Papagdanayon an Kaimbodan na May Bilog na Puso

“Ako maglalakaw sa saimong katotoohan. Gibohang bilog an sakong puso na matakot sa saimong ngaran.”​—SAL. 86:11.

1, 2. (a) Oyon sa Salmo 86:2, 11, ano an makakatabang sa sato na magdanay na maimbod ki Jehova sa atubang nin mga pagbalo o sugot? (b) Noarin maninigong pataluboon an odok sa pusong kaimbodan?

TAANO ta may mga Kristiano na nagdanay na maimbod sa laog nin dakol na taon sa ibong nin pagkabilanggo o persekusyon pero kan huri nadaog nin materyalismo? An simbag igwa nin koneksion sa satong piguratibong puso​—kun ano talaga an pagkatawo niato sa laog. An kaimbodan ikinokonektar kan ika-86 na Salmo sa bilog na puso, an boot sabihon, bakong banga. “O ingatan mo nanggad an sakong kalag, huli ta ako maimbod,” an pamibi kan salmistang si David. “Ika an sakuyang Dios—​iligtas mo an saimong lingkod na nagtitiwala sa saimo.” Namibi man si David: “Tokdoi ako, O Jehova, dapit sa saimong dalan. Ako maglalakaw sa saimong katotoohan. Gibohang bilog an sakong puso na matakot sa saimong ngaran.”​—Sal. 86:2, 11.

² Kun kita dai nagtitiwala ki Jehova sa bilog niatong puso, an ibang kapurisawan asin mga kinawiwilihan niato magpapaluya sa satong kaimbodan sa tunay na Dios. An maimot na mga pagmawot kapareho nin nakatalbong na mga bomba sa tinampo na linalakawan niato. Minsan ngani tibaad nakapagdanay na kitang maimbod ki Jehova sa masakit na mga kamugtakan, puede kitang mabiktima kan mga silo o siod ni Satanas. Mahalagang marhay nanggad na pataluboon niato an odok sa pusong kaimbodan ki Jehova ngonyan, bago mag-abot sa sato an mga pagbalo o sugot! “Orog sa gabos na maninigong ingatan,” an sabi kan Biblia, “ingatan mo an  saimong puso.” (Tal. 4:23) Makakanood kita nin mahalagang mga leksion mapadapit digdi sa eksperyensia nin sarong propeta hale sa Juda na isinugo ni Jehova ki Hadeng Jeroboam nin Israel.

“Tatawan Taka nin Regalo”

3. Ano an reaksion ni Jeroboam sa mensahe nin paghokom na ipinaabot kan propeta nin Dios?

³ Iladawan an eksena. Ipinaabot pa sana kan lalaki na lingkod nin Dios an malanit na mensahe ki Hadeng Jeroboam, na nag-establisar nin pagsamba sa ogbon na baka sa sampulong tribong kahadean nin Israel sa amihanan. Nagpuputok sa kaanggotan an hade. Pinagbotan nia an saiyang mga tawohan na dakopon an mensahero. Alagad ta tinabangan ni Jehova an saiyang lingkod. Tolos-tolos na milagrosong naalang an kamot na inunat kan hade huli sa kaanggotan, asin nabaak an altar na ginagamit sa falsong pagsamba. Bigla na sanang nagbago an boot ni Jeroboam. Nakimaherak sia sa lalaki na lingkod nin Dios: “Palumoyon mo tabi an lalawgon ni Jehova na saimong Dios asin ipamibi mo ako na logod maomayan an sakong kamot.” An propeta namibi, asin naomayan an kamot kan hade.​—1 Ha. 13:1-6.

4. (a) Taano an alok kan hade ta talagang sarong pagbalo sa kaimbodan kan propeta? (b) Ano an simbag kan propeta?

⁴ Dangan nagsabi si Jeroboam sa lalaki na lingkod kan tunay na Dios: “Mag-iba ka sa sako sa harong asin magkakan ka, asin tatawan taka nin regalo.” (1 Ha. 13:7) Ano an gigibohon ngonyan kan propeta? Maninigo daw niang akoon an pag-istimar kan hade pagkatapos na ipaabot nia sa saiya an mensahe nin pagkondenar? (Sal. 119:113) O maninigo daw niang sayumahan an imbitasyon kan hade, minsan ngani garo baga nagbabasol an hade? Si Jeroboam siertong igwa nin kakayahan na magtao nin mamahalon na mga regalo sa saiyang mga katood. Kun an propeta nin Dios igwa nin ano man na itinatagong kamawotan para sa materyal na mga bagay, posibleng marhay na magigin dakulang sugot an alok kan hade. Minsan siring, pinagbotan ni Jehova an propeta: “Dai ka magkakan nin tinapay o mag-inom nin tubig, asin dai ka magbalik sa dalan na inagihan mo.” Kaya an propeta marigon asin malinaw na nagsimbag: “Dawa itao mo sa sako an kabanga kan saimong harong dai ako maiba sa saimo asin dai ako makakan nin tinapay o mainom nin tubig sa lugar na ini.” Asin an propeta naghale sa Betel asin nag-agi sa ibang dalan. (1 Ha. 13:8-10) Anong leksion manongod sa odok sa pusong kaimbodan an itinotokdo sa sato kan nagin desisyon kan propeta?​—Roma 15:4.

‘Manigoan na Kamo’

5. Paanong an materyalismo sarong isyu nin kaimbodan?

⁵ An materyalismo tibaad garo baga bakong isyu nin kaimbodan, alagad ta iyo. Nagtitiwala daw kita sa panuga ni Jehova na itatao sa sato an talagang kinakaipuhan niato? (Mat. 6:33; Heb. 13:5) Imbes na magmaigot na makua sa ano man na paagi an nagkapira sa “mas marahay” na mga bagay sa buhay na dai niato kayang makua ngonyan, makakapamuhay daw kita na mayo kan mga iyan? (Basahon an Filipos 4:11-13.) Nasusugotan daw kita na dai nguna akoon an teokratikong mga pribilehio tanganing makua an gusto niato ngonyan? An maimbod daw na paglilingkod ki Jehova iyo an pangenot sa satong buhay? Sa pangenot, an satong mga simbag madepende sa kun baga an satong paglilingkod sa Dios bilog na puso o bako. “Iyan may dakulang pakinabang,” an surat ni apostol Pablo, “ining diosnon na debosyon kaiba an pagigin naninigoan sa sadiri. Huli ta dai kita nagdara nin ano man sa kinaban, asin dai man kita makakadara nin ano man hale dian. Kaya, mantang igwa na nin kakanon asin gubing, maninigoan na kita sa mga bagay na ini.”​—1 Tim. 6:6-8.

6. Anong “mga regalo” an tibaad ialok sa sato, asin ano an makakatabang sa sato sa pagdesisyon kun baga aakoon niato iyan?

⁶ Halimbawa, tibaad alokan kita kan satong among nin mas halangkaw na posisyon na mas halangkaw an sueldo asin igwa nin iba pang mga benepisyo. O tibaad iniisip niato na mas dakula an gaganaron niato kun mabalyo kita sa ibang nasyon tanganing magtrabaho. Sa primero, an siring na mga oportunidad tibaad garo baga bendisyon hale ki Jehova. Alagad bago kita magdesisyon sa bagay na iyan, bako daw na maninigong siyasaton niato an satong mga motibo? An pangenot na iisipon niato iyo an, “Paano maaapektaran kan sakong desisyon an relasyon ko ki Jehova?”

7. Taano ta mahalaga na haleon niato an materyalistikong mga kamawotan?

⁷ An sistema ni Satanas daing ontok sa pagpalakop nin materyalismo. (Basahon an 1 Juan 2:15, 16.) An katuyohan kan Diablo iyo na raoton an satong puso. Kun siring, kaipuhan kitang magin alerto na  aramon asin haleon an materyalistikong mga kamawotan sa satong puso. (Kap. 3:15-17) Dai nagin masakit para ki Jesus na sayumahan an inalok sa saiya ni Satanas na gabos na kahadean kan kinaban. (Mat. 4:8-10) Sia nagpatanid: “Magpuka kamo asin magmaan kamo sa gabos na klase nin kaaraan, huli ta dawa kun an sarong tawo abunda, an saiyang buhay dai minagikan sa mga bagay na sadiri nia.” (Luc. 12:15) An kaimbodan matabang sa sato na magsarig ki Jehova imbes na sa satong sadiri.

‘Dinaya Sia’ nin Gurang na Propeta

8. Paano nabalo an kaimbodan kan propeta nin Dios?

⁸ Marahay kutana an mangyayari sa propeta nin Dios kun sia nagpadagos sa saiyang pagbaklay papuli. Minsan siring, haros tolos-tolos na napaatubang sia sa saro pang pagbalo. “May sarong gurang na propeta na nag-eerok sa Betel,” an sabi kan Biblia, “asin an saiyang mga aki naglaog ngonyan asin isinaysay sa saiya” an gabos na nangyari sa pagpopoon kan aldaw na iyan. Kan madangog kan gurang na lalaki an bareta, sinabi nia sa sainda na mag-andam nin asno para sa saiya tanganing lapagon nia an propeta nin Dios. Dai nahaloy pakatapos kaiyan, nanompongan nia an propeta na nagpapahingalo sa sirong nin dakulang kahoy asin sia nagsabi: “Mag-iba ka sa sako sa harong asin magkakan ka nin tinapay.” Kan an lalaki na lingkod kan tunay na Dios magsayuma sa imbitasyon, an gurang na lalaki nagsimbag: “Ako saro man na propeta arog mo, asin sarong anghel an nagsabi sa sako paagi sa tataramon ni Jehova, na nagsasabi, ‘Pabalikon mo sia na kaiba ka sa saimong harong tanganing sia makakakan nin tinapay asin makainom nin tubig.’” Alagad an Kasuratan nagsasabi: “Dinaya nia sia.”​—1 Ha. 13:11-18.

9. Ano an sinasabi kan Kasuratan manongod sa madayang mga tawo, asin siisay an dinadanyaran ninda?

⁹ Ano man an tibaad motibo kan gurang na propeta, sia nagputik. Tibaad an gurang na lalaki dating maimbod na propeta ni Jehova. Minsan siring, sa puntong ini, sia minagawe na may pandadaya. Marigon na dinedenunsiar kan Kasuratan an siring na paggawe. (Basahon an Talinhaga 3:32.) Dinadanyaran kan mga madaya bako sanang an sadiri nindang espirituwalidad kundi sa parate pati an espirituwalidad kan iba.

“Nagbalik Siang Kaiba” an Gurang na Lalaki

10. Ano an reaksion kan propeta nin Dios sa imbitasyon kan gurang na lalaki, asin ano an resulta?

¹⁰ Maninigo kutanang narisa kan propeta hale sa Juda an panloloko kan gurang na propeta. Puede kutana siang naghapot sa saiyang sadiri, ‘Taano ta sa ibang tawo pa nagsugo nin anghel si Jehova sa pagtao nin bagong mga instruksion sa sako?’ An propeta puede kutanang nakiolay ki Jehova na linawon an instruksion, alagad dai ipinaparisa kan Kasuratan na ginibo nia iyan. Imbes, “nagbalik siang kaiba [an gurang na lalaki] tanganing sia makakakan nin tinapay sa saiyang harong asin makainom nin tubig.” Dai naogma si Jehova huli kaiyan. Kan an nadayang propeta sa katapustapusi pabalik na sa Juda, nakatupar sia nin leon asin ginadan sia kaini. Kanigoan  kamakamomondong katapusan kan saiyang pagigin propeta!​—1 Ha. 13:19-25. *

11. Anong marahay na halimbawa an itinao ni Ahias?

¹¹ Sa ibong na lado, si propeta Ahias, na isinugo tanganing nombrahan si Jeroboam bilang hade, nagdanay na maimbod sagkod na sia gumurang. Kan si Ahias gurang na asin buta na, isinugo ni Jeroboam an saiyang agom tanganing makihumapot ki Ahias manongod sa ikakarahay kan naghehelang nindang aking lalaki. May kapusoan na ihinula ni Ahias na magagadan an aki ni Jeroboam. (1 Ha. 14:1-18) Kabilang sa dakol na bendisyon na inako ni Ahias an pribilehio na mag-ambag sa ipinasabong na Tataramon nin Dios. Paano? Kan huri, an mga isinurat nia ginamit na reperensia ni Esdras na saserdote.​—2 Cron. 9:29.

12-14. (a) Anong leksion an manonodan niato sa nangyari sa mas hoben na propeta? (b) Iilustrar an pangangaipo na maingat asin mapagngayongayong estudyaran an hatol na basado sa Biblia na itinatao nin kamagurangan.

¹² Dai sinasabi kan Biblia kun taano ta dai kinonsulta si Jehova kan mas hoben na propeta bago ini mag-iba sa gurang na lalaki tanganing kumakan saka uminom. Posible daw na sinabi sa saiya kan gurang na lalaki kun ano an gusto niang madangog? Anong leksion an manonodan niato dian? Kaipuhan na lubos kitang kombensido sa pagkamakatanosan kan mga kahagadan ni Jehova. Asin kaipuhan na magin determinado kita na sunodon iyan, ano man an mangyari.

¹³ Dinadangog nin nagkapira kun ano an gusto nindang madangog kun mapadapit sa hatol. Halimbawa, tibaad an sarong parahayag na lalaki alokan nin trabaho na makakaina sa panahon na puede niang gamiton sa saiyang pamilya asin sa teokratikong mga aktibidad. Puede siang maghagad nin sadol sa sarong magurang sa kongregasyon. Tibaad an enot na sasabihon kan magurang iyo na inaadmitir nia na mayo sia sa kamugtakan na sabihon sa tugang kun paano kaini susuportaran an saiyang pamilya. Dangan puedeng ipagirumdom kan magurang sa tugang an mga peligro sa saiyang espirituwalidad kun aakoon nia an trabaho na inalok sa saiya. An gigirumdomon sana daw kan tugang iyo an enot na mga sinabi kan magurang sa kongregasyon, o seryoso daw niang pag-iisipan an kasunod na sinabi kan magurang? Malinaw na kaipuhan na seguradohon kan tugang kun ano an pinakamarahay para sa saiya sa espirituwal na paagi.

¹⁴ Estudyare an saro pang posibleng kamugtakan. Sarong tugang na babae an tibaad maghapot sa magurang sa kongregasyon kun maninigo niang suwayan an saiyang daing pagtubod na agom. Daing duda na ipapaliwanag sa saiya kan magurang na sia an madesisyon kun baga susuwayan nia o dai an saiyang  agom. Dangan puedeng ipagirumdom kan magurang an hatol kan Biblia manongod sa bagay na iyan. (1 Cor. 7:10-16) Eestudyaran daw na marhay kan tugang na babae an sinabi kan magurang? O sia daw nakapagdesisyon nang bayaan an saiyang agom? Sa pagdesisyon nia, madonong na mapagngayongayo niang estudyaran an hatol na basado sa Biblia.

Magin Hababa an Boot

15. Ano an manonodan niato sa sala kan propeta nin Dios?

¹⁵ Ano pa an manonodan niato sa sala kan propeta hale sa Juda? An Talinhaga 3:5 nagsasabi: “Magtiwala ka ki Jehova sa bilog mong puso asin dai ka manarig sa saimong sadiring pakasabot.” Imbes na padagos na magsarig ki Jehova siring kan nakaagi, sa pangyayaring ini an propeta hale sa Juda nagtiwala sa sadiri niang paghusgar. An saiyang sala nangahulogan kan pagkawara kan saiyang buhay asin kan saiyang marahay na ngaran sa atubangan nin Dios. An saiyang eksperyensia mapuersa nanggad na nagdodoon sa halaga kan paglilingkod ki Jehova na may hababang boot asin kaimbodan!

16, 17. Ano an makakatabang sa sato na magdanay na maimbod ki Jehova?

¹⁶ Huli sa maimot na inklinasyon kan satong puso, madali kitang madaya. “Madaya an puso nin labi sa ano pa man na bagay asin desesperado.” (Jer. 17:9) Tanganing magdanay na maimbod ki Jehova, dapat na padagos kitang magmaigot na haleon an daan na personalidad kaiba an tendensia kaiyan na magin pangahas asin mapagsarig sa sadiri. Asin dapat na isulog niato an bagong personalidad, “na linalang segun sa kabotan nin Dios sa tunay na katanosan asin kaimbodan.”​—Basahon an Efeso 4:22-24.

¹⁷ “An kadonongan yaon sa mga hababa an boot,” an sabi sa Talinhaga 11:2. An may hababang boot na pagsarig ki Jehova nagtatabang sa sato na makalikay sa paggibo nin magabat na mga sala. Halimbawa, an panluluya kan boot madaling makaraot sa satong paghusgar. (Tal. 24:10) Tibaad kita mapagal sa pakikikabtang sa sarong aspekto nin sagradong paglilingkod asin makamate na igo na an nagibo niato sa nakalihis na dakol na taon, na iniisip niato na tibaad panahon na tanganing an iba naman an magpasan nin paninimbagan. O tibaad mawoton niato na magkaigwa nin mas “normal” na buhay. Minsan siring, maiingatan niato an satong puso paagi sa ‘maigot na paghihingoa’ asin ‘pagdadanay na dakol an ginigibo sa gibohon kan Kagurangnan.’​—Luc. 13:24; 1 Cor. 15:58.

18. Ano an puede niatong gibohon kun dai niato aram kun ano an dapat na magin desisyon niato?

¹⁸ Kun beses, tibaad kaipuhan niatong gumibo nin masakit na mga desisyon, asin tibaad bakong madaling maaraman kun ano an tamang gibohon. Kun siring, masusugotan daw kita na resolberan an problema na kita sana? Kada mapaatubang kita sa siring na mga kamugtakan, magigin madonong na hagadon niato ki Jehova na tabangan kita. “Kun an siisay man sa saindo kulang nin kadonongan,” an sabi sa Santiago 1:5, “padagos siang maghagad sa Dios, huli ta sia abundang nagtatao sa gabos.” Itatao sa sato kan satong langitnon na Ama an banal na espiritu na kaipuhan niato tanganing makagibo kita nin tamang mga desisyon.​—Basahon an Lucas 11:9, 13.

Magin Determinado na Magdanay na Maimbod

19, 20. Ano an maninigong magin determinasyon niatong gibohon?

¹⁹ An mamondong mga taon pakatapos kan pagsuway ni Salomon sa tunay na pagsamba nagin grabeng pagbalo sa kaimbodan kan mga lingkod nin Dios. Totoo na dakol an nakikompromiso minsan paano. Minsan siring, an nagkapira talagang nagdanay na maimbod ki Jehova.

²⁰ Aroaldaw, napapaatubang kita sa mga pagpili asin desisyon na minabalo sa satong kaimbodan. Puede man niatong patunayan na kita maimbod. Pirme kitang magin maimbod ki Jehova mantang pinagdadanay niatong bilog an satong puso, na lubos na nagsasarig na padagos niang bebendisyonan an mga maimbod sa saiya.​—2 Sam. 22:26.

[Nota sa Ibaba]

Ano an Isisimbag Nindo?

• Taano ta maninigo kitang maghingoa na haleon an materyalistikong mga kamawotan sa satong puso?

• Ano an makakatabang sa sato na magdanay na maimbod ki Jehova?

• Paano makakatabang sa sato an pagigin hababa an boot tanganing magdanay na maimbod sa Dios?

[Mga Hapot Para sa Pag-adal]

[Mga Ritrato sa pahina 9]

Nasasakitan daw kamo na labanan an mga sugot?

[Mga Ritrato sa pahina 10]

Mapagngayongayo daw nindong eestudyaran an hatol na basado sa Biblia?