot na iayon sia sa relihiosong mga aktibidad. An Kristianong mga paryente asin an mga miembro kan lokal na kongregasyon maninigong nakakaaram kan mga problemang ini asin maninigo sindang magsuportar saka magmakolog.​—4/15, pahina 25-27.

• Ano an apat na lakdang na makakatabang sa mga mag-agom na resolberan an mga problema?

Magtagama nin panahon na pag-olayan an mga problema. (Ecl. 3:1, 7) Ipahayag nin onesto asin magalang an saindong opinyon. (Efe. 4:25) Hinanyogon asin midbidon an saboot kan saindong agom. (Mat. 7:12) Dapat kamong magkaoyon sa sarong solusyon, asin gibohon nindo iyan nin magkaibanan. (Ecl. 4:9, 10)​—5/1-E, pahina 10-12.

• Kan sadolon kita ni Jesus na mamibi na logod ipatawad an satong mga utang, anong mga utang an boot niang sabihon?

Linilinaw kan pagkomparar kan Mateo 6:12 asin Lucas 11:4 na bakong mga utang na kuarta an boot sabihon ni Jesus. An nasa isip nia iyo an mga kasalan. Kaipuhan niatong arogon an Dios paagi sa pagigin andam na magpatawad.​—5/15, pahina 9.

• Sa anong mga komite naglilingkod an mga miembro kan Namamahalang Grupo?

Komite kan mga Nagkokoordinar; Komite sa Tawohan; Komite sa Pagpublikar; Komite sa Paglilingkod; Komite sa Pagtotokdo; Komite sa Pagsurat.​—5/15, pahina 29.

• Paano kita makakasierto na lakop sa globo an Baha kan panahon ni Noe?

Si Jesus nagtubod na an Baha nangyari asin lakop sa globo. An mga patanid na nasa Biblia basado sa katunayan na nagkaigwa nin sarong Baha na lakop sa globo.​—6/1-E, pahina 8.

• An paggawe daw na ilinadawan sa Roma 1:24-32 nanonongod sa mga Judio o sa mga Hentil?

An paglaladawan puedeng angay sa arin man sa duwang iyan, alagad an espesipikong pinapanongdan ni apostol Pablo iyo an mga Israelita kan suanoy na sa laog nin dakol na siglo dai nagsunod sa Ley. Aram ninda an matanos na mga pagboot nin Dios, pero dai sinda namuhay kaoyon kaiyan.​—6/15, pahina 29.

• Saen an Tel Arad, asin taano ta makahulogan iyan?

An bulod na ini sa Israel na kinamumugtakan kan suanoy na siudad nin Arad yaon sa solnopan kan Gadan na Dagat. Sa bulod na ini, nakua nin mga parakalot an sarong koleksion nin lalagan na dalipay na ginamit bilang mga suratan. An nagkapira may mga ngaran na yaon sa Biblia, asin ipinapaheling kaiyan na an personal na ngaran nin Dios ginamit sa sekular na mga dokumento.​—7-9, pahina 23-24.

• Taano ta an pagkaigwa nin rasonableng mga linalaoman nakakadugang sa satong kagayagayahan?

Kun satong pinagmamaigotan na aboton an bakong rasonableng mga pasohan gurano man an sakripisyong kaipuhan, tinatawan sana niato an satong sadiri nin dai kinakaipuhan na tension. Pero, dai kita maninigong magin sobra kamapagpasunod, na ginagamit an satong hinohonang mga limitasyon bilang sarahotan tanganing magluwayluway sa ministeryo.​—7/15, pahina 29.

• Ano an tibaad makaolang sa pakikikomunikar nin mga magurang sa mga hoben?

An nagkapirang olang tibaad an pagkamasusupgon nin hoben, an saiyang pagmawot na magin independiente, asin an saiyang kagustohan na magsolo. Puedeng pagmaigotan nin mga magurang na makikomunikar sa impormal na mga kamugtakan asin masabotan bako sanang an mga tataramon kundi pati an mga namamatean kan hoben.​—8/1-E, pahina 10-11.