Tawan nin Onra si Jehova Paagi sa Pagpaheling nin Dignidad

‘An gibo ni Jehova dignidad asin kagayonan mismo.’​—SAL. 111:3.

1, 2. (a) Paano nindo tatawan nin kahulogan an “dignidad”? (b) Anong mga hapot an pag-oolayan sa artikulong ini?

KAN hapoton an dies anyos na si Madison kun ano an kahulogan kan pananaram na “may dignidad,” sia tolos-tolos nagsimbag, “Marahay an bulos.” Tibaad an dai aram kan aking babaeng iyan iyo na sinasabi kan Biblia na an Dios ‘nagugubingan nin dignidad.’ (Sal. 104:1) Para sa mga tawo, an pagpaheling nin dignidad tibaad kun beses kalabot an pagigin marahay an bulos. Halimbawa, minawot ni apostol Pablo na an Kristianong kababaihan “magsamno sa saindang sadiri nin husay na gubing, na may kabinian asin toltol na isip, bakong nin mga estilo nin pagsalapid nin buhok asin bulawan o perlas o mamahalon na gayong gubing.” (1 Tim. 2:9) Alagad orog pa dian an may dignidad na paggawe na nagtataong onra sa “dignidad asin kagayonan” ni Jehova.​—Sal. 111:3.

² Sa Biblia, an termino sa Hebreo para sa “dignidad” puede man itradusir na “kagayonan,” “kamahalan,” “kamurawayan,” asin “onra.” Segun sa pakahulogan nin sarong diksionaryo, an “dignidad” iyo “an kualidad o kamugtakan nin pagigin mahalaga, may onra, o iginagalang.” Asin mayo nin siisay man na maninigong tawan nin orog na onra asin paggalang kisa ki Jehova. Kun siring, bilang saiyang nagdusay na mga lingkod, kita maninigo na may dignidad sa pagtaram asin paggawe. Pero, taano ta an mga tawo puedeng gumawe na may dignidad? Paano naririsa an dignidad asin kagayonan ni Jehova? Paano kita maninigong maapektaran kan dignidad nin Dios? Ano an puedeng itokdo ni Jesu-Cristo sa sato manongod sa pagpaheling kan kualidad na ini? Asin paano kita makakapaheling nin diosnon na dignidad?

Kun Taano ta Puede Kitang Gumawe na May Dignidad

3, 4. (a) Ano an maninigo man na itao niato huli sa dignidad na itinao sa sato? (b) Siisay an makahulang pinapanongdan kan Salmo 8:5-9? (Helingon an nota sa ibaba.) (c) Siisay an tinawan ni Jehova nin dignidad kan nakaagi?

³ Huling an gabos na tawo ginibo sa ladawan nin Dios, sinda igwang kakayahan na gumawe na may dignidad. Tinawan ni Jehova nin dignidad an enot na tawo paagi sa pagnombra sa saiya na mangataman kan daga. (Gen. 1:26, 27) Dawa pagkawara kan pagkasangkap nin tawo, sinabi giraray ni Jehova an responsibilidad nin tawo may koneksion sa daga. Sa siring, “kinoronahan” pa man giraray nin Dios an mga tawo nin dignidad. (Basahon an Salmo 8:5-9.) * Huling tinawan kita nin dignidad, maninigo man na magtao kita nin dignidad​—na omawon an mamuraway na ngaran ni Jehova sa paagi na may pagsambang paggalang asin dignidad.

⁴ Si Jehova nangorognang nagtatao nin dignidad sa mga naggigibo nin sagradong paglilingkod sa saiya. An Dios nagtao nin dignidad ki Abel paagi sa pag-ako sa atang kaini asin paghabo sa idinolot kan tugang kaini na si Cain. (Gen. 4:4, 5) Tinawan nin instruksion si Moises na ‘ibugtak an ibang kabtang  kan saiyang dignidad’ ki Josue, an saro na masalida sa saiya bilang lider kan mga Israelita. (Bil. 27:20) Mapadapit sa aki ni David na si Salomon, an Biblia nagsasabi: “Padagos na ginibo ni Jehova na nangongorog na dakula si Salomon sa atubangan kan pagheling kan bilog na Israel asin na ibugtak sa saiya an makahadeng dignidad na dai pa namugtak sa siisay man na hade bago sa saiya sa Israel.” (1 Cron. 29:25) An Dios matao nin pambihirang dignidad sa bubuhayon liwat na linahidan na mga Kristiano, na maimbod na nagpapahayag kan “kamurawayan kan kagayonan kan saiyang paghade.” (Sal. 145:11-13) Sa siring na pagrukyaw ki Jehova, igwa man nin maogma asin may dignidad na kabtang an nagdadakol na kaburunyogan kan “ibang mga karnero” ni Jesus.​—Juan 10:16.

Naririsa an Dignidad Asin Kagayonan ni Jehova

5. Gurano kadakula an dignidad ni Jehova?

⁵ Sa awit na nagpapaheling kan pagkakalaen kan kadakulaan nin Dios asin kan kasaditan nin tawo, an salmistang si David nag-awit: “O Jehova na samong Kagurangnan, kanigoan kamamuraway kan saimong ngaran sa bilog na daga, ika na an dignidad isinasaysay sa itaas nin kalangitan!” (Sal. 8:1) Poon kan bago lalangon an ‘kalangitan asin daga’ sagkod sa panahon na lampas pa sa dakulang kaotoban kan katuyohan nin Dios na gibohon na paraiso an daga asin darahon sa pagkasangkap an pamilya nin tawo​—poon sa panahon na daing kapinonan sagkod sa panahon na daing sagkod—​si Jehova Dios an pinakamamuraway asin an may pinakanangongorog na dignidad na Personahe sa uniberso.​—Gen. 1:1; 1 Cor. 15:24-28; Kap. 21:1-5.

6. Taano ta sinabi kan salmista na si Jehova nagugubingan nin dignidad?

⁶ Seguradong napahiro an boot kan matatakton sa Dios na salmista kan minasdan nia an toninong na kadakulaan kan mabitoon na kalangitan sa banggi, na pano nin nagkikinang na “mga mutya”! Mantang an salmista napano nin pagngalas dapit sa kun paano “inuunat [nin Dios] an kalangitan siring sa tahob nin tolda,” ilinadawan nia si Jehova na nagugubingan nin dignidad huli sa Saiyang kahangahangang kakayahan sa paglalang. (Basahon an Salmo 104:1, 2.) An dignidad saka kagayonan kan dai naheheling asin makakamhan sa gabos na Kaglalang risang-risa sa saiyang naheheling na mga gibo.

7, 8. Anong ebidensia kan dignidad asin kagayonan ni Jehova an naheheling niato sa kalangitan?

⁷ Halimbawa, isip-isipa an galaksiang Milky Way. Sa garo mahiwason na kadagatan na ini nin mga bitoon, planeta, asin sistema solar, an planetang Daga minalataw na saditon nanggad siring sa sarong baybay sa mahiwason na baybayon. Tara, an saro sanang galaksiang ini igwa nin labing 100 bilyones na bitoon! Kun makakabilang kamo nin sarong bitoon kada segundo na daing pondo sa laog nin 24 oras kada aldaw, aaboton kamo nin 3,000 na taon tanganing makabilang nin 100 bilyones.

⁸ Kun an galaksiang Milky Way sana igwa na nin 100 bilyones na bitoon, kumusta man an iba pang kabtang kan uniberso? Kinakarkulo nin mga astronomo na an Milky Way puedeng saro sa mga 50 bilyones sagkod 125 bilyones na galaksia. Gurano kadakol an bitoon sa bilog na uniberso? An simbag siertong dai kayang marorop kan satong isip. Pero, “sinusuma [ni Jehova] an kabilangan kan mga bitoon; sinda gabos inaapod nia sa saindang ngaran.” (Sal. 147:4) Mantang nasasabotan nindo na si Jehova nagugubingan nin siring na dignidad asin kagayonan, dai daw kamo napapahiro na irukyaw an saiyang dakulang ngaran?

9, 10. Paano ibinabantog kan probisyon na tinapay an kadakulaan kan kadonongan kan Kaglalang niato?

⁹ Ibalyo niato ngonyan an satong atension hale sa mamuraway na kalangitan pasiring sa sarong bagay na ordinaryo sana arog kan tinapay. Si Jehova bako sanang “an Kaggibo kan langit asin daga” kundi sia man “an Saro na nagtatao nin tinapay sa mga nagugutom.” (Sal. 146:6, 7) An “dignidad asin kagayonan” nin Dios maheheling sa saiyang dakulang mga gibo, kaiba an saiyang probisyon na mga pananom na dian hale an tinapay. (Basahon an Salmo 111:1-5.) Tinokdoan ni Jesus an saiyang mga parasunod na mamibi: “Itao mo samo ngonyan an samong tinapay para sa aldaw na ini.” (Mat. 6:11) Tinapay an pangenot na kakanon nin dakol na suanoy na tawo, kaiba an mga Israelita. Minsan ngani an tinapay ibinibilang na simpleng kakanon, bako nanggad simple an kemikal na prosesong aagihan kaiyan tanganing an nagkapirang pundamental na sangkap magin masiram na tinapay.

¹⁰ Kan isinusurat an Biblia, an mga Israelita naggagamit nin harina hale sa trigo o sebada asin tubig sa paggibo nin tinapay. An lebadura ginagamit kun beses sa paggibo nin tinapay. Mantang  nagsasaralak an simpleng mga sangkap na ini, may nabibilog na kadakol na kombinasyon nin mga elemento na may aktibong koneksion sa lambang saro. Dai lubos na nasasabotan an eksaktong koneksion sa lambang saro kan mga elementong ini. Dugang pa, an paagi nin pagtunaw kan tinapay sa laog kan hawak saro pang makangangalas na komplikadong proseso. Bakong makangangalas na an salmista nag-awit: “Kanigoan kadakol kan saimong mga gibo, O Jehova! Iyan gabos ginibo mo sa kadonongan”! (Sal. 104:24) Napapahiro man daw kamo na omawon si Jehova?

Paano Kamo Naaapektaran kan Dignidad Asin Kagayonan nin Dios?

11, 12. Ano an puedeng magin epekto sa sato kan paghorophorop sa mga gibo nin paglalang nin Dios?

¹¹ Dai kita kaipuhan na magin mga astronomo tanganing magngalas sa kalangitan kun banggi ni na magin mga kemiko tanganing ikaogma an tinapay. Minsan siring, tanganing maapresyar an kagayonan kan satong Kaglalang, kaipuhan kitang magtao nin panahon na horophoropon an saiyang mga gibo. Ano an magigibo sa sato kan siring na paghorophorop? An epekto kaiyan kapareho kan paghorophorop sa ibang mga gibo ni Jehova.

¹² Mapadapit sa dakulang mga gibo ni Jehova para sa Saiyang banwaan, si David nag-awit: “An mamuraway na kagayonan kan saimong dignidad asin an saimong makangangalas na mga gibo sakuyang aatoman.” (Sal. 145:5) Inaatoman niato an mga gibong ini paagi sa pag-adal sa Biblia asin pagtao nin panahon na horophoropon an satong binabasa dian. Ano an epekto sa sato kan paghorophorop na ini? Nadudugangan an satong pag-apresyar sa dignidad asin kagayonan nin Dios. Kun siring, seguradong napapahiro kitang makiayon ki David sa pagtaong onra ki Jehova asin sa pagsabi: “Kun manongod sa saimong kadakulaan, ipapahayag ko iyan.” (Sal. 145:6) An paghorophorop sa makangangalas na mga gibo nin Dios maninigong magpakosog kan satong relasyon ki Jehova asin magmotibar sa sato na sabihon sa iba na may entusiasmo asin determinasyon an manongod sa saiya. Kamo daw maigot na nagpapahayag kan maogmang bareta asin nagtatabang sa mga tawo na apresyaron an dignidad, kagayonan, asin kamahalan ni Jehova Dios?

Sangkap na Ipinapabanaag ni Jesus an Dignidad nin Dios

13. (a) Segun sa Daniel 7:13, 14, ano an itinao ni Jehova sa saiyang Aki? (b) Bilang Hade, paano tinatratar ni Jesus an saiyang mga sakop?

¹³ An Aki nin Dios, si Jesu-Cristo, maigot na nagbalangibog kan maogmang bareta asin nagtaong onra sa saiyang may dignidad asin mamuraway na langitnon na Ama. Tinawan ni Jehova an saiyang bugtong na Aki nin espesyal na dignidad paagi sa pagtao sa saiya kan ‘pamamahala asin kahadean.’ (Basahon an Daniel 7:13, 14.) Pero, si Jesus bakong maabhaw ni daing malasakit. Sa kabaliktaran nanggad​—sia mapagmalasakit na Namamahala na nasasabotan an mga limitasyon kan saiyang mga sakop asin nagtatao sa sainda nin dignidad. Estudyare an sarong halimbawa kun paano trinatar ni Jesus bilang Designadong Hade an mga tawo na nanuparan nia, nangorogna an mga isinikwal asin an mga garo baga masakit kamotan.

14. Paano minamansay an mga daoton sa suanoy na Israel?

 ¹⁴ An mga tawong daoton kan suanoy na mga panahon sa parate nakakaeksperyensia nin makamomondong marhay na luway-luway na pagkagadan. Padikitdikit na naaapektaran an mga parte nin hawak kan biktima kaiyan. An pagpaomay sa daoton ibinilang na imposible siring sa pagbuhay liwat sa tawong gadan. (Bil. 12:12; 2 Ha. 5:7, 14) An mga daoton ipinapahayag na maati asin ikinakaati nanggad saka pinapalayas sa sosyedad. Kun minarani sinda sa mga tawo, dapat nindang ikurahaw an patanid na: “Maati, maati!” (Lev. 13:43-46) An sarong daoton garo man sana gadan. Segun sa rabinikong mga rekord, an sarong daoton tinotogotan na rumani sa siisay man sagkod sana sa distansiang mga 1.7 metros. Sinasabi na kun may maheling na sarong daoton, dawa sa haroharayo, ginagapo ini nin sarong namomoon sa relihion tanganing alawon ini sa harayo.

15. Paano trinatar ni Jesus an sarong daoton?

¹⁵ Minsan siring, mahalagang mangnohon an reaksion ni Jesus sa sarong daoton na nagdolok sa saiya asin nakimaherak na paomayan. (Basahon an Marcos 1:40-42.) Imbes na pahaleon an daoton, trinatar ni Jesus sa mapagmalasakit asin may dignidad na paagi an rinarayoan na tawong iyan. An naheling ni Jesus sarong kaherakherak na tawo na nangangaipo nin pakaginhawa. Mantang napahiro an puso, si Jesus listong naghiro huli sa saiyang pakamate nin pagmalasakit. Inunat nia an saiyang takyag, dinuotan an daoton, asin pinaomayan ini.

16. Anong leksion an nanodan nindo sa paagi nin pagtratar ni Jesus sa iba?

¹⁶ Bilang mga parasunod ni Jesus, paano niato maaarog an paagi nin pagpabanaag ni Jesus kan dignidad kan saiyang Ama? An sarong paagi iyo na midbidon na an gabos na tawo​—ano man an kamugtakan, salud, o edad—​maninigong tawan nin angay na onra asin paggalang. (1 Ped. 2:17) An mga nasa katongdan nin pangangataman, siring baga nin mga agom na lalaki, magurang, asin Kristianong kamagurangan, nangorognang kaipuhan na magtao nin dignidad sa saindang mga pinapangatamanan asin magtabang sa mga ini na dai mawaran nin paggalang sa sadiri. Tanganing idoon na kahagadan ini para sa gabos na Kristiano, an Biblia nagsasabi: “Sa pagkamoot na sa magturugang magkaigwa kamo nin mamomoton na kapadangatan sa lambang saro. Sa pagtao nin onra sa lambang saro mangenot kamo.”​—Roma 12:10.

Pagpaheling nin Dignidad sa Pagsamba

17. Ano an manonodan niato sa Kasuratan manongod sa pagpaheling nin dignidad kun minadolok ki Jehova sa pagsamba?

¹⁷ Ipinapaheling kan Biblia na maninigong tawan nin espesyal na atension an pagpaheling nin dignidad kun kita minadolok ki Jehova sa pagsamba. “Maanan mo an saimong bitis kun ika minaduman sa harong kan tunay na Dios,” an sabi kan Eclesiastes 5:1. Pinagbotan si Moises sagkod si Josue na haleon an saindang mga sandalyas kan sinda nasa banal na lugar. (Ex. 3:5; Jos. 5:15) Dapat nindang gibohon ini bilang kapahayagan nin may pagsambang paggalang. An Israelitang mga saserdote inobligar na magsulot nin mga karsonsilyong lino “tanganing tahoban an saindang kahubaan.” (Ex. 28:42, 43) Huli kaini, malilikayan na maheling an saindang kahubaan kun sinda naglilingkod sa altar. An gabos na miembro kan pamilya nin  saserdote dapat na suportaran an diosnon na pamantayan dapit sa dignidad.

18. Paano niato ipinapaheling an dignidad sa satong pagsamba ki Jehova?

¹⁸ Kun siring, an dignidad sa pagsamba may kalabot na onra asin paggalang. Tanganing magin maninigo sa onra asin paggalang, dapat kitang gumawe na may paggalang. An dignidad na ipinapaheling niato dapat na bakong pagsaginsagin o paheling sana. Iyan maninigong bako sanang an naheheling kan mga mata nin tawo kundi an naheheling nin Dios​—an satong puso. (1 Sam. 16:7; Tal. 21:2) An dignidad maninigong magin kabtang kan satong pagkatawo asin maninigong makaimpluwensia sa satong gawe-gawe, saboot, relasyon sa iba, dawa sa paagi nin pagmansay saka pagheling niato sa satong sadiri. Iyo, an dignidad maninigo na risang-risa sa gabos na panahon asin sa gabos na sinasabi saka ginigibo niato. Kun mapadapit sa satong paggawe, hiro-hiro, asin paggubing saka pagpakarhay sa sadiri, isinasapuso niato an mga tataramon ni apostol Pablo: “Dai kami sa ano man na paagi nagtatao nin ano man na dahelan nin pagkasingkog, tanganing an samong ministeryo dai makuanan nin sala; kundi sa lambang paagi irinerekomendar niamo an samong sadiri bilang mga ministro nin Dios.” (2 Cor. 6:3, 4) ‘Sinasamnohan niato an katokdoan kan satong Paraligtas, an Dios, sa gabos na bagay.’​—Tito 2:10.

Padagos na Magpaheling nin Diosnon na Dignidad

19, 20. (a) Ano an sarong marahay na paagi nin pagtao nin dignidad sa iba? (b) Kun mapadapit sa dignidad, ano an maninigo na determinado niatong gibohon?

¹⁹ Nagpapaheling nin dignidad an linahidan na mga Kristiano, na “mga embahador na kasalida ni Cristo.” (2 Cor. 5:20) An “ibang mga karnero,” na maimbod na nagsusuportar sa sainda, may dignidad na mga representante kan Mesiyanikong Kahadean. An sarong embahador o representante nagtataram na may kapusoan asin dignidad para sa saiyang gobyerno. Kun siring, maninigo kitang magtaram na may dignidad asin kapusoan bilang pagsuportar sa gobyerno nin Dios, an Kahadean. (Efe. 6:19, 20) Asin kun dinadara niato sa iba an “maogmang bareta dapit sa bagay na orog karahay,” bako daw na pinapahelingan niato sinda nin dignidad?​—Isa. 52:7.

²⁰ Maninigo kitang magin determinado na pamurawayon an Dios paagi sa paggawe niato kaoyon kan saiyang dignidad. (1 Ped. 2:12) Pirme kitang magpaheling nin hararom na paggalang sa saiya, sa pagsamba sa saiya, asin sa satong kapwa mga parasamba. Asin logod na si Jehova, na naggugubing mismo nin dignidad asin kagayonan, maogma sa satong may dignidad na paagi nin pagsamba sa saiya.

[Nota sa Ibaba]

Ano an Isisimbag Nindo?

• Ano an maninigong magin epekto sa sato kan pag-apresyar sa kagayonan kan dignidad ni Jehova?

• Ano an manonodan niato manongod sa dignidad sa reaksion ni Jesus sa sarong daoton?

• Paano niato matatawan nin onra si Jehova sa may dignidad na mga paagi?

[Mga Hapot Para sa Pag-adal]

[Ritrato sa pahina 12]

Paano tinawan ni Jehova nin dignidad si Abel?

[Ritrato sa pahina 14]

An dakulang mga gibo ni Jehova risang-risa dawa sa probisyon na tinapay

[Ritrato sa pahina 15]

Ano an nanodan nindo manongod sa dignidad sa paagi nin pagtratar ni Jesus sa sarong daoton?

[Ritrato sa pahina 16]

Kalabot sa may dignidad na pagsamba an pagtao nin onra ki Jehova